“9–15 Mei. Namba 11–14; 20–24: ‘Yufala I No Mas Girap Agensem Lod, Mo Yufala I No Mas Fraet! ,’” Kam Folem Mi—Blong Sandei Skul: OlTesteman 2022 (2021)
“9–15 Mei. Namba 11–14; 20–24,” Kam Folem Mi—Blong Sandei Skul: 2022
9–15 Mei
Namba 11–14; 20–24
“!Yufala I No Mas Girap Agensem Lod, Mo Yufala I No Mas Fraet! ”
Wan bes wei blong save stret wanem blong lukluk nomo long hem long taem blong ol klas, i blong askem ol memba blong klas wanem oli faenem we i gat mining long olgeta taem oli bin stap stadi long ol skripja blong olgeta. Hemia bae i talemaot long yu wanem i impoten long olgeta, mo wanem nao oli bin lanem finis.
Raetemdaon Ol Filing mo Tingting blong Yu
Invaetem Man blong Serem Wanem Oli Gat
Samtaem, wanem i nid blong leftemap tingting blong ol memba blong klas blong oli serem ol niu tingting blong olgeta we i kamaot long stadi blong olgeta, hem i blong askem wan simpol kwestin olsem: “?Wanem nao Tabu Spirit i tijim yu taem we yu bin stap ridim ol skripja long wik ia?” Afta, givim tingting taem long olgeta blong oli tingting hevi mo givim ansa.
Stap Tijim Doktrin
Blong stap toktok agensem profet blong Lod, i mekem Lod i no glad.
-
Sapos yufala i ridim Namba 12, i save helpem ol memba blong klas blong andastanem se hem i series tumas blong stap toktok agensem profet blong Lod. Yu save invaetem ol memba blong klas blong ridim japta ia mo blong tokbaot olsem wanem Lod i stap filim abaot ol wokman blong Hem. Folem wanem i stap long ol ves 1–2, ?long tingting blong yu, i minim wanem blong stap toktok agensem profet blong Lod? ?Wanem nao denja blong stap mekem olsem? ?Wanem nao yumi save lanem aot long ol aksen blong Moses mo Ol Man Isrel insaed long ol ves 13 mo 15?
“Moses, tingting blong hem i stap daon moa.”
-
Bae sam pipol oli save sapraes blong ridim se wan lida we i hae olgeta olsem Moses, we i bin stanap long fored blong Fero, mo i bin mekem ol bigfala merikel wetem paoa blong Lod, semtaem, i bin wan man we “tingting blong hem i stap daon moa.” Yu save yusum Namba 12:3 blong statem wan toktok storian abaot wanem hem i tru fasin blong gat tingting i stap daon, o wanem i tru fasin blong no stap flas. Maet bae yu wantem lukluk i go long mining blong toktok ia long “Flas, No Stap Flas, Fasin blong No Stap Flas” insaed Gaed blong Ol Skripja (olskripja.churchofjesuschrist.org). Olsem wan klas, yu save lukluk tu long ol ples we oli tokbaot wei we Moses i no bin stap flas, o i bin gat tingting i stap daon; luk insaed long Namba 12.
-
?Wanem nara pruf nao blong fasin blong Moses blong no stap flas, bae yumi save lan aot long hem? (Eksampol, luk long Eksodas 18:13–25; Namba 11:26–29; Hibrus 11:24–27; Moses 1:10–11). Mo tu, maet bae yu wantem ridim mo toktok raon long wei we Sevya i bin soem fasin blong gat tingting i stap daon, o fasin blong no stap flas Matiu 11:29; 27:11–14; Luk 22:41–42; Jon 13:4–5). ?Wanem nao, ol eksampol blong Moses mo Sevya—o blong ol pipol we yumi save olgeta—oli stap tijim yumi abaot fasin blong no stap flas? ?From wanem nao Lod i wantem yumi blong gat fasin blong no stap flas?
Wetem fet long Lod, yumi save gat hop long fiuja.
