Whither Thou Goest [Te vāhi tā ’oe e haere], nā Sandy Freckleton Gagon

6–12 nō Tiunu

Ruta ; 1 Samuela 1–3

« Tē ’oa’oa nei ta’u ’ā’au ia Iehova »

’A tuatāpapa ai ’outou i teie hepetoma i te orara’a o Ruta ’e Naomi ’e Hana ’e tē vai atu ra, ’a fa’aro’o mā’ite i te Vārua ’e ’a pāpa’i i te mau mana’o ato’a e tae mai. E aha tei fa’auruhia ia ’oe ’ia rave ?

Pāpa’i i te mau mana’o e tae mai

I te tahi taime tē mana’o nei tātou ē, tītauhia te ’ē’a pāpū nō tō tātou orara’a, mai te ha’amatara’a e hope noa atu. ’Ua ’ite ho’i tātou ē, te ’ē’a poto roa a’e mai te hō’ē vāhi i te tahi atu, ’o te rēni ’āfaro ïa. Teie noa rā, pinepine te mau fa’atāerera’a ’e te mau tī’oira’a i te fa’a’ī i tō tātou orara’a ma te fa’ahaere ia tātou i ni’a i te mau ’avei’a tīa’i-’ore-hia. E hi’o paha tātou i tō tātou orara’a, e mea ta’a ’ē roa i te mea tā tātou i mana’o na.

’Ua ta’a maita’i paha Ruta ’e Hana i te reira. E ’ere ’o Ruta i te ’āti ’Īserā’ela, ’ua fa’aipoipo rā i te hō’ē, ’e i te pohera’a tāna tāne, tītauhia iāna ’ia mā’iti. E ho’i ānei i tōna ’utuāfare ’e i tōna orara’a tahito mātauhia, ’aore rā e fāri’i ānei i te fa’aro’o a tō ’Īserā’ela ’e i teie ’utuāfare ’āpī ’e tōna metua ho’ovai vahine ? (Ruta 1:4–18). Te ’ōpuara’a a Hana nō tōna orara’a, ’o te fānaura’a ïa i te tamari’i, nō te ’orera’a rā i noa’a iāna « ’ua ’ino’ino roa tōna ’ā’au » (hi’o 1 Samuela 1:1–10). ’A tai’o ai ’outou nō ni’a ia Ruta ’e ia Hana, ’a feruri i te fa’aro’o tei tītauhia nō te tu’u i tō rāua orara’a i roto i te rima o te Fatu ’e nō te rātere i ni’a i te mau ’ē’a tīa’i-’ore-hia. I muri iho e nehenehe ’outou e feruri i tō ’outou iho tere. E ’ite ’outou i te ta’a-’ē-ra’a i roto ia ’outou ’e ’ia Ruta ’e ia Hana—’e te tahi atu mau ta’ata. I roto rā i te mau tāmatara’a ’e te mau hitima’uera’a mai teie taime ē tae noa atu i tō ’outou tāpaera’a mure ’ore, e nehenehe ’outou e ha’api’i i te parau mai ia Hana te huru : « Tē ’oa’oa nei ta’u ’ā’au ia Iehova » (1 Samuela 2:1).

Nō te hō’ē hi’ora’a rere ā manu nō te buka a Ruta ’e 1 Samuela, hi’o « Ruth » ’e « Samuel, books of » i roto i te Bible Dictionary (Fa’atoro parau nō te Bibilia).

Mau mana’o nō te tuatāpapara’a pāpa’ira’a mo’a a te ta’ata hō’ē

Ruta

E ti’a i te Mesia ’ia fa’ariro i te ’ohipa ’oto rahi ’ei upo’oti’ara’a

I te pohera’a te tāne a Ruta, ’ua riro ïa ’ei ’ohipa ’oto rahi atu ā i ni’a iāna, i tā te vahine ’ivi e fa’aruru i teie mahana. I roto i te ta’ere a te ’āti ’Īserā’ela i terā tau, te vahine ’aita tāna e tāne ’e ’aita e tamaiti, ’aita tōna ti’ara’a mana nō te fatu i te hō’ē vāhi ’e ’aita iho ā ïa tāna e rāve’a nō te ora ’ōna ana’e. ’A tai’o ai ’oe i te ’ā’amu o Ruta, ’a hi’o nāhea te Fatu i te fa’arirora’a i te ’ohipa ’oto rahi ’ei ha’amaita’ira’a rahi. E aha tā ’oe e ’ite ra nō ni’a ia Ruta, tei tauturu paha iāna ? E aha te ’ohipa a Boaza i roto i te fa’aorara’a ia Ruta mai tōna vaira’a rāve’a ’ore (hi’o Ruta 4:4–7). E aha te huru mai tō te Mesia tā ’oe e ’ite ra i roto ia Ruta ’e ia Boaza ?

