I te vāhi tā ’oe e haere nā Sandy Freckleton Gagon

6–12 nō Tiunu

Ruta ; 1 Samuela 1–3

« Tē ’oa’oa nei tā’u ’ā’au ia Iehova »

’A tai’o ai ’outou i te Ruta ’e te 1 Samuela 1–3, ’a ani i te Metua i te Ao ra e nāhea e nehenehe ai ia ’outou ’ia tauturu i te mau tamari’i ’ia ha’api’i mai nā roto mai i te mau parau mau i roto i teie mau pene. Tāpa’o i te mau mana’o tā ’outou e fāri’i.

Pāpa’i i te mau mana’o e tae mai

Tītau i te mana’o

’A ani i te mau tamari’i ’ia fa’a’ite mai i te mea tā rātou i ’ite nō ni’a ia Ruta, ia Naomi, ia Hana ’e ia Samuela. E mea tano ’ia fa’a’ite ia rātou i te mau hōho’a, mai terā i roto i te arata’ira’a nō teie hepetoma i roto i te Mai, pe’e mai—nō te mau ta’ata hō’ē ’e te mau ’utuāfare.

Ha’api’i i te ha’api’ira’a tumu : Te mau tamari’i ’āpī a’e

Ruta

E nehenehe au e fa’a’ite i te here ’e te hāmani maita’i i te feiā ’āti a’e iā’u.

I te pohera’a te tāne a Ruta, e nehenehe tāna e pārahi noa i roto i tōna fenua ’āi’a, terā rā, ’ua fa’aoti ’oia e haere nā muri iho i tōna metua vahine ivi ho’ovai ’o Naomi, ’e ’ia ha’apa’o iāna. ’A feruri e nāhea te hi’ora’a Mesia ’o Ruta e nehenehe e fa’auru i te mau tamari’i tā ’outou e ha’api’i ra ’ia hāmani maita’i i te ta’ata ’āti a’e ia rātou.

Mau ’ohipari’i e nehenehe e rave

• E ani i te mau tamari’i ’ia fa’ahōho’a ia Naomi, ia Ruta, ia Boaza, ’aore rā, i te tahi atu mau huru ta’ata, a fa’ati’a ai ’outou i tō rātou ’ā’amu i roto i te buka a Ruta (hi’o ato’a « Ruta ’e ’o Naomi » i roto i Te mau ’ā’amu o te Faufa’a Tahito). ’A ani i te mau tamari’i ’ia ’āfa’i mai i tō rātou rima i ni’a i te mau taime ato’a e fa’aro’o rātou i te hō’ē ’ohipa hāmani maita’i i roto i te ’ā’amu. E aha tō tātou huru ’ia maita’i ana’e te ta’ata i ni’a ia tātou ? E aha tō tātou huru ’ia maita’i ana’e tātou i ni’a ia vetahi ’ē ?

• E hīmene ’āmui i te hō’ē hīmene nō ni’a i te hāmani-maita’i-ra’a, mai te « Soyons gentils » (Chants pour les enfants, 83). ’A tauturu i te mau tamari’i ’ia feruri i te mau rāve’a e nehenehe ai ia rātou ’ia hāmani maita’i i tō rātou ’utuāfare ’e te mau hoa. Mai te mea e hina’aro rātou i te tauturu, ’a fa’a’ite ia rātou i te mau hōho’a ’o te mau ta’ata e fa’a’ite ra i te hāmani maita’i. Nō te mau mana’o ato’a i fa’ahitihia, ’a vaiiho i te mau tamari’i ’ia pāpa’i hōho’a i te hō’ē māfatu i ni’a i te tāpura ’ere’ere.

1 Samuela 1:1–18

Tē fa’aro’o nei ’e tē pāhono nei te Metua i te Ao ra i tā’u mau pure.

I te taime a ’oto ai ’o Hana i te mea ē, e’ita e noa’a tāna tamari’i, ’ua fāriu atu ’oia i te Fatu ra ma te fa’aro’o ’e ’ua pāhono mai te Fatu i tāna pure. ’A tauturu i te mau tamari’i ’ia ’ite ē, e nehenehe tā rātou e pure i te Metua i te Ao ra i te mau taime ato’a, i te taime hoa rā tē ’oto ra rātou.

Mau ’ohipa e nehenehe e rave

• I roto i tā ’outou iho mau ta’o, a parau i te mau tamari’i nō te aha ’o Hana i ’oto ai (hi’o 1 Samuela 1:2–8 ; hi’o ato’a « Hana » i roto i Te mau ’ā’amu o te Faufa’a Tahito). E aha tā tātou e nehenehe e rave ’ia ’oto ana’e tātou ? E tai’o i te mau tamari’i i te 1 samuela 1:10, ’e ’a ani i te mau tamari’i ’ia fa’aro’o mai i te mea tā Hana i rave. ’A ui i te mau tamari’i e aha tō rātou huru ’ia pure ana’e rātou. ’A tai’o i te ’īrava 18 nō te fa’ata’a ē, i muri a’e i tāna pure, « ’aita ’o Hana i ’oto fa’ahou ».

