Deved mo Golaeat, i kam long Steve Nethercott

13–19 Jun

1 Samuel 8–10; 13; 15–18

“Hem I Gat Paoa blong Win long Faet”

Taem yu stap rere blong tij, tingbaot se maet ol memba blong klas oli bin gat ol gud eksperiens blong stap stadi long ol skripja long hom. ?Wanem nao yu save mekem blong bildimap olgeta antap long ol eksperiens ia?

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Blong leftemap tingting blong ol memba blong klas blong oli serem wanem we oli bin lanem long wik ia, givim olgeta taem ia blong tingting abaot eni tingting o filing we oli bin gat abaot 1 Samuel 8–10; 13; 15–18. Afta long hemia, askem olgeta blong oli serem wan ves we i bin givim olgeta wan insperesen wetem wan niu tingting.

Stap Tijim Doktrin

1 Samuel 9:15–17; 10:1–12; 16:1–13

God i singaotem ol pipol tru long profesi, blong oli holem ol wok insaed long kingdom blong Hem.

• Ol stori ia we oli tokbaot God we i bin jusum Sol mo Deved tru long profesi mo revelesen, i save helpem ol memba blong klas blong oli andastanem wei we God i stap jusum ol pipol blong oli givim seves, o holem wok insaed long Jos tedei. Yu save invaetem ol memba blong klas blong oli ridim 1 Samuel 9:15–17; 10:1–12; mo 16:1–13, mo oli lukaotem ol ples we oli save helpem olgeta blong andastanem wanem nao i minim blong God i singaotem yu, o i singaotem man (Ol Toktok blong Bilif 1:5). ?Bae i mekem wanem i defren blong ol pipol we God i singaotem olgeta, mo blong olgeta we oli stap sastenem olgeta, blong oli save se God nao i stap jusum ol pipol blong mekem wok insaed long Jos blong Hem?

  

  Pikja Droing blong Samuel we i stap anoentem Sol, © Lifeway Collection/we i karem laesens long goodsalt.com

1 Samuel 13:5–14; 15

Blong stap obei, hem i moa gud bitim blong stap sakrifaes.

• Blong stap toktok raon se from wanem hem i impoten blong stap obei long Lod, yu save invaetem klas blong luklukbak long 1 Samuel 13:5–14 mo lukaotem ol fasin mo ol aksen we oli bin mekem se Sol i foldaon. ?Wanem nao yumi save lanem aot long ol mistek blong Sol?

• Yumi no save evri risen from wanem Sol i bin givim oda blong kilimded evri Man blong Amalekae mo ol animol blong olgeta, be i gat ol lesen blong lanem aot long wei we hem i bin fesem komanmen ia. Blong helpem ol memba blong klas blong oli faenemaot ol lesen ia, yu save raetem long bod Blong stap obei, i moa gud bitim … mo invaetem ol memba blong klas blong oli tingting hevi long sentens ia taem we, tugeta, yufala i stap luklukbak long ol samting we oli bin hapen insaed long 1 Samuel 15. ?Wanem sam gudfala samting we samtaem yumi stap jusum long laef blong yumi, be yumi no stap jusum blong obei long God? ?From wanem nao blong stap obei i moa gud bitim ol nara gudfala samting?

1 Samuel 16:6–7

“[Lod] i stap lukluk long tingting blong [man].”

• Afta we oli ridim 1 Samuel 16:6–7, ol memba blong klas oli save serem tingting blong olgeta abaot mining blong “lukluk long tingting blong [man]” (ves 7). ?Olsem wanem yumi stap lan blong luk long wei we Lod i stap lukluk samting? Ol memba blong klas oli save serem eksperiens blong olgeta we i tijim olgeta hamas i impoten blong lukluk long tingting blong man, be i no blong luk olsem wanem hem i luk aotsaed.

1 Samuel 17

Lod i save helpem yumi winim eni jalenj.

• Insaed long Aotlaen blong wik ia, insaed long Kam Folem Mi—Blong Wanwan Man, Woman mo Famli, i givim tingting blong ol memba blong klas oli save tingting hevi long ol toktok blong ol defren pipol we oli tokbaot olgeta insaed long 1 Samuel 17. Tingting blong askem klas blong serem wanem we oli bin lanem aot long aktiviti ia. ?Wanem wan spesel samting we oli bin lanem abaot Deved?

• Samfala memba blong klas, maet oli fesem ol jalenj we oli luk se oli bigwan tumas olsem Golaeat i bin mekem long ami blong Sol. ?Olsem wanem yu save yusum stori blong Deved mo Golaeat blong helpem ol memba blong klas blong oli fesem ol jalenj wetem fet long Lod? Maet yu save soem wan pikja blong Deved mo Golaeat (olsem hemia we i stap long aotlaen blong wik ia insaed long Kam Folem Mi—Blong Wanwan Man, Woman mo Famli). Afta, ol memba blong klas oli save raetem wan lis antap long bod, blong ol samting we oli ol “Golaeat” blong olgeta long taem tedei. Afta, oli save faenem ol ves long 1 Samuel 17 we i soemaot fet blong Deved we i bin mekem se hem i save winim Golaeat (luk tu long toktok we i stap long “Sam Moa Risos”). Maet ol memba blong klas oli save serem ol eksperiens blong ol taem we oli bin filim se Lod i stap helpem olgeta blong win long faet blong olgeta.

Sam Moa Risos

Winim Ol Golaeat blong yumi.

Presiden Gordon B. Hinckley i bin tijim:

“I gat ol Golaeat raon long yumi, ol bigfala strong man wetem rabis tingting blong prapa spolem yu nomo. Olgeta ia, oli no ol man we oli ol saes man, be oli ol man mo oli ol grup we oli kontrolem ol samting we oli save switim man be oli ol rabis samting we oli save kam blong jalenjem yu, mo mekem se yu nomo strong, mo prapa spolem yu long en. …

“ … Be yu no nid blong fraet sapos yu gat sling ia, we i trutok, we yu holem long han blong yu. … Yu gat ol ston we oli klin fasin mo ona, mo fasin blong stap tru blong yu yusum agensem olgeta enemi ia we bae oli wantem blong winim yu. Be yu, yu yu save kilim olgeta nomo, ‘stret long medel blong ae blong olgeta;’ hemia wan tok haed. Yu save winim olgeta taem yu disiplinim yu se bae yu stap longwe long olgeta. Long plante long olgeta, yu save talem olsem we Deved i bin talem long Golaeat: ‘Yu yu kam blong faet long mi long tufala spia mo naef blong faet blong yu, be mi mi kam blong faet long yu long nem blong Hae God. Hem i God blong mifala, mo hem i gat olgeta paoa, be yu yu stap jikim ol soldia blong hem’ [1 Samuel 17:45]” (“Overpowering the Goliaths in Our Lives,” Ensign, May 1983, 46, 51).

Kam Antap long Fasin blong Yumi blong Stap Tij

Koling blong yu i kam tru long insperesen. Olsem wan tija, Lod i bin singaotem yu blong blesem ol pikinini blong Hem. Taem yu laef klin inaf blong kasem help blong Hem, bambae Hem i givim yu revelesen ia we yu stap lukaotem. (Luk long Teaching in the Savior’s Way, 5.)