Fa’ahōho’ara’a nō tō Iehova fāra’a ia Mose ’e i e 70 peresibutero nō ’Īserā’ela, nā Jerry Harston

25 nō ’Ēperēra–1 nō Mē

Exodo 24; 31–34

« E nā pīha’i ato’a iho vau ia ’oe »

’A fa’aineine ai Mose nō te arata’i i te mau tamari’i o ’Īserā’ela i te fenua i parauhia ra, ’ua parau mai ra te Fatu, « e nā pīha’i ato’a iho vau ia ’oe » (Exodo 33:14). ’A fa’aineine ai ’outou i te ha’api’i i te mau tamari’i i roto i tā ’outou piha, ’a feruri e nāhea ’outou e nehenehe ai e ani manihini i te Fatu « ’ia haere nā pīha’i iho ia [’outou] ».

Pāpa’i i te mau mana’o e tae mai

Tītau i te mana’o

’A ani i te tamari’i tāta’itahi ’ia mā’iti mai rātou hō’ē ’api parau tānūmerahia mai tā rātou e hina’aro. ’A fa’a’ohipa i teie mau nūmera nō te fa’ata’a i te ’āna’ira’a i reira te mau tamari’i e nehenehe ai e fa’a’ite mai i te hō’ē mea tā rātou i ha’api’i mai nā roto mai i te mau pāpa’ira’a mo’a, i te fare ānei ’aore rā i te Paraimere.

Ha’api’i i te ha’api’ira’a tumu : Te mau tamari’i ’āpī a’e

Exodo 31:13, 17

Te fa’aturara’a i te mahana sābati o te hō’ē ïa tāpa’o nō tō’u here i te Fatu.

’Ua parau te Fatu ia Mose ē, i te taime e ha’amo’a te tamari’i o ’Īsera’ela i te mahana sābati, tē fa’a’ite ra rātou iāna ē, ’ua hina’aro rātou ’ia riro ’ei mau ta’ata nōna.

Mau ’ohipari’i e nehenehe e rave

• ’A pāpa’i hōho’a i te hō’ē māfatu i ni’a i te tāpura ’ere’ere, ’e e ani i te mau tamari’i e aha te aura’a teie tāpa’o. ’A tauturu ia rātou ’ia feruri i te tahi atu mau mea ’o tē nehenehe e riro ’ei tāpa’o nō te here, mai te hō’ē tauahi ’aore rā, hō’ē ’ohipa tāvinira’a. ’A tai’o ia rātou i te Exodo 31:13. E tauturu ia rātou ’ia māramarama ē, ’ia ha’amo’a ana’e tātou i te mahana sābati, e tāpa’o te reira i te Fatu ē, tē here nei tātou iāna.

• E parau i te mau tamari’i i te tahi mau rāve’a tā ’outou e tāmata nei e fa’a’ite i tō ’outou here i te Fatu i te sābati. ’A vaiiho ia rātou ’ia fa’a’ite mai e mea nāhea tā rātou ’e tō rātou ’utuāfare i te rave i te reira. ’A ani ia rātou ’ia fa’a’ohipa i te ’api ’ohipara’a nō teie hepetoma nō te fa’a’ite i te mau mana’o hau atu.

  

  Nā roto i te fa’aturara’a i te mahana sābati, tē fa’a’ite ra tātou i tō tātou here i te Fatu.

Exodo 32:1–8, 19–24

E nehenehe au e tu’u i te Fatu nā mua roa i roto i tō’u orara’a.

’A vai ai Mose i ni’a i te mou’a nō Sinai nō te paraparau i te Fatu, ’ua mā’iti te mau tamari’i o ’Īserā’ela ’ia ha’amori i te idolo ’auro ’eiaha ra iāna. E nehenehe teie ’ā’amu e fa’aha’amana’o i te mau tamari’i tā ’outou e ha’api’i ra ē, ’eiaha tātou e vaiiho i te tahi atu mau mea ’ia riro ’ei mea faufa’a a’e nō tātou hau atu i te Fatu.

Mau ’ohipari’i e nehenehe e rave

• ’A hi’o poto noa i nā ture hō’ē ’ahuru ’e te mau tamari’i, ma te ha’apāpū i nā ture mātāmua e piti (hi’o Exodo 20:3–6). ’A fa’a’ohipa i « Te ture hō’ē ’ahuru » (i roto i Te mau ’ā’amu o te Faufa’a Tahito) nō te fa’a’ite ia rātou i te ’ā’amu i roto i te Exodo 32:1–8, 19–24. Mai te mea e nehenehe, e vaiiho i te mau tamari’i ’ia tauturu mai ia ’outou ’ia fa’ati’a i te ’ā’amu. E tauturu i te mau tamari’i ’ia hi’o mai e aha te hape tā te ’āti ’Īserā’ela i rave i roto i teie ’ā’amu (e hina’aro paha ’outou e fa’aha’amana’o i te mau tamari’i i nā ture mātāmua e piti o te ture hō’ē ’ahuru). E aha te mea i tītauhia i te ’āti ’Īserā’ela ’ia rave ?

