Na Wasa Damudamu

4–10 ni Epereli

Na Lako Yani 14–17

“Ni Tu Vakadua, Ka Raica na Veivakabulai i Jiova”

Vakasamataka na sala e vakayagataki kina na veika era sa sotava na luve i Isireli vei ira na lewe ni nomu kalasi. Na veika sotavi cava ena veivuke vakalevu sara vei ira mera veivosakitaka?

Vola na Veika o Vakauqeti Kina

Sureta na Veiwasei

E sinai tu e Na Lako Yani 14–17 na ivakananumi guilecavi dredre. Sa rawa ki na dua na lewe ni kalasi me droinitaka e dua na ka a yaco mai na veiwase oqo ka me ra vakilakila na vo ni kalasi na ka e droinitaka tiko o koya. Kerea mera wasea na ka era sa vulica mai na itukutuku oqo.

Vakavulica na iVunau

Na Lako Yani 14

Sa sereki keda na Tamada Vakalomalagi ni da muria na Yalo.

• Sa vaka me sa itinitini ni ilakolako vei ira na Isireli na Wasa Damudamu, ia sa kila tu na Kalou na veika era a sega ni kila. Na railesuvi ni itukutuku veivakurabuitaki ni takosovi ni Wasawasa Damudamu sa rawa me vakavotua ki na lewe ni kalasi na veigauna sa dau sereki ira kina na Kalou mai na nodra veivakatovolei. Sa rawa beka mo taroga na lewe ni kalasi me ra railesuva Na Lako Yani 14 ka wasea na cava e vakauqeti ira vakalevu me baleta na itukutuku oqo. Sa rawa mo vakayaloqaqataki ira talega mera wasea na veika era sotava ena nodra a sereki mai na veivakatovolei, vata kei na veitikina mai na wase ni ivola ka tara cake na nodra vakabauta ni Kalou ena rawa ni sereki keda.

• Sa rawa me ka taleitaki talega me wiliki vata na Vunau kei na Veiyalayalati 8:2–3. Na cava e vakatavulica na veitikina oqo me baleti Mosese? E veisautaka vakacava na veitikina oqo na ivakarau ni noda nanuma baleta na veika e yaco e Na Lako Yani 14? Na cava era vakatura me baleta na sala meda vakasaqara kina na veivueti mai na noda vakatovolei? Sa rawa mo raica na itukutuku ena “iKuri ni iVurevure” me ikuri ni nomuni veivosaki.

Na mana mai vua na Kalou a vakani ira vakayago na Isireli; eda sa gadreva talega na veivakani vakayalo e veisiga. Fresco mai vei Leopold Bruckner

Na Lako Yani 15:23–27; 16:1–15; 17:1–7

Ena vakarautaka na Turaga me baleta na veika eda gadreva ena noda ilakolako ni bula.

• Na Lako Yani 15–17 e solia na veimataqali itukutuku e rawa ni tara cake na nodra vakabauta na lewe ni kalasi na kaukauwa kei na lomasoli ni Turaga me vakarautaka noda gagadre vakayago ka vakayalo. Sa rawa ki na lewe yadua ni kalasi me vulica e dua na itukutuku oqo, me raica kina na itukutuku vakayalo: Na Lako Yani 15:23–27; 16:1–15; 17:1–7. Solia vei ira e vica na lewe ni kalasi e dua na gauna me ra wasea na veika era sa kunea. Eda na vakayagataka vakacava na itukutuku eso oqo me da vakayaloqaqataka kina e dua e gadreva tu me na sotavi na nona leqa vakayago ka vakayalo?

• Sa rawa ki na lewe ni kalasi me ra na wilika talega na veitikina oqo ka vakatakila na ivakaraitaki ni vosakudrukudru. Eda na vakamacalataka beka vakacava vua e dua na cava na vosa kudrukudru? Na cava soti na revurevu ni vosakudrukudru era yaco kina mera ka rerevaki sara? Sa rawa beka ki na lewe ni kalasi me ra wasea na ivakasala ni kena drovaki na veitemaki me vosa kudrukudrutaki kina na Turaga ena gauna eda sotava kina na dredre levu.

