“4–10 Julae. 2 King 2–7: ‘I Gat Wan Profet I Stap long Isrel,’” Kam Folem Mi—Blong Sandei Skul: OlTesteman 2022 (2021)
“4–10 Julae. 2 King 2–7,” Kam Folem Mi—Blong Sandei Skul: 2022
Pikja droing blong Elisa we i stap soem ol faea wilkat long wokman blong hem, © Review & Herald Publishing/we i karem laesens long goodsalt.com
4–10 Julae
2 King 2–7
“I Gat Wan Profet I Stap long Isrel”
Taem yu stap rere blong tij, ridim 2 King 2–7 mo lukaotem insperesen blong laef blong yuwan bakegen. Afta, yu lisin long ol kwaet toktok blong Spirit abaot ol mesej ia we bae oli blesem ol memba blong klas blong yu.
Raetemdaon Ol Filing mo Tingting blong Yu
Invaetem Man blong Serem Wanem Oli Gat
Samtaem ol memba blong klas oli nidim sot taem blong luklukbak long ol japta we oli bin ridim bifo oli save serem ol niu tingting we oli bin kasem aot long skripja stadi blong olgetawan. Traem blong givim sam minit blong hemia long stat blong klas; afta, invaetem ol memba blong klas blong oli serem wan samting we oli bin lanem.
Stap Tijim Doktrin
?God i save wokem ol merikel insaed long laef blong yumi?
-
Taem yufala i stap toktok raon long ol merikel we oli raetem insaed long 2 King 2–6, maet bae i help blong askem ol memba blong klas blong talem mining blong toktok ia, merikel. Maet yu save serem niu tingting ia we i kam long Presiden Howod W. Hanta: “[Ol merikel] oli ol taem we God i stap soemaot paoa blong Hem, we yumi no naf blong tokbaot o eksplenem, o andastanem fulwan. … Ol saen mo bigfala wok ia, oli bin kamaot klia long laef mo seves blong Jisas Kraes, we i stret Pikinini blong God bakegen. Be ol merikel ia, i nomata we oli mekem ae blong yu i open bigwan mo i mekem se yu yu sek, plante long ol merikel blong Kraes ia, oli stap soemaot nomo ol bigfala moa merikel we Papa blong Hem i bin mekem fastaem long Hem, mo i stap gohed blong mekem raon long yumi. … Bae i gat plante merikel sapos yumi gat ol ae blong luk, mo ol sora blong harem” (“The God That Doest Wonders,” Ensign, May 1989, 15–16). ?Olsem wanem nao ol niu wei blong lukluk ia oli stap helpem yumi blong luk han blong God insaed long laef blong yumi?
-
Tingting blong askem ol memba blong klas blong mekem lis blong ol merikel we oli stap tokbaot insaed long 2 King 2–6. ?Wanem nao yumi lanem abaot Lod aot long ol merikel ia? Maet ol memba blong klas oli wantem blong tokbaot ol merikel—ol bigwan mo ol smolwan—we olgeta, o famli blong olgeta i bin kasem. ?Olsem wanem nao yumi save luksave moa ol merikel blong God insaed long laef blong yumi—wetem ol merikel ia we oli defren long hemia we yumi bin stap wet from?
-
Maet ol memba blong klas oli save faenem se bae i givim olgeta insperesen blong stap komperem sam long ol merikel we Elisa i bin mekem wetem sam we Jisas Kraes i bin mekem (luk long 2 King 4:8–37 mo Luk 7:11–16; 2 King 4:42–44 mo Jon 6:1–13; 2 King 5:1–15 mo Luk 17:11–19). ?Wanem nao ol merikel ia oli stap tijim yumi abaot Sevya mo ol profet blong Hem?
Sapos yumi gat tingting i stap daon mo yumi stap obei, Jisas Kraes i save hilim yumi.
-
Wan lesen we yumi save lan aot long hiling blong leprosi blong Neman, hem i hamas i impoten blong gat tingting i stap daon. Blong statem wan toktok storian insaed long klas, yu save raetem long bod: Hae tingting blong Neman mo Tingting we i stap daon blong Neman. Ol memba blong klas oli save luklukgud insaed long 2 King 5:1–19 mo raetem long bod ol sentens ia we i soemaot hae tingting mo tingting we i stap daon, blong Neman. ?Weswe? ?Yumi tu, samtaem, yumi olsem Neman? ?Weswe? ?Yumi tu, samtaem, yumi olsem ol wokman blong hem? ?Olsem wanem nao yumi kam blong save wanem we Neman i bin kam blong save?
-
Wan nara lesen we yumi save lanem aot long stori ia, hem i hamas i impoten blong stap obei long God long ol smol samting. Blong stat, yufala i save ridim 2 King 5:9–12 mo askem ol memba blong klas blong talem tingting blong olgeta long risen we Neman i bin kros (ves 12). ?From wanem, samtaem, yumi laekem moa blong mekem ol bigfala samting we God i stap askem yumi, be i no ol simpol samting? (ves 13). ?Wanem praes blong mekem ol simpol samting ia?
“Yu no fraet. Olgeta long saed blong yumi oli plante moa, i winim olgeta ya.”
-
Yumi evriwan i bin gat ol taem we yumi filim se yumi stap yumiwan, o yumi fraet. Tingting long, hao nao, sapos yufala i toktok raon long stori we i stap long 2 King 6:8–23 bae i save helpem klas blong filim olsem. Yu save stat blong askem nomo ol memba blong klas wanem nao i tajem olgeta long ol ves ia. Oli save serem ol eksperiens blong olgeta abaot sam taem we Lod i bin openem ae blong olgeta (ves 17) mo i bin helpem olgeta blong luk se oli no bin stap olgetawan (luk long “Sam Moa Risos”). ?Olsem wanem yumi save helpem wanwan long yumi blong “no fraet”? (ves 16).
Sam Moa Risos
“Stap openem ol ae blong spirit blong yumi.”
Taem hem i bin stap tokbaot stori we i stap long 2 King 6:8–23, Elda Ronald A. Rasband i bin talem:
“Maet yumi no gat ol hos mo ol faea kat blong ronemaot ol fraet blong yumi mo winim ol devel blong yumi, be lesen i klia. Lod i stap wetem yumi, i gat tingting long yumi mo i stap blesem yumi long ol wei we Hem nomo i save mekem. Prea i save singaotem paoa mo revelesen we yumi nidim blong putum tingting blong yumi long Jisas Kraes, mo sakrifaes blong Hem we i pem praes from yumi. Lod i bin save se, samtaem, bambae yumi fraet. Mi bin stap long ples ia, mo yufala tu. … Long Jos ia, maet namba blong yumi i smol long wei we wol i stap kaontem paoa, be taem yumi openem ae blong spirit blong yumi, ‘olgeta long saed blong yumi oli plante moa, i winim olgeta ya’ [2 King 6:16]” (“Be Not Troubled,” Liahona, Nov. 2018, 18–19).
Kam Antap long Fasin blong Yumi blong Stap Tij
Sendem olgeta ia we oli stap lan, oli go long ol skripja blong olgeta. Taem we yu save mekem, leftemap tingting blong ol memba blong klas blong oli openem mo ridim ol skripja blong olgeta, mo ol toktok blong olgeta profet ia we oli stap laef blong oli kasem moa daereksen, blong oli kasem ansa long ol kwestin, mo oli kasem sapot. Toktok blong God i gat bigfala stamba blong trutok. (Luk long Teaching in the Savior’s Way, 21.)