“22–28 Ogis. Ol Sam 102–103; 110; 116–119; 127–128; 135–139; 146–150: ‘Olgeta Samting we I Gat Laef, Evriwan I Mas Presem Hem,’” Kam Folem Mi—Blong Sandei Skul: OlTesteman 2022 (2021)
“22–28 Ogis. Ol Sam 102–103; 110; 116–119; 127–128; 135–139; 146–150,” Kam Folem Mi—Blong Sandei Skul: 2022
Evri Ni Bae I Bodaon, i kam long J. Kirk Richards
“22–28 Ogis
Ol Sam 102–103; 110; 116–119; 127–128; 135–139; 146–150
“Olgeta Samting we I Gat Laef, Evriwan I Mas Presem Hem”
?Wijwan long ol tijing long Ol Sam, yu yu filim se bae i givim moa help long ol memba blong klas blong yu? Taem yu stap stadi long wik ia, tingting hevi long ol wei we yu save helpem olgeta blong faenem mining insaed long ol tok blong ol sam ia.
Raetemdaon Ol Filing mo Tingting blong Yu
Invaetem Man blong Serem Wanem Oli Gat
Givim sam minit long ol memba blong klas blong oli luklukbak long ol sam we oli bin ridim long wik ia, mo invaetem olgeta blong oli serem skripja we oli laekem moa. Leftemap tingting blong olgeta blong serem wanem we Spirit i bin tijim olgeta. ?Olsem wanem nao Ol Sam oli mekem se yu kam antap long wosip blong yuwan long Lod?
Stap Tijim Doktrin
Lod i save helpem yumi taem yumi stap safa.
-
?Weswe? ?Ol memba blong klas blong yu oli bin filim semmak olsem hem we i bin raetem Ol Sam 102 i bin filim? ?Olsem wanem yumi save tanem yumi i go long Lod taem we yumi filim se tingting i slak o i fasfas? Taem we oli bin stap stadi long Ol Sam 102, 103, mo 116 long hom long wik ia, maet ol memba blong klas oli bin faenem sam sentens we i bin givim insperesen long olgeta blong oli tanem olgeta i go long Lod long ol taem blong tes blong olgeta. Leftemap tingting blong olgeta blong serem wanem we oli bin faenem, o olsem wan klas, tugeta faenem sam sentens we i givim insperesen. Mo tu, ol memba blong klas oli save tokbaot olsem wanem Lod i bin sapotem olgeta long ol taem we oli fesem fasin blong agens.
-
Ol memba blong klas blong yu, maet bae oli laekem blong raetem wan sam blong olgeta abaot wei we Lod i bin helpem olgeta long ol taem blong tes. Ol sam ia, bae oli no nid blong oli mas longfala—i blong talemaot nomo bilif, tangkyu mo pres blong olgeta. Ol memba blong klas bae oli save wok olgetawan nomo, o oli save wok tutu, mo oli save luklukbak long Ol Sam 102, 103, mo 116 blong gat samfala aedia. Invaetem sam pipol blong oli serem sam ia we oli raetem, sapos oli glad blong mekem. Mo tu, yufala i save singsing ol hym tugeta abaot wei we Lod i stap kamfotem yumi, olsem “Where Can I Turn for Peace?” (Hymns, no. 129).
Hiling, i kam long J. Kirk Richards
God bambae i kipim yumi i stap long rod ia blong Hem.
-
Blong statem wan toktok storian abaot Ol Sam 119, yu save invaetem ol memba blong klas blong tokbaot wan taem we oli bin folem wan rod blong oli save kasem wan ples (maet bae i help blong toktok long wan long taem blong wik blong askem hem blong hem i rere blong tokbaot hemia). ?Wanem nao ol eksperiens we i bin mekem se i had blong yu stap long rod ia? ?Wanem nao i bin helpem olgeta blong stap long rod ia? Afta, maet bae yu save droem wan rod long bod, mo invaetem ol memba blong klas blong raetem ol sentens we oli kamaot long Ol Sam 119 we i talem wanem we Lod i bin mekem blong helpem yumi blong stap long kavenan rod ia blong Hem. Tingting blong serem wan toktok we i kam long Presiden Russell M. Nelson insaed long “Sam Moa Risos” blong i pat blong storian blong yufala.
