9–15 nō Mē

Nūmera 11–14 ; 20–24

« ’Eiaha rā e fa’aru’e ia Iehova, ’eiaha ho’i e mata’u »

Tē ha’afaufa’a nei teie arata’i ha’api’ira’a vetahi o te mau parau tumu faufa’a rahi e rave rahi e vai nei i roto i te buka Nūmera. ’Ia vai matara i te tahi atu mau parau tumu tā te Vārua e tauturu ia ’outou ’ia ’ite.

Pāpa’i i te mau mana’o e tae mai

Noa atu ē e nā raro noa ’oe, e’ita te tere mai te medebara nō Sinai i te fenua i parauhia ra i Kana’ana e 40 matahiti te maoro. ’O te maorora’a rā teie tei tītauhia i te mau tamari’i a ’Īserā’ela, e ’ere nō te tāpae i te rātere i terā fenua, nō te rātere rā i tō rātou ātea pae vārua : te ātea i rotopū i tō rātou huru i terā tau ’e te huru tā te Fatu i te tītau ia rātou ’ia riro mai, ’ei mau ta’ata nō tāna fafaura’a.

Tē vauvau nei te buka Nūmera i te tahi mau ’ohipa i tupu i roto i terā 40 matahiti, nā reira ato’a te mau ’ohipa tei tītauhia i te mau tamari’i a ’Īserā’ela ’ia ha’api’i hou ’a tomo ai i roto i te fenua i parauhia ra. ’Ua ha’api’i mai rātou ’ia ha’apa’o maita’i i te parau a te mau tāvini tei mā’itihia e te Fatu (hi’o Nūmera 12). ’Ua ha’api’i mai rātou ’ia tu’u i tō rātou ti’aturi i ni’a i te mana o te Fatu, noa atu ā e au ē, e mea pōiri roa te ananahi (hi’o Nūmera 13–14). ’E ’ua ha’api’i rātou ē, ’o te māuiui pae vārua te hope’a nō te fa’aro’o tāpetepete ’e te ti’aturi ’ore, e nehenehe rā rātou e tātarahapa ’e e hi’o i te Fa’aora ra nō te ora mai i te reira (hi’o Nūmera 21:4–9).

I te tahi taime mai te mau tamariʼi a ’Īserā’ela tātou. ’Ua ’ite pauroa tātou e aha te huru te medebara pae vārua, ’e e ti’a ato’a i terā mau ha’api’ira’a tā rātou i ha’api’i e fa’aineine ia tātou nō te tomo i roto i tō tātou fenua i parauhia ra : ’oia ho’i te ora mure ’ore i pīha’i iho i tō tātou Metua i te Ao ra.

Nō te hō’ē hi’ora’a rere ā manu nō te Buka o te mau Nūmera, hi’o « Numbers » i roto i te Bible Dictionary (Fa’atoro parau nō te Bibilia).

Mau mana’o nō te tuatāpapara’a pāpa’ira’a mo’a a te ta’ata hō’ē

Nūmera 11:11–17, 24–29 ; 12

’Ua matara te heheura’a i te tā’āto’ara’a, tē arata’i nei rā te Atua i tāna ’Ēkālesia nā roto i tāna peropheta.

I roto i te Nūmera 11:11–17, 24–29, ’a hi’o i te fifi tā Mose i fa’aruru ’e te rāve’a tā te Atua i tu’u mai. I tō ’oe mana’o e aha tā Mose e parau ra i te nā-’ō-ra’a ’oia ē, ’āhani « ’ei peropheta ato’a tō Iehova ra ta’ata ē ’ati noa a’e » ? (’īrava 29). ’A feruri ai ’oe i teie mau ’īrava, ’a feruri i teie mau parau a te peresideni Russell M. Nelson : « ’Ua hina’aro mau ānei te Atua e paraparau ia ’outou ? ’Ē ! ’Auē, e mau mea hau atu ho’i tā tō ’outou Metua i te Ra’i i hina’aro ’ia ’ite ’outou » (« Heheura’a nō te ’Ēkālesia, heheura’a nō tō tātou orara’a », Ensign ’aore rā Liahona, Mē 2018, 95).

