Ol Prisena Oli Ronwe, i kam long James Tissot mo sam narawan moa

11–17 Julae

2 King 17–25

“Hae God I God blong Ol Laen blong Isrel, Mo King Ia I Trastem Hem”

Luklukbak long olgeta tingting mo filing we yu bin raetemdaon long taem blong stadi blong yuwan long 2 King 17–25 long wik ia. ?Yu yu filim s wijwan skripja long ol japta ia bae i gat moa mining long ol memba blong klas blong yu?

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Taem we ol memba blong klas oli serem wanem we oli stap lanem long hom, long taem blong skripja stadi blong olgeta, ol nara memba blong klas bae oli save filim insperesen blong stap stadi long ol skripja blong olgeta truaot long wik. Yu save statem klas blong yu taem yu invaetem ol memba blong klas blong ansa long wan kwestin olsem hemia: “?Wanem nao Tabu Spirit i bin tijim yu taem yu bin stap ridim ol japta ia we yu gat blong ridim long wik ia?”

Stap Tijim Doktrin

2 King 18:28–36; 19:1–7, 14–19

Yumi save stap tru long Lod taem fet blong yumi i fesem jalenj.

• Ol trutok insaed long 2 King 18–19 oli save helpem yumi blong save olsem wanem blong mekem taem we fet blong yumi i fesem jalenj. ?Olsem wanem bae ol memba blong klas blong yu bae oli faenemaot ol trutok ia? Yu save invaetem ol memba blong klas blong serem samfala risen from wanem oli biliv long God mo long plan blong Hem. Afta, oli save luklukgud long 2 King 18:28–35, mo lukaotem ol risen we Ol Man Asiria oli givim long ol pipol long Jerusalem blong no stap trastem Lod. ?Olsem wanem nao Setan i stap traem blong winim yumi blong gat tu tingting long bilif blong yumi tedei? Afta, ol memba blong klas oli save luklukgud insaed long 2 King 19:1–7, 14–19 mo faenem wanem yumi save lan aot long Hesekaea abaot wei blong mekem samting taem we fet blong yumi i fesem jalenj. ?Olsem wanem Lod i stap helpem yumi blong winim ol jalenj blong fet blong yumi? ?Wanem nao ol nara tingting we ol memba blong klas oli gat blong stap riniu bilif blong olgeta mo gat tras long Lod?

• Yu save invaetem wan memba blong klas blong i kam long klas we hem i rere blong talem sot storian we Ol Man Asiria oli gat wetem ol man blong Hesekaea kolosap long ol wol blong siti blong Jerusalem (luk long 2 King 18:17–36). Bifo hem i talem stori ia, invaetem ol memba blong klas blong tingting se oli ol man we oli stap laef long Jerusalem, nao oli stap lisin long storian ia. ?Wanem kaen tingting o filing nao maet oli bin gat? ?Wanem nao oli save mekem? Yu save givim long ol memba blong klas sam pat blong mesej blong Elda David A. Bednar: “Therefore They Hushed Their Fears” (Liahona, May 2015, 46–49) mo invaetem olgeta blong lukaotem ol ol kaonsel we bae i sastenem olgeta long ol taem blong fraet, o fasin blong gat tu tingting. ?Olsem wanem nao fet blong yumi long Jisas Kraes i bin sapotem yumi long ol taem blong jalenj?

2 King 22:8–20; 23

Ol skripja oli save tanem hat blong yumi i go long Lod.

• Sapos yufala i toktok raon long paoa we toktok blong God i bin gat long laef blong King Josaea mo ol pipol blong hem, bae i save givim insperesen long ol memba blong klas blong oli lukaotem semfala paoa ia insaed long laef blong olgeta. Yu save statem wan toktok storian taem yu stap invaetem ol memba blong klas blong oli traem tingting long maen blong olgeta, se, bae laef blong olgeta i olsem wanem sapos oli no bin gat ol skripja. Afta, oli save luklukgud insaed long 2 King 22:8–11; 23:1–6, 21, 24 blong faenemaot olsem wanem Josaea mo ol pipol blong hem oli bin jenisim laef blong olgeta taem oli bin harem toktok blong God aot long ol skripja we oli jes faenem insaed long tempol. ?Olsem wanem ol stori o histri ia oli helpem yumi blong andastanem gud moa Papa long Heven mo Jisas Kraes?

• Ol bigfala jenis we toktok blong God i bin mekem long Josaea mo plante pipol long kingdom blong hem, i save givim insperesen long ol memba blong klas blong stap lukaotem ol semmak jenis long laef blong olgeta. Afta we yufala i toktok raon long ol jenis ia (luk long 2 King 23:1–6, 21, 24), ol memba blong klas oli save serem ol eksperiens blong olgeta abaot wan skripja o wan stori long skripja i bin mekem samting i defren long laef blong olgeta. Maet oli save tokbaot from wanem oli bin save akseptem mesej blong skripja ia long taem ia long laef blong olgeta. Toktok ia insaed long “Sam Moa Risos” bae i save helpem klas storian blong yufala.

  

  Ol skripja oli save help blong tanem hat blong yumi i go long Lod.

Sam Moa Risos

Faenemaot bakegen wanem i stap long ol skripja.

Presiden Spensa W. Kimbol i talem se:

“Mi mi save stret se, wanwan long yumi, long wan taem long laef blong yumi, i mas faenemaot, blong yumiwan, wanem i stap long ol skripja—mo i no faenem wan taem nomo, be faenem bakegen ol skripja ia, bakegen mo bakegen. …

“Mi filim strong we evriwan long yumi i mas gobak long ol skripja, semmak olsem we King Josaea i bin mekem, mo letem ol skripja oli wok strong insaed long yumi, oli pusum yumi blong gat wan tingting we i nomo save slak, blong wok blong Lod. …

“Mi faenem se taem mi toktok wanwan taem nomo wetem Hae God, mo taem mi luk se i no gat sora blong heven i stap lisin, mo i no gat voes blong heven i toktok, hemia mi mi longwe we longwe. Sapos mi draonem mi long ol skripja, nao mi nomo stap longwe tumas, mo spirit i kambak. Mi faenem se mi lavem moa olgeta we mi mas lavem wetem ful hat, maen, mo paoa, mo taem mi lavem olgeta moa, nao mi faenem i isi blong obei long kaonsel blong olgeta” (Teachings of Presidents of the Church: Spencer W. Kimball [2006], 62–63, 67).

Kam Antap long Fasin blong Yumi blong Stap Tij

Yusum ol tul blong help blong stadi long skripja. Wan wei blong helpem ol memba blong klas blong oli andastanem ol skripja, hem i blong poenem olgeta long ol risos olsem Gaed long Ol Skripja, mo ol atikol insaed long Gospel Topik (ChurchofJesusChrist.org). Mo tu, oli save faenem ol infomesen we i save help, we oli stap long “Sam Tingting blong Kipim long Maen” we i stap long Kam Folem Mi—Blong Wanwan Man, Woman mo Famli.