maonten

Wan maonten, o bigfala hil long Ijip we oli stap biliv se hem i Bigfala Hil blong Sinae.

18–24 Epril

Eksodas 18–20

“Bambae Mifala I Mekem Olgeta Samting we Hae God I Talem”

Ridim Eksodas 18–20, mo raetemdaon ol tingting mo ol filing we yu gat long wei blong helpem ol memba blong klas blong yu blong lanem samting aot long ol japta ia. Iven ol simpol tingting o filing oli save lidim yu blong gat ol eksperiens we yu lanem samting we i gat mining.

Raetemdaon Ol Filing mo Tingting blong Yu

serem aekon

Invaetem Man blong Serem Wanem Oli Gat

Blong invaetem ol memba blong klas blong oli serem wanem we oli bin lanem, yu save raetem long bod 18, 19, and 20—ol japta we oli bin ridim long Eksodas long wik ia. Askem ol memba blong klas blong raetem long saed blong wanwan namba blong japta, ol namba blong ol ves ia we oli wantem toktok raon long ol aot long japta ia. Taem we ol memba blong klas oli serem ol niu tingting blong olgeta, askem ol nara memba blong klas sapos oli gat ol niu tingting abaot ol semfala skripja ia.

tijing aekon

Stap Tijim Doktrin

Eksodas 18:13–26

Yumi save help blong tekem hevi wok ia blong stap mekem wok blong Lod.

• Yu save leftemap tingting blong klas blong yu blong toktok raon long kaonsel blong Jetro we hem i bin givim long Moses (luk long Eksodas 18:13–26) taem yu askem olgeta blong traem pikjarem long maen blong olgeta se oli stap storian wetem wan we i stap filim se ol koling blong Jos we hem i gat, ol wok blong famli, o ol nara responsabiliti oli “hevi tumas” mo bae hem i “spolem [hem] nomo” (Eksodas 18:18). ?Olsem wanem nao kaonsel we i stap long Eksodas 18:13–26 i save help? ?Wanem moa advaes bae yumi save serem aot long eksperiens blong yumiwan?

• Sapos yufala i toktok raon long Eksodas 18:13–26, i save givim wan janis blong toktok raon long wei we wok blong givhan i save helpem yumi blong “tekem hevi wok” wetem ol lida blong yumi insaed long wok ia blong Lod (Eksodas 18:22). ?Wanem fasin nao Jetro i talem long Moses blong lukaotem insaed long olgeta we bae oli stap givim seves olsem “ol lida” blong ol pipol? (luk long Eksodas 18:21). ?From wanem ol fasin ia oli impoten tumas long ol hadwok blong yumi blong givhan long wanwan long yumi? ?Olsem wanem nao blong stap givhan long ol memba blong famli, ol memba blong Jos, mo ol narawan, i save help blong “tekem hevi wok” aot long ol lida blong yumi long Jos? Olsem pat blong toktok storian insaed long klas, yu save soem wan long ol vidio ia we oli faenem long ministering.ChurchofJesusChrist.org.

  man we i stap sekhan wetem wan woman

  Blong stap givhan long ol narawan i wan wei we yumi save tekpat long wok ia blong Lod.

Eksodas 20:2–11

Yumi mas putum Lod faswan insaed long laef blong yumi.

• ?Bae yu save tingting abaot wan bigfala wok we i wok gud moa taem yumi finisim ol moa impoten step faswan? (Insaed long ol eksampol i save gat fasin blong faenem ansa blong wan matematik problem, o blong stap folem wan resipi). Serem, wetem klas, sam eksampol we yu save gud long olgeta, mo invaetem olgeta blong tingting long sam eksampol blong olgetawan. ?olsem wanem nao, blong stap finisim ol step we oli moa impoten oli go wetem ol komanmen we oli stap long Eksodas 20:2–11? ?Wanem nao ol komanmen oli stap tijim yumi abaot fasin blong putum God i kam faswan insaed long laef blong yumi? ?Wanem sam long ol samting we bae yumi gat temtesen blong putum i kam faswan long Hem? (Blong gat sam eksampol, luk long toktok we i stap long “Sam Moa Risos.”) Blong luklukbak long Eksodas 20:2–11 bae i save helpem ol memba blong klas blong yu blong tingtingbak long ol komitmen blong olgeta blong stap putum God i kam faswan.

Eksodas 20:2–17

God i gat bigfala sore.

• ?Olsem wanem nao yu save helpem ol memba blong klas blong yu blong andastanem hamas Ol Ten Komanmen ia oli impoten long taem blong yumi tedei? Yu save serem klas blong oli sidaon tutu, mo invaetem olgeta blong stap ridim Eksodas 20:2–17 mo afta, toktok raon long hao fasin blong stap obei long wanwan long ol komanmen ia bae i blesem olgeta, famli blong olgeta, mo ol pipol raon long olgeta. Mo tu, yu save soem vidio ia, “Obedience to the Ten Commandments” (ChurchofJesusChrist.org). ?Wanem blesing nao Papa long Heven i promesem yumi blong stap obei long ol komanmen blong Hem? (Blong eksampol, luk long Mosaea 2:41). ?Olsem wanem ol komanmen ia oli soemaot lav we God i gat long yumi?

additional resources icon

Sam Moa Risos

I no gat wan narafala god.

Presiden Spencer W. Kimball i bin tijim se i gat samting we i semsemmak bitwin fasin blong bifo blong stap wosipim ol pikja we oli katem long ston o wud, mo fasin blong ol pipol tedei. Hem i talem:

“Fasin blong stap wosipim ol aedol i wan long ol bigfala sin. …

“Ol aedol blong tedei, o ol giaman god oli save ol samting olsem ol klos, ol haos, ol bisnis, ol masin, ol trak, ol bot blong flas, mo plante nara samting we oli save karemaot yu long rod ia blong kam olsem wan god. …

“Ol samting we oli no save tajem, oli save kam olsem ol god. Ol digri mo ol leta, mo ol taetol oli save kam ol aedol. …

“Plante pipol oli stap bildim mo putum samting insaed long wan hom, mo oli pem wan trak fastaem—mo afta, oli faenem se oli ‘nomo save’ pem taeting. ?Huia nao oli stap wosipim? Hem ia i no Lod blong heven mo wol ia. …

“Plante oli stap wosipim taem blong sut long bus, go huk, go holidei, ol piknik long wiken mo ol nara taem blong go aot. Ol narawan oli gat olsem aedol ol gem blong spot, besbol, futbol, faet wetem buluk, o plei golf. …

“Mo yet, wan nara pikja we ol man oli stap wosipim, i paoa mo fasin blong kam haeman. … Olgeta god blong paoa, bigfala rij, mo paoa blong lidim tingting, oli ol samting we man i wantem tumas, mo oli ril i semmak olsem ol smol buluk we ol pikinini blong Isrel oli wokem long gol long waelples” (Teachings of Presidents of the Church: Spencer W. Kimball [2006], 146–47).

Stap Kam Antap long Fasin blong Yumi blong Stap Tij

Lukluk nomo long samfala prinsipol. “I gat fulap samting blong toktok raon long hem long wanwan lesen, be i no nid blong kavremap evri samting long wan klas ia nomo blong save tajem hat blong wan—plante taem, wan o tu ki poen nomo oli naf” (Teaching in the Savior’s Way, 7).