iVakaraitaki ni nona rairai o Jiova vei Mosese kei 70 na qase ni Isireli, mai vei Jerry Harston

25 ni Epereli–1 ni Me

Lako Yani 24; 31–34

“Ena Lako Vata kei Iko na Noqu iSerau”

Laiva na vosa oqo mai vei Elder Jeffrey R. Holland me dusimaka na nomu vakavakarau mo veivakavulici: “E vuqa na tamata era sega ni lako mai ki Lotu ena nodra raica walega e vica na dina vou vakosipeli. … Era dau gole mai me vakasaqara e dua na ka veisotavi vakayalo. … Era vinakata me vaqaqacotaki na nodra vakabauta ka vakavoui na nodra inuinui” (“E dua na Qasenivuli e Lako mai vua na Kalou,” Ensign, Me 1998, 26).

Vola na Veika o Vakauqeti Kina

Sureta na Veiwasei

Sa rawa mera raitayaloyalotaka na lewe ni kalasi ni kaya mai e dua na itokani, “Au sega ni wilika na Veiyalayalati Makawa; e sega soti ni yaga ki na noqu bula.” Kerei ira me ra sauma ena nodra wasea e dua na ka era a kunea ni vakaibalebale ena nodra vulica na Veiyalayalati Makawa.

Vakavulica na iVunau

Lako Yani 31:12-17

Eda doka na siga ni Vakacecegu me ivakatakilakila ni noda yalodina ki vua na Turaga.

• Sa rawa mo tekivu ena nomu kerei ira na lewe ni kalasi kevaka mera vakamacalataka vua e dua na lewe ni matavuvale se itokani na vuna era sa duatani kina na Sigatabu mai na veisiga tale eso. Sureti ira mera wasea na veika era sa tukuna se na ka era na kaya beka ena veisiga ni mataka. Na wiliki ni Lako Yani 31:12–17 se na itukutuku ena “iKuri ni iVurevure” e rawa ni solia vei ira eso tale na vakasama. E vakaraitaka vakacava noda yalodina vei Jisu Karisito na noda digidigi ena siga ni Vakacecegu?

• E dina ga ni ka e vakamacalataki ena Lako Yani 31:14–15 sa sega ni vakayagataki nikua, era vakaraitaka na nona nanuma na Turaga me baleta na siga ni Vakacecegu. Na cava e sa rui bibi kina na ivunau oqo? Na veivosakitaki ni ivolanikalou oqo e rawa ni veivuke: Lako Yani 31:12–17; Aisea 58:13–14; Vunau kei na Veiyalayalati 59:9–13.

  

  Ni da rokova na siga ni Vakacecegu, eda vakaraitaka na noda lomana na Turaga.

Lako Yani 32; 34:1–17

Na ivalavala ca oya na vuki tani mai vua na Kalou, ia e solia o Koya e dua na sala lesu.

• Me vukei ira na lewe ni kalasi me ra vakasamataka ka vakaitaukeitaka na itukutuku ena Lako Yani 32, kerei ira taumada me ra railesuva yadudua se vakailawalawa na iwase oqo. Qai kerea eso na lewe ni kalasi mera taura na nodra ivakarau o ira na Isireli era sega ni waraki Mosese me lesu mai ka ra sa nanuma me sa caka e dua na matakau koula. Na cava beka e rawa ni vakavuna nodra sa sokalou ki na matakau? Eso tale na lewe ni kalasi e rawa ni vakamasuti ira me ra tudei tikoga ki vua na Turaga kei na Nona parofita. Sa rawa mera veivosakitaka na lewe ni kalasi na veika e vakauqeti ira mera dau maroroya na nodra veiyalayalati. Na cava e rawa ni da cakava me da vukei ira era sotava tu na dredre me ra maroroya na nodra veiyalayalati?

