2–8 nō Mē

Exodo 35–40 ; Levitiko 1 ; 16 ; 19

« ’Ia mo’a tō Iehova »

’A tuatāpapa ai ’outou i te mau pāpa’ira’a mo’a i teie hepetoma nā roto i te pure, ’a feruri i te mau tamari’i tā ’outou e ha’api’i ra. E nehenehe te Vārua Maitaʼi e tauturu ia ʼoutou ’ia ʼite e aha te mau parau mau e ti’a ia rātou ’ia ’ite, ’e nāhea ’outou ’ia ha’api’i i te reira mau parau mau ia rātou.

Pāpa’i i te mau mana’o e tae mai

Tītau i te mana’o

E tu’u i te i’oa o te tamari’i tāta’itahi i roto i te hō’ē fa’ari’i. ’A ani i te hō’ē tamari’i ’ia huti i te hō’ē o te mau i’oa, ’e e ani i te tamari’i tei hutihia tōna i’oa, ’ia fa’a’ite mai i te hō’ē mea tāna i ha’api’i mai ’aita i maoro a’e nei i roto i te Faufa’a Tahito. ’A paraparau i te mau tamari’i e nāhea te mea tā rātou i ha’api’i mai i te tauturu ia rātou ’ia ha’afātata atu ia Iesu Mesia. ’A nā reira noa e tae roa ʼua noaʼa i te mau tamariʼi atoʼa te taime nō te faʼaʼite mai.

Ha’api’i i te ha’api’ira’a tumu : Te mau tamari’i ’āpī a’e

Exodo 36:1

E nehenehe tā’u e tauturu i te ’ohipa a te Fatu.

E mau hōro’a tō te mau tamari’i ’āpī ’o tā rātou e nehenehe e fa’a’ohipa nō te rave i te ’ohipa a te Fatu i ni’a i te fenua nei. Nāhea ’outou e nehenehe ai e tauturu i te mau tamari’i ’ia fāri’i i te hina’aro ’ia fa’a’ite e aha tā te Fatu i hōro’a ia rātou ?

Mau ’ohipari’i e nehenehe e rave

• ’A tai’o Exodo 36:1 i te mau tamari’i, ’e e ani ia rātou ’ia fa’aro’o e aha te mea tā te Fatu i hōro’a ia Bezaleela ’e ia Aholiaba nō te tauturu ia rāua ’ia patu i te « vāhi mo’a » (setene). ’A paraparau i te tamari’i tāta’itahi i te hō’ē hōro’a tāna e vai ra (e mea tano e ani i te mau metua). ’A fa’a’ite pāpū ē, ’ua « tu’u mai » te Atua i te mau hōro’a i roto i tāna mau tamari’i tāta’itahi.

• E parau i te mau tamari’i nō te aha ’outou e hina’aro ai e tauturu i te ’ohipa a te Fatu. ’A tauturu ia rātou ’ia feruri i te mau rāve’a e nehenehe ai rātou ’ia ’āmui ato’a mai (mai te ha’api’ira’a nō ni’a i te hō’ē tupuna, te paraura’a i te hō’ē ta’ata nō ni’a ia Iesu, ’aore rā, te tāvinira’a i te hō’ē melo o te ’utuāfare). ’A pāpa’i i tō rātou mau mana’o i ni’a i te mau ’api parau, ’a tu’u i te reira i roto i te hō’ē fa’ari’i, ’e ’a ani i te tamari’i tāta’itahi ’ia mā’iti hō’ē ’e ’ia ha’uti mai i te ’ohipa i fa’a’itehia i ni’a i te ’api parau.

Exodo 40:17–34

E nehenehe au e ’ite ē tē vai mau ra te Atua i roto i te mau vāhi mo’a.

’Ua fa’aue te Fatu i te mau tamari’i o ’Īserā’ela ’ia patu i te sekene ’ia nehenehe iāna ’ia « pārahi i rotopū ia rātou » (Exodo 25:8). E nehenehe ’outou e tauturu i te mau tamari’i ’ia ha’api’i mai nō ni’a i te mau vāhi mo’a tā te Atua i hōro’a mai ia tātou i teie mahana nō te tauturu ia tātou ’ia ’ite i tōna vaira’a mau.

Mau ’ohipari’i e nehenehe e rave

• ’A fa’a’ite i te hō’ē hōho’a nō te sekene tahito (hiʼo te arata’i nō teie hepetomai roto i te Mai, pe’e mai—nō te ta’ata hō’ē ’e te ’utuāfare). ’A ani i te mau tamari’i ’ia ’ite mai i te mau tuha’a rau o te sekene, mai te mōrī fa’atārere ’aore rā, te mau fata, ’e ’a fa’a’ite atu ē, ’ua fa’ata’ahia teie mau mea nō te tauturu i te ’āti ’Īserā’ela ’ia mana’o i te Fatu (nō te mau ha’amāramaramara’a hau atu nō ni’a i te sekene, hi’o Exodo 40:17–34). E aha te mau vāhi mo’a tā tātou e vai ra i teie mahana ’o tē tauturu ia tātou ’ia mana’o i te Fatu ?