-
Maet bae ol memba blong klas blong yu oli save lanem samting taem oli komperem wanem we Ol Sam 119 i stap tijim abaot fasin blong stap long rod ia blong Lod, wetem ol nara skripja we oli stap tijim ol semmak trutok. Tingting blong serem klas i go long ol grup mo askem wanwan grup blong luklukbak long ol skripja ia: Ol Sam 119:33–40, 105; Ol Proveb 4:11–19; 1 Nifae 8:20–28; 11:25; 2 Nifae 31:17–21; Alma 7:9, 19–20. Invaetem wanwan grup blong serem wanem oli bin lanem. Givim taem long ol memba blong klas blong oli tingting hevi long wanem we oli kasem insperesen blong mekem folem wanem we oli bin lanem.
Lod i save hat blong yumi.
-
Blong stap andastanem se Lod i save gud wanem yumi nidim—i save gud ol tingting mo ol aksen blong yumi, ol samting we yumi strong long ol, mo ol samting we yumi no strong long ol—mo se Hem i lavem yumi; blong andastanem ol samting ia bae i save gat bigfala paoa long tingting blong yumi long saed blong ol joes we yumi stap mekem. Yu save invaetem klas blong lukaotem ol sentens we oli stap long Ol Sam 139 we i stap tijim impoten trutok ia. ?Olsem wanem bae laef blong yumi i defren taem yumi save trutok ia? Mo tu, ol memba blong klas oli save toktok raon long ol wei we oli save invaetem Lod blong “lukluk gud long mi, blong yu savegud ol tingting blong mi. Plis yu skelem laef blong mi, blong yu faenemaot ol samting we mi stap tingting long hem” (ves 23).
Sam Moa Risos
Rod ia we i stret mo i no isi.
Presiden Russell M. Nelson i talem:
“Sapos wokbaot blong yumi tru long laef ia i mas gat sakses long hem, yumi nidim blong folem daereksen we i kam long heven. Lod i talem: ‘Lukluk long mi long evri tingting blong yutufala; no gat tu tingting, no fraet.’ [Doktrin mo Ol Kavenan 6:36]. Mo Man we i Raetem Ol Sam i bin raetem: ‘Hae God. Tok blong yu i olsem laet. Oltaem hem i stap soemaot rod blong mi, mo i stap lidim mi’ [Ol Sam 119:105]. …
“Long wokbaot blong yumi truaot long laef, yu fesem samting we i kam blokem rod blong yu, mo yu mekem samfala mistek. Givhan we skripja i givim, i helpem yu blong luksave ol rong samting, mo blong yu tekem step blong stretem samting. Yu stop blong go long rong daereksen. Yu stadi gud evriwan long skripja rod map ia. Afta, yu tekem rod blong sakem sin mo stretem evri samting we i nid blong stretem blong kam long rod ia we i stret mo i no isi we i lid i go long laef we i no save finis’ [2 Nifae 31:18]” (“Living by Scriptural Guidance,” Ensign, Nov. 2000, 17).
Stap Kam Antap long Fasin blong Yumi blong Stap Tij
Yusum olgeta we oli stap traehad. Samtaem, ol memba blong klas we oli stap gat hadtaem blong mekem wan samting, oli jes nidim blong oli pat blong wan grup blong mekem se oli filim se man i lavem olgeta. Tingting blong askem olgeta blong plei wan rol long wan lesen we i stap kam antap, o invaetem olgeta blong kam long klas, o mekemsua se oli gat rod blong kam long jos. No givap sapos oli no mekem eni samting afta long ol traehad we yu bin mekem fastaem. (Luk long Teaching in the Savior’s Way, 8–9