9–15 ni Me

Tiko Mai na Lekutu 11–14; 20–24

“Ni Kakua ni Talaidredre vei Jiova, ni Kakua Talega ni Rere”

Dua na sala vinaka sara me kilai kina na ka me vakanamatataki ena gauna ni kalasi oya me tarogi na lewe ni kalasi se cava era raica e vakaibalebale tu ni ra vulica na ivolanikalou. Ena vakatakila oqo na ka e bibi vei ira kei na ka era sa vakarau tu ni vulica.

Vola na Veika o Vakauqeti Kina

Sureta na Veiwasei

Eso na gauna na ka ga ena vakayaloqaqataka na lewe ni kalasi me ra wasea na raitaudonu eso ni nodra vuli oya me tarogi e dua na taro rawarawa vaka “Na cava e vakavulica vei iko na Yalo Tabu ni o wilika na ivolanikalou ena macawa oqo?” Qai solia na gauna mera vakasamataka vagumatua ka sauma.

Vakavulica na iVunau

Tiko Mai na Lekutu 12

Sa vakacala na Turaga na vosa vakacacataki ni Nona parofita.

• Na wiliki ni Tiko Mai na Lekutu 12 sa rawa ni vukea na lewe ni kalasi me ra kila vakamatata na bibi sara ni vosa vakacacataka na parofita ni Turaga. Sa rawa mo sureta na lewe ni kalasi mera wilika na wase oqo ka veivosakitaka na sala e nanumi ira tu kina na Nona italai na Turaga. Yavutaki ena tikina e 1–2, na cava o nanuma sa ibalebale ni vosa vakacacataka na parofita ni Turaga? Na cava na ka rerevaki eso ena kena vakayacori? Na cava eda rawa ni vulica mai na ivalavala i Mosese kei ira na Isireli ena tikina e 13 kei na 15?

Tiko Mai na Lekutu 12:3

“A yalomalua sara o Mosese.”

• Ena rairai kurabui eso na tamata ni wilika ni dua na iliuliu qaqa vakataki Mosese, ka duri tu ena matai Fero ka vakayacora na cakamana veivakurabuitaki eso ena kaukauwa ni Turaga, a “yalomalua sara” talega. O rawa ni vakayagataka na Tiko Mai na Lekutu 12:3 mo tekivutaka kina e dua na veivosaki ni yalomalumalumu dina tu. O rawa ni gole ki na vakamacala ni “Yalomalua, Yalomalumalumu” ena iDusidusi ki na iVolanikalou (scriptures.ChurchofJesusChrist.org). Sa rawa talega mo vakaraica va-kalasi na ivakatakilakila eso ni yalomalumalumu i Mosese ena Tiko Mai na Lekutu 12.

• Na vakadinadina cava tale ni yalomalumalumu i Mosese e rawa ni da vuli mai kina? (raica, me ivakaraitaki, Lako Yani 18:13–25; Tiko Mai na Lekutu 11:26–29; Iperiu 11:24–27; Mosese 1:10–11). Sa rawa talega mo wilika ka veivosakitaka na sala a vakaraitaka kina na iVakabula na yalomalumalumu (raica na Maciu 11:29; 27:11–14; Luke 22:41–42; Joni 13:4–5). Na cava e vakavulica vei keda na ivakaraitaki i Mosese kei na iVakabula—se ira na tamata eda kila—me baleta na yalomalumalumu? Cava na vuna e vinakata kina na Kalou me da yalomalua?

Tiko Mai na Lekutu 13–14

Ena vakabauti ni Turaga, sa rawa ni da vakanuinui tu ki na veisiga ni mataka.

