Droini ni ibulubulu sa lala mai vei Maryna Kriuchenko

11–17 ni Epereli

Siganimate

“Ena Vakaotia Sara na Mate ko Koya”

Ni ko vakavakarau mo veivakavulici ena Siga Tabu ni Siganimate, vakasamataka na sala e rawa ni o vukei ira kina na lewe ni kalasi me ra rawata na titobu ni vakavinavinaka ena vuku kei na ivakadinadina me baleta na isoro kei na Tucaketale nei Jisu Karisito.

Vola na Veika o Vakauqeti Kina

Sureta na Veiwasei

Sa rawa mo sureti ira na lewe ni kalasi me ra wasea na veika era sa cakava se na nodra matavuvale me ra vaqaqacotaka na nodra vakabauti Jisu Karisito kei na Nona Veisorovaki ena gauna ni Siganimate oqo.

Vakavulica na iVunau

Ena vuku ga ni sa vakadrukai mate na iVakabula, eda sa na bula tale vakakina.

• Me vaka ni nikua na Siga Tabu ni Siganimate, sa rawa me railesuvi na itukutuku vakaivolanikalou ni isevu ni Siganimate—na Tucaketale nei Jisu Karisito (raica na Joni 20:1–17). Sa rawa mo sureta e dua ena lewe ni kalasi me tukuna na italanoa ena nona vosa ga. E rawa ni o vakaraitaka na vidio na “He Is Risen” (ChurchofJesusChrist.org). Sa rawa ki na lewe ni kalasi me ra rekitaka talega nodra lagata na sere ni lotu me baleta na iVakabula kei na wiliki ni ivolanikalou veisemati (idusidusi era sa volai tiko ena boto ni sere yadua ena Sere ni Lotu). Me ra na qai wasea na lewe ni kalasi na veimalanivosa talei mai na sere ni lotu kei na nodra nanuma me baleta na iVakabula.

• Mo vukei ira na nomu kalasi me ra vakavinavinakataka na sala sa vakadinadinataki Jisu Karisito kina na Veiyalayalati Makawa, sa rawa mo sureti ira me ra railesuva na ivolanikalou ena ituvatuva ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale, ka vakakina na veitukutuku ena iVola i Momani e salavata kei na ituvatuva. Na cava eda vulica me baleta na iVakabula kei na Nona ilesilesi mai na veitukutuku oqo? Na cava na vuna e bibi kina meda kila na vei parofisai oqo?

Eda na kunea na vakacegu kei na reki ena vuku ni Veisorovaki ni iVakabula.

• Na ituvatuva ena macawa oqo ena Lako Mai, Mo Muri Au—Baleta na Tamata Yadua kei na Matavuvale era oka kina na veivolanikalou era vakamacalataka na vakacegu kei na reki e yaco mai ena vukui Jisu Karisito. Kevaka era wilika na veivolanikalou oqo e vale, vakayaloqaqataki ira me ra wasea na nodra vakasama kei na nanuma me baleti ira. Se o rawa ni wilika vakalasi e vica na ivolanikalou ka veivosakitaka na vakacegu kei na reki eda vakila baleta na iVakabula kei na nona Veisorovaki. Eda na wasea vakacava na veivakalougatataki oqo vei ira na tamata era rairai sasaga dredre tiko me ra kunea na vakacegu kei na reki ena nodra bula? Sa rawa talega mo sureta e dua na lewe ni kalasi me wilika na itukutuku nei Peresitedi Russell M. Nelson “Reki kei na Bulabula Vakayalo” (Liaona, Nove. 2016, 81–84) ena loma ni macawa ni bera na kalasi ka me vakavakarau tiko mai ki na kalasi me mai wasea na veika era vakavulica na itukutuku oqo me baleta na kena kunei na reki ena iVakabula.