• Sa rawa ni vukea na lewe ni kalasi me ra vakatauvatana na mana e vakamacalataki tiko e Na Lako Yani 16 vata kei na kakana e gadrevi e yaloda. Na tautauvata cava soti eda rawa ni raica? Na lesoni vakayalo cava a vinakata beka kina na Turaga me vakavulici ira kina na Isireli ena Nona solia mai na mana ena sala a cakava kina? (raica na Joni 6:31–35, 48–58). E rawa ni o vakaraitaka e dua se sivia na vidio e kune ena “Additional Resources.”

Na Lako Yani 17:8–16

Eda sa vakalougatataki ena noda tokoni ira na noda iliuliu.

• Na itukutuku ni nodrau a laveta cake tiko o Eroni kei Uri na liga i Mosese e vakaraitaka tiko na bibi ni nodra tokoni o ira era sa kacivi me ra liutaki keda. Sa rawa mo sureta e vica na lewe ni kalasi mera vakatasuasuataka na veika o ya ena gauna e wilika tiko kina e cake e dua tale na lewe ni kalasi. E tautauvata vakacava na nodrau sasaga o ya o Eroni kei Uri ki na noda sasaga meda tokoni ira tiko na noda iliuliu? Eda vakaraitaka vakacava noda sa tokoni ira tiko na noda iliuliu?

iKuri ni iVurevure

Sa rawa mo ciqoma na veidusimaki e nomu ga.

E vakavuvulitaka o Sisita Michelle Craig:

“Me vaka ni ko tisaipeli yalodina [ni iVakabula] sa rawa ni ko ciqoma na veivauqeti kei na ivakatakila e nomu ga, e salavata tikoga kei na Nona ivunau, ka a buli ga me nomu. Sa tu na nomu ilesilesi kei na itavi cecere mo vakayacora ena bula oqo ka na soli vei iko na veidusimaki cecere mo vakayacora rawa kina.

“O Nifai, na taci Jereti, ka vakakina o Mosese e ratou a dui donuya kece na wasawasa levu me ratou kosova—ka duidui na sala eratou a cakava kina. A cakacakataka o Nifai ‘na kau ena kedra icakacaka vakamatai sara’ [1 Nifai 18:1]. A taya o taci Jereti na waqa era a ‘dregati matua sara na nodra waqa me vaka na dari’ [raica na Ica 6:5–8]. Ia o Mosese sa ‘lako e na qele mamaca e loma ni wasawasa’ [Na Lako Yani 14:29].

“Eratou sa dui ciqoma yadudua na veidusimaki, ka caka me nodratou yadudua, ka ratou vakanuinui kina ka cakacakataka. Na Turaga e dau nanumi ira era talairawarawa ka, ena vosa i Nifai ena, ‘vakarautaka rawa mada na sala [vei keda] meda rawata rawa kina na ka sa vakarota’ [1 Nifai 3:7]. Raica ni a kaya o Nifai, ‘e dua na sala’—sega ni ‘na sala.’

“Eda dau calata beka se biliga na ilesilesi yadua mai vua na Turaga baleta ni a vakarautaka o Koya ‘e dua na sala’ ka dua tani mai na ka eda namaka? (“Na Rawaka Vakayalo,” Liaona, Nove. 2019, 21).

Vidio

Ena vidio na “Daily Bread: Pattern,” “Daily Bread: Experience,” kei na “Daily Bread: Change” (ChurchofJesusChrist.org), e wasea o Elder D. Todd Christofferson na rai titobu me baleta na veika veivakurabuitaki ni mana.

Vakatorocaketaki ni Noda Veivakavulici

Vakayaloqaqataki ira eso mera cavuta na nodra ivakadinadina E vuqa vei ira o vakavulica e tiko na nodra dui vakadinadina kaukauwa ni ka dina me ra wasea. Sureti ira me ra wasea na nodra ivakadinadina ena nodra tarogi ena taro rawarawa, me vaka oqo, “O sa bau vakalougatataki vakacava ena nomu muria na parofita?” (Raica talega na Veivakavulici ena iVakarau ni iVakabula, 11.)