te ti’ara’a Mose i ni’a i te mou’a

Fa’ahōho’ara’a nō Mose e ti’a ra i ni’a i te mou’a Nebo, © Providence Collection/licensed nō roto goodsalt.com

16–22 nō Mē

Deuteronomi 6–8 ; 15 ; 18 ; 29–30 ; 34

« E ara ’oe i reira, ’o te moīna Iehova ia ’oe »

’A feruri e nāhea ’outou i te fa’aau i te mau ’ohipara’a i roto i teie arata’ira’a i ni’a i te mau hina’aro o te mau tamari’i tā ’outou e ha’api’i ra. ’Ei hi’ora’a, mai te mea e mau tamari’i ’āpī tā ’outou e ha’api’i ra, e nehenehe ’outou e tauturu ia rātou ’ia fa’aineine nō te bāpetizora’a nā roto i te fa’aaura’a i te ’ohipara’a i raro a’e i « Te ha’apa’ora’a i tā’u mau fafaura’a, e hōro’a mai te reira i te mau ha’amaita’ira’a rarahi» i roto i te tuha’a nō te mau tamari’i pa’ari a’e.

Pāpa’i i te mau mana’o e tae mai

ītona fa’a’itera’a

Tītau i te mana’o

E ani i te mau tamari’i ’ia fa’a’ite mai i te mau mea tā rātou i ha’api’i mai nō ni’a ia Mose i roto i te Paraimere ’aore rā, i te fare i te mau hepetoma i ma’iri a’e nei. Mai te mea e hina’arohia, ’a fa’a’ite i te mau hōho’a nō te mau ’ohipa tei tupu i roto i te orara’a ’o Mose nō te tauturu ia rātou ’ia ha’amana’o. ’A parau ia rātou ē, i teie mahana, e paraparau ’outou nō ni’a i te mau mea tā Mose i ha’api’i i te hope’a ’o tōna orara’a i ni’a i te fenua nei.

ītona ha’api’ira’a

Ha’api’i i te ha’api’ira’a tumu : Te mau tamari’i ’āpī a’e

Deuteronomi 6:5

E nehenehe tā’u e here i te Fatu mā tō’u ’ā’au ato’a.

’Ua ha’api’i Mose i te mau tamari’i o ’Īserā’ela ē, e mea ti’a ia rātou ’ia here i te Fatu mā to rātou ’ā’au ato’a, tō rātou vārua ato’a, ’e tō rātou pūai ato’a. ’A feruri i te mau rāve’a e nehenehe ai ia ’outou ’ia tauturu i te mau tamari’i tā ’outou e ha’api’i ra ’ia fa’arahi i tō rātou here i te Metua i te Ao ra ’e i te Fa’aora.

Mau ’ohipari’i e nehenehe e rave

• ’A pāpa’i hōho’a i ni’a i te tāpura ’ere’ere i te hō’ē māfatu, te hō’ē hōho’a nō te hō’ē tino ’e hō’ē rima pūai. ’A tai’o i te Deuteronomi 6:5, ’e ’a fa ’atoro i te mau hōho’a ’a tai’o ai ’outou i te mau ta’o ra « ’ā’au », « vārua », ’e « pūai ». E ani i te mau tamari’i, te tahi i muri i te tahi, ’ia fa’atoro i te mau hōho’a ’a fa’ahiti ai te piha ha’api’ira’a i te ’īrava pāpa’ira’a mo’a nā muri iho ia ’outou.

• ’A hīmene ’e te mau tamari’i i te hō’ē hīmene nō ni’a i te mau mea i hāmanihia e te Atua, mai te « Mon Père Céleste m’aime » (Chants pour les enfants, 16–17). ’A tauturu i te mau tamari’i ’ia ’imi i te mau ta’o i roto i te hīmene ’o tē fa’a’ite ra ē, ’ua here te Metua i te ao ra ia tātou. ’A tauturu ia rātou ’ia feruri i te mau rāve’a e nehenehe ai ia tātou ’ia fa’a’ite iāna ē, tē here ato’a nei tātou iāna.

Deuteronomi 6:6–9

Te mau pāpa’ira’a mo’a ’o te parau ïa a te Atua.