  

  Nō teie tamari’i au i pure ai, nā Elspeth Young

• ’A fa’a’ohipa i te ’api ’ohipara’a nō teie hepetoma nō te ha’api’i i te mau tamari’i e nehenehe rātou e pure i te Metua i te Ao ra, ’e e tauturu mai ’Oia ia rātou. ’A fa’a’ū ai te mau tamari’i, ’a hīmene ’aore rā, ’a fa’ata’i i te hō’ē pehe ’o tē hīmene ’o tē ha’api’i ra nō ni’a i te pure, mai « La prière d’un enfant » (Chants pour les enfants, 6–7).

1 Samuela 2:1–10

’Ua rave te Fatu i te mau ’ohipa fa’ahiahia e rave rahi nō’u nei.

’Ua fa’a’ite ’o Hana i tōna ’ā’au māuruuru i te Fatu nā roto i te hō’ē pehepehe ’āruera’a. E nehenehe tōna hi’ora’a e tauturu i te mau tamari’i ’ia feruri i te mau mea e rave rahi e ti’a ia rātou ’ia ha’amāuruuru i te Metua i te Ao ra.

Mau ’ohipari’i e nehenehe e rave

• ’A tai’o i te mau tamari’i i te tahi ’o te mau mea tā Hana i parau i muri a’e i te ha’amaita’ira’a te Fatu iāna i te hō’ē tamaiti (hi’o 1 Samuela 2:1–2). ’A fa’a’ite i te mau tamari’i i te hō’ē ha’amaita’ira’a tā ’outou i fāri’i nō ’ō mai i te Fatu ra, ’e e aha tei tupu i roto ia ’outou. I muri iho ’a ani i te mau tamari’i ’ia paraparau mai nō ni’a i te mau ha’amaita’ira’a tā te Fatu i hōro’a mai ia rātou. Nāhea tātou i te fa’a’ite i tō tātou ’ā’au māuruuru iāna ?

• ’A hīmene ’āmui i te hō’ē hīmene ’o tē fa’ata’a i te tahi mau ha’amaita’ira’a tā te Fatu e hōro’a mai ia tātou, mai te « Mon Père Céleste m’aime » (Chants pour les enfants,16–17). E ani i te mau tamari’i ’ia pāpa’i hōho’a i te mau ha’amaita’ira’a tā rātou i fāri’i nō ’ō mai i te Fatu ra.

Ha’api’i i te ha’api’ira’a tumu : Te mau tamari’i pa’ari

Ruta

E nehenehe e roa’a iā’u te fa’aro’o i te Fatu.

’Ua rave ’o Ruta i te mau tusia nō te ha’apa’o maita’i i te Fatu ’e ’ia ha’apa’o māite noa i mua ia Naomi. Nāhea e ti’a ai ia ’outou ’ia tauturu i te mau tamari’i ’ia ha’api’i mai nā roto mai i te mau ’ohipa fa’aro’o a Ruta ?

Mau ’ohipari’i e nehenehe e rave

• ’A fa’a’ite i te hō’ē hōho’a nō Ruta ’e ’o Naomi (hiʼo te arata’ira’a o teie hepetoma i roto i te Mai, pe’e mai—nō te ta’ata hō’ē ’e te ’utuāfare). I muri iho ’a pāpa’i e toru upo’o parau i ni’a i te tāpura ’ere’ere: Te mau tāmatara’a, te mau ’ohipa, te mau ha’amaita’ira’a. ’A ani i te mau tamari’i ’ia tai’o i te Ruta 1:3–5, 8, 16 ; 2:1–3, 8–12 ; 4:13–17, ’e ’a pāpa’i i raro a’e i te mau upo’o parau i te mau mea tei ’itehia ia rātou i roto i teie mau ’īrava. Nāhea tō Ruta fa’a’itera’a i tōna fa’aro’o i te Fatu ? ’A fa’a’ite i te hō’ē hi’ora’a nō te huru ’o tō ’outou ha’amaita’i-ra’a-hia nō tō ’outou fa’aro’o ia Iesu Mesia, ’e a vaiiho i te mau tamari’i ’ia fa’a’ite mai i tō rātou iho mau ’itera’a.

• ’A hīmene ’āmui i te hō’ē hīmene nō ni’a i te fa’aro’o, mai te « ’O te Fatu tō’u māramarama » (Te mau Hīmene, no. 43) ’aore rā, « La foi » (Chants pour les enfants, 50–51). E aha tā te hīmene e ha’api’i mai nei ia tātou nō ni’a i te ti’aturira’a i te Fatu ? Nāhea e noa’a ai tō tātou fa’aro’o ia Iesu Mesia noa atu i roto i te mau taime fifi ?

1 Samuela 1

Tē fa’aro’o nei ’e tē pāhono nei te Metua i te Ao ra i tā’u mau pure.

I te taime « ’ua ’ino’ino roa tōna ’ā’au » ’ua fāriu atu ’o Hana i te Metua i te ao ra i roto i te pure (1 samuela 1:10). Nāhea e ti’a ai ia ’outou ’ia fa’aitoito i te mau tamari’i tā ’outou e ha’api’i ra ’ia nā reira ato’a ?

