Siosefa ʻo ʻIsipité ʻi he fale fakapōpulá

Ta fakatātaaʻi ʻo Siosefa ‘o ‘Isipité ʻi he fale fakapōpulá ʻe Jeff Ward

7–13 Māʻasi

Sēnesi 37–41

“Na‘e ʻIa Siosefa ʻa [e ʻEikí]”

ʻOku ʻikai fakataumuʻa ia ke ke akoʻi e ngaahi ʻekitivitī kotoa ʻi he lēsoni ko ʻení. ʻI hoʻo teuteu ke faiakó, lotua e Laumālié ke tokoniʻi koe ke ke ʻiloʻi ko e fē ʻa e ngaahi ʻekitivitī (kapau ʻoku ʻi ai) ʻi he lēsoni ko ʻení te ne feau lelei taha e ngaahi fiemaʻu hoʻo kalasí.

Lekooti Hoʻo Ngaahi Ongó

fakaʻilonga feʻinasiʻakí

Fakaafeʻi e Feʻinasiʻakí

Ke poupouʻi e kau mēmipa ʻo e kalasí ke nau vahevahe e meʻa naʻa nau ako ʻi heʻenau ako fakataautahá mo fakafāmilí, te ke lava ʻo fakaafeʻi kinautolu ke nau kumi ha ngaahi kupuʻi lea ʻi he Sēnesi 37–41 ʻoku nau fakahaaʻi ha lēsoni pe tefitoʻi moʻoni ʻoku nau ongoʻi ʻoku mahuʻinga.

fakaʻilonga akoʻí

Akoʻi e Tokāteliné

Sēnesi 37:1–28; 39; 40:1–19; 41:9–45

“Na‘e ʻIa Siosefa ʻa [e ʻEikí]” ʻi heʻene faingataʻaʻiá.

• ʻE lava ke tofanga ha kau mēmipa ʻo hoʻo kalasí ʻi ha ngaahi faingataʻa lahi ʻo hangē ko Siosefá. Ke tokoni ki he kalasí ke nau maʻu ha ngaahi ueʻi fakalaumālie ʻi he sīpinga ʻa Siosefá, te ke lava ʻo vahevahe kinautolu ki ha ngaahi kulupu ʻe tolu pea kole ki he kulupu takitaha ke nau toe vakaiʻi ha taha ʻo e ngaahi potufolofola ko ʻení: Sēnesi 39; 40:1–19; pe 41:9–45. Hili iá, ʻe lava ʻe he kulupu takitaha ʻo vahevahe e ngaahi founga naʻe ʻia Siosefa ai ʻa e ʻEikí lolotonga ʻene ngaahi faingataʻaʻiá. ‘O ka feʻunga, ʻe lava ke vahevahe ʻe he kau mēmipa ʻo e kalasí ha ngaahi aʻusia naʻe ʻiate kinautolu ai ʻa e ʻEikí lolotonga ha faingataʻa lahi. ‘E anga fēfē haʻatau ako ke vakai lelei ange ki he ʻafio ʻa e ʻEikí ʻi heʻetau moʻuí?

• ‘E lava ke tokoni e lēsoni fakatātā ko ʻení ke fakahaaʻi e founga te tau lava ai ʻo ikunaʻi e faingataʻá: tuku ha meʻa maʻamaʻa, hangē ko ha foʻi pulu pelesitiki fuosiʻi, ʻi ha faʻoʻanga meʻa pea fakafonu ia ʻaki ha piini pe laise, ʻo aʻu ki he vaeuá. Fakaafe‘i ha taha ke ne lulululuʻi lelei pē e foʻi hiná kae ʻoua kuo ʻalu hake e foʻi pulú ki ʻolunga. Na‘e tatau fēfē ʻa Siosefa mo e foʻi pulú? ʻE lava ke vahevahe ʻe he kau mēmipa ʻo e kalasí ha ngaahi sīpinga ʻo hono tokoniʻi ʻe he ʻEikí ʻa Siosefa ke ne ikunaʻi e ngaahi faingataʻá mei he Sēnesi 37:5–11; 39; 40:1–19; 41:9–45. Te nau lava foki ʻo vahevahe e ngaahi taimi naʻe tokoniʻi ai kinautolu ʻe he ʻEikí ʻi ha ngaahi founga tatau.