’Ua fa’ata’ahia te parau a’o i roto i te Deuteronomi 6:6–9 nō te tauturu i te ’āti ’Īserā’ela ’ia « ara [rātou] i reira, ’o te moīna Iehova ia [rātou] » ’e i tāna parau (’īrava 12). Nāhea e ti’a ai ia ’outou ’ia tauturu i te mau tamari’i ’ia fa’ariro i te pure ’e i te mau pāpa’ira’a mo’a ’ei tuha’a tāmau nō tō rātou orara’a ?

Mau ’ohipari’i e nehenehe e rave

• ’A ani i te hō’ē tamari’i ’ia huna i te hō’ē buka pāpa’ira’a mo’a i roto i te piha a tāpiri ai te toe’a ’o te mau tamari’i i tō rātou mata. I muri iho ’a ani i te mau tamari’i ’ia ’ara’ara i tō rātou mata ’e ’ia tāmata i te ’imi i te mau buka pāpa’ira’a mo’a. Ma te fa’a’ohipa i te mau pereota tumu i roto i Deuteronomi 6:6–9, ’a fa’a’ite i te mau tamari’i ē, ’ua parau ’o Mose i te ’āti ’Īserā’ela ’ia tu’u i te mau pāpa’ira’a mo’a i te mau vāhi e ’ite rātou ’e e ha’api’i mai rātou i te reira i te mau mahana ato’a. ’A tauturu i te mau tamari’i ’ia feruri i te mau vāhi i roto i tō rātou fare i reira e ti’a ai ia rātou ’ia vaiiho i te mau pāpa’ira’a mo’a, ’ia ti’a ia rātou ’ia ’ite i te reira i te mau mahana ato’a.

• ’A hīmene i te hō’ē hīmene nō ni’a i te pāpa’ira’a mo’a, mai te « Quand je lis l’Ecriture sainte » (Chants pour les enfants, 66). ’A fa’a’ite i tō ’outou ’itera’a pāpū ē, e parau nā te Atua te mau pāpa’ira’a mo’a, ’e ’a parau i te mau tamari’i e mea nāhea te reira i te ha’amaita’ira’a i tō ’outou orara’a.

tē tūturi ra Iesu ma te tāpe’a i te ta’ata

’O Iesu Mesia te peropheta mai ia Mose.

Deuteronomi 18:15–18

Tē ha’api’i nei te mau peropheta ia tātou nō ni’a ia Iesu Mesia.

’Ua tohu ’o Mose ē, e haere mai Iesu Mesia ’e e ti’a ia tātou ’ia fa’aro’o i te mau parau tā Iesu e ha’api’i mai.

Mau ’ohipari’i e nehenehe e rave

• ’A tauturu i te hō’ē o te mau tamari’i ’ia tai’o i te Deuteronomi 18:18, ’e ’a parau i te mau tamari’i ē, te peropheta mai ia Mose, tā te Atua e fa’ati’a fa’ahou, ’o Iesu Mesia ïa. Nō te tauturu i te mau tamari’i ’ia ’ite ē, e mea nāhea ’o Mose ’e ’o Iesu e tuea ai, ’a ’āfa’i mai i te mau hōho’a nō te mau ’ohipa tā Mose i rave ’e nō te mau ’ohipa tā Iesu i rave, ’e ’a vaiiho i te mau tamari’i ’ia fa’atuea i te reira. ’Ei hi’ora’a, e nehenehe ’outou e ’āfa’i mai i te mau hōho’a ’o Mose ’e ’o Iesu e fa’atōro’a ra ia vetahi ’ē ’e e ha’api’i ra (hi’o Te buka hōho’a ’evanelia, no.15, 16, 38,39).

• ’A fa’a’ite i te mau tamari’i i te hō’ē hōho’a ’o tō tātou peropheta i teie mahana, ’e a fa’a’ite i te hō’ē mea tāna i ha’api’i nō ni’a i te Fa’aora. E ani i te mau tamari’i ’ia pāpa’i i te hō’ē hōho’a o te peropheta nō te fa’a’ite i tō rātou ’utuāfare.

