Lod Hem I Man blong Lukaot long Mi we Mi Sipsip blong Hem, i kam long Yongsung Kim, havenlight.com

8–14 Ogis

Ol Sam 1–2; 8; 19–33; 40; 46

“Hae God I Stap Lukaot Gud long Mi Olsem we Mi Mi Sipsip blong Hem”

Mekem plan blong gat sam wei blong ol memba blong klas oli serem ol eksperiens long saed blong spirit, we oli stap gat taem oli stap ridim Ol Sam.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Invaetem ol memba blong klas blong oli serem wanem oli faenemaot insaed long Ol Sam, we i simpol olsem blong stap askem ol kwestin olsem: ?Wanem nao Spirit i stap tijim yu taem yu stap ridim Ol Sam long wik ia? Wanem Sam nao i bin helpem yu blong filim kolosap gud long Lod?

Stap Tijim Doktrin

Ol Sam 1; 23; 26–28; 46

Ol Sam oli stap tijim yumi blong trastem Lod.

• Aotlaen blong wik ia, insaed long Kam Folem Mi—Blong Wanwan Man, Woman mo Famli i givim sam tingting blong stap ridim Ol Sam 1; 23; 26–28; 46 mo stap lukaotem olgeta samting ia:

  • Ol invitesen blong trastem Lod

  • Ol toktok we oli tokbaot Lod

  • Ol toktok we oli tokbaot pis, paoa, mo ol nara blesing we Hem i givim

  • Ol toktok we oli tokbaot olgeta pipol we oli stap trastem Hem

  Yu save raetem ol sentens ia long bod mo invaetem ol memba blong klas blong oli raetem, long saed blong wanwan sentens, wan samting we oli bin raetem long Ol Sam 1; 23; 26–28; o 46. Sapos oli nidim help, nao yu save poenem olgeta i go long ol ves ia: Ol Sam 1:1–4; 23:1–6; 26:1, 6–8, 12; 27:1, 3, 8, 14; 28:1, 7; 46:1–3, 10. Ol memba blong klas oli save serem ol filing blong olgeta, we oli bin gat abaot Sevya taem we oli bin ridim ol sam ia.

• From se Ol Sam oli stap olsem ol hym long Ol Man Isrel, maet yu save invaetem ol memba blong klas blong givim nem blong sam hym we i mekem olgeta oli tingabaot ol sam we oli bin ridim long wik ia. Oli save go long “Skripja” indeks long en blong hymbuk blong kasem sam moa aedia (luk tu long lis we i stap long “Sam Moa Risos”). Ol memba blong klas oli save singsing sam long ol hym ia mo faenem ol semmak stamba toktok insaed long ol hym mo ol sam. ?Wanem mesej blong pis mo fet long Jisas Kraes nao yumi faenem?

Ol Sam 2; 22; 31:5

Ol Sam oli stap poenem maen blong yumi i go long laef mo seves blong Jisas Kraes.

• Blong stap ridim Ol Sam—speseli olgeta ia we i poenem yumi long laef blong Sevya—i wan gudfala wei blong mekem fet blong yumi long Jisas Kraes i kam strong moa. Yu save serem klas i go long ol grup blong tu o moa pipol, mo givim wanwan grup, wan long olgeta grup blong skripja refrens ia: Ol Sam 2:1–3 mo Ol Wok 4:24–28; Ol Sam 2:7 mo Ol Wok 13:30–33; Ol Sam 22:1 mo Matiu 27:45–46; Ol Sam 22:7–8 mo Matiu 27:39–43; Ol Sam 22:16 mo Luk 23:32–33; Ol Sam 22:18 mo Matiu 27:35; Ol Sam 31:5 mo Luk 23:46. Askem wanwan grup blong faenem olsem wanem profesi insaed long Ol Sam i bin kamtru long taem blong laef blong Sevya, mo toktok raon long wei we ol skripja ia oli mekem testemoni blong olgeta abaot Sevya i kam strong moa.

  O, yu save raetem ol skripja refrens ia long bod, mo invaetem ol memba blong klas blong oli majem wan skripja blong Ol Sam i go wetem wan taem insaed long Niu Testeman.

  Mo tu, yu save invaetem ol memba blong klas blong oli serem ol nara refrens i go long Sevya, we oli faenem taem we oli bin stap stadi long Ol Sam (olsem Ol Sam 34:20; 41:9; luk tu long Luk 24:44).

  Afta we ol memba blong klas oli toktok raon long ol skripja ia, oli save tokbaot from wanem ol sam ia oli bin gat mining blong Ol Man Jiu we oli bin save Sevya. ?From wanem oli gat mining long yumi?

Ol Sam 23

“Hae God i stap lukaot gud long mi olsem we mi mi sipsip blong hem.”

• Blong helpem ol memba blong klas blong oli toktok raon long pikja ia mo simbol ia we i stap long Ol Sam 23, tingting blong soem ol pikja ia we i go wetem ol aedia we oli stap long ol sam, olsem olgeta ia we oli stap long Kam Folem Mi—Blong Wanwan Man, Woman mo Famli. Afta, yu save askem ol memba blong klas blong oli faenem ol toktok o ol sentens we oli gat mining insaed long Ol Sam, mo blong oli toktok raon long wanem nao oli stap ripresentem. Eksampol: ?Wanem nao ol sentens ia olsem “mi spel gud long ples we i gat gudfala gras long hem,” o “mi go long kwaet ples we wota i stap ron smol long hem” i mekem mi tingting long hem? Ol samting ia “nalnal” mo “wokingstik” ?oli simbol blong wanem? ?I minim wanem blong “fulumap kap blong mi i fulap we i fulap gud”? ?Wanem nao ol simbol ia oli stap tijim yumi abaot Jisas Kraes? Maet yu save givim tingting se ol memba blong klas oli talem sam ia bakegen, mo oli riplesem sam long ol simbol ia wetem sam mining we klas i bin toktok raon long hem finis.

Sam Moa Risos

Ol hym oli go wetem wanem i stap long Ol Sam.

• Ol Sam 8:3–9; 9:1–2. “How Great Thou Art” (Hymns, namba 86)

• Ol Sam 23. “The Lord Is My Shepherd,” “The Lord My Pasture Will Prepare” (Hymns, ol namba 108, 109)

• Ol Sam 23:6; 150. “Praise to the Lord, the Almighty” (Hymns, namba 72)

• Ol Sam 26:8. “We Love Thy House, O God” (Hymns, namba 247)

• Ol Sam 27:1. “The Lord Is My Light” (Hymns, namba 89)

• Ol Sam 33:1–6; 95:1–6. “For the Beauty of the Earth” (Hymns, namba 92)

• Ol Sam 37:3–9. “Be Still, My Soul” (Hymns, namba 124)

• Ol Sam 148. “All Creatures of Our God and King” (Hymns, namba 62)

Stap Kam Antap long Fasin blong Yumi blong Stap Tij

Yusum miusik. “Ol hym oli invaetem Spirit blong Lod, i putum wan filing blong respek i stap, mo i yunaetem yumi, olsem ol memba, mo i givim wan wei blong yumi givim ol pres blong yumi long Lod. … Ol hym oli pusum yumi blong sakem sin mo mekem ol gudfala wok, blong yumi bildimap testemoni mo fet, blong mekem olgeta we oli wari oli gat pis, blong mekem olgeta we oli krae oli gat pis, mo givim insperesen long yumi blong stap strong kasem en” (Hymns, ix).