Esta, i kam long James Johnson

25–31 Julae

Esta

“Yu Yu Kam blong Bambae Yu Save Givhan long Yumi long Hadtaem Ia”

?Hamas nao yu yu save ol memba blong klas blong yu? Traem blong kam blong save gud moa, wan memba blong klas, evri wik. Hemia bae i blong helpem yu blong tingting long ol nid blong olgeta taem we yu stap rere blong tij (luk long Teaching in the Savior’s Way, 7).

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Ol memba blong klas oli save serem wetem wan we i sidaon kolosap long olgeta abaot wanem Spirit i bin tijim olgeta, wan samting we oli kam blong andastanem i klia moa, o wan samting we oli putum i kam insaed long laef blong olgeta taem oli bin stap ridim Buk blong Esta. Afta, letem sam long olgeta oli serem wetem ful klas.

Stap Tijim Doktrin

Esta

Lod i putum yumi long samfala situesen we yumi save blesem ol narawan.

• Maet ol memba blong klas oli bin lukaotem ol wei we Lod i bin mekem i posibol blong Esta blong sevem Ol Man Jiu, olsem we oli talem long aotlaen blong wik ia insaed long Kam Folem Mi—Blong Wanwan Man, Woman mo Famli. Invaetem olgeta blong serem wanem we oli bin faenem. O, tugeta, yufala i save lukluk long sam moa eksampol (luk long Esta 2:21–23; 3:10–14; 4:14–16). ?Wanem nao yumi save mekem blong luksave han blong God long laef blong yumi? Toktok ia we i kam long Elda Neil L. Andersen long “Sam Moa Risos” i gat wan ansa long kwestin ia.

• Blong helpem ol memba blong klas blong yu blong tingting abaot wei we Lod i bin mekem olgeta oli rere from “hadtaem ia” (Esta 4:14), invaetem olgeta blong ridim Esta 4:10–17. ?Olsem wanem nao ol toktok blong Modekae i go long Esta oli bin helpem hem blong mekem desisen ia blong difendem ol pipol blong hem? Semmak olsem we God i bin putum Esta long wan ples we bae hem i save sevem Ol Man Jiu, ?wanem nao sam situesen we Hem i bin putum yumi long hem blong yumi save blesem ol nara man? ?Olsem wanem nao yumi kam ol moa gud tul insaed long han blong Hem? Sapos yu ridim toktok ia blong Sista Virginia U. Jensen insaed long “Sam Moa Risos” i save givim insperesen ol memba blong tingting abaot sam taem we oli bin filim se oli stap olsem ol tul long han blong Lod. Askem olgeta blong serem ol eksperiens blong olgeta olsem we Spirit i lidim olgeta blong mekem.

Esta 4

Fasin blong stap livim kakae, i soemaot se yumi stap dipen long Lod.

• Yu save yusum Esta 4 blong toktok raon long ol blesing we oli kam taem wan i livim kakae. Maet yu save mekem wan memba blong klas i luklukbak long ol samting we i bin hapen, we i bin mekem se Esta mo ol nara Man Jiu oli bin livim kakae. ?From wanem oli bin jusum blong livim kakae? ?From wanem yumi jusum blong livim kakae? Tugeta, maet bae yufala i wantem luklukbak long sam moa skripja abaot fasin blong livim kakae, olsem Aesea 58:6–12 mo Matiu 4:1–4; 17:14–21 (luk tu long Gaed long Ol Skripja , “Livim Kakae, Fasin blong Livim Kakae,” olskripja.ChurchofJesusChrist.org). Maet, yu o sam memba blong klas i save serem eksperiens we i soemaot olsem wanem fasin blong livim kakae i tekem paoa blong Lod insaed long laef blong yumi.

Esta 3:1–11; 4:10–17; 5:1–4

Blong save mekem stret samting, plante taem i nidim strong paoa long tingting.

• Ol stori blong Modekae mo Esta, we tufala i bin gat strong paoa long tingting blong stanap from samting we i stret mo gud, i save givim insperesen long ol memba blong klas blong gat strong paoa long tingting blong mekem stret samting. Yu save invaetem haf blong klas blong oli ridim abaot Modekae (luk long Esta 3:1–11) mo nara haf blong rid abaot Esta (luk long Esta 4:10–17; 5:1–4). Sapos tufala i stap long ples ia tedei, ?wanem nao Modekae mo Esta bae i talem long yumi blong leftemap tingting blong yumi taem we i had blong mekem raet samting? Ol memba blong klas oli save serem tu samfala situesen we oli mas tekem aksen wetem strong paoa long tingting. Yu save soem vidio ia: “Courage” (ChurchofJesusChrist.org) o yu save singsing o ridim ol toktok blong wan singsing we i tokbaot fasin blong stanap from trutok, olsem “Do What Is Right” (Hymns, no. 237). Afta, toktok raon long wanem vidio ia o singsing ia i stap tijim abaot fasin blong gat strong paoa long tingting.

  

  Esta long fored blong King, i kam long Minerva K. Teichert

Sam Moa Risos

Han blong God.

Elda Neil L. Andersen i tijim:

“Samtaem, yumi save luk han blong Lod insaed long laef blong ol narawan, be yumi stap askem yumiwan: ‘?Olsem wanem nao mi save luk moa klia, han ia blong hem insaed long laef blong mi bakegen?’ …

“Taem yu stap obei long ol komanmen, mo prea wetem fet blong luk han blong Lod insaed long laef blong yu, mi promesem yufala se bambae Hem i openem ol ae blong spirit blong yufala i bigwan moa, mo bambae yu save luk klia moa se yu yu no stap yuwan” (“Thy Kingdom Come,” Liahona, May 2015, 121–22).

“From wan taem olsem hemia.”

Sista Virginia U. Jensen i bin tijim: “Mi no biliv se, hem i wan aksiden we yu mo mi i stap ia long wan spesel taem olsem. Mi biliv se, olsem Esta blong bifo, yumi ‘kam … long taem ya, blong bambae [yumi] save givhan long yumi long hadtaem ya’ [Esta 4:14], from se paoa blong yumi blong lidim tingting blong man, eksampol blong yumi, paoa blong yumi, mo fet blong yumi i stap stanap olsem wan strong samting agensem taed blong ivel we i stap girap, we i stap wantem blong tekova long ol hom, ol famli blong yumi, mo olgeta we yumi lavem olgeta” (“Creating Places of Security,” Ensign, Nov. 1997, 89).

Stap Kam Antap long Fasin blong Yumi blong Stap Tij

Go long ol skripja faswan. Ol skripja oli fas samting blong yusum blong stadi long hem mo stap rere. Yu no fogetem se ol toktok blong ol profet blong tedei, oli kam komplitim ol tabu standet wok, mo tu, oli ol skripja. (Luk long Teaching in the Savior’s Way, 17–18.)