Pikja droing blong emti tumb we i kam long Maryna Kriuchenko

11–17 Epril

Ista

“Hae God Bambae I Mekem we Ded Bambae I Go Lus Olgeta”

Taem yu stap rere blong tij long Ista Sandei, tingting long wei we yu save helpem ol memba blong klas blong gat moa bigfala tangkyu from wan testemoni abaot sakrifaes blong Jisas Kraes we i pem praes from sin, mo from Laef Bakegen long Ded.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Maet yu save invaetem ol memba blong klas blong serem wanem we, olgeta, o famli blong olgeta, oli bin mekem blong mekem bilif blong olgeta long Jisas Kraes mo Atonmen blong Hem i kam strong moa

Stap Tijim Doktrin

From se Sevya i bin winim ded, yumi tu, bae yumi laef bakegen.

• From se tedei i Ista Sandei, tingting blong luklukbak long skripja stori blong fasfala Ista—Laef Bakegen long Ded blong Jisas Kraes (luk long Jon 20:1–17). Bae yu save invaetem wan memba blong klas blong talem stori ia wetem ol stret toktok blong hem nomo. Mo tu, yu save soem vidio ia “He Is Risen” (ChurchofJesusChrist.org). Ol memba blong klas oli save glad blong singsing ol hym abaot Sevya mo stap rid ol skripja we oli go wetem ol hym ia (ol refrens oli stap daon long pej blong wanwan singsing insaed long Hymns). Ol memba blong klas oli save serem ol fevret sentens blong olgeta we oli kamaot long ol hym, mo filing blong olgeta abaot Sevya.

• Blong helpem ol memba blong klas blong oli talem bigfala tangkyu long wei we OlTesteman i stap testifae abaot Jisas Kraes, yu save invaetem olgeta blong luklukbak long ol skripja we oli stap long tebol long aotlaen blong wik ia insaed long Kam Folem Mi—Blong Wanwan Man, Woman mo Famli, mo tu, insaed long ol skripja insaed long Buk blong Momon we oli kam wetem tebol ia. ?Wanem nao yumi lanem abaot Sevya mo misin blong Hem aot long ol skripja ia? ?From wanem hem i impoten blong save abaot ol profesi ia?

Yumi save faenem pis mo glad tru long Atonmen blong Sevya.

• Aotlaen blong wik ia, insaed long Kam Folem Mi—Blong Wanwan Man, Woman mo Famli i tekem wan lis blong ol skripja we oli tokbaot pis mo glad we oli kam tru long Jisas Kraes. Sapos ol memba blong klas oli ridim ol skripja ia long hom, leftemap tingting blong olgeta blong oli serem ol tingting mo ol filing blong olgeta abaot ol skripja ia. O yufala i save ridim sam skripja, olsem wan klas, mo tokbaot pis mo glad ia we yumi stap filim from Sevya mo Atonmen blong Hem. ?Olsem wanem nao yumi serem olgeta blesing ia wetem ol pipol we maet oli stap traehad blong faenem pis mo glad insaed long laef blong olgeta? Yu save invaetem tu wan memba blong klas blong ridim mesej blong Presiden Russell M. Nelson “Joy and Spiritual Survival” (Liahona, Nov. 2016, 81–84) long wik bifo klas mo blong oli kam long klas we oli rere blong serem wanem nao mesej ia i stap tijim abaot wei blong faenem glad long Sevya.

• Maet bae yu filim insperesen blong lidim wan toktok storian insaed long klas abaot wei blong helpem ol narawan blong oli faenem pis mo glad long Kraes. Yu save invaetem ol memba blong klas blong tingting abaot wan we oli save hem—maet wan we oli stap givhan long hem—we maet i nidim sapos, seves blong olgeta, o simpol nomo, oli nidim blong harem testemoni blong olgeta abaot Kraes mo Atonmen blong Hem. Leftemap tingting blong ol memba blong klas blong oli lukluk i gobak long ol skripja (olsem olgeta ia anda long “Sam Moa Risos”) taem oli tingting long seves we maet bae oli givim, o ol testemoni we bae oli serem blong mekem olgeta raon long olgeta oli kam strong moa. Invaetem samfala memba blong klas blong oli serem ol tingting blong olgeta abaot fasin blong givim seves olsem we Jisas i bin mekem.

Grei Dei long Golgota, i kam long J. Kirk Richards

Tru long Atonmen blong Hem, Jisas Kraes i gat paoa blong helpem yumi blong winim sin, ded, ol tes, mo ol wiknes.

• Wan wei blong helpem ol memba blong klas blong tingting hevi long ol blesing we oli kam tru long Atonmen blong Sevya, i blong raetem ol heding ia long bod: Sin, Ded, Tes, mo Wiknes. Wanwan memba blong klas i save ridim wan long ol skripja ia we oli putum long lis long “Sam Moa Risos,” mo tingting hevi long wei we Sevya i stap helpem yumi blong winim ol samting we oli bin raetem long bod. OI memba blong klas oli save raetem long bod ol skripja refrens blong olgeta anda long wan o moa long wan long ol heding ia long bod, mo serem testemoni blong olgeta abaot Sevya mo Atonmen blong hem.

• Ol stori mo ol stadi blong komperem samting, oli save helpem yumi blong andastanem Atonmen blong Jisas Kraes. Eksampol: yu save invaetem wan memba blong klas blong serem wan long ol stori o stadi blong komperem samting we i stap long mesej blong Elda Walter F. González “Hiling Han blong Sevya” (Liahona, Nov 2019, 90–92) o mesej blong Sista Neill F. Marriott “Abiding in God and Repairing the Breach” (Liahona, Nov. 2017, 10–12). ?Wanem nao ol stori ia mo stadi blong komperem samting oli stap tijim yumi abaot Atonmen blong Kraes? Invaetem ol memba blong klas blong oli wok tutu blong tingting abaot ol stori blong olgetawan mo stadi blong komperem samting long laef blong olgetawan.

• ?Wanem nao yumi lanem aot long ol ves ia abaot praes we Jisas Kraes i bin pem blong sevem yumi: Aesea 53:3–5; Mosaea 3:7; Doktrin mo Ol Kavenan 19:16–19? ?Wanem praes nao, Papa blong yumi long Heven i bin pem? (Luk long Jon 3:16).

Sam Moa Risos

Ol Skripja abaot Atonmen blong Jisas Kraes

• Aesea 61:1–3

• Esikel 36:26–28

• Matiu 11:28–30

• Luk 1:46–55

• Rom 8:35–39

• Alma 7:10–13

• Alma 11:42–45

• Moronae 10:32–33

• Doktrin mo Ol Kavenan 19:15–19

• Moses 5:9–12

Stap Kam Antap long Fasin blong Yumi blong Stap Tij

Talem tangkyu long olgeta long klas blong yu we oli stap lanem samting. “Yu no mas kam blong yu lus insaed long lesen mekem se yu fogetem olgeta long klas we oli stap lanem samting, blong talem tangkyu long olgeta blong save tekpat long klas. Oli nidim blong save se yu laekem we oli stap glad blong serem ol niu tingting blong olgeta, mo tu, ol testemoni blong olgeta (Teaching in the Savior’s Way, 33).