• ’A fa’a’ite i te hō’ē hōho’a nō te hō’ē hiero, ’e ’a tai’o i te Exodo 25:8 i te mau tamari’i. ’A fa’ata’a ē, i tō tātou nei ’anotau, ’ua hōro’a mai te Atua ia tātou i te mau vāhi mo’a i reira tātou e nehenehe ai e ha’afātata atu iāna. E tauturu i te mau tamari’i ia tāpura i te tahi o teie mau vāhi. E ani i te mau tamari’i e aha tō rātou mana’o ’ia feruri ana’e rātou i teie mau vāhi mo’a. ’A fa’a’ite atu ia rātou ē, e nehenehe ato’a tātou e ha’afātata atu i te Atua ’ia pure ana’e tātou, noa atu te vāhi te reira tātou.

• ’A fa’a’ī i te ’api ’ohipara’a ’e te mau tamari’i. ’A rave ai ’outou i te reira, ’a hīmene i te hō’ē hīmene ’e ’o rātou nō ni’a i te hiero, mai te « Oh, j’aime voir le temple » (Chants pour les enfants, 95).

  

  Mai te sekene i tahito ra, tē fa’a’ite mai nei te hiero ia tātou i te Fa’aora.

Ha’api’i i te ha’api’ira’a tumu : Te mau tamari’i pa’ari a’e

Exodo 35:20–29; 36:1

’Ua hōro’a mai te Atua iā’u i te mau hōro’a nō te tauturu i tāna ’ohipa.

’Ua fāri’i te mau tamari’i ato’a a te Metua i te ao ra i te hō’ē mea nō te tauturu i tāna ’ohipa. E hina’aro paha te mau tamari’i tā ’outou e ha’api’i ra i tā ’outou tauturu nō te ’ite nāhea e nehenehe ai ia rātou ’ia fa’a’ohipa i tō rātou mau hōro’a nō te tauturu i roto i te ’ohipa a te Atua.

Mau ’ohipari’i e nehenehe e rave

• ’A fa’a’ite i te hō’ē hōho’a nō te sekene (hiʼo te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare). ’A ani i te mau tamari’i e aha te mau materia i hina’arohia nō te patu i te sekene. ’A tai’o ’e te mau tamari’i i te Exodo 35:20–29, ’e ’a ani ia rātou ’ia ’imi mai e mea nāhea i roa’a mai ai te mau materia i hina’arohia. ’A fa’a’ite pāpū ē, tē vai ra tō te tamari’i tāta’itahi hō’ē mea nō te tauturu i te ’ohipa a te Fatu.

• ’A ani i te mau tamari’i ’ia tai’o i te Exodo 36:1 nō te ’ite mai i te mea tā te Fatu i hōro’a i te feiā tei pi’ihia nō te tauturu i te patura’a i te setene. E ani i te mau tamari’i ’ia fa’a’ite mai i tō rātou mana’o nō ni’a i te mea tā te Fatu i hōro’a ia rātou nō te tauturu i te patura’a i tōna bāsileia (’a hōro’a i te mau mana’o tauturu mai te mea e hina’arohia). Nāhea e nehenehe ai ia tātou ’ia fa’a’ohipa i teie mau mea nō te ha’amaita’i ia vetahi ’ē ?

Exodo 40:17–33

E nehenehe au e riro hau atu ā mai ia Iesu Mesia ’e te Metua i te ao ra.

’Aita te setene i fa’ati’a noa i te tamari’i o ’Īserā’ela ’ia fāri’i i te vaira’a mau o te Atua i rotopū ia rātou, ’ua ha’api’i ato’a mai rā te reira ia rātou i te mau mea e nehenehe tā rātou e rave nō te riro hau atu mai te Atua te huru.

Mau ’ohipari’i e nehenehe e rave

• E ani i te mau tamari’i ’ia fa’a’ohipa i te Exodo 40:17–33 nō te ’ite mai i te mau mea tei riro ’ei tuha’a nō te setene, ’e ’ia ’imi mai i te tahi o te reira i roto i te hō’ē hōho’a o te sekene tahito (hi’o te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare). E ani i te mau tamari’i ’ia pāpa’i i tā rātou iho mau hōho’a o te sekene. ’A paraparau nō ni’a i te huru e nehenehe ai te tuha’a tāta’itahi o te sekene e ha’api’i mai nō ni’a i te Fa’aora ’aore rā, te Metua i te ao ra. ’Ei hi’ora’a, te ’āfata o te fa’a’itera’a, e nehenehe te reira e fa’aha’amana’o ia tātou i te mau fa’auera’a a te Atua, te fata, e nehenehe te reira e fa’aha’amana’o ia tātou i te tusia a Iesu Mesia, te mōrī fa’atārere, e nehenehe te reira e fa’aha’amana’o ia tātou ē, ’o te Fa’aora te māramarama o te ao nei, ’e te vai atu ra.