• Te ke lava ʻo kole ange ki he kau mēmipa ʻo e kalasí ke hivaʻi pe lau e ngaahi lea ʻo ha himi fekauʻaki mo hono fakahoko ʻo e ngaahi fili ʻoku totonú, ʻo hangē ko e “Faitotonu Neongo ʻa e Luma” (Ngaahi Himi, fika 145). Hili iá, ʻe lava ʻe he kau mēmipa ʻo e kalasí ʻo maʻu e ngaahi fakakaukau mo e kupuʻi lea ʻi he Sēnesi 37:1–28; 39; 40:1–19; 41:9–45 ʻokú ne fakatātaaʻi e pōpoaki ʻo e himí. Na‘e tāpuekina fēfē ʻa Siosefa ʻi he taimi naʻá ne fai ai e meʻa ʻoku totonú, neongo ʻene faingataʻaʻiá? Ko e fē ha taimi kuo tāpuekina ai kitautolu ʻe he ʻEikí ʻi he ngaahi taimi faingataʻá ʻi heʻetau fai e meʻa ʻoku totonú?

Sēnesi 37:5–11; 40; 41:1–38

Kapau ʻoku tau faivelenga, ʻe tataki mo fakahinohinoʻi fakalangi kitautolu ʻe he ʻEikí.

• Neongo ʻoku ʻikai maʻu fakahā fakataautaha e taha kotoa pē ʻi he ngaahi misí, ʻoku ʻi ai ha ngaahi meʻa te tau lava ʻo ako fekauʻaki mo e fakahaá mei he ngaahi aʻusia ʻa Siosefá, kau tamaioʻeiki ʻa Feló, pea mo Felo. Te ke lava ʻo fakaafeʻi e kau mēmipa ʻo e kalasí ke toe vakaiʻi e Sēnesi 37:5–11; 40:5–8; 41:14–25, 37–38 pea vahevahe ha faʻahinga meʻa pē ʻoku nau ako fekauʻaki mo e fakahaá. Te ke lava foki ʻo fakaafeʻi kinautolu ke vahevahe e meʻa kuó ne tokoniʻi kinautolu ke nau mateuteu ke maʻu, mahino, mo ngāueʻi e fakahaá.

  Ko Siosefa ʻokú ne fakaʻuhinga e misí ʻi he fale fakapōpulá

  Joseph Interpreting the Butler and Bakerʻs Dreams (ʻOku Fakaʻuhingaʻi ʻe Siosefa e Misi ʻa e Tangata Fua Ipú mo e Tangata Taʻo Maá), tā ʻe François Gérard

Sēnesi 39:1–20

Te tau lava ʻo hola mei he ʻahiʻahí ʻi he tokoni mai ʻa e ʻEikí.

• Te ke lava ʻo kole ki he kau mēmipa ʻo e kalasí ke nau vahevahe e meʻa naʻa nau ako fekauʻaki mo hono matuʻuaki ʻo e ʻahiʻahí, ʻi heʻenau ako e Sēnesi 39 he uike ní. Ko e hā naʻe fai ʻe Siosefa ke ne ikunaʻi ai e ʻahiʻahí? (vakai, veesi 7–12). ʻOku ʻomi ʻe he vitiō “Pole ke Tuʻu Toko Taha” (ChurchofJesusChrist.org) ha ngaahi sīpinga ʻo ha niʻihi naʻa nau matuʻuaki ʻa e ʻahiʻahí. Fakakaukau ke kole ki he kau mēmipa ʻo e kalasí ke nau hiki ha lisi ʻo e ngaahi meʻa te tau lava ʻo fai ke maʻu e mālohi ʻo e ʻOtuá, ʻi he taimi ʻoku tau fehangahangai ai mo e ngaahi ʻahiʻahí. (ʻE lava ke maʻu ʻe he kau mēmipa ʻo e kalasí ha ngaahi fakakaukau ʻi he Mātiu 4:1–11 pe ʻi he ngaahi folofola ʻoku ʻi he “ ʻAhiʻahí, ʻAhiʻahiʻí” ʻi he Fakahinohino ki he Ngaahi Folofolá [scriptures.ChurchofJesusChrist.org].)