• ’A fa’a’ite i te hō’ē hōho’a nō Iesu Mesia, ’e tae noa atu i te mau hōho’a nō te tahi atu mau mea tā te mau tamari’i e nehenehe e rave i te tahi taime, mai te mau tauha’a ha’uti, te mau ha’utira’a, ’e tē vai atu ra. ’A ani i te mau tamari’i ’ia ’imi mai i te hōho’a ’o tē fa’a’ite mai ē, e aha te mea faufa’a a’e nō tātou. ’A fa’a’ite i te mau tamari’i e mea nāhea tō ’outou ha’amaita’ira’ahia nō te tu’ura’a i te Fatu nā mua roa i roto i tō ’outou orara’a—e tae noa atu nā mua i te tahi atu mau mea maita’i.

Exodo 33:11

’Ua paraparau te Fatu ia Mose mata e mata.

I muri a’e i tō Mose ha’amoura’a i te kafa ’auro « ’ua paraparau noa mai lehova ia Mose, mai te hō’ē ta’ata e paraparau i tōna ra tau’a ». E nehenehe te ’itera’a i te reira e patu i te fa’aro’o o te mau tamari’i ē, e ta’ata mau te Fatu tei here ia rātou.

Mau ’ohipari’i e nehenehe e rave

• ’A parau i te mau tamari’i e aha tā ’outou e fāri’i ’ia paraparau ana’e ’outou i te hō’ē hoa maita’i, ’e ’a ani ia rātou e aha tā rātou e fāri’i. ’A tai’o ia rātou i te pereota mātāmua ’o te Exodo 33:11. ’A ani i te mau tamari’i, i tō rātou mana’o, e aha tā te peropheta Mose i fāri’i. ’A parau i te mau tamari’i nō ni’a i te mau taime ’a ha’afātata roa ai ’outou i te Fatu, noa atu ē, ’aita ’outou i ’ite mata roa iāna.

• ’A hīmene ’āmui i te hō’ē hīmene ’o tē fa’a’ite ra i te mana’o ’o te Metua i te ao ra ’aore rā ’o Iesu, nō ni’a ia tātou, mai te « Jésus est notre ami » (Chants pour les enfants, 37). ’A fa’a’ite i te mau hōho’a ’o te Fa’aora i te fa’a’itera’a i te here ia vetahi ’ē (hi’o i Te buka hōho’a ’o te ’evanelia, no. 36, 41–43, 46–47). ’A fa’aitoito i te mau tamari’i ’ia fa’a’ite mai e aha tō rātou mana’o nō ni’a i te Metua i te ao ra ’e ia Iesu.

Ha’api’i i te ha’api’ira’a tumu : Te mau tamari’i pa’ari a’e

Exodo 31:12–17

Te fa’aturara’a i te mahana sābati o te hō’ē ïa tāpa’o nō tō’u here i te Fatu.

E nehenehe te ha’amo’ara’a i te mahana sābati e riro ’ei mea ’ōhie a’e—’e ’ei mea ’oa’oa a’e—nō te mau tamari’i ’ia ’ite ana’e rātou ē, e tāpa’o te reira nō tā rātou fafaura’a i mua i te Fatu.

Mau ’ohipari’i e nehenehe e rave

• ’A ani i te mau tamari’i i te tahi mau uira’a nō te tauturu ia rātou ’ia māramarama e aha te hō’ē tāpa’o—’ei hi’ora’a, « e aha te mau tāpa’o e fa’a’ite mai ia ’outou ē, tē fātata mai ra te pu’e tau fa’atupura’a rā’au ’aore rā, tē putahia ra ’outou i te to’eto’e ? » E ani ia rātou ’ia tai’o i te Exodo 31:13, 16–17 e ’ia ’imi mai i te ta’o « tāpa’o ». E aha tā te Fatu i parau ē, ’o te hō’ē ïa tāpa’o i rotopū ia tātou ’e ’ōna ? Nō te aha e mea faufa’a roa teie tāpa’o ?

• E ani i te mau tamari’i ’ia fa’ata’a mai, te tahi i muri mai i te tahi, nō te aha rātou i mā’iti ai ’ia fa’atura i te mahana sābati. E nehenehe te mau video « The Sabbath Is for You [Nō ’outou te Sābati] »’aore rā « Upon My Holy Day [I tō’u mahana mo’a ra]—Honoring the Sabbath [Te fa’aturara’a i te Sābati] » (ChurchofJesusChrist.org), e tauturu.

• E ani i te mau tamari’i ’ia pāpa’i i te mau mea ato’a tā rātou e nehenehe e feruri ē, e nehenehe tā rātou e rave i te mahana sābati nō te fa’a’ite i te Fatu ē, ’ua here rātou iāna. ’A fa’aitoito ia rātou ’ia fa’a’ite mai i te tahi mau mea i roto i tā rātou tāpura. E ani ia rātou ’ia ’āfa’i i tā rātou mau tāpura i te fare, ’ia fa’a’ite atu i te reira i tō rātou ’utuāfare, ’e ’ia hi’o i te reira i te mau taime ato’a e hina’aro rātou i te mau mana’o nō ni’a i te mea e rave i te mahana sābati.

