Stap Sevem Hemia we I Bin Lus, i kam long Michael T. Malm

15–21 Ogis

Ol Sam 49–51; 61–66; 69–72; 77–78; 85–86

“Bambae Mi Talemaot long Yufala Ol Samting Ia we Hem I Mekem long Mi”

Tingting long advaes blong Elda David A. Bednar taem yu stap rere blong tij: “Blong toktok mo talem samting nomo, hemia i no blong stap tij. Blong stap prijim gospel long wei blong Lod, i minim tu blong stap lukluk raon, mo stap lisin, mo stap luksave samting bifo yu toktok” (“Becoming a Preach My Gospel Missionary,” New Era, Oct. 2013, 6).

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Wan wei blong stap invaetem ol memba blong klas blong serem wan samting we oli ridim long wik ia, hem i blong raetem long bod: “Bambae mi stap singsingaot from we mi mi glad” o “Oltaem bambae mi stap tokbaot ol stret fasin blong yu” (Ol Sam 71:23, 24). Maet ol memba blong klas oli save serem wanem we oli bin faenem we i helpem olgeta blong “[oli] glad we oli glad” o “tokbaot ol stret fasin blong [Lod].”

Stap Tijim Doktrin

Ol Sam 51; 85–86

“Yu yu gud tumas long mifala, mo yu stap fogivim mifala.”

• Ol Sam 51 i tokbaot ol filing we plante long yumi i gat taem yumi stap wantem sakem sin mo kasem fogivnes. Blong helpem ol memba blong klas blong oli andastanem gud moa fasin blong sakem sin mo filim insperesen blong sakem sin plante taem, yu save givim tingting blong oli luklukgud insaed long Ol Sam 51 wetem kwestin ia long maen blong olgeta: ?Hem i minim wanem blong sakem sin? Afta, letem olgeta oli serem samfala ansa.(Sam Moa Risos i tekem niu tingting we i save help.) ?From wanem, samtaem, fasin blong sakem sin i wan samting we man i no laekem blong mekem? ?Wanem nao yumi faenem insaed long Sam ia we i mekem se fasin blong sakem sin i wan samting we i mekem man i glad?

• ?Olsem wanem nao bae yumi tokbaot wanem i kaen filing wan i save filim blong kasem fogivnes from sin tru long paoa ia blong Jisas Kraes we i pemaot sin. Invaetem ol memba blong klas blong oli serem ol tingting blong olgeta, mo leftemap tingting blong olgeta blong faenem ol skripja insaed long Ol Sam 51; 85–86 we i tokbaot ol risal blong fogivnes insaed long laef blong yumi (Eksampol : Luk long Ol Sam 51:1–2, 7–12; 85:2–9). Tingting long soemaot gud ol pikja mo ol samting blong helpem ol memba blong luksave wanem ol sentens ia oli minim. Afta, ol memba blong klas oli save serem ol filing we oli gat abaot Sevya Jisas Kraes, mo hamas Hem i bin wantem blong pemaot praes from ol sin blong yumi, blong mekem se yumi kasem fogivnes. Maet, tugeta yufala i save singsing wan hym abaot sakrifaes ia “Mi Sapraes Tumas We Jisas Hem i Lavem Mi” (STSP, namba 22).

• Blong save sakem sin, yumi nidim fet, i no fet nomo se bae Jisas Kraes i save klinim yumi, be tu, se bambae Hem i klinim yumi. Maet ol memba blong klas oli bin faenem sam skripja long Ol Sam 51; 85–86 long wik ia we i bin mekem fet blong olgeta long Lod i kam strong moa, hemia long saed blong se Lod i wantem blong fogivim olgeta. Leftemap tingting blong olgeta blong serem wanem we oli bin faenem. Yu save poenem olgeta i go long Ol Sam 86:5, 13, 15 mo askem wanem we ol ves ia oli stap tij abaot Lod. ]?Hem i minim wanem se, Lod “Fasin blong [hem], oltaem [i] gat sore long man, mo [i] lavem [man] tumas. Oltaem [hem i] stap mekem tingting blong [hem] i longfala, mo [hem i] kaen tumas, oltaem [hem i] stap holem ol promes blong [hem]”? (ves 15). ?From wanem hem i impoten blong yumi save hemia?

Ol Sam 66:5–20

Testemoni blong yumi abaot Jisas Kraes i save helpem ol narawan blong go long Hem.

• Wan long ol bigfala blesing blong stap mit tugeta long Sandei Skul, hem i janis ia blong kasem paoa aot long bilif mo testemoni blong ol narawan we oli stap folem Jisas Kraes. Blong givim janis ia long klas blong yu, yu save askem ol memba blong klas blong oli ridim Ol Sam 66:16 mo tingting hevi long kwestin ia: ?Sapos bae yu mas “talemaot … ol samting ya we hem i mekem long [yu],” ?wanem nao bae yu talemaot? Taem oli stap tingting hevi long hemia, oli save ridim ol ves 5–20 blong gat samfala aedia. Letem olgeta oli save raetemdaon ansa blong olgeta. Afta, invaetem olgeta blong “talemaot” long wanwan long olgeta—long ol smol grup, o long ful klas—wanem we Jisas Kraes i bin mekem long sol blong olgeta.

  

  Yumi save serem ol testemoni blong yumi wetem ol narawan abaot wanem we Lod i bin mekem blong yumi.

Sam Moa Risos

Fasin blong sakem sin i minim jenis.

Presiden Russell M. Nelson i tokbaot fasin blong sakem sin long wei ia:

“Taem Jisas i askem yu mo mi, blong ‘sakem sin,’ Hem i stap invaetem yumi blong jenisim maen blong yumi, save blong yumi, spirit blong yumi—iven wei we yumi pulum win. Hem i stap askem yumi blong jenisim wei we yumi lavem man, tingting, wok, spendem taem blong yumi, tritim waef blong yumi, tijim ol pikinini blong yumi, mo iven, wei blong kea long bodi blong yumi.

Blong save progres, i no gat wan samting we i mekem yumi moa fri, gat moa gud fasin, o i moa impoten bitim blong stap lukluk evri dei long fasin blong sakem sin. Blong sakem sin, i wan wan spesel taem; hem i wan rod blong folem. Hem i ki blong hapines mo pis long maen. Taem yumi yusum wetem fet, fasin blong sakem sin i openem doa blong yumi kasem paoa blong Atonmen blong Jisas Kraes. …

“Taem yumi jusum blong sakem sin, !yumi jusum blong jenis! Yumi letem Sevya i jenisim yumi i kam wan moa gud vesen blong yumiwan. Yumi jusum blong groap long saed blong spirit mo blong kasem glad—glad ia blong fasin blong pemaot man, tru long Hem. Taem yumi jusum blong sakem sin, !yumi jusum blong kam moa olsem Jisas Kraes!”(“Yumi Save Mekem Gud Moa mo Stap Gud Moa,” Liahona, Mei 2019, 67).

Kam Antap long Fasin blong Yumi blong Stap Tij

Askem ol kwestin we i stap i tajem hat mo maen. “Askem olgeta we oli lanem samting blong oli serem wanem we oli stap filim abaot wan skripja, abaot hao ol pipol insaed long skripja oli bin filim, o olsem wanem ol trutok ia insaed long skripja i go wetem laef blong yumi” (Teaching in the Savior’s Way, 31).