Ruta ; 1 Samuela 1

E nehenehe tā’u e ti’aturi ē e arata’i mai te Atua ’e e tauturu mai ’oia iā’u noa atu ā tō’u vaira’a.

E ti’a ānei ia ’oe ’ia fa’aau i te mau ’ā’amu nō Ruta, nō Naomi ’e nō Hana, ia ’oe ? Penei a’e ’ua mamae ’oe i te hō’ē pau rahi, mai tei tupu nō Ruta ’e nō Naomi (hi’o Ruta 1:1–5). ’Aore rā mai ia Hana te huru, ’ua tīa’i maoro ’oe i te mau ha’amaita’ira’a ’aita ā i fāri’ihia (hi’o 1 Samuela 1:1–10). ’A feruri i te mau poro’i tā ’oe e nehenehe e ha’api’i mai i roto i te hi’ora’a nō teie mau vahine ha’apa’o maita’i. Mea nāhea tō Ruta ’e tō Hana fa’a’itera’a i tō rāua fa’aro’o i te Atua ? E aha te mau ha’amaita’ira’a tā rāua i fāri’i ? Nāhea ’oe i te pe’e i tō rāua hi’ora’a ? ’A feruri nāhea ’oe i te « fa’aruru i raro a’e » i te Fatu (Ruta 2:12) noa atu ā e mea huru fifi te orara’a.

Hi’o ato’a Reyna I. Aburto, « I roto i te ata ’e te mahana, e pārahi te Fatu i pīha’i iho iā’u ! » Liahona, Novema 2019, 57–60.

For This Child I Prayed [I pure ho’i au i teie nei tamaiti] nā Elspeth Young

1 Samuela 2:1–10

E ti’a i tō’u ’ā’au ’ia ’oa’oa i te Fatu.

I muri iho i tō Hana ravera’a i te tamaiti ra ia Samuela i roto i te hiero, ’ua fa’ahiti ’oia i te parau ’ārue i te Fatu, tei pāpa’ihia i roto i te 1 Samuela 2:1–10. E mau parau ha’aputapū ’ā’au atu ā ’ia ’ite ’oe ē, nā mua noa a’e, « ’ua ’ino’ino roa tōna ’ā’au… ’oto roa atu » (1 Samuela 1:10). ’A tuatāpapa ai ’oe i teie mau ’īrava, e aha te mau poro’i tā ’oe e ’ite ra ’o tē fa’arahi i te mana’o ’ārue ’e te māuruuru i te Fatu ? Penei a’e e fa’auru te hīmene a Hana ia ’oe nō te ’ite mai i te hō’ē rāve’a ’āpī nō te fa’a’ite i tō ’oe ’ā’au māuruuru i te Fatu—hō’ē hīmene, hō’ē pēni, hō’ē ’ohipa tāvinira’a, ’aore rā te hō’ē mea e fa’a’ite i tō ’oe mau mana’o iāna.

Parau mau, ’aita te mau pure tu’utu’u ’ore ato’a e pāhonohia mai tei pāhonohia i tā Hana. E aha tā ’oe e ’ite nei i roto i te a’ora’a a te peresideni Dieter F. Uchtdorf, « ’Ia māuruuru i roto i te mau huru ato’a o te orara’a » ’o tē nehenehe e tauturu ia ’oe i te taime ’aita tā ’oe mau pure i pāhonohia mai tā ’oe e tīa’i ra ?(Liahona, Mê 2014, 70–77).

1 Samuela 3

E ti’a iā’u ’ia fa’aro’o ’e ’ia ha’apa’o i te reo o te Fatu.