Terā rā, ’ia parauhia e nehenehe te mau ta’ata ato’a ’ia riro ’ei peropheta, e ’ere ïa ē, ’o rātou pā’āto’a tē nehenehe e fa’atere i te mau ta’ata a te Atua mai tā Mose i rave. E mea pāpū roa te reira i te ’ohipa i tupu i roto i te Nūmera 12. ’A tai’o ai ’oe i teie pene, e aha te mea e hi’o maita’i ? I tō ’oe mana’o e aha tā te Fatu e hina’aro ia ’oe ’ia māramarama nō ni’a i te heheura’a a te ta’ata hō’ē ’e te pe’era’a i te peropheta ?

Hi’o ato’a 1 Nephi 10:17 ; Te Parau Ha’api’ira’a ’e te mau Parau Fafau 28:1–7 ; Dallin H. Oaks, « E piti rēni nō te ’āparaura’a », Liahona, Nov. 2010, 83–86.

Nūmera 13–14

Maoti tō’u fa’aro’o i te Fatu e ti’a ai iā’u ’ia ti’aturi i te ananahi.

’A tai’o ai ’oe i te Nūmera 13–14, ’a tāmata i te feruri ia ’oe iho mai te mau tamariʼi a ’Īserā’ela. ’Ia mana’o ’oe, nō te aha rātou i hina’aro ai e « ho’i… i Aiphiti » ? (Nūmera 14:3). ’Ua tupu a’enei ānei tō ’oe mana’o taiā mai ia rātou i tomo i roto i te fenua i parauhia ra  E aha tā ’oe e nehenehe e parau nō ni’a i te « ’ā’au » ’ē o Kaleba ? (Nūmera 14:24). E aha tā ’oe e fa’ahiahia nei i te fa’aro’o o Kaleba ’e o Iosua, ’e nāhea ’oe i te pe’e i tō rāua hi’ora’a i roto i te mau mea tā ’oe e fa’aruru nei ?

Hi’o ato’a Te Mau Ha’api’ira’a a te mau Peresideni o te ’Ēkālesia : Gordon B. Hinckley (2016), 83–85.

Nūmera 21:4–9

Mai te mea e hi’o vau ia Iesu Mesia ma te fa’aro’o, e ti’a iāna ’ia fa’aora i tō’u māuiui pae vārua.

’Ua mātau te mau peropheta o te Buka a Moromona i te ’ā’amu i pāpa’ihia i roto i te Nūmera 21:4–9 ’e ’ua māramarama i te aura’a pae vārua o te reira. E aha tā te 1 Nephi 17:40–41 ; te Alama 33:18–22 ; ’e te Helamana 8:13–15 e ha’amāramarama fa’ahou nei nō ni’a i teie ’ā’amu ? ’A tuatāpapa ai ’oe i teie mau ’īrava, ’a feruri i te fa’aorara’a pae vārua tā ’oe e tīa’i nei. ’Ua tītauhia i te mau tamari’i a ’Īserā’ela ’ia « [hi’o] i taua ’ōphi veo ra » (Nūmera 21:9) nō te ora mai. E aha te mana’o e tae mai nei nō te ’ohipa e rave hope atu ā nō te « ’ite atu i te Tamaiti a te Atua ra ma te fa’aro’o » ? (Helamana 8:15).

Hi’o ato’a Ioane 3:14–15 ; Te Parau Ha’api’ira’a ’e te mau Parau Fafau 6:36 ; Dale G. Renlund, « Tē rahi ra tōna maita’i », Liahona, Mē 2019, 70–73.

’Ua ora mai te mau tamariʼi a ’Īserā’ela nā roto i te hi’ora’a i ni’a i te ’ōphi veo.

Nūmera 22–24

E ti’a iā’u ’ia pe’e i te hina’aro o te Atua, noa atu ā e tāmata te ta’ata i te parau iā’u ’aita.

I tō Balaka, te ari’i o te ’āti Moabi, fa’aro’ora’a ē, tē fātata mai ra te mau tamariʼi a ’Īserā’ela, ’ua pi’i ’oia ia Balaama ’ia haere mai, e ta’ata tu’iro’o nō te paraura’a i te mau ha’amaita’ira’a ’e te katara i ni’a i te ta’ata. I hina’aro Balaka ’ia ha’aparuparu ’oia i te mau tamariʼi a ’Īserā’ela nā roto i te hō’ē katara. Hi’o maita’i na nāhea Balaka te tāmatara’a i te tāparu ia Balaama (hi’o Nūmera 22:5–7, 15–17), ’e ’a feruri ato’a i te mau ’umera’a ’ia hara tā ’oe e fa’aruru nei, nō te pāto’i i te hina’aro o te Atua. E aha te mea tā ’oe e fa’ahiahia nei i te pāhonora’a a Balaama i roto i te Nūmera 22:18, 38 ; 23:8, 12, 26 ; 24:13 ?