• Ni ko veivosakitaka na italanoa ni 12 na kai Isireli ka yamata vuni tu ena vanua yalataki ka soli nodra ripote, navuca mo tarogi ira na lewe ni kalasi se cava era nanuma e rawa ni tutaki kina na italanoa oqo ki na ituvaki eso era sotava. Me veivuke, o rawa ni sureta na lewe ni kalasi me ra vola na veika ena Tiko Mai na Lekutu 13:23–33 e rawa ni vakatauvatani ki na dua na ka ena noda bula. Me ivakaraitaki, na vanua yalataki sa rawa ni matataka e dua na ka e vinakata tu na Turaga me da rawata, na vua ni vaini sa rawa ni veivakalougatataki, na tuwawa sa rawa ni bolebole eso eda na sotava, kei na so tale. Vakayaloqaqataka na lewe ni kalasi me ra wasea na ka era nanuma ena vinakata na Turaga me ra vulica mai na italanoa oqo.

  

  E tini na yamata vuni ni Isireli a rere; A vakabauta tu o Josua kei Kelepi.© Lifeway Collection/licensed from goodsalt.com

Tiko mai na Lekutu 21:4–9

Kevaka eda rai vei Jisu Karisito ena vakabauta, sa rawa ni vakabulai keda vakayalo o Koya.

• Me vukei ira na lewe ni kalasi ni veivosakitaka na itukutuku ena Tiko mai na Lekutu 21:4–9 ka tara cake na nodra vakabauta na iVakabula, sa rawa ni o vola na veitaro vakaoqo ena papa: Na cava e matataka na gata parasa? Na cava e rawa ni matataka na ikati ni gata? Cava na vuna era sega ni via raica kina na gata parasa na tamata eso? e rawa vakacava ni da “raica tu” edaidai? Sa rawa ni wasea na lewe ni kalasi na isaunitaro era raica ni ra wilika na Tiko mai na Lekutu 21:4–9; 1 Nifai 17:40–41; Alama 33:18–22; kei na Ilamani 8:13–15. Na cava eso na ka rawarawa e sureta tu na iVakabula meda cakava me ciqomi kina na Nona veivakabulai? Cava na vuna e dau dredre kina ni caka ena so na gauna na veika rawarawa vakaoqo? (raica na “iKuri ni iVurevure” ena vakasama eso ni ka oqo). De na rawa ki na lewe ni kalasi mera wasea na sala e sa kauta mai kina na kaukauwa ni iVakabula ki na nodra bula na vakayacori ni veika oqo.

iKuri ni iVurevure

“Na veika lalai ka rawarawa.”

A tukuna e dua na bisopi o Elder L. Whitney Clayton ka a vakasalataka na lewe ni tabanalevu era sotava tu na veimataqali bolebole dredre ena nodra bula:

“Na nona vakasala vei ira na lewe ni tabanalevu e dau oka tu kina na talevi ni cakacaka rawarawa eso ni vakabauta, vaka na vulici ni iVola i Momani,] … saumi ikatini, kei na veiqaravi tudei ena Lotu. Ia vakavuqa, na nodra sausaumi kivua e sa dau vakatitiqataki tu ga ‘… Na cava me mai betena kina ki na veika au sotava tiko na vakayacori ni dua vei ira na ka oya?’

“… O ira ka nakita tu ni vakayacora na ‘veika lalai ka rawarawa’ [Alama 37:6]—talairawarawa tiko ki na sala lalai eso—sa vakalougatataki ena vakabauta kei na kaukauwa e lako sivita yawa tu na ivalavala donu ni talairawarawa vakai ira ka, kena dina, na rairai tawasemati vakaoti tu kivei ira” (“A Ka Kecega sa Kaya vei Kemudou o Koya, Dou Kitaka,” Liaona, Me 2017, 98).

Vakatorocaketaki ni Noda Veivakavulici

Vakanamata ki na veika bibi duadua. E sega ni rawa ni tauri na italanoa kece se ivakavuvuli kece. Muria na Yalo, ka vakasamataka na nodra gagadre na lewe ni kalasi ni ko vakatulewataka na sala mo vakayagataka kina na gauna ni kalasi. Nanuma ni sa itikotiko, sega ni rumu ni kalasi, na yavu ni kena vulici na kosipeli.