Red Si

4–10 Epril

Eksodas 14–17

Eksodas 14–17: “!Yufala i mas stanap strong! Tedei Bambae Yufala I Luk Ol Samting we Hae God Bambae I Mekem blong Sevem Yumi!”

Tingbaot olsem wanem ol eksperiens blong ol pikinini blong Isrel oli blong ol memba blong klas tu. ?Wijwan eksperiens bae i help moa blong oli toktok raon long hem?

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Eksodas 14-17 i fulap long ol gudfala stori blong stap tingbaot long olgeta. Wan memba blong klas i save droem wan pikja blong wan samting we i bin hapen long ol japta ia, mo ol nara memba blong klas oli save traem faenem wanem nao hem i stap droem. Askem olgeta blong serem wanem we oli lanem aot long stori ia.

Stap Tijim Doktrin

Eksodas 14

Papa long Heven i mekem yumi kam fri taem we yumi stap folem Spirit.

• Long Ol Man Isrel, i luk olsem se Red Si i olsem wan ples we i nomo gat nara ples blong ronwe long hem; be God i bin save sam samting we olgeta oli no bin save. Sapos yufala i luklukbak long stori blong merikel taem we oli bin krosem Red Si, bae i save mekem se ol memba blong klas oli tingbaot ol taem we God i bin mekem olgeta oli kam fri long ol tes blong olgeta. Maet bae yu save askem ol memba blong klas blong luklukbak long Eksodas 14 mo serem wanem i givim moa insperesen aot long stori ia. Mo tu, leftemap ol tingting blong serem ol eksperiens blong olgeta wetem wei blong kam fri long ol tes, wetem ol ves we oli kamaot long japta ia we i bildimap fet blong olgeta se God bae i save mekem yumi kam fri.

• Bae i intresting tu blong ridim Doktrin mo Ol Kavenan 8:2–3 tugeta. ?Wanem nao ol ves ia oli stap tijim yumi abaot Moses? ?Olsem wanem nao ol ves ia oli jenisim wei we yumi stap lukluk long ol samting we oli bin hapen long Eksodas 14? ?Wanem nao oli stap talem abaot wei blong lukaotem blong kam fri long ol tes blong yumi? Tingting long toktok ia we i stap long “Sam Moa Risos”, mo wanem bae hem i save ademap long toktok storian blong klas.

Mana we i bin kam long God, i bin fidim Isrel long saed blong bodi; yumi nidim tu blong kakae long saed blong spirit. Fresco i kam long Leopold Bruckner

Eksodas 15:23–27; 16:1–15; 17:1–7

Lod bambae i lukluk long ol nid blong yumi taem yumi stap wokbaot i go tru long laef.

• Eksodas 15–17 i givim plante stori we i save bildimap bilif blong ol memba blong klas long paoa blong Lod, mo glad hat blong Lod blong lukluk long ol nid blong yumi long saed blong bodi mo long saed blong spirit. Maet wanwan memba blong klas i save stadi long olgeta skripja ia, mo lukaotem ol mesej long saed blong spirit: Eksodas 15:23–27; 16:1–15; 17:1–7. Givim janis long samfala memba blong klas blong serem wanem we oli faenem. ?Olsem wanem nao yumi save yusum ol stori ia blong leftemap tingting blong wan we i gat sam nid long saed blong laef ia mo long saed blong spirit?

• Ol memba blong klas oli save rid tu long ol ves ia mo oli faenem ol eksampol blong stap komplen. ?Olsem wanem yumi save eksplenem long wan, mining blong stap komplen? ?Wanem nao sam risal blong stap komplen we i mekem se i gat denja we i kam wetem fasin ia? Maet ol memba blong klas oli save serem sam advaes long wei blong stap longwe long temtesen blong stap komplen agensem Lod taem yumi stap gotru long ol tes we oli had.

• Bae i save helpem ol memba blong klas blong komperem mana we oli tokbaot long Eksodas 16 wetem kaekae ia we spirit blong yumi i nidim. ?Wanem semfala samting yumi luk? ?Wanem lesen long saed blong spirit bae Lod i wantem blong tijim Ol Man Isrel taem Hem i bin sendem mana long wei ia we Hem i bin mekem? (luk long Jon 6:31–35, 48–58). Yu save soem tu wan o moa long wan long ol vidio we i stap long “Sam Moa Risos.”

Eksodas 17:8–16

Yumi gat blesing taem yumi stap sastenem ol lida blong yumi.

• Stori blong Eron mo Huru we tufala i stap holem han blong Moses, i soemaot hamas i impoten blong sastenem, o sapotem olgeta we God i singaotem olgeta blong lidim yumi. Yu save invaetem samfala memba blong klas blong aktemaot eksperiens ia long sem taem we wan nara memba blong klas i stap ridim stori ia laod. ?Olsem wanem nao ol hadwok blong Eron mo Huru blong stap holem ol han blong Moses i go antap, i semmak long ol hadwok blong yumi blong sapotem ol lida blong yumi? ?Olsem wanem nao bae yumi soemaot sapot long ol lida blong yumi?

Sam Moa Risos

Yu save kasem daereksen we i blong yuwan nomo.

Sista Michelle Craig i bin tijim:

“Olsem ol fetful disaepol blong Jisas Kraes, yu save kasem ol insperesen mo revelesen blong yuwan, we oli go wetem ol komanmen blong Hem we oli stret blong yuwan. Yu gat ol spesel misin mo rol blong mekem long laef mo bae i gat ol spesel help blong fulfilim olgeta.

“Nifae, brata blong Jared, mo iven, Moses, oli bin gat wan bigfala wota blong krosem—mo wanwan long olgeta oli bin mekem long ol defdefren wei. Nifae i wokem ‘ol timba long fasin we i defren’ [1 Nifae 18:1]. Brata blong Jared i bildim “ol sip we i sat gud olsem wan dis’ [luk long Ita 6:5–8]. Mo Moses “i wokbaot long drae graon long medel blong solwota’ [Eksodas 14:29].

“Olgeta wanwan oli kasem ol daereksen we i kam stret blong olgetawan mo wanwan i trastem mo mekem folem. Lod i save gud olgeta we oli stap obei mo, long toktok blong Nifae, ‘bae i mekem rere wan rod blong yumi, blong mekem samting ia we hem i talem long yumi blong mekem’ [1 Nifae 3:7]. Tekem not se Nifae i talem, ‘wan wei’—be i no ‘wei ia .’

“?Yumi stap mestem o no stap luksave wanwan wok we Lod i stap givim from se Hem i rere long ‘wan wei’ we i defren long wanem we yumi stap tingting long hem?” (“Paoa long Saed blong Spirit,” Liahona, Nov 2019, 19).

Ol Vidio

Insaed long ol vidio ia we oli stap long Inglis, “Daily Bread: Pattern,” “Daily Bread: Experience,” mo “Daily Bread: Change” (ChurchofJesusChrist.org), Elda D. Todd Christofferson i bin serem sam niu tingting long saed blong merikel blong mana.

Stap Kam Antap long Fasin blong Yumi blong Stap Tij

Leftemap tingting blong ol narawan blong oli serem testemoni blong olgeta. Plante long olgeta ia we yu stap tijim oli gat ol strong witnes blong olgetawan abaot trutok blong serem. Invaetem olgeta blong serem ol testemoni ia taem oli askem ol simpol kwestin, olsem: “Olsem wanem nao yu bin kasem blesing taem yu bin folem profet?” (Luk tu long Teaching in the Savior’s Way, 11.)