Ol Jajmen blong Job, i kam long Joseph Brickey

1–7 Ogis

Job 1–3; 12–14; 19; 21–24; 38–40; 42

“Be Tingting blong Mi Bambae I Stap Strong long Hem Nomo”

?Wanem trutok nao Tabu Spirit i bin helpem yu long stap lanem taem yu bin stap stadi long long Buk blong Job? ?Wanem nao yu wantem blong serem wetem klas blong yu?

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Ol memba blong klas we oli bin stadi long Job long wik ia, maet oli faenem ol trutok we i gat mining long olgeta. Blong mekem olgeta oli serem wanem oli gat, yu save raetem long bod: Mi ridim ol skripja from … mo askem ol memba blong klas blong oli finisim sentens ia.

Stap Tijim Doktrin

Job 1–2; 12–13; 19:23–27

Tras blong yumi long Papa long Heven mo long Jisas Kraes, i save helpem yumi blong stap fetful long evri situesen.

• Ol fas tu japta blong Buk blong Job, we i tokbaot Setan we i stap kwestinim ol risen biaen long fasin blong Job blong stap fetful, i save helpem ol memba blong klas blong oli skelem risen blong olgeta blong stap fetful long Papa long Heven mo long Jisas Kraes. Ol memba blong klas oli save stat taem oli lisin long samfala risen we wan i jusum blong stap obei long ol komanmen blong God. Oli save luklukgud insaed long Job 1:6–12; 2:1–6 blong faenemaot wanem nao Setan i bin talem abaot fasin blong Job blong stap fetful. ?From wanem bae i wan denja blong stap obei nomo long Lod from risen ia we Setan i talem? ?Wanem nao ansa blong Job long Job 1:20–22; 2:9–10 i stap soemaot long yumi abaot Job? Ol memba blong klas oli save tokbaot from wanem oli stap jusum blong stap fetful long God.

  

  Job, i kam long Gary L. Kapp

• Taem we Job i bin gat ol taem we hem i bin gat hadtaem blong fesem fasin blong gat tu tingting mo fasin blong lusum hop, long en, tras we hem i bin gat long Lod i bin sapotem hem long taem we hem i bin stap safa. Blong lanem samting aot long eksampol blong Jos, ol memba blong klas oli save luklukgud long sam long ol ves ia blong faenemaot ol gud wei we Job i bin fesem ol tes blong hem: Job 1:21; 2:10; 12:9–10, 16; 13:15–16; 19:23–27. ?Wanem nao yumi save lanem aot long ol ansa o wei ia, we i save helpem yumi blong stap strong long saed blong spirit taem yumi fesem ol tes? ?From wanem hem i wan denja blong ting se ol tes oli ol panismen from ol sin blong yumi?

• Toktok we Job i talemaot long Job 19:23–27 i save givim insperesen long ol memba blong klas blong tingting hevi mo serem tru bilif blong olgeta se Ridima ia, Jisas Kraes, Hem i stap laef. Maet blong stat, yu save invaetem ol memba blong klas blong tingting hevi, kwaet, long ol toktok blong Job we oli stap long ol ves ia. Afta long hemia, toktok raon long ol kwestin olsem: ?From wanem nao, wan testemoni abaot Ridima blong yumi, i impoten tumas long ol taem blong tes olsem hemia we Job i bin safa mo gotru long ol? ?Olsem wanem nao testemoni blong yumi i bin sapotem yumi long ol taem blong tes blong yumi? Blong stap singsing o stap ridim ol toktok blong wan hym abaot Jisas Kraes, olsem “Mi Save Ridima Hem I Laef” (STSP, pej 68), i save mekem se yu gat moa niu tingting mo moa paoa long saed blong spirit long ol toktok storian blong yufala.

Job 38

Lukluk blong God i moa bigwan bitim lukluk blong yumi.

• Plante samting we oli stap insaed long Buk blong Job (ol japta 3–37) i abaot Job mo ol fren blong hem we oli stap faet wetem kwestin ia: “?From wanem ol nogud samting oli stap hapen long ol pipol we oli stret mo gud?” Nomata se Lod i no stap ansarem kwestin ia fulwan insaed long Buk blong Job, Hem i givim wan impoten mesej we i stap. Yu save helpem ol memba blong klas blong faenemaot mesej ia taem yu invaetem olgeta blong ridim ol kwestin we Lod i bin askem long Job, insaed long Job 38:1–7, 18–24. ?Wanem nao yumi lanem aot long ol kwestin ia?

• Gospel we i kambak, blong Jisas Kraes, i givim moa laet we i save helpem yumi andastanem sam long ol risen from wanem i gat safaring insaed long wol. Ol memba blong klas oli save sam trutok we oli save from se, Restoresen blong Gospel, i bin givim olgeta wan moa bigfala lukluk mo andastaning abaot fasin blong stap safa. Oli save faenem sam long ol trutok ia insaed long ol skripja mo toktok we i stap long “Sam Moa Risos.”

Sam Moa Risos

Wan niu Lata-dei wei blong lukluk long ol stamba tingting biaen long fasin blong stap safa.

Olgeta skripja ia, oli givim sam tingting abaot ol stamba tingting blong safa:

• 2 Nifae 2:11–14

• Ita 12:27

• Doktrin mo Ol Kavenan 58:3–5

• Doktrin mo Ol Kavenan 122

• Moses 5:10–12

Spensa W. Kimbol i bin tijim:

“Sapos yumi stap tingting se laef long wol ia nomo i evri samting abaot laef, bae harem nogud, sore, fasin blong no gat sakses, mo laef we i sot, bae i wan filing blong harem nogud. Be sapos yumi tekem laef olsem wan samting we i no save finis we i stap finis stat long laef bifo laef ia mo afta i go kasem fiuja blong laef blong yumi we i no save finis afta we yumi ded, afta bae yumi lukluk evri samting we bae i hapen long wan stret wei. 

“?Hemia i no wan waes tingting blong [God] i givim yumi ol tes blong mekem se yumi save girap i go antap i go bitim ol tes ia; blong yumi gat ol responsabiliti we yumi save mekem, blong yumi save wok blong mekem masel blong bodi i kam strong, mo blong gat ol harem nogud blong traem sol blong yumi? ?Yumi no fesem ol temtesen blong testem paoa blong yumi? ?Yumi no fesem ol sik blong yumi save lanem fasin blong save wet longtaem? mo ?yumi no fesem ded blong yumi save kasem wan bodi we i nomo save ded mo i fulap long glori? …”

“Sapos glad mo pis, mo ol praes, bae man o woman we i stap mekem gud samting i givim olgeta long yumi olsem nomo mo naoia nomo, bae i no save gat nogud samting i stap—evriwan bae i mekem gud, be bae oli mekem i no from se i raet blong mekem gud. Bae i no gat wei blong testem paoa blong yumi, bae man i no save kam blong developem gud fasin, bae man i no luk paoa blong hem i gro, bae i no gat fridom blong mekem joes” (Teachings of Presidents of the Church: Spencer W. Kimball [2006], 15).

Kam Antap long Fasin blong Yumi blong Stap Tij

Stap folem Spirit. Yu no save talem bifo taem olsem wanem nao bae lesen i gohed, be ol kwaet toktok blong Spirit bae oli save soem rod long yu. Taem we yu rere long saed blong spirit, bambae Lod i givim yu “long stret aoa, yes long stret taem, wanem we bae [yu] talem” (Doktrin mo Ol Kavenan 100:6), mo maet i stret samting ia nao we ol memba blong klas oli nidim blong harem. (Luk long Teaching in the Savior’s Way, 10.)