“16–22 Mei. Eksodas 6–8; 15; 18; 29–30; 34: ‘Mo Yufala I Mas Lukaot Gud blong Yufala I No Fogetem Hem,’” Kam Folem Mi—Blong Sandei Skul: OlTesteman 2022 (2021)
“16–22 Mei. Dutronome 6–8; 15; 18; 29–30; 34,” Kam Folem Mi—Blong Sandei Skul: 2022
Pikja droing blong Moses antap long Maont Nebo, © Providence Collection/we oli karem laesens long goodsalt.com
16–22 Mei
Dutronome 6–8; 15; 18; 29–30; 34
“Mo Yufala I Mas Lukaot Gud blong Yufala I No Fogetem Hem”
Moses i bin kasem insperesen blong tijim ol pikinini blong Isrel folem ol nid blong olgeta (luk long Dutronome 6:1). Taem yu stap stadi long Dutronome, lukaotem insperesen blong save wanem prinsipol blong tijim, folem ol nid blong ol memba.
Raetemdaon Ol Filing mo Tingting blong Yu
Invaetem Man blong Serem Wanem Oli Gat
From se insaed long Dutronome i gat ol las toktok blong Moses i go long ol pikinini blong Isrel, yu save invaetem ol memba blong klas blong oli serem wan samting we oli faenem insaed long Dutronome we, olgeta tu, oli wantem putum insaed long ol las toktok blong olgeta i go long ol pikinini blong olgeta, o ol apupikinini blong olgeta. Taem we oli stap serem hemia, askem olgeta blong eksplenem from wanem oli jusum ol toktok ia.
Stap Tijim Doktrin
Dutronome 6:4–7, 20–25; 8:2–5, 11–17; 29:18–20; 30:6–10, 15–20
Lod i stap askem yumi blong lavem Hem wetem ful hat blong yumi.
-
Truaot long Dutronome, i gat ol ples long skripja we i pusum yumi blong tingting abaot situesen, long saed blong spirit, blong hat blong yumi. Blong helpem ol memba blong klas blong oli serem ol tingting blong olgeta abaot ol skripja ia, yu save droem wan hat antap long bod. Afta, serem olgeta skripja ia long ol memba blong klas: Dutronome 6:4–7, 20–25; 8:2–5, 11–17; 29:18–20; 30:6–10, 15–20. Invaetem ol memba blong klas blong raetem skripja insaed long hat sapos hem i stap tij abaot wan samting we yumi sapos blong gat long hat blong yumi, o raetem skripja aotsaed long hat sapos hem i stap tij abaot wan samting we yumi sapos blong stap longwe long hem. ?Hem i minim wanem blong givim ful hat blong yumi long Papa long Heven?
-
?Olsem wanem yumi stap eksplenem long famli blong yumi mo ol narawan from wanem yumi stap obei long ol komanmen blong God? Afta we yufala i toktok raon long kwestin ia, ol memba blong klas oli save ridim Dutronome 6:4–7, 20–25 o toktok we i stap long “Sam Moa Risos” mo blong oli serem ol tingting blong olgeta. ?Olsem wanem ol niu tingting ia oli jenisim wei we yumi stap filim abaot ol komanmen, o abaot ol kavenan?
“Yufala i mas tijim ol pikinini blong yufala long [ol toktok blong Lod.]”
-
Samtaem, i save help blong harem ol aedia abaot ol wei we ol narawan oli stap tijim mo stap lanem gospel insaed long hom blong olgeta. Taem yufala i toktok raon long wei we ol memba blong klas oli stap folem kaonsel insaed long Dutronome 6:4–9, 20–25 i save givim wan janis long klas blong yufala blong yufala i lan aot long wanwan long yufala. ?Wanem nao yumi stap tijim mo stap “tokbaot” (ves 7) abaot toktok blong God olsem we ol ves ia oli stap talem? ?Wanem eksperiens nao yumi save serem, we insaed long ol, Lod i bin lidim yumi long ol hadwok blong yumi?