• ’A ani i te mau tamari’i ’ia tai’o i te Exodo 25:8 nō te ’ite mai nō te aha te Fatu i hina’aro ai ’ia patu te tamari’i o ’Īserā’ela i te hō’ē « vāhi mo’a » (’aore rā, sekene). ’A tauturu i te mau tamari’i ’ia tāpura i te mau vāhi ’e te mau huru tupura’a e nehenehe ai ia tātou ’ia ’ite tei reira te Fatu. Nāhea teie mau vāhi i te tauturu ia tātou ’ia riro hau atu mai te Metua i te ao ra ’e ia Iesu Mesia te huru ?

Levitiko 1:1–4

Nā roto i te tāra’ehara a Iesu Mesia, e nehenehe tā’u hara e fa’a’orehia.

’Ua fa’ata’ahia te mau tusia ’ānimara, tei ravehia i roto i te Faufa’a Tahito, nō te ha’api’i i te mau tamari’i ’Īserā’ela nō ni’a i te fa’a’orera’a hara e roa’a nā roto i te tāra’ehara a Iesu Mesia.

Mau ’ohipari’i e nehenehe e rave

• ’A fa’a’ite i te mau hōho’a nō Iesu Mesia i roto i Getesemane ’e i ni‘a i te sātauro (hi’o Te Buka Hōho’a ’Evanelia, nos. 56, 57). ’A fa’ata’a ē, ’ua fa’aue mai te Fatu i te mau tamari’i o ’Īserā’ela ’ia rave i te mau tusia nō te ha’api’i ia rātou ē, e nehenehe tā rātou mau hara e fa’a’orehia nā roto i te tāra’ehara a Iesu Mesia. E tai’o i te mau tamari’i i te Levitiko 1:1– 4, ’e e ani ia rātou ’ia ’imi i te mau ta’o ’aore rā, i te mau pereota ’o tē fa’aha’amana’o ia rātou i te tusia a Iesu Mesia.

• ’A fa’a’ite i te hō’ē hōho’a nō Iesu Mesia i te fāra’a atu i te mau ta’ata i Amerika (mai Te Buka hōho’a ’evanelia, no. . 82). ’A fa’ata’a ē, i muri a’e i te fa’asātaurora’ahia o Iesu Mesia ’e ’ua ti’afa’ahou mai, ’ua ha’api’i ’oia i te mau ta’ata i Amerika nō te aha ’aita i tītau-fa’ahou-hia ia rātou ’ia fa’atusia i te mau ’ānimara. ’A tai’o ’āmui i te 3 Nephi 9:19–20, ’e ’a ani i te mau tamari’i e aha tei fa’auehia ia tātou ’ia fa’atusia i teie nei. E aha te aura’a ’ia pūpū atu i te hō’ē tusia ’o te ’ā’au tātarahapa ’e te vārua marū ? ’A parau atu ’ia ’imi rātou i « Te ’ā’au tātarahapa » i roto i te buka arata’i nō te mau pāpa’ira’a mo’a (scriptures.ChurchofJesusChrist.org) nō te tauturu i te pāhonora’a i teie uira’a. E ani ia rātou ’ia feruri e nāhea e nehenehe ai ia rātou ’ia pūpū i te ’ā’au tātarahapa ’e te vārua marū i te Fatu ra.

Fa’aitoito i te ’apora’a mai i te fare

’A ani i te mau tamari’i ’ia ani i te Metua i te ao ra i teie hepetoma e mea nāhea tāna e hina’aro ia rātou ’ia tauturu i tāna ’ohipa i roto i tō rātou ’utuāfare.

Ha’amaita’ira’a i tā tātou ha’api’ira’a

’A fa’atoro i te mau tamari’i i ni’a i te Metua i te ao ra ’e ia Iesu Mesia. Tā ’outou fā mātāmua, ’o te tauturura’a ïa i te mau tamari’i tā ’outou e ha’api’i ra ’ia ha’apūai i tō rātou fa’aro’o i te Metua i te ao ra ’e ia Iesu Mesia. E aha tā ’outou e nehenehe e rave nō te tauturu ia rātou ’ia māramarama nāhea te orara’a i te mau parau mau ’o te ’evanelia i te tauturu ia rātou ’ia riro hau atu mai te Metua i te ao ra ’e tāna tamaiti te huru ?