King Deved we I Tekem Jea blong Hem, i kam long Jerry Miles Harston

20–26 Jun

2 Samuel 5–7; 11–12; 1 King 3; 8; 11

“Kingdom blong Yu I Stap Oltaem, Gogo I No Save Finis”

Taem we yu stap stadi long ol skripja, wetem prea, lukaotem blong save wijwan prinsipol nao bae i gat moa mining long ol memba blong klas blong mekem se yu save lukluk nomo long nid blong olgeta.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Blong faenemaot wanem nao ol memba blong klas oli faenem se i gat mining long skripja stadi blong olgeta, yu save askem olgeta blong oli raetem skripja we i bin givim insperesen long olgeta long ol pis pepa, mo afta, yu putum ol pis pepa ia insaed long wan kontena. Afta, ol memba blong klas oli save jusum sam pepa long kontena ia, mo klas i save ridim mo toktok raon long ol skripja ia.

Stap Tijim Doktrin

2 Samuel 6:1–8

Yumi mas mekem wok blong God long wei blong Hem.

• Maet yu save askem ol memba blong klas blong ridim 2 Samuel 6:1–8 mo tingting long wanem woning stori ia i holem blong yumi tedei. Toktok blong Brigham Yang we i stap long “Sam Moa Risos” i save help. ?Wanem nao sam wei we maet yumi stap traem blong mekem wok ia blong God long wan wei we i no olsem we Hem, Hem i talem? ?From wanem i gat denja long hemia? Maet ol memba blong klas oli save serem ol eksperiens blong olgeta abaot wan taem we oli bin lanem blong trastem daereksen we Lod i givim blong mekem wok blong Hem i kamtru.

2 Samuel 11

Oltaem yumi mas lukaotgud blong blokem yumi long sin.

• Blong save lanem samting aot long ol nogud joes blong Deved, olsem we oli raetem long 2 Samuel 11 i save helpem yumi blong stap longwe long ol semmak mistek. Tugeta, maet klas i save ridim 2 Samuel 11:1–17 mo faenemaot ol joes ia we Deved i bin mekem we i bin lidim hem i go long sin. ?Bae wanem nao David i bin save mekem i defren? Yu save askem tu long ol memba blong klas blong oli raetemdaon wan sentens we i save help blong givim insperesen long wan blong stap longwe long sin, hemia folem wanem we oli bin lanem aot long 2 Samuel 11. Invaetem sam memba blong klas blong oli serem ol tingting blong olgeta.

• Yu save yusum 2 Samuel 11 blong toktok raon long ol denja blong ponografi mo ol nara sin long saed blong seks. Blong mekem hemia, tugeta, klas ia i save luklukbak long samfala pat blong mesej blong Elda L. Whitney Clayton “Blessed Are All the Pure in Heart” (Liahona, Nov. 2007, 51–53). ?Wanem kaonsel nao Elda Clayton i bin givim abaot ol denja blong ponografi? Mo tu, yu save wajem vidio ia: “To Look Upon” (ChurchofJesusChrist.org). ?Olsem wanem Sevya i helpem yumi blong winim ol temtesen o kaen fasin ia?

  Maet ol memba blong klas oli save serem sam aedia we oli bin faenem se i helpem ol hadwok blong olgeta blong protektem ol famli blong olgeta long ponografi, o winim wanem we ponografi i mekem long man. Mesej blong Sista Linda S. Reeves, “Protection from Pornography—a Christ-Focused Home” i save help (Liahona, May 2014, 15–17; luk tu long “Sam Moa Risos”).

Tempol hem i haos blong Lod.

1 King 8:22–61

Ol tempol oli karem ol blesing oli kam.

• 1 King 8 i tokbaot ol blesing we Solomon i bin askem blong ol pipol blong hem taem we tempol i bin finis. Yu save serem ol ves 22–61 long ol memba blong klas, mo askem olgeta blong serem wan samting we oli faenem insaed long ol ves ia we i givim insperesen long olgeta long tempol wosip blong olgeta. Ol memba blong klas oli save serem olsem wanem wosip insaed long haos blong Lod i bin blesem laef blong olgeta.

1 King 8:61; 11:1–11

Tingting blong hem i no stap strong wetem Lod.

• ?Hem i minim wanem blong no letem tingting blong yumi i stap strong wetem Lod? (1 King 8:61). ?Hemia i defren se ol aksen blong yumi i mas stret gud? ?Long wanem wei? Taem we ol memba blong klas oli stap tingting hevi long ol kwestin ia, oli save ridim 1 King 11:1–11 mo teknot long wanem Lod i stap talem abaot hat, o tingting blong Solomon. ?Olsem wanem yumi save stap longwe long ol mistek ia we hem i bin mekem?

Sam Moa Risos

Mekem bigfala sip i balens gud.

Presiden Brigham Yang i tijim: “Lego Kingdom i stap, from Lod i stap balensem gud sip ia; mo sapos hem i saedsaed smol, mo i luk se i nid blong stretem, sapos rod i go aotsaed smol samtaem, mo yumi luk se evri samting bae i kafsaed, yumi mas lukaot long wei we yumi stretem han blong yumi blong balensem sip ia; bae yumi no stap fos blong mekem wan samting we i no blong yumi mekem; lego i stap, hem i wok blong Lod” (Discourses of Brigham Young, sel. John A. Widtsoe [1954], 66).

Protektem ol pikinini long ponografi.

Sista Linda S. Reeves i tijim: “?Olsem wanem nao yumi stap protektem ol pikinini mo ol yut blong yumi? Ol filta, oli ol gudfala tul, be filta we i wok gud moa long wol ia, wan ia nomo we bae i wok gud, i filta we i stap insaed long yumiwan, we i kam long wan dip testemoni blong stap obei, mo wan testemoni abaot lav blong Papa long Heven mo sakrifaes ia we i pem praes, we i kam long Sevya blong yumi (“Protection from Pornography—a Christ-Focused Home,” Liahona, May 2014, 16; luk tu long Joy D. Jones, “Tokbaot Ponografi: Protektem, Fesem, mo Kasem Hiling,” Liahona, Okt 2019, 36–41).

Stap Kam Antap long Fasin blong Yumi blong Stap Tij

Meksua se yu stap tijim tru doktrin. “Gohed blong askem yuwan: ‘?Hao nao wanem we mi stap tijim, bae i helpem ol memba blong klas blong mi blong oli bildimap fet blong olgeta long Kraes, sakem sin, mekem mo kipim ol kavenan wetem God, mo kasem Tabu Spirit?’” (Teaching in the Savior’s Way, 20).