Exodo 32:1–8, 19–24

E nehenehe au e tu’u i te Fatu nā mua roa i roto i tō’u orara’a.

Hō’ē parau poro’i nō roto mai i te ’ā’amu i roto i te Exodo 32 e mea faufa’a roa nō te ha’apa’ora’a i nā ture mātāmua e piti ’o nā ture hō’ē ’ahuru—’eiaha e ha’amori i te ta’ata ’aore rā i te hō’ē mea ’ē atu i te Fatu.

Mau ’ohipari’i e nehenehe e rave

• ’A ani i te mau tamari’i ’ia fa’a’ite mai i te hō’ē mea tā rātou i ’ite nō ni’a i te ’ā’amu ’o Aarona i te hāmanira’a i te hō’ē kafa ’ei ha’amorira’a nā te ’āti ’Īserā’ela. Mai te mea e hina’aro rātou i te tauturu, ’a fa’a’ite atu ia rātou i te Exodo 32:1–8, 19–24, ’aore rā, ’a fa’a’ite atu ia rātou i « Te ture hō’ē ’ahuru » (i roto Te mau ’ā’amu o te Faufa’a Tahito). Nō te aha e mea hape nō te ’āti ’Īserā’ela ’ia ha’amori i te hō’ē idolo ? (E nehenehe ’outou e fa’a’ite i te mau tamari’i i nā ture mātāmua e piti ’o nā ture hō’ē ’ahuru i roto i te Exodo 20:3–6).

• E tauturu i te mau tamari’i ’ia feruri i te mau hi’ora’a ’o te mau tao’a e fa’ahemahia te ta’ata ’ia ha’amori ’eiaha rā i te Fatu—te mau mea ’o tē ’ume ia tātou i te ātea ’ē iāna. I muri iho, ’a ani ia rātou ’ia fa’a’ite mai i te mau hi’ora’a nō te mau mea ’o tē tauturu ia rātou ’ia fa’atumu i ni’a i te Fa’aora ’e ’ia ha’amori iāna.

Exodo 32:1–5, 21–24

E nehenehe au e ti’a nō te parauti’a.

I tō te ’āti ’Īserā’ela paraura’a ia Aarona ’ia hāmani i te hō’ē idolo ’auro, ’ua fāri’i ’oia ’ia rave i te reira, noa atu ē, e mea hape te reira (hi’o Deuteronomi 9:20). A feruri e nāhea e nehenehe ai ia ’outou ’ia fa’aitoito i te mau tamari’i ’ia ti’a nō te parauti’a, noa atu ē, tē tura’i ra te tahi atu mau ta’ata ia rātou ’eiaha e rave.

Mau ’ohipari’i e nehenehe e rave

• E ani i te mau tamari’i ’ia tai’o i te Exodo 32:1–5, 21–24, tāta’ihō’ē, ’aore rā, tāta’ipiti, ’e ’ia fa’a’ite mai i tō rātou mana’o nō ni’a i te ’ohipa e ti’a ia Aarona ’ia rave ’a ani ai te ’āti ’Īserā’ela iāna ’ia hāmani i te hō’ē kafa ’auro. Nāhea Aarona i te tauturura’a i te ta’ata ?

• ’A tauturu i te mau tamari’i ’ia feruri i te mau taime e nehenehe ai rātou e fa’aruru, ’ia ani ana’e mai te tahi mau ta’ata ia rātou ’ia rave i te hō’ē ’ohipa ’o tā rātou i ’ite e mea hape. E ani i te mau tamari’i ’ia fa’a’ite mai i te mau mana’o i te tahi ’e te tahi nō ni’a e aha tā rātou e rave i roto i te reira mau huru tupura’a.

Fa’aitoito i te ’apora’a mai i te fare

’A ani i te mau tamari’i ’ia fa’a’ite i tō rātou ’utuāfare i te mau mana’o tā rātou i fa’aro’o i teie mahana nō ni’a i te ha’amo’ara’a i te mahana sābati.

Ha’amaita’ira’a i tā tātou ha’api’ira’a

E ani i te mau tamari’i ’ia fa’a’ite mai i te ’itera’a pāpū. E nehenehe te mau uira’a tā ’outou e ui e fa’aitoito i te mau tamari’i ’ia fa’a’ite mai i tō rātou mana’o nō ni’a i te Fa’aora, ’e e mea nāhea te orara’a i te ’evanelia i te ha’amaita’ira’a ia rātou. ’Ia nā reira ana’e rātou, tē fa’a’ite ra ïa rātou i te ’itera’a pāpū. (Hi’o Ha’api’ira’a mai tā te Fa’aora, 11, 32).