Nomata Weaples Yu Yu Go long Hem, i kam long Sandy Freckleton Gagon

6–12 Jun.

Rut; 1 Samuel 1–3

“!Hae God! Yu Yu Mekem Tingting blong Mi I Glad we I Glad!”

Hem i impoten blong rere blong tij, be yu mekemsua se, insaed long plan blong yu, yu givim sam janis long ol memba blong klas blong oli serem wanem we oli bin lanem.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Blong invaetem ol memba blong klas blong oli serem wanem we oli bin lanem, yu save invaetem olgeta blong raetem wan toktok o wan sentens antap long bod, we i kamaot long Rut 1–4 o 1 Samuel 1–3 we i bin givim olgeta wan insperesen long taem blong stadi blong olgeta wanwan, o long taem blong famli stadi. Ridim sam toktok o sentens ia laod, mo askem ol memba blong klas blong oli serem olsem wanem ol toktok o sentens ia i bin givim insperesen long olgeta.

Stap Tijim Doktrin

Rut; 1 Samuel 1–2

Kraes i save tanem wan prapa nogud taem i kam wan taem blong win.

• I nomata se ol memba blong klas blong yu oli gat wanwan tes blong olgeta we oli defren long hemia blong Rut mo Hana, oli save lan aot long ol wei we tufala fetful woman ia i bin fesem taem we oli bin gat lus mo hat i soa. Blong helpem olgeta blong mekem hemia, yu save serem klas long ol smol grup mo invaetem wanwan grup blong ridim wan japta we i kamaot long Rut 1–4 o 1 Samuel 1. Antap long bod, yu save raetem ol kwestin olsem: ?Wanem tes nao Rut o Hana i bin stap fesem? ?Olsem wanem oli bin soem tras blong olgeta long Lod long taem blong ol tes blong olgeta? Ol grup ia oli save lukaotem ol ansa blong wan o moa long wan long ol kwestin ia, mo serem wanem nao oli faenem. ?Wanem nao yumi lanem aot long ol stori ia abaot from wanem Lod i save helpem yumi long taem blong tes?

  

  Pikinini Ia, Mi Bin Prea From, i kam long Elspeth Young

• I no evriwan we i stap prea blong gat wan pikinini, we i kasem wan pikinini; mo i no evriwan we waef o man blong hem i ded, i mared bakegen. Be ol jalenj blong yumiwan, i nomata se oli wanem, oli save kam ol janis blong tanem yumi i go long Sevya, mo mekem fet blong yumi long Hem i kam strong moa. Yu save askem ol memba blong klas blong oli ridim Rut 2:11–12 mo 1 Samuel 1:9–11 mo tokbaot olsem wanem ol tes blong Rut mo Hana i jenisim rilesensip blong olgeta wetem Lod. Ol memba blong klas oli save serem tu olsem wanem fet blong olgetawan i bin kam strong moa from se oli bin tanem olgeta i go long Jisas Kraes long ol taem blong tes.

  Blong sapotem toktok storian ia, yu save invaetem wan memba blong klas o moa blong oli kam we oli rere blong serem sam niu tingting aot long olgeta mesej ia: mesej blong Sista Reyna I. Aburto “!Tru long Klaod mo San I Saen, Lod, Stap Wetem Mi!” (Liahona, Nov 2019, 57–60); seksen ia we taetol blong hem i: “Glad Ia blong Winim Samting tru long Kraes” we i kamaot long mesej blong Elda D. Todd Christofferson “Glad Ia blong Ol Sent” (Liahona, Nov 2019, 15–18); o ol toktok blong Presiden Elaine S. Dalton insaed long “Sam Moa Risos.” Askem ol memba blong klas blong oli save serem wanem oli bin lanem abaot wei we ol tes blong yumi oli save stap olsem ol janis blong gat moa fet long Jisas Kraes.

1 Samuel 2:18–36; 3

Yumi mas lisin mo obei long voes blong Lod.

• Maet bae i gat ol pipol insaed long klas blong yu, we, olsem Samuel, oli bin harem voes ia blong Lod, be oli no bin luksave se hem i voes ia blong Lod. Yu save invaetem ol memba blong klas blong luklukbak long 1 Samuel 3, mo lukaotem wanem nao Samuel i bin mekem we i save helpem yumi long ol hadwok blong yumi blong save harem mo save obei long voes blong Lod. Yu save askem long tu (2) memba blong klas blong oli aktem wanem i bin hapen bitwin Samuel mo Ilae.

• Samtaem, yumi kam blong stap long wan situesen olsem hemia blong Ilae—yumi gat janis ia blong helpem wan blong luksave voes ia blong Lod. Maet ol memba blong klas oli save serem olsem wanem oli bin mekem hemia wetem ol fren, ol memba blong famli, o ol narawan. ?Wanem skripja o eksperiens nao yumi bin serem blong helpem ol narawan blong oli andastanem olsem wanem Lod i stap toktok wetem yumi? (Eksampol, luk long Doktrin mo Ol Kavenan 6:22–23; 8:2–3; 9:7–9).

Sam Moa Risos

Yumi neva stap yumiwan.

Presiden Elaine S. Dalton i bin tijim:

“Wokbaot blong laef, samtaem i tekem yumi i go long sam rod we yumi neva ting long hem. I gat ol rod we oli benben, mo ol kona we i no gat wan long yumi i save talem se bae i kam. Be, wetem wanwan rod we i benben ia, o i tanem long kona, i gat wan janis tu i stap—wan janis blong jusum wei we bae yumi fesem, mo wanem i plan blong yumi blong tekem aksen. Ol hadtaem long laef, oli save stap olsem ol janis we oli helpem yumi kam kolosap moa long Sevya, mo ol janis blong yumi trastem hem moa fulwan. Taem yumi stap long rod ia blong stap kolosap long Hem evri dei, yumi stap developem ol fasin mo ol kwaliti we oli olsem hemia blong Kraes.

“Olsem Rut mo Hana, yumi evriwan bae i fesem samting we bae i kam agensem yumi. Bae yumi no save andastanem oltaem plan ia we Lod i putum blong laef blong yumi, be hem i testemoni blong mi se, neva bae yumi stap yumiwan nomo. Hem i neva stap wetem yumi, mo Hem i stap promesem yumi: ‘Yufala i no save luk wetem ae blong yufala nomo, long taem naoia, plan ia blong God blong yufala, abaot ol samting we bae oli hapen naoia i go, mo glori we bae i kam afta plante hadtaem’ [Doktrin mo Ol Kavenan 58:3]” (“Lessons from Ruth and Hannah,” Ensign, Apr. 2006, 35, 37).

Luk tu long Jon 14:18; Alma 38:5.

Kam Antap long Fasin blong Yumi blong Stap Tij

Hem i oraet nomo blong talem se: “mi no save.” I nomata se yumi mas traem bes blong ansarem eni kwestin we ol memba blong klas blong yu oli gat abaot gospel, Lod i no traem blong talem se yu yu mas save evri samting. Taem we yu no save ansarem wan samting, talemaot mo luksave hemia, mo talem wan tru testemoni abaot wanem we yu yu save. (Luk long 1 Nifae 11:16–17; Teaching in the Savior’s Way, 24.)