Mai ia tātou pā’āto’a, tītauhia ia Samuela ’ia ha’api’i nāhea i te ’ite i te reo o te Fatu. ’A tuatāpapa ai ’oe i te 1 Samuela 3, e aha tā ’oe e ha’api’i nei mai roto mai i teie tamāroa, nō ni’a i te fa’aro’ora’a ’e te ha’apa’ora’a i te reo o te Fatu ? E aha te mau ’ohipa i tupu nō ’oe, ’e ’ua fa’aro’o ’oe i tōna reo ? E aha te mau rāve’a tā ’oe e fāna’o nei, mai ia Eli, nō te tauturu i te ta’ata ’ia ’ite i te taime tē paraparau mai ra te Fatu ia rātou ? (hi’o 1 Samuela 3:7).

Hi’o ato’a Ioane 14:14–21 ; David P. Homer, « Fa’aro’o i tōna reo », Liahona, Mē 2019, 41–43.

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Ruta 1:16–18 ; 2:5–8, 11–12.E nehenehe tō ’outou ’utuāfare e hi’o i te mau hi’ora’a nō te hāmani maita’i ’e nō te mana’o fa’atura i roto i teie mau ’īrava. Nāhea tātou i te fa’a’ite i te hāmani maita’i i tō tātou ’utuāfare ’e ia vetahi ’ē, ’e i te mana’o fa’atura ato’a ia Iesu Mesia ? E nehenehe te pene « Ruta ’e ’o Naomi » (i roto i Te mau ’a’amu nō te Faufa’a Tahito) e tauturu i tō ’outou ’utuāfare ’ia ha’api’i mai nā roto i te hi’ora’a o Ruta.

1 Samuela 1:15.Penei a’e e nehenehe ’outou e mani’i i te hō’ē mea mai roto i te hō’ē fāri’i nō te tauturu i te mau melo o te ’utuāfare ’ia hi’o i te aura’a o te parau a Hana ē : « ’Ua fa’a’ite hua… vau i ta’u hina’aro i mua i te aro o Iehova ». Nō te aha e rāve’a maita’i teie nō te fa’ata’a e aha te huru nō tā tātou mau pure ? Nāhea tātou e nehenehe ai e ha’amaita’i i tā tātou iho mau pure ’e te pure o te ’utuāfare ?

1 Samuela 2:1–10.E nehenehe te pehepehe a Hana, nō te ’ārue i te Fatu, e fa’aha’amana’o ia ’outou i te mau hīmene tā ’outou e fa’a’ohipa nō te ’ārue i te Fatu. E nehenehe ’outou e hīmene ’āmui i te tahi. E nehenehe ato’a te mau melo o te ’utuāfare e feruri i te tahi atu mau rāve’a nō te fa’a’ite i tō rātou mau mana’o nō Iesu Mesia. ’Ei hi’ora’a, e nehenehe rātou e pāpa’i i te hōho’a e fa’a’ite ra nō te aha rātou e here nei i te Fa’aora.

1 Samuela 3:1–11.E au paha ’outou i te ha’uti ta’ata ora i te ’ā’amu nō te pi’ira’a te Fatu ia Samuela, ’aore rā e nehenehe e māta’ita’i i te video ra « Samuela ’e Eli » (ChurchofJesusChrist.org). E nehenehe te mau melo o te ’utuāfare e paraparau nō ni’a i te mau taime ’ua tae mai te mana’o ē tē paraparau ra te Fatu ia rātou, ’e nāhea rātou i te ha’apa’ora’a i tāna mau parau.

Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetomai roto Mai, pe’e mai—nō te Paraimere

Hīmene tei mana’ohia : « Tei Roto i tō’u nei ’ā’au », Te mau hīmene, N°135.

Ha’amaita’i i tā ’outou iho tuatāpapara’a pāpa’ira’a mo’a

E vaiiho i te Vārua ’ia arata’i i tā ’outou tuatāpapara’a. ’A pure ’ia arata’i te Vārua Maita’i ia ’outou nō te mau mea tei tītauhia ’ia ha’api’i. ’A vai ara i tōna mau muhumuhu, noa atu ā e riro ’outou i te tai’o nō ni’a i te hō’ē tumu parau ’aita i mana’ohia e tai’o ’aore rā, e riro ’outou i te tuatāpapa nā roto i te tahi atu rāve’a ’ē.

Fa’ahōho’ara’a nō Samuela tē fa’aro’o ra i te Fatu, nā Sam Lawlor