Pikja blong Tempol blong Serubabel, i kam long Sam Lawlor

18–24 Julae

Esra 1; 3–7; Nehemaea 2; 4–6; 8

“Mi Mi Stap Mekem Wan Bigfala Wok”

Taem yu stap invaetem ol memba blong klas blong yu blong serem wanem i kamaot klia long olgeta insaed long Buk blong Esra mo Buk blong Nehemaea, mo tu, blong serem eni tingting mo filing we yu bin kasem taem yu bin stadi.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Samtaem, blong raetem ol ki toktok o sentens long bod bae i save rimaenem ol memba blong klas abaot ol samting we oli bin lanem aot long ol skripja, mo bae i mekem i isi long olgeta blong serem. Eksampol: yu save raetem Bildimbak, Riperem, mo Stanemap Bakegen long bod mo invaetem ol memba blong klas blong oli serem ol ves aot long riding blong olgeta we i go wetem wan o moa long wan long ol toktok ia.

Stap Tijim Doktrin

Esra 3:8–13; 6:16–22

Ol Tempol oli save tekem glad i kam long yumi.

• Blong stap ridim abaot glad ia we Ol Man Jiu oli bin filim taem we oli bin stap bildimbak tempol blong olgeta i save helpem ol memba blong klas blong oli filim moa bigfala tangkyu from ol tempol long taem blong yumi tedei. Yu save invaetem ol memba blong klas blong luklukbak Esra 3:8–13 mo 6:16–22 mo toktok raon long sam long ol wei we Ol Man Jiu oli bin stap selebretem mo dediketem tempol. ?From wanem wok blong stap bildim wan tempol, i wan gud wok blong stap selebretem? Yu save invaetem ol memba blong klas blong serem olsem wanem ol tempol, mo wok we yumi stap mekem insaed, i tekem glad i kam long olgeta. Toktok ia we i insaed long “Sam Moa Risos” i save leftemap tingting blong ol memba blong klas blong save gotru long glad ia blong tempol wok.

  

  Tempol i save stap olsem wan stamba blong glad insaed long laef blong yumi.

Esra 4–5; Nehemaea 2; 4; 6

Yumi save helpem wok blong God blong muv fored nomata se bae i gat fasin blong agens.

• Buk blong Esra mo Buk blong Nehemaea oli tokbaot ol pipol we oli bin stap mekem ol impoten wok, nomata se i bin gat plante samting we ol enemi blong olgeta i mekem agensem olgeta. Blong save statem wan toktok storian, yu save invaetem ol memba blong klas wanem nao bigfala wok we Nehemaea i bin mekem (Nehemaea 6:3) we oli save komperem long laef blong yumi. ?Wanem nao ol impoten wok we God i bin givim long yumi? Afta, yu save ridim Esra 4:4 mo toktok raon long wei we Setan i stap mekem han blong yumi i nomo strong, mo i stap trabolem tingting blong yumi blong no stap mekem wok ia blong God. ?Wanem nao yumi stap lanem aot long Nehemaea mo ol wokman we oli wok wetem hem, we yumi save rid abaot long Nehemaea 2:18–20; 4:6–9; mo 6:1–3? ?Hem i minim wanem blong “glad tumas long wok” we i blong wok blong Sevya? (Nehemaea 4:6). Tingting blong serem pat blong mesej blong Presiden Dieter F. Uchtdorf “We Are Doing a Great Work and Cannot Come Down” (Liahona, May 2009, 59–62), speseli tufala las seksen.

• Maet bae yu filim insperesen blong holem wan toktok storian we yufala i komperem ol hadwok blong Serubabel blong stap bildimbak tempol, wetem hadwok blong yumi blong stap go long tempol mo mekem wok blong sevem ol man insaed long hem. Eksampol: yu save raetem tufala heding ia long bod: Serubabel mo Yumi. Anda long Serubabel, ol memba blong klas oli save raetem wanem we “ol enemi blong Juda mo Benjamin” (Esra 4:1) oli bin traem blong mekem blong stopem Serubabel mo ol Jiu pipol blong bildimbak tempol ia (luk long Esra 4). Anda long Yumi, ol memba blong klas oli save mekem lis blong sam wei we enemi i stap traem blong stopem yumi blong stap traem blong go long tempol. Afta, oli save serem sam advaes wetem wanwan long yumi abaot wei we yumi sapos blong askem help blong Lod blong stap winim wanem we i kam agens.

Nehemaea 8:1–12

Yumi gat blesing taem yumi stap stadi long ol skripja.

• Maet ol memba blong klas oli save ridim Nehemaea 8:1–12 tugeta mo toktok raon long wei we Esra mo ol pipol blong hem oli stap filim abaot God mo toktok blong Hem. Leftemap tingting blong ol memba blong klas blong lukluk i go long sam spesifik ves we oli soem olsem wanem oli bin filim. Invaetem ol memba blong klas blong oli talemaot wei we oli filim abaot toktok blong God. ?Olsem wanem yumi save kam antap long ol hadwok blong yumi blong stadi long toktok blong God?

Sam Moa Risos

Stap filim glad blong tempol.

Presiden Russell M. Nelson i tijim:

“Yumi save kasem insperesen long ful dei tru long ol tempol mo famli histri eksperiens we ol narawan oli bin gat. Be, yumi mas mekem wan samting blong save gotru long glad ia yumiwan. Mi wantem blong givim wan jalenj long wanwan long yumi blong mekem se gudfala filing blong wok ia i save gohed mo i save kam antap moa. Mi invaetem yufala blong prea, mo tingting long wanem kaen sakrifaes—bae i gud sapos sakrifaes ia i sakrifaes blong taem—we bae yu mekem moa wok blong tempol mo famli histri long yia ia.

“Yumi joen long wok blong God we I Gat Olgeta Paoa. Hem i stap laef. Jisas Hem I Kraes. Hemia i Jos blong Hem. Yumi ol kavenan pikinini blong Hem. Hem i save dipen long yumi” (Russell M. Nelson and Wendy W. Nelson, “Open the Heavens through Temple and Family History Work,” Ensign, Oct. 2017, 39).

Kam Antap long Fasin blong Yumi blong Stap Tij

Yusum ol papa mo mama blong ol yut. Sapos yu yu stap tijim ol yut, serem wanem we yu stap tijim wetem papa mo mama blong olgeta. Oli save helpem yu blong andastanem ol nid blong ol yut mo olsem wanem blong helpem olgeta. Hemia i save stap tu olsem wan gudfala wei blong leftemap tingting blong holem ol famli storian abaot wanem ol yut oli stap lanem insaed long klas. (Luk long Teaching in the Savior’s Way, 27.)