E dua na ulunivanua mai Ijipita sa dau vakabauti raraba tiko me Ulunivanua o Saineai.

18–24 ni Epereli

Na Lako Yani 18–20

“A Ka Kecega sa Kaya ko Jiova Keimami na Cakava”

Wilika Na Lako Yani 18–20, ka vola na veivakauqeti o sa ciqoma me ra vukei kina na lewe ni kalasi mera vuli mai na veiwase oqo. Na vakasama rawarawa sara mada ga e rawa ni veimuataki me vakaibalebale cake kina na vuli-ka.

Vola na Veika o Vakauqeti Kina

Sureta na Veiwasei

Mera sureti na lewe ni kalasi me ra wasea na veika era sa vulica, sa rawa mo vola ena vava ni volavola na 18, 19, kei na 20—oya na veiwase era wilika e Na Lako Yani ena macawa oqo. Kerei ira na lewe ni kalasi me ra vola toka tikiva na naba ni wase yadua na iwiliwili ni tikina era gadreva mera na veivosakitaka mai na wase oya. Ni ra sa wasea na lewe ni kalasi na nodra veivakararamataki, taroga na vo ni kalasi ke tiko na nodra veivakararamataki me baleta na itukutuku vata oqo.

Vakavulica na iVunau

Na Lako Yani 18:13–26

Eda rawa ni veivuke ena noda “colata na icolacola” ni kena vakayacori na cakacaka ni Turaga.

• Sa rawa mo vakayaloqaqataka na nomu kalasi mera veivosakitaka na ivakasala nei Jecoro vei Mosese (raica Na Lako Yani 18:13–26) ena nomu kerea me ra raitayalotaka ni ra veivosaki tiko kei na dua na yalewa se tagane ka nanuma tiko ni nona veikacivi ena Lotu, oga ni vuvale, se itavi tale eso era sa rui “oga bibi” ka na vakavuna vua na tagane se yalewa oya me na “malumalumu dina mai” (Na Lako Yani 18:18). Ena veivuke vakacava na ivakasala ena Na Lako Yani 18:13–26 ? Na ikuri ni ivakasala cava tale eda rawa ni wasea mai na veika yadua eda dui sotava?

• Na kena veivosakitaki Na Lako Yani 18:13–26 ena rawa ni madigi me veivosakitaki kina na kena rawa ni vukei keda na veiqaravi meda “veivuke kina kei” ira na noda iliuliu ena cakacaka ni Turaga (Na Lako Yani 18:22). Na ivakarau ni bula cava a kaya o Jecoro vei Mosese me vakasaqara vei ira era na veiqaravi mera “vakatulewa” vei ira na tamata? (raica Na Lako Yani 18:21). Na cava na vuna era bibi kina na ivakarau ni bula o ya ena noda sasaga meda veiqaravi kina vakai keda? E yaco vakacava na veiqaravi vei ira na lewe ni matavuvale, na lewe ni Lotu, kei na so tale me vukea na kena “colati na nodra icolacola,” na noda iliuliu ni Lotu? Me tiki ni nomuni veivosaki, sa rawa mo vakaraitaka e dua na vidio veisemati e tiko ena ministering.ChurchofJesusChrist.org.

  

  Na veiqaravi vei ira na tamata sa dua na sala eda rawa ni vakaitavi kina ena cakacaka ni Turaga.

Na Lako Yani 20:2–11

E dodonu meda na vakaliuca tiko na Turaga ena noda bula.

