Pikja droing blong Debora we i stap lidim ami blong Ol Man Isrel, © Lifeway Collection/we i karem laesens long goodsalt.com

30 Mei–5 Jun.

Jajes 2–4; 6–8; 13–16

Hae God I Jusumaot Wan blong Tekemaot Olgeta long Han blong King

Tingbaot se tija we i moa impoten, hem i Tabu Spirit. ?Olsem wanem yu save helpem ol memba blong klas blong yu blong oli letem Tabu Spirit i tijim olgeta taem yufala i stap toktok raon long ol trutok we oli stap long buk blong Ol Jajes?

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Raetem antap long bod ol nem blong sam jaj we oli faenem insaed long Jajes 2–4; 6–8; 13–16 (olsem Debora, Barak, Gidion mo Samson). Givim sam minit long ol memba blong klas blong luklukbak long ol japta ia mo raetem andanit long wan long ol nem ia long bod, wan trutok we oli bin lanem aot long eksperiens blong jaj ia.

Stap Tijim Doktrin

Jajes 2:11–19; 3:5–12; 4:1–16

Lod i mekem yumi fri taem yumi mestem rod.

• Sapos yufala i luklukgud long saekol blong Isrel abaot fasin blong agens, blong harem nogud, blong sakem sin, mo blong kam fri, bae i save helpem ol memba blong klas blong luksave paoa blong God blong mekem yumi kam fri insaed long laef blong yumiwan bakegen. Ol memba blong klas oli save wok long ol smol grup blong faenem saekol ia we oli tokbaot long Jajes 2:11–19; 3:5–12. ?Olsem wanem ol pikinini blong Isrel oli bin kam fri long saekol ia blong sin mo stap safa? ?Wanem nao yumi save lanem aot long Buk blong Ol Jaj abaot wei we oli bin kamaot long sin mo safaring? ?Wanem sam wei we God i stap mekem yumi kam fri? Yu save invaetem ol memba blong klas blong oli faenem mo oli serem ol skripja we oli stap testifae abaot Lod olsem Man we i Mekem yumi Kam Fri, mo olsem Ridima (eksampol: 2 Samuel 22:1–3; Sam 40:16–17; 1 Nifae 1:19–20; Mosaea 23:21–23; Doktrin mo Ol Kavenan 138:23).

• Jajes 2:19 i talem se Ol Man Isrel oli bin tanem baksaed blong olgeta plante taem long God, mo oli bin stap mekem wosip blong ol aedol. Maet ol memba blong klas oli save talem sot ves ia long wei blong wan woning blong olgetawan bakegen. ?Long wanem wei nao, samtaem, yumi stap “bodaon” long “ol narafala god”? ?Olsem wanem nao Lod i stap helpem yumi blong jenisim fasin blong yumi blong “stap mekem hed”?

• Blong statem wan toktok storian abaot wei we Debora mo Barak oli bin mekem Isrel i kam fri long Ol Man Kenan, yu save askem wan memba blong klas blong i talem sot stori ia long klas (bae i help blong kontaktem memba blong klas ia longtaem bifo dei blong klas, blong mekem se hem i save rere). Klas i save tokbaot ol kwaliti we Debora i bin gat we i tajem olgeta. ?Olsem wanem nao Debora i givim insperesen long ol pikinini blong Isrel blong stap folem Lod? Maet, tugeta, yufala i save ridim Jajes 4:14 mo toktok raon long mining blong fetful tok blong Debora we i talem se: “!Yufala i go! !Naoia Hae God i stap go fastaem long yufala, i stap lidim yufala!” ?Olsem wanem nao Lod i stap go fastaem long yumi? (luk tu long Doktrin mo Ol Kavenan 84:87–88).

Jajes 6–8

Lod i save wokem ol merikel taem we yumi trastem ol wei blong Hem.

• Taem yumi stap stadi long singaot blong Gidion blong wok, bae i save givim insperesen long ol memba blong klas blong mekem samting long seves blong olgeta. Maet yu save askem olgeta blong ridim mo toktok raon long Jajes 6:11–16. ?Wanem nao yumi save lanem aot long eksperiens ia? Blong helpem olgeta blong lanem samting aot long Jajes 7, yu save invaetem wan, o moa long wan memba blong klas blong hem i priten se hem i soldia blong Gidion, mo i talem stori wetem lukluk blong wan soldia long tetaem ia. Ol nara memba blong klas oli save askem ol kwestin long olgeta abaot eksperiens blong olgeta olsem ol soldia. ?Wanem semmak samting yumi save luk bitwin stori ia mo wanem i stap hapen naoia insaed long laef blong yumi? ?Wanem nao yumi lanem abaot Lod aot long ol stori ia?

Jajes 13–16

Paoa long bodi mo tingting i kam folem hamas yumi fetful long ol kavenan we yumi bin mekem wetem God.

• ?Olsem wanem yu save helpem ol memba blong klas blong oli faenemaot tugeta, ol trutok we oli givim insperesen, mo ol impoten woning we oli kamaot long stori blong Samson? Wan wei blong mekem hemia, hem i blong invaetem haf blong klas blong luklukbak long Jajes 14–16, mo oli lukaotem ol ves we i soem se Lod i bin stap wetem Samson. Nara haf i save lukaotem tu ol ves ia we oli soem se Samson i no bin putum ful tingting mo taem blong hem long Lod. Askem ol memba blong klas blong serem wanem oli faenem. ?Wanem nao laef blong Samson i stap tijim yumi abaot fasin blong stap kipim ol kavenan we yumi mekem wetem God? Toktok we i kam long Sista Ann M. Dibb insaed long “Sam Moa Risos” bae i save help.

  

  Samson I Brekemdaon Ol Bigfala Pos, i kam long James Tissot mo sam narawan moa

Sam Moa Risos

Wan lesen we i kamaot long laef blong Samson.

Sista Ann M. Dibb i bin tijim se: “Samson i bon i kam long wol ia, wetem bigfala paoa we hem i save kasem. Mama blong hem i bin promesem hem se: ‘Hem nao bambae i statem wok ia blong tekemaot yufala long han blong ol man Filistia, blong sevem yufala’ [Jajes 13:5]. Be taem Samson i stap groap, hem i bin lukluk moa long ol temtesen blong wol ia, be i no daereksen blong God. Hem i bin mekem ol joes from se oli mekem hem i glad [Jajes 14:3] be i no from ol joes ia oli bin stret. Ol skripja oli ripitim toktok ia ‘mo i godaon’ [Jajes 14:7] taem we oli stap tokbaot ol wokbaot, ol aksen mo ol joes blong Samson. Hem i no bin girap mo saen i go blong mekem o kasem bigfala paoa we i stap blong hem i kasem, be Samson i letem wol i winim hem, i lusum paoa ia we God i bin givim long hem, mo i ded long wan ded we i nogud mo i kam kwiktaem” (“Arise and Shine Forth,” Liahona, May 2012, 118).

Stap Kam Antap long Fasin blong Yumi blong Stap Tij

Putum wan taem i stap blong olgeta we oli lanem samting, oli serem wanem oli lanem. “Taem olgeta we oli lanem samting oli serem wanem we oli stap lanem, oli no filim Spirit nomo mo mekem testemoni blong olgeta i kam strong moa, be tu, oli stap leftemap tingting blong ol nara memba blong klas blong faenemaot ol trutok olgetawan. … Putum wan taem i stap long evri lesen blong studen i save serem tingting.” (Teaching in the Savior’s Way, 30.)