ītona ha’api’ira’a

Ha’api’i i te ha’api’ira’a tumu : Te mau tamari’i pa’ari a’e

Deuteronomi 6:6–9

E nehenehe au e tāpe’a i te parau a te Atua i roto i tō’u ’ā’au.

’Ua ha’api’i mai Mose ē, e ti’a ia tātou ’ia tāpe’a i te parau a te Atua i roto i tō tātou ’ā’au, ’e ’ua hōro’a ’oia i te ’āti ’Īserā’ela i te parau a’o nō ni’a i te huru nō te tāpe’a-tāmau-māite-ra’a i te parau a te Atua i mua ia rātou. Nāhea ’outou i te fa’auru i te mau tamari’i ’ia ha’api’i mai i te parau a te Atua i te mau mahana ato’a ?

Mau ’ohipari’i e nehenehe e rave

• ’A pāpa’i i ni’a i te tāpura ’ere’ere i te mau ta’o ’e te mau pereota nō roto mai i te Deuteronomi 6:6–9 ’o tē fa’a’ite ra e nāhea te ’āti ’Īserā’ela i te ha’amana’o i te parau a te Atua (mai te pārahi, haere, ta’oto, rima ’e fare). E ani i te mau tamari’i ’ia ’imi i teie mau parau i roto i te mau ’īrava. E aha tā teie mau ta’o e ha’api’i nei nō ni’a i te fa’arirora’a i te mau pāpa’ira’a mo’a ’ei tuha’a nō tō tātou orara’a i te mau mahana ato’a ? ’A ani i te mau tamari’i e aha tā rātou e nehenehe e rave nō te ha’amana’o i te parau a te Atua i roto i tō rātou orara’a i te mau mahana ato’a.

• ’A hōro’a i te tamari’i tāta’itahi i te hō’ē ’api parau, ’e ’a ani ia rātou ’ia pāpa’i i te hō’ē pereota nō roto mai i te Deuteronomi 6 tei riro ’ei mea faufa’a rahi nō rātou. E ani ia rātou ’ia fa’a’ite mai nō te aha rātou i mā’iti ai i tā rātou pereota. E ani atu ’ia fa’anehenehe rātou i tā rātou ’api parau ’e ’ia tu’u i te reira i roto i tō rātou fare nō te ha’amana’o i te reira. ’A fa’aitoito i te mau tamari’i ’ia pāpa’i ’e ’ia fa’a’ite i te tahi atu mau pereota tei ’itehia ia rātou i roto i te mau pāpa’ira’a mo’a.

Deuteronomi 15:7–11

E nehenehe au e tāvini ma te ’oa’oa i te feiā nava’i ’ore.

E nehenehe te mau ha’api’ira’a i roto i te Deuteronomi 15:7–11 e tauturu i te mau tamari’i tā ’outou e ha’api’i ra ’ia māramarama ē, te tauturura’a ia vetahi ’ē, e ’ere ïa i te tahi noa ’ohipa ri’i. E mea ti’a rā ’ia ravehia te reira mā te ’ā’au hina’aro mau.

Mau ’ohipari’i e nehenehe e rave

• ’A pāpa’i i ni’a i te tāpura ’ere’ere ’O vai, Nō te aha ’e Nāhea  . E ani i te mau tamari’i ’ia tai’o i te Deuteronomi 15:7–11 nō te ’ite mai ’o vai tā tātou e tauturu, nō te aha tātou e tauturu ai ia rātou, ’e e aha te huru ’o tō tātou ’ā’au nō ni’a i te tauturura’a. E ani ia rātou ’ia pāpa’i i ni’a i te tāpura ’ere’ere i te mau mea tā rātou i ’ite mai. ’A hīmene i te hō’ē hīmene ’o tē ha’apāpū i te parau poro’i i roto i teie mau ’īrava, mai te « ’Ua rave ānei au i te hō’ē mea maita’i ? » (Te mau Hīmene, n° 148).

