Jehova we i kamkamaot long Moses mo ol elda blong Isrel

Pikja droing blong Jehova we i kamkamaot long Moses mo ol 70 elda blong Isrel, i kam long Jerry Harston

25 Epril–1 Mei

Eksodas 24; 31–34

“Mi Bambae Mi Go Wetem Yu”

Letem ol toktok ia we oli kam long Elda Jeffrey R. Holland oli lidim wei we yu stap rere blong tij: “Plante long ol pipol oli no kam long Jos blong stap lukaotem wan niu samting long saed blong gospel. … Be oli kam blong lukaotem blong gat wan eksperiens long saed blong spirit. … Oli wantem se fet blong olgeta i kam strong, mo hop blong olgeta i kam niu bakegen” (“A Teacher Come from God,” Ensign, May 1998, 26).

Raetemdaon Ol Filing mo Tingting blong Yu

serem pikja bokis

Invaetem Man blong Serem Wanem Oli Gat

Ol memba blong klas oli save pikjarem long maen blong olgeta se wan fren i talem se: “Mi no ridim OlTesteman; hem i no go wetem laef blong mi.” Askem olgeta blong oli givim wan ansa taem oli serem wan samting we oli bin faenem se i gat mining insaed long las stadi blong olgeta long saed blong OlTesteman.

tijing aekon

Stap Tijim Doktrin

Eksodas 31:12–17

Yumi ona long Sabat olsem wan saen blong komitmen blong yumi long Lod.

• Maet yu save stat taem yu askem ol memba blong klas sapos oli bin eksplenem finis long wan memba blong famli, o long wan fren, se from wanem oli tekem se Ol Sandei oli defren long ol nara dei. Invaetem olgeta blong serem wanem we oli bin talem, o wanem bae oli talem long fiuja. Sapos yufala i ridim Eksodas 31:12–17 o toktok insaed long “Sam Moa Risos” i save givim sam moa tingting long olgeta. ?Olsem wanem nao ol joes abaot Sabat oli soem komitmen blong yumi long Jisas Kraes?

• Iven we ol panismen we oli stap tokbaot insaed long Eksodas 31:14–15 oli no blong tedei, oli stap talem strong nomo hao nao Lod i stap filim abaot Sabat. ?From wanem komanmen ia i impoten tumas? Blong stap toktok raon long ol skripja ia i save help: Eksodas 31:12–17; Aesea 58:13–14; Doktrin mo Ol Kavenan 59:9–13.

  pipol i stap wokbaot long fored blong jos

  Taem yumi stap ona long Sabat, yumi stap soem lav ia we yumi gat long Lod.

Eksodas 32; 34:1–17

Blong mekem sin, i blong tanem baksaed long God, be Hem i putum wan rod blong kambak.

• Blong helpem ol memba blong klas blong tingting hevi mo tekem long olgetawan stori ia long Eksodas 32, faswan, askem olgeta blong luklukbak long japta ia olgeta wanwan, o long ol grup. Afta, askem sam memba blong klas blong oli mekem rol blong Ol Man Isrel, we oli kam blong oli nomo save wet long Moses blong hem i kambak, mo oli bin disaed blong mekem wan aedol we oli wokem wetem gol. ?Wanem filing nao i bin save lidim olgeta blong mekem wosip blong aedol? Ol nara memba blong klas oli save traem blong winim tingting blong olgeta blong oli mas stap tru long Lod mo long profet blong Hem. Ol memba blong klas oli tokbaot wanem i givim insperesen long olgeta blong oli stap kipim ol kavenan blong olgeta. ?Wanem nao yumi save mekem blong helpem olgeta we maet oli gat hadtaem blong kipim ol kavenan blong olgeta?

• Taem ol pipol oli ridim OlTesteman, samtaem, oli sapraes long strik panis we Lod i putum from sin. Eksodas 34:1–9 i save helpem olgeta blong luk se taem we God i no akseptem sin, Hem i gat sore tu, mo i stap givim fogivnes long olgeta we oli sakem sin. Maet ol memba blong klas oli save ridim skripja ia mo tingting hevi long ol kwestin olsem: ?Wanem nao yumi lanem abaot Lod aot long ol ves ia? ?From wanem nao yumi nid blong save ol samting ia abaot Hem? Yu save poenemaot se Josef Smit Transelsen, Eksodas 34:7 (insaed long Eksodas 34:7, futnot f) i mekem i klia se God bae i no “stretem olgeta we oli stap agens.” ?Hemia i minim wanem? Maet ol memba blong klas oli save serem olsem wanem oli bin witnesem God we i gat sore long olgeta. ?Olsem wanem i posibol blong God i gat sore we i stret evriwan, mo semtaem i gat fasin blong mekem i stret evriwan long ol man? (luk long Alma 42:13–15).

• Eksodas 34:6–17, bae yumi save luk se hem i wan instraksen blong helpem Ol Man Isrel blong oli sakem sin ia blong olgeta blong stap wosipim ol aedol (we oli tokbaot gud long Eksodas 32). ?Wanem nao yumi faenem insaed long ol ves ia we maet i bin save helpem Ol Man Isrel blong sakem sin? ?Wanem nao yu lanem abaot Lod mo fasin blong sakem sin aot long instraksen ia?

Eksodas 33:11–17

Yumi nidim blong God i stap wetem yumi long laef blong yumi.

• ?Olsem wanem bae yu helpem ol memba blong klas blong oli praktisim wanem we Lod i bin talem long Moses long Eksodas 33:11–17? Yu save stat taem yufala i luklukbak long wok ia we God i stil nidim Moses blong mekem i kamtru (luk long Eksodas 33:1–3). ?Wanem we yumi faenem insaed long ol ves 11–17 we maet i bin mekem Moses i kam strong moa long tingting mo maet i bin givim kamfot long hem? Ol memba blong klas oli save tingting abaot wan samting we God i wantem olgeta blong mekem—olsem blong mekem wan wok insaed long wan Jos koling, mekem wan famli responsabiliti, o wan givhan janis. Afta, oli save ridim ol ves ia bakegen. ?Wanem niu tingting yumi kasem abaot wei we God bae i sapotem yumi?

sam moa risos aekon

Sam Moa Risos

Sabat hem i wan saen.

Presiden Russell M. Nelson i eksplenem hao: “Taem mi mi bin yangfala, mi bin stadi long wok blong ol narafala pipol we oli bin putum tugeta wan lis blong ol samting blong mekem, mo ol samting blong no mekem long Sabat. Longtaem afta nomo mi bin lanem aot long ol skripja se hao mi mekem samting, mo fasin blong mi long Sabat, i saen ia nao bitwin mi mo Papa blong mi long Heven [luk long Eksodas 31:13; Esikel 20:12, 20]. Wetem samting ia we mi andastanem, mi nomo nidim ol lis blong ol samting blong mekem mo blong no mekem. Taem mi mas mekem desisen se wan aktiviti i stret o no long Sabat dei, mi stap askem miwan nomo: ‘Wanem saen mi wantem givim long God?’ Kwestin ia i mekem se ol joes blong mi long saed blong Sabat dei, oli klia olsem glas nomo” (“The Sabbath Is a Delight,” Liahona, May 2015, 130).

Kam Antap long Fasin blong Yumi blong Stap Tij

Tij wetem Spirit. “Nambawan stamba tingting blong evri samting we wan gospel tija i mekem—evri kwestin, evri skripja, evri aktiviti—hem i blong invaetem Spirit blong bildimap fet mo blong invaetem evriwan blong kam long Kraes” (Teaching in the Savior’s Way, 10).