• O na rairai vakauqeti mo liutaka na kena veivosakitaki na sala mera vukei na tamata me ra kunea na vakacegu kei na reki vei Karisito. Sa rawa mo sureti ira na lewe ni kalasi me ra vakasamataka e dua era kila—e dua beka era veiqaravi kina—a rairai gadreva na nodra veitokoni, veiqaravi, se rogoca mada ga na nodra ivakadinadina baleti Karisito kei na nona Veisorovaki. Vakayaloqaqataki ira na lewe ni kalasi me ra raica na ivolanikalou (me vakataka ena “iKuri ni iVurevure”) ni ra vakasamataka tiko na veiqaravi mera na cakava se na ivakadinadina e rawa ni ra wasea me ra vaqaqacotaki ira era tu wavoliti ira. Sureta e vica na lewe ni kalasi me ra wasea na nodra nanuma me baleta na nodra veiqaravi me vaka a vakayacora o Jisu.

Grey Day Golgotha, mai vei J. Kirk Richards

Mai na Nona Veisorovaki, sa tu vei Jisu Krisito na kaukauwa me vukei keda meda qaqa vei ivalavala ca, mate, veivakatovolei, kei na malumalumu.

• E dua na sala me ra vukei kina na lewe ni kalasi me ra vakasamataka vakatitobu na veivakalougatataki e lako mai ena Veisorovaki ni iVakabula o ya me volai ena vava ni volavola na ulutaga iValavala Ca, Mate, Veivakatovolei, kei na Malumalumu. Sa rawa ki na lewe ni kalasi yadua mera wilika e dua na tiki ni ivolanikalou e tiko ena “iKuri ni iVurevure” ka vakasamataka vakatitobu na sala ena vukei keda kina na iVakabula meda qaqa vei ira na veika sa volai tu ena vava ni volavola. Sa rawa ki na lewe ni kalasi mera vola na nodra tiki ni ivolanikalou ena ruku ni dua se sivia na ulutaga ena vava ni volavola ka wasea na nodra ivakadinadina me baleta na iVakabula kei na Nona Veisorovaki.

• Ena rawa me vukei keda na italanoa kei na vakatautauvata meda kila vinaka kina na Veisorovaki i Jisu Karisito. Me vakataka, nomu rawa ni sureta e dua na lewe ni kalasi me wasea e dua na italanoa se na vakasama mai na itukutuku nei Elder Walter F. González “Na Liga ni iVakabula” (Liaona, Nove. 2019, 90–92), se na itukutuku nei Sisita Neill F. Marriott “Tu Vata kei na Kalou ka Vakavinakataka na Kacila” (Liaona, Nove. 2017, 10–12). Na cava e vakavulica vei keda na italanoa kei na vosa vakatautauvata oqo me baleta na Veisorovaki i Karisito? Sureti ira na lewe ni kalasi mera cakacaka vata vakayarurua mera vakasamataka na nodra dui italanoa kei na vosa vakatautauvata.

• Na cava eda sa vulica mai na veitikina oqo me baleta na isau sa mai sauma o Jisu Karisito baleta na noda vakabulai: Aisea 53:3–5; Mosaia 3:7; Vunau kei na Veiyalayalati 19:16–19? Na isau cava beka sa sauma na Tamada Vakalomalagi? (raica na Joni 3:16).

iKuri ni iVurevure

Na iVolanikalou me baleta na Veisorovaki i Jisu Karisito?

• Aisea 61:1–3

• Isikeli 36:26–28

• Maciu 11:28–30

• Luke 1:46–55

• Roma 8:35-39

• Alama 7:10–13

• Alama 11:42–45

• Moronai 10:32–33

• Vunau kei na Veiyalayalati 19:15–19

• Mosese 5:9–12

Vakatorocaketaki ni Noda Veivakavulici

Dau vakavinavinakataki ira era vuli tiko. “Me kakua ni vesuki iko na lesoni mo guilecava mo vakavinavinakataka kina na nodra cau na vuli. E dodonu mera kila ni ko taleitaka na gagadre ni lomadra mera wasea na nodra veivakararamataki kei na ivakadinadina” (Veivakavulici ena iVakarau ni iVakabula, 33).