• Ni ra wilika na tamata na Veiyalayalati Makawa, era dau kurabui ena so na gauna ena totogi e vakatauca na Turaga ena vuku ni ivalavala ca. Lako Yani 34:1–9 e rawa ni vukei ira me ra raica ni dina ga ni sega ni duavata kei na ivalavala ca na Kalou, ia sa dauloloma, ka solia na veivosoti vei ira era veivutuni. Sa rawa ni wilika na lewe ni kalasi na itukutuku oqo ka vakasamataka na taro vakaoqo: Na cava eda vulica me baleta na Turaga mai na veitikina oqo? Na cava e bibi kina meda kila na veika oqo baleti Koya? Sa rawa mo dusia ni iVakadewa nei Josefa Simici, Lako Yani 34:7 (ena Lako Yani 34:7, ivakamacala e) e vakamatatataka ni Kalou ena sega ni “vakagalalataki ira na veisaqasaqa.” Na cava na kena ibalebale oqo? Sa rawa mera wasea na lewe ni kalasi na sala era sa vakadinadinataka kina na loloma cecere ni Kalou. E rawa vakacava vua na Kalou me lomani keda vakavinaka sara ka dodonu vinaka sara? (raica na Alama 42:13–15).

• Lako Yani 34:6–17 e rawa ni laurai me ivakasala me ra veivutunitaka na Isireli na nodra ivalavala ca ni qaravi kalou matakau (vakamacalataki ena Lako Yani 32). Na cava e rawa ni laurai ena veitikina oqo ka vukei ira na Isireli me ra veivutuni? Na cava o vulica me baleta na Turaga kei na veivutuni mai na ivakaro oqo?

Lako Yani 33:11–17

Eda gadreva na iserau ni Kalou ena noda bula.

• O na vukei ira vakacava na lewe ni kalasi mera bulataka na veika a tukuna na Turaga vei Mosese ena Lako Yani 33:11–17? Sa rawa mo tekivu ena nomu railesuva na cakacaka e se gadreva tiko na Kalou vei Mosese me vakayacora (raica na Lako Yani 33:1–3). Na cava eda raica ena tikina e 11–17 ka vakaukauwataka ka solia na vakacegu vei Mosese? Na lewe ni kalasi me ra vakasamataka e dua na ka e vinakata na Kalou me ra cakava—me vaka na kena vakayacori e dua na veikacivi ni Lotu, dua na itavi vakamatavuvale, se dua na madigi ni veiqaravi. Sa rawa mera qai wilika tale na tikina oya. Na veivakararamataki cava eda rawata ena sala ena tokoni keda kina na Kalou?

iKuri ni iVurevure

Na Siga ni Vakacecegu e dua na ivakatakilakila.

A vakamacalataka o Peresitedi Russell M. Nelson: “Niu se cauravou, au dau vakadikeva na nodra cakacaka eso era vola na veika mera cakava kei na veika mera kakua ni cakava ena Siga ni Vakacecegu. Ia e muri, au sa qai kila rawa mai na ivolanikalou ni noqu ivakarau kei na itovo ena Siga ni Vakacecegu sa dua na ivakatakilakila mai vei au ki vua na Tamaqu Vakalomalagi [raica na Lako Yani 31:13; Isikeli 20:12, 20]. Ena kila oqori, sa sega tale ni gadrevi meu vola na veika meu cakava se kua. Ni gauna meu vakatulewa kina se vinaka se ca e dua na itavi ena Siga ni Vakacecegu, au sa tarogi au ga, ‘Na ivakatakilakila cava meu vakaraitaka vua na Kalou?’ Na taro o ya e vakamatatataka vakavinaka na noqu digidigi baleta na Siga ni Vakacecegu” (“Me Ka e Rekitaki na Siga ni Vakacecegu,” Liaona, Me 2015, 130).

Vakatorocaketaki ni Noda Veivakavulici

Veivakavulici ena Yalotabu. “Na inaki cecere ni ka kece e vakayacora e dua na qasenivuli ni kosipeli—na taro kece, na ivolanikalou kece, na itaviqaravi kece—o ya mena sureta na Yalotabu me tarai cake na vakabauta ka sureta na tamata kece mera gole mai vua na Karisito” (Veivakavulici ena iVakarau ni iVakabula, 10).