-
Taem yufala i stap toktok raon long stori abaot ol 12 Man Isrel we oli lukaotem promes graon mo givim ripot blong olgeta, tingting blong stap askem long ol memba blong klas olsem wanem oli filim se stori ia i save go tu wetem ol situesen we oli stap fesem. Blong save help, yu save invaetem ol memba blong klas blong mekem wan lis blong ol samting we oli stap long Namba 13:23–33 we oli save komperem long ol samting insaed long laef blong yumi. Eksampol: Promes graon i save ripresentem wan samting we Lod i wantem yumi blong mekem i hapen, o ol grep ia oli save ripresentem ol blesing, ol bigfala hae man ia oli save ripresentem ol jalenj we yumi stap fesem, mo sam narawan moa. Leftemap tingting blong ol memba blong klas blong oli serem wanem we oli filim we Lod i wantem olgeta blong lanem aot long stori ia.
PikjaOl man oli soem ol frut long MosesTen long Ol Man Israel we oli ol spae oli fraet; Josua mo Kaleb, tufala i bin gat fet. © Lifeway Collection/we oli karem laesens long goodsalt.com
Sapos yumi stap luk long Jisas Kraes wetem fet, Hem i save hilim spirit blong yumi.
-
Blong helpem ol memba blong klas blong toktok raon long stori we i stap long Namba 21:4–9 mo bildimap fet blong olgeta long Sevya, yu save raetem ol kwestin olsem olgeta kwestin ia antap long bod: ?Snek ia we oli wokem long bras, hem i ripresentem wanem? ?Wanem nao ol soa we snek i givim taem i kakae man i ripresentem? ?From wanem nao sam pipol oli no bin wantem stap luk long snek ia we oli wokem long bras? ?Olsem wanem nao yumi save “lukluk long” hem tedei? Ol memba blong klas oli save serem ansa blong olgeta taem oli ridim Namba 21:4–9; 1 Nifae 17:40–41; Alma 33:18–22; mo Hileman 8:13–15. ?Wanem nao oli sam simpol samting we Sevya i stap invaetem yumi blong mekem blong kasem hiling blong Hem? ?From wanem nao, samtaem, hem i had blong mekem ol simpol samting olsem? (luk long “Sam Moa Risos” blong gat sam tingting long saed ia). Maet ol memba blong klas oli save serem olsem wanem nao we, taem yumi mekem olgeta samting ia, i tekem paoa blong Sevya insaed long laef blong olgeta.
Sam Moa Risos
“Ol smol mo simpol samting.”
Elda L. Whitney Clayton i bin tokbaot wan bisop we i bin givim advaes long ol memba blong wod we oli bin stap fesem ol defren kaen jalenj long laef blong olgeta:
“Advaes blong hem long ol memba blong wod, plante taem, i blong gobak long ol simpol praktis blong fet, olsem blong stap stadi long Buk blong Momon, … blong stap pem taeting, mo blong stap givim seves insaed long Jos wetem wan ful tingting mo hat. Plante taem, ansa blong ol memba i gobak long hem i go olsem: “?Olsem wanem, blong mekem eni long ol samting ia bae i stretem ol problem we mi mi stap fesem?’
“ … Olgeta we oli stap strong blong mekem ol ‘smol mo simpol samting’ [Alma 37:6]—blong stap obei long wanem yumi tekem se oli ol smol rod—oli kasem blesing blong gat fet mo gat paoa we i bigwan i bitim ol stret smol fasin ia blong stap obei, mo long en, bae i luk se oli no go wetem olgeta” (“Whatsoever He Saith unto You, Do It,” Liahona, May 2017, 98).
Kam Antap long Fasin blong Yumi blong Stap Tij
Lukluk nomo long wanem we i moa impoten. Hem i no posibol blong kavremap evri stori o evri prinsipol. Folem Spirit, mo tingting long ol nid blong wanwan memba blong klas taem yu stap disaed olsem wanem blong spendem taem long klas. Tingbaot se hom, i no klasrum, i stap olsem senta blong stap lanem gospel.