Moses i stap odenem Josua

Pikja droing blong Moses i stap odenem Josua, i kam long Darrell Thomas

23–29 Mei

Josua 1–8; 23–24

“Tingting blong Yu I Mas Strong, mo Yu Mas Stanap Strong Oltaem”

Taem yu stap ridim Josua 1–8 mo 23–24, tingting long advaes ia blong “yu mas tingting gud long ol tok blong [Lod] long dei mo long naet” (Josua 1:8). Luklukgud long ol kwaet toktok blong Spirit we oli kam long yu. Olgeta kwaet toktok ia oli save lidim yu blong gat ol aedia blong tijim klas blong yu.

Raetemdaon Ol Filing mo Tingting blong Yu

serem pikja bokis

Invaetem Man blong Serem Wanem Oli Gat

Invaetem ol memba blong klas blong oli serem wan skripja, aot long riding blong olgeta long wik ia, we i bin leftemap fet we oli gat long Jisas Kraes. Eksampol: maet oli bin tingting hevi long samfala wei we misin blong Josua i mekem olgeta oli tingbaot Jisas Kraes. ?From wanem nao yumi glad from ol stori insaed long Buk blong Josua?

tijing aekon

Stap Tijim Doktrin

Josua 1:1–9

“Tingting blong Yu I Mas Strong, Yu No Mas Fraet, Yu Mas Stanap Strong Oltaem.”

• Oli talem long Josua plante taem: “Tingting blong yu i mas strong, yu no mas fraet, yu mas stanap strong oltaem” (luk long Dutronome 31:7, 23; Josua 1:6–7, 9). Maet ol memba blong klas oli lanem samting sapos oli toktok raon long wanem nao Lod i minim long sentens ia. Oli save luklukgud insaed long Josua 1:1–9 blong faenem kaonsel we Lod i bin givim long Josua blong helpem hem blong no mas fraet mo stanap strong. Oli save serem tu ol eksampol blong ol pipol we oli save olgeta we oli bin gat ol kaen tes olsem. ?Olsem wanem nao Josua i bin soem se hem i gat paoa long bodi mo long tingting insaed long ol histri we yumi save faenem insaed long Buk blong Josua? (Eksampol: luk long ol japta 3, 6, mo 8). Maet ol memba blong klas oli save serem olsem wanem oli stap traem blong no mas fraet mo stanap strong.

Josua 1:8

Toktok blong God i save mekem se ol wok blong yumi i gat frut blong hem.

• Blong leftemap tingting blong ol memba blong klas blong mekem skripja stadi blong olgetawan mo wetem famli, yufala i save ridim Josua 1:8 insaed long klas. ?Wanem nao yumi lanem aot long ol ves ia abaot wei blong stadi long ol skripja? Maet ol memba blong klas oli save serem wanem we oli stap mekem blong “tingting gud” long ol skripja “dei mo naet.” ?Olsem wanem nao Lod i mekem se “ol wok blong yumi i gat frut blong hem,” mo “yumi save win” taem yumi bin stap stadi long toktok blong Hem?

  woman we i stap ridim ol skripja

  Toktok blong God i save mekem se “ol wok blong [yumi] i gat frut blong hem” (Josua 1:8).

Josua 3–4

Yumi save gat ol “sapraes” blong God long laef.

• Maet ol memba blong klas oli lanem samting sapos oli luklukbak, blong wan sot taem, long stori blong stori blong Ol Man Isrel we oli stap krosem Jodan Reva. Yu save serem klas blong oli sidaon tutu, mo invaetem wanwan smol grup ia blong oli talem stori long wanwan long olgeta, mo wan i ridim wan sentens, mo narawan i ridim nara sentens folem (leftemap tingting blong olgeta blong lukluk long Josua 3 sapos oli nid blong tingbaot wanem i stori ia). Afta, olsem wan klas, oli save toktok raon long eni ditel we i bin kamaot klia long olgeta. ?Wanem samting yumi lanem aot long stori ia we i save helpem yumi blong gat eksperiens long ol sapraes we Lod i mekem long yumi insaed long laef blong yumi? (ves 5). ?Wanem “sapraes” nao Hem i bin mekem blong yumi? ?From wanem nao hem i impoten blong wanwan jeneresen i gat ol eksperiens long saed blong spirit we i stap tijim olgeta se “paoa blong hem i bigwan tumas”?(Josua 4:24).

• I nomata se yumi evriwan i nidim blong gat ol eksperiens we oli stap bildimap fet blong yumi, blong stap tingbaot wanem we Lod i bin mekem blong ol bubu blong yumi, hem i impoten tu. Folem wanem we i stap long Josua 4, ?wanem nao Ol Man Isrel oli bin mekem blong helpem ol fiuja jeneresen oli tingbaot taem ia we oli bin krosem Jodan Reva? (luk long Josua 4:1–7). ?Wanem nao yumi save mekem blong meksua se ol fiuja jeneresen oli no fogetem ol eksperiens blong yumi?

Josua 6–8

Fasin blong stap obei i tekem paoa blong God i kam insaed long laef blong mi.

• Aotlaen blong wik ia, insaed long Kam Folem Mi—Blong Wanwan Man, Woman mo Famli i talem blong komperem ol faet blong Ol Man Isrel agensem Ol Man Kenan, insaed long Josua 6–8 wetem ol faet blong yumi wanwan agensem temtesen. Yu save askem ol memba blong klas abaot wanem tingting mo filing oli bin gat taem we oli bin ridim olgeta japta ia, wetem tingting blong komperem ol samting ia, long maen blong olgeta. O, yu save poenem olgeta i go long ol spesifik ves we man i luk se i stret wetem ol faet blong yumi tedei blong stap longwe long sin, mo oli save tokbaot wanem ol ves ia oli stap tijim abaot wei blong kasem o yusum paoa blong God insaed long laef blong yumi. Sam long ol ves ia, oli Josua 6:1–5, 18, 20; 7:11–13.

Josua 23–24

“Naoia yufala i mas jusumaot huia bambae yufala i wok blong hem.”

• Maet bae i save helpem ol memba blong klas blong praktisim wanem i stap long Josua 23–24 long olgetawan sapos oli tekem se olgeta nao oli Ol Man Isrel we oli stap lisin long Josua we i givim advaes ia long olgeta taem hem i stap long en blong laef blong hem. Yu save givim sam ves long olgeta blong oli ridim saelen, mo afta, askem olgeta blong serem wan samting aot long ol ves ia we bae i givim olgeta insperesen blong stap fetful long Lod. Mo tu, oli save serem olsem wanem, olgetawan, oli bin mekem desisen ia abaot “[huia bae oli biaen long hem]” (Josua 24:15). ?From wanem oli bin mekem desisen ia?

• Yu save invaetem ol memba blong klas blong jusum wan sentens aot long Josua 23–24 we i givim insperesen long olgeta blong jusum blong stap biaen long God, mo afta, mekem wan posta, o wan posta wetem ol toktok blong sentens ia blong hangem long hom o putum long sosol media.

Kam Antap long Fasin blong Yumi blong Stap Tij

Fasin blong gro long saed blong spirit, i stap hapen insaed long hom. Ol memba blong klas blong yu, oli nidim blong gat eksperiens blong olgetawan long saed blong spirit aotsaed long klas blong save stap strong long saed blong spirit. Faenem ol wei blong yusum sot taem we yu gat wetem olgeta blong givim insperesen long olgeta blong oli fidim olgetawan long saed blong spirit wetem ol skripja, long hom—oli save mekem hemia olgetawan mo wetem famli blong olgeta. (Luk long Teaching in the Savior’s Way, 18.)