Te vāhi ’oto rā, e au ē, i te hope’a, ’ua fati Balaama i raro a’e i te ’umera’a ’e ’ua ha’avare ia ’Īserā’ela (hi’o Nūmera 31:16 ; Iuda 1:11). ’A feruri nāhea i te vai ha’apa’o maita’i noa i te Fatu noa atu ā te ’umera’a a te ta’ata.

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Nūmera 11:4–6.Mai te mau tamariʼi a ’Īserā’ela a’enei ānei tō tātou huru, mai tei ’itehia i roto i te Nūmera 11:4–6 ? Nāhea Te Parau Ha’api’ira’a ’e te mau Parau Fafau 59:15–21 e nehenehe e tauturu mai ?

Nūmera 12:3E aha te mau fa’a’itera’a a Mose ē, e mea « marū mau » ’oia i roto i te Nūmera 12 ’aore rā i roto i te tahi atu mau ’īrava tā ’oe i tai’o ? E nehenehe e hi’o i te tātarara’a a Elder David A. Bednar nō te marū i roto i tāna a’ora’a « ’O te ha’eha’a ’e te marū o te ’ā’au » (Liahona, Mē 2018, 30–33) ’aore rā, te parau « Meek, Meekness [te marū] » i roto i te arata’i nō te mau pāpa’ira’a mo’a (scriptures.ChurchofJesusChrist.org). E aha tā tātou e ʼapo nei nō ni’a i te huru tātou e nehenehe e marū atu ā ? E aha te mau ha’amaita’ira’a e nehenehe e tae mai ’ia nā reira tātou ?

Nūmera 13–14.E nehenehe e piti melo o te ’utuāfare (’aore rā hau atu) e ha’avarevare « tāmoemoe » (Nūmera 13:17) i te tahi atu vāhi o te fare mai te huru ’o te fenua i parauhia ra. I muri iho e nehenehe rātou e hōro’a mai i te parau fa’a’ite mai te au i te Nūmera 13:27–33 ’aore rā te Nūmera 14:6–9. E aha te ha’api’ira’a tā tātou e ’apo nei nō ni’a i te fa’aro’o i roto i nā parau fa’a’ite e piti i roto i teie mau ’īrava ? Nāhea tātou e nehenehe e riro rahi atu ā mai ia Kaleba ’e ’ia Iosua ?

Nūmera 21:4–9.I muri iho i te tai’ora’a i te Nūmera 21:4–9, ’e tae noa atu te 1 Nephi 17:40–41 ; te Alama 33:18–22 ; ’e te Helamana 8:13–15, e nehenehe tō ’outou ’utuāfare e hāmani i te hō’ē ’ōphi pāpie ’aore rā e hāmani i te ’araea ; ’e e pāpa’i i ni’a i te reira ’aore rā i ni’a i te hō’ē pāpie i te tahi mau mea ’ōhie e nehenehe e rave nō te « ’ite atu i te Tamaiti a te Atua ra ma te fa’aro’o » (Helamana 8:15).

Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a nō teie hepetoma i roto Mai, pe’e mai—nō te Paraimere

Hīmene tei mana’ohia : « E Iesu, ’ia feruri au », Te mau hīmene, N°71.

Ha’amaita’ira’a i tā tātou ha’api’ira’a

Tauturu i tō ’outou ’utuāfare ’ia fa’atupu i te fa’arava’ira’a ia rātou iho i te pae vārua. ’Eiaha e fa’a’amu’amu noa i te mau parau, ’a tauturu rā i [te mau melo o tō ’outou ’utuāfare] ’ia ’ite i te mau parau mau o te ’evanelia nō rātou iho, i roto i te mau pāpa’ira’a mo’a ’e te mau parau a te mau peropheta » (Ha’api’ira’a mai tā te Fa’aora, 28).

Moses and the Brass Serpent [Mose ’e te ’ōphi veo], nā Judith A. Mehr