Elaeja I Traem Ol Pris blong Bal, i kam long Jerry Harston

27 Jun–3 Julae.

1 King 17–19

“Sapos Hae God I God, I Gud Yufala I Mekem Wosip long Hem”

Stamba tingting blong ol skripja—mo klas blong yu—i blong bildimap fet long Papa long Heven mo long Jisas Kraes. Letem stamba tingting ia i lidim rod blong evri desisen we yu stap tekem abaot wanem blong tijim mo wanem kwestin blong askem.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Invaetem ol memba klas blong oli serem ol niu tingting we oli kasem aot long 1 King 17–19; yu save invaetem olgeta blong tingting long wan taetol we bae oli save givim long wanwan long ol japta ia. ?Wanem ves nao i mekem olgeta blong oli tingting long ol taetol ia?

Stap Tijim Doktrin

1 King 17:8–16; 19:19–21

Wan invitesen blong mekem sakrifaes, i wan janis blong praktisim fet blong yumi.

• Eksampol blong wido blong Sarepat i save givim insperesen long ol memba blong klas long ol taem we fet blong olgeta i stap long tes. Blong stat, yu save askem olgeta blong mekem wan lis blong ol joes we i nidim blong gat fet long Jisas Kraes. Afta, oli save ridim stori we i stap long 1 King 17:8–16 mo tokbaot wanem nao stori ia i stap tijim olgeta abaot fasin blong stap praktisim fet. Leftemap tingting blong ol memba blong klas blong oli serem filing blong olgeta abaot wido ia, mo olsem wanem eksampol blong hem, i givim insperesen blong olgeta blong oli praktisim fet blong olgeta. ?Olsem wanem nao fet blong hem i semmak long fet we Elisa i bin soem, we yumi save rid long 1 King 19:19–21? Maet ol memba blong klas oli glad blong serem ol sakrifaes we oli bin mekem blong Lod, mo olsem wanem Hem i bin blesem olgeta.

• Stori blong wido blong Sarepat i save tijim tu yumi abaot ol blesing we oli kam aot long sakrifaes. Yu save askem ol memba blong klas blong oli tingting hevi long wei we bae oli ansa long ol toktok olsem: “Mi no gat naf mane blong pem taeting,” o “mi mi bisi tumas, mi no save akseptem blong stap givhan.” ?Wanem nao 1 King 17:8–16 i stap tijim yumi we i go wetem ol toktok ia ?Olsem wanem save blong yumi abaot Sevya i stap helpem yumi taem oli askem yumi blong mekem ol sakrifaes? Ol toktok blong Elda Lynn G. Robbins insaed long “Sam Moa Risos” oli save help tu.

1 King 18:17–39

“Sapos Hae God I God, I Gud Yufala I Mekem Wosip long Hem.”

• Sapos yufala i toktok raon long 1 King 18:17–39 bae i save helpem ol memba blong klas blong oli komitim olgeta moa blong stap folem Jisas Kraes mo stap trastem Hem. Afta we yu luklukbak long stori ia wetem klas, yu save raetem, long bod, kwestin we Elaeja i bin askem long ol pipol blong Isrel: “?Wetaem bambae yufala i mekemap tingting blong yufala?” (ves 21). ?Wanem nao kwestin ia i minim? Letem ol memba blong klas oli serem wanem oli filim. ?Wanem nao sam long ol risen we ol pipol oli gat blong tekem taem blong mekemap tingting (we i minim se oli save stop smol, ol gat tu tingting) se bae oli biaen long Lod o bae oli biaen long Bal? ?From wanem nao, yumi no save stret se bae yumi biaen long Jisas Kraes o no? Ol memba blong klas oli save serem sam eksperiens we i bin helpem olgeta blong jusum blong folem Sevya.

Wan wei we i yusum ol simbol blong soemaot wanem i stap long 1 King 19:11–12. Profet Ia, © Robert Booth Charles/Bridgeman Images

1 King 19:1–12

Plante taem Lod i stap toktok long ol wei we i kwaet mo i simpol.

• Plante pipol oli gat hadtaem blong luksave taem we Lod i stap toktok long olgeta. Blong helpem ol memba blong klas blong luksave voes ia blong Lod, yu save invaetem olgeta blong ridim 1 King 19:1–12 mo serem wanem we Elaeja i bin lanem. Maet ol memba blong klas oli save serem ol eksperiens we i bin tijim olgeta abaot ol defren wei we Lod i stap toktok long olgeta. Yu save serem vidio ia: “How Can I Feel the Holy Ghost More Often?” (we i kam long “Face to Face wetem Presiden Eyring mo Elda Holland” [wol yut brodkas, 4 Maj 2017], ChurchofJesusChrist.org).

• Blong statem toktok storian abaot sentens ia “kwaet smol voes,” yu save soem olgeta samting ia (o ol pikja blong olgeta samting ia) we i save helpem ol memba blong klas blong oli tingting hevi long sentens ia. Ol memba blong klas oli save givim sam nara eksampol. ?From wanem nao tufala toktok ia, “kwaet” mo “smol” oli ol gudfala wei blong tokbaot voes blong Spirit? Blong sam moa ditel, ol memba blong klas oli save ridim ol skripja olsem Hileman 5:30; 3 Nifae 11:3–7; Doktrin mo Ol Kavenan 6:22–23; 8:2–3; 9:8–9; 11:12–14; 36:2. Oli save serem sam nara skripja abaot wei blong luksave Spirit. ?Wanem nao ol skripja ia oli stap talem abaot wanem yumi mas mekem blong harem voes ia blong Lod? Ol vidio ia “Feeling the Holy Ghost” o “Voice of the Spirit” bae oli save help (ChurchofJesusChrist.org).

Sam Moa Risos

Wido blong Sarepat.

Elda Lynn G. Robbins i bin talem: “Elaeja i bin andastanem doktrin ia se ol blesing oli kam afta long tes blong fet blong yumi [luk long Ita 12:6; Doktrin mo Ol Kavenan 132:5]. Hem i no bin selfis. Olsem wokman blong Lod, Elaeja i bin stap ia blong hem i givim samting, i no blong hem i tekem samting [luk long 1 King 17:13–16]. … Wan risen from wanem Lod i soemaot pikja blong ol doktrin wetem ol situesen we oli bigwan olgeta, hem i blong katemaot ol eskius. Sapos Lod i ting se wido ia we i pua evriwan i mas givim smol we hem i gat, hemia i putum ol narawan we oli faenem se i no stret taem, o i no isi blong sakrifaes, oli stap wea? (“Tithing—a Commandment Even for the Destitute,” Liahona, May 2005, 35).

Kam Antap long Fasin blong Yumi blong Stap Tij

Stap wan tul blong Spirit, we yu gat tingting i stap daon. “Stamba tingting blong yu, olsem wan tija, i no blong mekem wan taf presentesen, be i blong helpem ol narawan blong kasem Tabu Spirit we i lidim olgeta—Tabu Spirit ia we i tru tija” (Teaching in the Savior’s Way, 10).