• Te ke faka‘aongaʻi fēfē e sīpinga ʻa Siosefá ke tokoniʻi e kau mēmipa ʻo e kalasí ke nau matuʻuaki e ʻahiʻahi ke fai ha angahala fakasekisualé? Makehe mei hono toe vakaiʻi ʻo e Sēnesi 39:1–20, ʻe lava ke toe fakamanatu ʻe he kalasí ʻa e “Haohaoa Fakasekisualé” (‘i he Ki Hono Fakamālohia ʻo e Toʻu Tupú [2011], 35–37). Te nau lava ʻo vahevahe e meʻa ʻoku nau ako fekauʻaki mo hono matuʻuaki ʻo e ngaahi fakakaukau, lea, mo e tōʻonga ʻoku iku ki he faiangahala fakasekisualé. ʻE lava ke tokoni hono toe vakaiʻi ʻo e “Fakatomalá” (ʻi he Ki Hono Fakamālohia ʻo e Toʻu Tupú, 28–29) ke mahino ki he kau mēmipa ʻo e kalasí ʻa e faingamālie ʻoku ʻomi ʻe Sīsū Kalaisi ke tau fakatomala aí.

Sēnesi 41:15–57

‘Oku totonu ke tau teuteu ki he ngaahi faingataʻa ʻe ala hokó.

• Te ke lava ʻo kole ange ki ha mēmipa ʻe taha ʻo e kalasí ke ne fakamatalaʻi e ngaahi misi ʻa Feló (vakai, Sēnesi 41:15–24) mo ha taha kehe ke ne vahevahe e ngaahi fakaʻuhinga ʻa Siosefá (vakai, veesi 25–32). Ko e hā naʻe fokotuʻu ʻe Siosefa ke faí? (vakai, veesi 33–36, 47–49). Ko e hā ha ngaahi lēsoni ʻoku ʻomi ʻe he talanoa ko ʻení ki hotau kuongá? (vakai ki he faleʻi ʻa Palesiteni Kōtoni B. Hingikelī ʻi he “Ngaahi Maʻuʻanga Tokoni Kehé”).

fakaʻilonga ki he ngaahi maʻuʻanga tokoni kehé

Ngaahi Maʻuʻanga Tokoni Kehé

Ko e teuteu ki he ngaahi taimi ‘o e faingataʻá.

Naʻe pehē ʻe Palesiteni Kōtoni B. Hingikelī: “ʻOku ou kole atu ke mou fakapotopoto ʻi hoʻomou fakamolé; mapuleʻi hoʻomou fakataú pea fakaʻehiʻehi mei he fakamoʻuá ʻi he lahi taha ʻe lavá. Totongi ʻa e moʻuá ʻi he vave taha ʻokú ke lavá. … Tuku ha paʻanga talifaki, neongo ʻo ka siʻisiʻi” (“To the Boys and to the Men,” Ensign, Nōvema 1998, 54).

Ko Hono Fakatupulaki ʻEtau Founga Akoʻí

“Ko e fakafanongó ko hano fakahaaʻi ia ʻo e ʻofá. “Kole ki he Tamai Hēvaní ke tokoni ʻi hono fakamahino atu kiate koe e lea ʻoku fai atu ʻe hoʻo kalasí. ʻI hoʻo tokanga lelei ki heʻenau ngaahi pōpoaki ʻoku lea ʻaki mo ʻikai lea ʻakí, ʻe mahino lelei ange ai kiate koe ʻenau fiemaʻú, mo e meʻa ʻoku nau hohaʻa mo tokanga ki aí” (Ko e Faiako ʻi he Founga ʻa e Fakamoʻuí, 35).