Blong stap helpem olgeta we oli stap long nid i minim blong gat ol han we oli save givim samting, mo wan hat we i wantem givim.
-
Be yumi no kasem dei ia yet we “bae i no gat puaman long medel blong yumi” (Dutronome 15:4), mekem se olgeta prinsipol long saed blong fasin blong helpem olgeta we oli pua insaed long Dutronome 15, oli impoten yet tedei, iven we ol kaen praktis ia long saed blong ol kaon mo ol wokman, i bin jenis. Yu save invaetem ol memba blong klas blong luklukbak long ol ves 1–15 mo faenem olgeta prinsipol long saed blong stap helpem ol puaman mo olgeta long nid, we bae oli save toktok raon long ol insaed long klas. Ol kwestin olsem oli save help: ?Hem i minim wanem blong “yumi no mas griri … we yumi mas givhan” long olgeta we oli stap long nid? (ol ves 8, 11). ?Wanem rol nao hat blong yumi i plei blong stap helpem ol narawan? (luk long ol ves 7, 9–10). ?Wanem nao yumi save lanem abaot fasin blong stap helpem olgeta we oli stap long nid, aot long eksampol blong Lod? (luk long ves 15).
Lod i stap invaetem yumi blong jusum bitwin “laef mo gud, mo ded mo ivel.”
-
Bae i intresting blong komperem ol toktok blong Moses insaed long Dutronome wetem sam long ol las tijing blong Lihae i go long famli blong hem, we yumi ridim insaed long 2 Nifae 1–4. Maet ol memba blong klas oli save faenem ol samting we oli semsemmak, mo ol samting we oli defdefren bitwin olgeta skripja ia: Dutronome 29:9 mo 2 Nifae 4:4; Dutronome 30:15–20 mo 2 Nifae 2:26–29. ?Olsem wanem nao Lihae i eksplenem moa wanem we Moses i bin tijim? ?From wanem ol toktok olsem laef mo ded oli wan gudfala wei blong tokbaot ol joes blong yumi taem we yumi “holem” o “gowe” long olgeta komanmen blong God? (Dutronome 30:16–17). Ol memba blong klas oli save serem wanem nao oli faenem long ol skripja ia we i givim insperesen long olgeta blong “wantem laef” (Dutronome 30:19).
Sam Moa Risos
Yumi stap kipim ol kavenan blong yumi from se yumi lavem God.
Presiden Linda K. Burton i bin tijim:
“Aot long evri risen we yumi save gat blong yumi mas wok strong moa wetem strong tingting long fasin blong kipim ol kavenan, risen ia nao i moa impoten bitim evriwan long olgeta—lav. …
“‘Sapos yumi save glad tumas long ol plante blesing we oli blong yumi tru long fasin we Lod i pemaot yumi, nao i no gat wan samting we Lod bae i askem long yumi mo bae yumi no wantem mekem wetem ful hat mo tingting’ [Joseph Fielding Smith, “Importance of the Sacrament Meeting,” Relief Society Magazine, Oct. 1943, 592]. Folem toktok ia we i kam long Presiden Josef Filding Smit, blong stap kipim ol kavenan, hem i wan wei blong talemaot lav we yumi gat long Atonmen ia we man i no save andastanem, we i no gat en, we Sevya mo Ridima blong yumi i mekem, mo i no gat wan wei blong Papa long Heven i gat blong talemaot stret lav ia we Hem i gat long yumi” (“The Power, Joy, and Love of Covenant Keeping,” Liahona, Nov. 2013, 114).
Stap Kam Antap long Fasin blong Yumi blong Stap Tij
Lisin. “Blong stap lisin, hem i wan aksen blong lav. … Askem Papa long Heven blong helpem yu blong andastanem wanem nao ol memba blong klas oli gat blong talem. Taem yu lisin gud long ol mesej blong olgeta we oli talem mo hemia we oli no talem, bambae yu kam blong andastanem gud moa nid, wari, mo wanem oli wantem” (Teaching in the Savior’s Way, 34).