• O rawa ni vakasamataka beka e dua na itavi e cakacaka vakavinaka cake ni da vakacavara taumada na ituvatuva bibi duadua? (Me vakataka noda walia e dua na soqoni ni fika se vakamuri e dua na iwalewale ni vakasaqa). Wasea ki na kalasi eso na ivakaraitaki o sa kila vakavinaka tu, ka sureti ira me ra vakasamataka ga na nodra. E sema vakacava na noda vakacavara e liu na ituvatuva bibi duadua ki na ivakaro era tiko e Na Lako Yani 20:2–11? Na cava era vakavulica vei keda na ivakaro me baleta na noda vakaliuca na Kalou ena noda bula? Na cava soti na veika e rawa ni da temaki kina me da vakaliuca cake mai Vua? (Me baleta eso na ivakaraitaki, raica na itukutuku ena “iKuri ni iVurevure.”) Ni railesuvi Na Lako Yani 20:2–11 ena rawa ni vukei ira na lewe ni nomu kalasi mera nanuma tiko na nodra yalayala mera vakaliuca taumada na Kalou.

Na Lako Yani 20:2–17

Sa dau loloma veivueti na Kalou.

• E rawa vakacava mo vukei ira na lewe ni nomu kalasi mera kila vakavinaka na bibi ni Vunau e Tini ena noda gauna oqo? Sa rawa mo veisasataki ira na lewe ni kalasi ka sureti ira mera wilika Na Lako Yani 20:2–17 ka qai veivosakitaka ni talairawarawa ki nai vunau yadua sa rawa ni vakalougatataki ira, nodra matavuvale, kei ira era tiko voliti ira. E rawa ni o vakaraitaka na vidio na “Obedience to the Ten Commandments” (ChurchofJesusChrist.org). Na veivakalougatataki cava sa yalataka vei keda na Tamada Vakalomalagi ni da talairawarawa ki na Nona ivakaro? (raica, me kena ivakaraitaki na, Mosaia 2:41). Era vakaraitaka vakacava na vei ivakaro oqo na loloma ni Kalou kivei keda?

iKuri ni iVurevure

Me kakua vei iko na kalou tani.

E vakavulica o Peresitedi Spencer W. Kimball ni ra sa tiko na kena vakatautauvatataki na iqaraqaravi makawa ni matakau ceuceu kei na nodra ivakarau ni bula na tamata nikua. A kaya:

“Na qaravi kalou tani sa dua vei ira na ivalavala ca bibi duadua. …

“Na kalou matakau nikua se kalou lasu e rawa ni oka kina na isulu, itikotiko, bisinisi, misini, motoka, waqa ni marau, kei na vuqa tale na iyaya e veivagolei tani mai na salatu ki na bula vakalou. …

“Na veika e sega na vatukana sa rawa talega mera kalou. Na koroi ni vuku kei na matanivola kei na itutu sa rawa mera kalou matakau. …

“E vuqa na tamata era tara vale ka saunaka ka volia e liu na motoka—ka qai raica e muri ni ra ‘sega ni rawa’ me ra sauma na nodra ikatini. O cei era sa sokalou tiko kina? E dina sara ni sega ki vua na Turaga ni lomalagi kei vuravura. …

“E vuqa era sokalou ki na vakasasa manumanu, na laki siwa se qoli, na gade vakayawa, na pikiniki kei na gade ena mua ni macawa. Eso era sa sokalou matakau tiko ena qito, tavi polo, caqepolo, na vakavala bulumakau, se golf. …

“E dua tale na matakau era sokalou tiko kina na tagane o ya na kaukauwa kei na irogorogo me dokai. … Na veikalou oqo ni kaukauwa, vutuniyau, kei na veivakayarayarataki era sa sega ni mamau rawa ka ra sa tiko dina me vaka na matakau koula bulumakau nodra na luvei Isireli ena lekutu” (Nodra iVakavuvuli na Peresitedi ni Lotu: Spencer W. Kimball [2006], 146–47).

Vakatorocaketaki ni Noda Veivakavulici

Vakanamata ki na vica ga na ivakavuvuli. “E levu sara na ka e tu me veivosakitaki ena veilesoni yadua, ia e sega ni gadrevi me vakaotivi kece ena dua na gauna ni kalasi mena tarai kina na yalona e dua—ena so na gauna, dua se rua na usutu bibi sa na rauta vinaka.” (Veivakavulici ena iVakarau ni iVakabula, 7).