Mau ’ohipa e nehenehe e rave

• Nō te tauturu i te mau tamari’i ’ia ha’api’i mai nō ni’a ia Hana i roto i te 1 Samuela 1, ’a hōro’a i te tamari’i tāta’itahi i te tahi mau ’īrava nō te tai’o i roto i te pene (’aore rā, ’a fa’a’ite i te video « Hannah’s Faith [Te fa’aro’o o Hana] » ChurchofJesusChrist.org). I muri iho, ’a tāora i te hō’ē pōpō ’aore rā, i te hō’ē tao’a na’ina’i i te hō’ē tamari’i ra, ’e ’a ani iāna ’ia fa’ati’a mai i te hō’ē tuha’a o te ’ā’amu hou a tāora ai i te pōpō i te tamari’i i muri iho nō te fa’ati’a mai i te tahi atu tuha’a ’o te ’ā’amu. ’Ia hope ana’e te ’ā’amu, ’a ani i te mau tamari’i ’ia fa’a’ite mai i te hō’ē mea tā rātou i ha’api’i mai i roto i te hi’ora’a ’o Hana.

• ’A tai’o ’āmui i te 1 samuela 1:15, ’e ’a paraparau e aha te aura’a ’ia nīni’i i tō rātou vārua i mua i te Fatu. ’A hāmani ’e te mau tamari’i, i te hō’ē tāpura ’o te mau mea tā tātou e nehenehe e parau i te Atua ’ia pure ana’e tātou. E hīmene ’āmui i te hō’ē hīmene nō ni’a i te pure, mai te « La prière d’un enfant» (Chants pour les enfants, 6–7). ’A fa’a’ite pāpū i te here o te Atua i tāna mau tamari’i ’e i tōna hina’aro ’ia fa’aro’o ’e ’ia pāhono i tā rātou mau pure.

• ’A ani i te mau tamari’i ’ia tāpura (te ta’ata hō’ē ’aore rā, ’ei pupu) i te mau hi’ora’a ’o te mau ta’ata i roto i te mau pāpa’ira’a mo’a tei pure i te Metua i te Ao ra. (Mai te mea e hina’aro rātou i te tauturu, e nehenehe ’outou e fa’atoro ia rātou i ni’a i te Luka 22:41–43 ; Enosa 1:2–6 ; Iosepha Semita—’Ā’amu 1:14–17). E ani ia rātou ’ia fa’a’ite mai i te mea tā rātou i ha’api’i mai nā roto mai i teie mau ’ā’amu.

1 Samuela 3:1–10

E nehenehe au e fa’aro’o ’e e ha’apa’o i te reo o te Fatu.

I te taime e tamaiti iti noa ā ’o Samuela, ’ua fa’aro’o ’oia i te reo ’o te Fatu, ’aita rā ’oia i ta’a i te reira i te taime mātāmua. Nāhea e ti’a ai ia ’outou ’ia tauturu i te mau tamari’i tā ’outou e ha’api’i ra, ’ia fa’aro’o ’e ’ia ha’a i ni’a i te mau muhumuhu tā rātou e fāri’i ?

Mau ’ohipa e nehenehe e rave

• E ani i te hō’ē tamari’i ’ia fa’ahōho’a ia Samuela ’e i te tahi atu ’ia fa’ahōho’a ia Elia ’a tai’o ai ’outou i te 1 Samuela 3:1–10 (’aore rā ’a fa’a’ite i te video « Samuela ’e Elia », ChurchofJesusChrist.org). E aha tā tātou e nehenehe e ha’api’i mai nā roto mai ia Samuela nō ni’a i te fa’aro’ora’a i te reo ’o te Fatu ? Nāhea tātou i te fa’a’ite ē, e hina’aro tātou e fa’aro’o ’ia paraparau ana’e mai te Fatu ia tātou ?

• E ani i te mau tamari’i ’ia feruri nāhea rātou i te fa’ata’a i te hō’ē ta’ata e nāhea te Fatu ’ia paraparau mai ia rātou. ’A ani ia rātou ’ia ’imi i te mau pāhonora’a i roto i te hō’ē ’aore rā, hau atu ’o te mau ’īrava i muri nei : Te Parau Ha’api’ira’a ’e te mau Parau Fafau 6:22–23 ; 8:2–3 ; 9:7–9.

Fa’aitoito i te ’apora’a mai i te fare

E fa’aitoito i te mau tamari’i ’ia feruri i te hō’ē ta’ata ’aore rā, i te hō’ē mea e nehenehe rātou e pure nō te reira i teie hepetoma. ’A hōro’a ia rātou i te mau rāve’a i te mau taime i muri nei ’ia fa’a’ite mai e mea nāhea tō te Metua i te Ao ra pāhonora’a i tā rātou mau pure.

Ha’amaita’ira’a i tā tātou ha’api’ira’a

Te mau tamari’i huma ’A haere i ni’a i te disability. ChurchofJesusChrist.org nō te ’ite e nāhea e ti’a ai ia ’outou ’ia pāhono maita’i a’e i te mau hina’aro ’o te mau tamari’i huma.