2–8 Mei

Eksodas 35–40; Levitikas 1; 16; 19

“Tabu Fasin long Lod”

Taem yu stap gat ol eksperiens we oli gat mining abaot fasin blong stap stadi long ol skripja, bae yu save tij mo testifae taem yu stap mit wetem ol memba blong klas long Sandei. ?Wanem nao yu save mekem blong leftemap tingting blong ol memba blong klas blong mekem sem samting?

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Olgeta japta we oli stap long riding blong wik ia oli yusum ol simbol blong tij abaot Jisas Kraes mo sakrifaes blong Hem we i pem praes from sin. Blong statem klas, yu save invaetem ol memba blong klas blong oli raetem o droem long bod, wan samting we oli bin faenem insaed long Eksodas 35–40 o Levitikas 1; 16; 19 we i bin tijim olgeta abaot Sevya. Invaetem olgeta blong serem wanem we oli bin lanem.

Stap Tijim Doktrin

Eksodas 35–40

Lod i wantem yumi rere blong kam tabu semmak olsem Hem.

• Taem we ol memba blong klas oli bin stadi long Eksodas 35–40 long wik ia, maet oli bin tingting hevi long wei we ol samting we i blong tabenakol bifo oli stap tanem ol tingting blong olgeta i go long Jisas Kraes. Sapos oli bin mekem hemia, leftemap tingting blong olgeta blong oli serem ol tingting blong olgeta. Tebol ia insaed long aotlaen blong wik ia long Kam Folem Mi—Blong Wanwan Man, Woman mo Famli i save helpem toktok storian ia. Mo tu, yu save tokbaot olsem wanem ol simbol ia, we oli joen wetem tabenakol, oli stap tij abaot fasin blong kam moa tabu. ?Olsem wanem nao Jisas Kraes i stap helpem yumi blong kam moa tabu?

• Long plante, aedia ia blong kam moa tabu, i wan samting we i no posibol nating. ?Olsem wanem nao bae yu helpem ol memba blong klas oli andastanem se blong kam tabu i pat blong plan ia we Papa long Heven i gat long yumi? Maet yu save ridim toktok blong Presiden Henry B. Eyring we i stap long “Sam Moa Risos.” ?I minim wanem blong kam tabu? ?Olsem wanem nao ol lata-dei tempol blong yumi wok we yumi stap mekem longwe oli helpem yumi blong kam moa tabu? (luk tu long Doktrin mo Ol Kavenan 84:19–24; 109:6–26; 128:15–18). Afta, yu save askem ol memba blong klas blong serem olsem wanem ol samting ia oli bin helpem olgeta—o i bin helpem ol narawan we oli save olgeta—blong oli kam moa tabu.

• Tabenakol blong Ol Man Isrel long waelples i semmak long plante wei long ol lata-dei tempol blong yumi. Yu save invaetem ol memba blong klas blong oli mekem lis blong ol samting we oli bin lanem abaot tabenakol insaed long Eksodas 35–40 we i mekem olgeta oli tingbaot wanem yumi stap gotru long hem long tempol. Sapos oli nidim help, maet yu save poenem olgeta i go long ol ves olsem: Eksodas 40 mo soem olgeta ples we oli tokbaot wan vel, ol olta, ol tabu klos, fasin blong wasem mo anoentem man. ?Olsem wanem tempol i stap helpem yumi blong kam long Kraes? ?Wanem nao yumi stap mekem blong mekem blong lukluk nomo long Hem long taem we yumi stap insaed long tempol?

Levitikas 1:1–9; 16

Tru long Atonmen blong Jisas Kraes, yumi save kasem fogivnes.

• Nomata yumi luk se aedia ia blong sakrifaes blong animol i defren smol tedei, i gat fulap samting we yumi save lanem aot long praktis ia abaot sakrifaes blong Jisas Kraes we i pem praes from ol sin blong yumi. Blong statem wan toktok raon long topik ia, yu save soem ol pikja blong taem we Sevya i stap long Getsemane, mo antap blong kros (luk long Gospel Art Buk, ol namba 56, 57). Ol memba blong klas oli save serem ol toktok we oli filim long saed blong sakrifaes ia we i pem praes, we Jisas Kraes i bin mekem. Afta long hemia, invaetem ol memba blong klas blong luklukbak long Levitikas 1:1–9 o Levitikas 16, we i tokbaot sakrifaes blong ol animol, mo faenem ol toktok we oli bin filim we i go tu wetem sakrifaes blong Sevya. ?Olsem wanem ol sakrifaes ia blong bifo oli helpem yumi blong andastanem gud moa Atonmen ia blong Jisas Kraes? Ol memba blong klas oli save singsing wan hym abaot Sevya mo oli save serem ol filing blong olgeta abaot Hem.

  

  Ol pikinini blong Isrel oli bin givim ol ofring blong tabenakol wetem wan “tingting blong hem we i glad blong givim” (Eksodas 35:5). Pikja droing i kam long Corbert Gauthier, © Lifeway Collection/we i karem laesens long goodsalt.com

• I save help blong ol memba blong klas oli komperem ol sakrifaes we Lod i bin stap askem long taem blong OlTesteman, wetem ol sakrifaes we Hem i stap askem yumi tedei. Eksampol, oli save mekem wan lis blong ol wei we yumi mekem ol sakrifaes blong Lod mo wok blong Hem, olsem blong givim seves long ol koling, blong pem fas ofring, blong mekem famli histri wok, o blong givhan long wanwan long yumi. Afta, tugeta yufala i save ridim Levitikas1:1–9 mo invaetem ol memba blong klas blong luklukgud long wanem kaen ofring nao oli tokbaot long ol ves ia we i go wetem ol ofring we Lod i stap askem yumi blong givim tedei (luk long 3 Nifae 9:19–20; Doktrin mo Ol Kavenan 64:34). ?Wanem nao yumi save lanem aot long Moses 5:7 abaot wei we yumi lukluk ol sakrifaes blong yumi from wok ia blong Lod?

Sam Moa Risos

God i save mekem yumi kam tabu.

Presiden Henry B. Eyring i bin tijim:

“Hapines we i moa bigwan, i kam taem yumi gat moa tabu fasin long yumiwan. … Ol skripja oli tijim yumi se long medel blong ol nara samting, yumi save kam tabu, o kam moa tabu taem yumi praktisim fet long Kraes, taem yumi soem se yumi obei, sakem sin, sakrifaes from Hem, kasem ol tabu odinens, mo kipim ol kavenan blong yumi wetem Hem. …

“Hym ia ‘More Holiness Give Me’ (Givim Moa Tabu Fasin) [Hymns, no. 131]i talem wan wei blong prea from help blong kam moa tabu. Hem we i raet i waes mo talem se tabu fasin i blong lukaot wan presen we i kam long God we i gat lav, we Hem i givim sloslo, afta yumi mekem pat blong yumi” (“Tabu Fasin mo Plan blong Stap Glad,” Liahona, Nov 2019, 100–101, 103).

Stap Kam Antap long Fasin blong Yumi blong Stap Tij

Yusum tabu miusik. Ol mesej insaed long ol hym oli save kam givim strong sapot long doktrin ia we yu stap stadi long hem insaed long ol skripja. Eksampol: blong stap singsing wan hym olsem: “More Holiness Give Me” o “Mi Sapraes Tumas we Jisas Hem i Lavem Mi” (Hymns mo STSP, namba 131, mo pej 22) i save kam blong givim strong sapot long samfala mesej we oli tijim insaed long Levitikas 16 mo 19.