• ’A ani i te mau tamari’i ’ia feruri i te hō’ē ta’ata tā rātou e nehenehe e tauturu—i roto iho ā rā i tō rātou iho ’utuāfare. ’A hōro’a ia rātou i te taime nō te pāpa’i i te mea tā rātou e rave i teie hepetoma nō te tauturu i te reira ta’ata. Mai te mea e nehenehe, ’a rave i te mau fa’anahora’a ’ia fa’atoro te piha ha’api’ira’a i te hō’ē ta’ata nava’i ’ore.

Deuteronomi 30:8–10

E hōpoi mai te ha’apa’ora’a i tā’u mau fafaura’a i te mau ha’amaita’ira’a rahi.

Mai te mau tamari’i o ’Īserā’ela, tītauhia ia tātou te fa’aha’amana’ora’a tāmau nō te ora i tā tātou mau fafaura’a. E nehenehe te tai’ora’a i te Deuteronomi 30:8–10 e tauturu i te mau tamari’i ’ia māramarama maita’i a’e e aha te hō’ē fafaura’a, ’e e fa’auru ia rātou ’ia ha’apa’o i tā rātou mau fafaura’a.

Mau ’ohipari’i e nehenehe e rave

• ’A ani i te mau tamari’i e aha te hō’ē fafaura’a (mai te mea e hina’aro rātou i te tauturu, ’a fa’a’ite ē, e ’itehia ia rātou te hō’ē tātarara’a i roto i te « Fafaura’a » i roto i te buka arata’i nō te mau pāpa’ira’a mo’a [scriptures.ChurchofJesusChrist.org]). ’A pāpa’i e piti tuha’a i ni’a i te tāpura ’ere’ere ’e teie mau upo’o parau: mau parau fafau a te ’āti ’Īserā’ela ’e te mau parau fafau a te Atua. ’A ani i te mau tamari’i ’ia ’imi i te Deuteronomi 30:8–10 ’e ’ia fa’a’ī i te ’api. (Mai te mea e tītauhia, ’a tauturu i te mau tamari’i ’ia ta’a maita’i i te mau aura’a o te mau pereota i roto i te ’īrava 9). ’A fa’a’ite pāpū i te mau ha’amaita’ira’a tei fāri’ihia e ’outou nā roto i te ha’apa’ora’a i tā ’outou mau fafaura’a.

• E ani i te mau tamari’i ’ia pāpa’i i ni’a i te tāpura ’ere’ere i te mau parau fafau tā tātou e rave i te bāpetizora’a ’e te mau fafaura’a a te Metua i te ao ra ia tātou (hi’o Te Parau Ha’api’ira’a ’e te mau Parau Fafau 20:37, 77). E aha tā tātou e nehenehe e rave nō te ha’amana’o tāmau noa i te Fa’aora ’e nō te ha’apa’o i tā tātou mau fafaura’a ?

ītona ’apora’a mai

Fa’aitoito i te ’apora’a mai i te fare

E ani i te mau tamari’i ’ia feruri ē, e melo ’outou nō tō rātou ’utuāfare, ’e ’a ani ia rātou ’ia fa’a’ite mai ia ’outou i te hō’ē mea tā rātou i ha’api’i mai i roto i te piha ha’api’ira’a i teie mahana. ’A fa’aitoito ia rātou ’ia fa’a’ite i te mea tā rātou i parau mai ia ’outou, i te hō’ē o te mau melo o tō rātou ’utuāfare ’ia ho’i atu rātou i te fare.

Ha’amaita’iraʼa i tā tātou ha’api’ira’a

’A ui i te mau uira’a fa’auruhia. ’A ui i te mau uira’a ’o tē tītau i te mau tamari’i ’eiaha te fa’a’ite-noa-ra’a i te mau ’ohipa, tē fa’a’ite ato’a rā i tō rātou ’itera’a pāpū nō te mau parau mau o te ’evanelia. ’Ei hi’ora’a, mai te mea tē ’āparau ra ’outou i te mau fa’auera’a, e nehenehe ’outou e ani i te mau tamari’i ’ia fa’a’ite mai ē, nāhea te ha’apa’ora’a i te mau fa’auera’a i te ha’amaita’ira’a ia rātou.

’api ’ohipara’a : Te mau pāpa’ira’a mo’a e parau ïa nā te Atua.