2–8 ni Me

Lako Yani 35–40; Vunau ni Soro 1; 16; 19

“Sa Tabu me nei Jiova”

Ni sa vakaibalebale na nomu vulica na ivolanikalou, sa na rawa ni ko na veivakavulici ka vakadinadinataka ni ko sota kei ira na lewe ni kalasi ena Sigatabu. Na cava e rawa ni o cakava mo vakayaloqaqataka kina eso mera kitaka vakakina?

Vola na Veika o Vakauqeti Kina

Sureta na Veiwasei

Na iwase ni wilivola ena macawa oqo e vakayagataka na ivakatakarakara me vakavulici kina baleti Jisu Karisito kei na Nona isoro ni veivakaduavatataki. E rawa ni o tekivuna na kalasi ena nomu sureti ira na lewe ni kalasi me ra vola se droinitaka ena papa e dua na ka era a kunea ena Lako Yani 35–40 se na Vunau ni Soro 1; 16; 19 e vakavulici ira me baleta na iVakabula. Sureti ira mera wasea na ka era sa vulica.

Vakavulica na iVunau

Na Lako Yani 35–40

Na Turaga e vinakati keda meda savasava me vakataki Koya.

• Ni ra vulica na lewe ni kalasi na Lako Yani 35–40 ena macawa oqo, era na rairai vakasamataka vakatitobu na veika ena valecavu makawa ka vukica nodra vakanananu vei Jisu Karisito. Kevaka era cakava, vakayaloqaqataki ira me ra wasea na nodra nanuma. Na teveli ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale ena rawa ni veivuke ena veivosaki oqo. E rawa talega ni o veivosakitaka na veika e semati vata na ivakatakarakara oqo kei na Valecavu me baleta na kena yaco me savasava vakalevu cake. E vukei keda vakacava o Jisu Karisito me da savasava vakalevu?

• Vei ira e vuqa, na vakasama ni kena yaco me savasava cake sara e rairai tawa yacovi rawa. O na vukei ira vakacava na lewe ni kalasi mera kila deivaki ni bula savasava sa tiki ni yavu nei Tamada Vakalomalagi me baleti keda? E rawa ni o wilika vata na itukutuku nei Peresitedi Henry B. Eyring ena “iKuri ni iVurevure.” Na cava na ibalebale mo bula savasava cake sara? E vukei keda vakacava na noda vei valetabu edaidai kei na cakacaka eda cakava e kea me da savasava cake kina? (raica talega na Vunau kei na Veiyalayalati 84:19–24; 109:6–26; 128:15–18). Sa rawa mo qai tarogi ira na lewe ni kalasi mera wasea na sala sa vukei ira kina na veika oqo—se so tale era kila—mera savasava cake sara.

• Na nodra valecavu na Isireli ena loma ni lekutu e tautauvata kei na vuqa sara na sala ki na noda valetabu edaidai. Sa rawa mo sureta na lewe ni kalasi mera vola na veika era sa vulica me baleta na valecavu ena Lako Yani 35–40 e vakananumi ira ena veika eda sotava ena valetabu. Kevaka era gadreva na veivuke, e rawa ni o dusia vei ira na tikina ena Lako Yani 40 baleta e dua na ilati, icabocabo, isulu tabu, veisavai, kei na veilumuti. E vukei keda vakacava na dina oqo meda gole kina vei Karisito? Na cava e rawa ni da cakava me vakanamata kina na noda gauna e valetabu ki Vua?

Vunau ni Soro 1:1–9; 16

Ena Veisorovaki i Jisu Karisito, sa rawa ni da vosoti.

• E dina ga ni sa rui ka vou vei keda na vakasama ni solibula manumanu nikua, e levu sara na ka eda rawa ni vulica mai na noda bulataka tiko na solibula veisorovaki i Jisu Karisito. Me tekivuna na veivosaki, e rawa ni o vakaraitaka na iyaloyalo ni iVakabula e Kecisemani kei na kauveilatai (raica na Gospel Art Book, naba. 56, 57). Sa rawa vei ira na lewe ni kalasi mera wasea na vosa eso era nanuma ni veiwekani kei na isoro veivakaduavatataki i Jisu Karisito. Mo qai sureti ira na lewe ni kalasi me ra railesuva na Vunau ni Soro 1:1–9 se na Vunau ni Soro 16, ka vakamacalataka na nodra sorovaki na manumanu, ka kunea na vosa era nanuma ni ra veiwekani kei na solibula ni iVakabula. Ena vukei keda vakacava na solibula makawa oqo meda kila vinaka cake kina na Veisorovaki i Jisu Karisito? Sa rawa mera lagata na lewe ni kalasi e dua na serenilotu me baleta na iVakabula ka wasea na nodra nanuma me baleti koya.

  

  Era solia na luvei Isireli na isolisoli me baleta na valecavu ena “yalo sa yalodina” (Lako Yani 35:5). Droini mai vei Corbert Gauthier, © Lifeway Collection/licensed mai na goodsalt.com

• Ena rawa ni veivuke vei ira na lewe ni kalasi mera vakatauvatana na solibula e gadreva na Turaga ena gauna ni Veiyalayalati Makawa kei na solibula e kerea vei keda nikua. Me kena ivakaraitaki, e rawa ni ra tuva na sala eso eda dau solibula kina vua na Turaga kei na nona cakacaka, me vaka na veiqaravi ena veikacivi, saumi ni isolisoli ni lolo, cakava na cakacaka ni tuvakawa, se veiqaravi vakai keda. Mo ni qai wilika vata na Vunau ni Soro 1:11–9 ka sureti ira na lewe ni kalasi mera vakasaqara na tiki ni isolisoli e vakamacalataki tiko ena veitikina oqo ka na rawa ni solia vei keda na Turaga na isolisoli nikua (raica na 3 Nifai 9:19–20; Vunau kei na Veiyalayalati 64:34). Na cava eda rawa ni vulica mai na Mosese 5:7 ena noda raica kina na noda solibula ena cakacaka ni Turaga?

iKuri ni iVurevure

Ena qai vakaukauwataki keda na Kalou.

A vakavulica o Peresitedi Henry B. Eyring:

“Na marau cecere e lako mai na noda bula savasava cecere. … Na ivolanikalou e vakavulici keda mai na veika tale eso, sa rawa meda vakacerecerei vakalou se meda yalo savasava cake ni da vakabauti Karisito,vakaraitaka noda talairawarawa, veivutuni, solibula Vua, ciqoma na cakacaka vakalotu tabu, ka maroroya noda veiyalayalati kei Koya.

“Na serenilotu ‘Meu Savasava Tu’ [Serenilotu, naba 73] e vakatura na sala meda masu meda vukei meda yalo savasava cake. A vakatura vakavuku o dauvolaivola me sa isolisoli mai vua e dua na Kalou dauloloma, ka soli ena kena gauna, ni sa oti kece na veika eda rawa ni qarava” (“Yalosavasava kei na iTuvatuva ni Bula Marau,” Liaona, Nove. 2019, 100–101, 103).

Vakatorocaketaki Noda Veivakavulici

Vakayagataka na sereivakatagi vakalou. Na itukutuku ena serenilotu e rawa ni vaqaqacotaka na vunau ena ivolanikalou. Me vakataka, na lagati ni dua na serenilotu me vaka na “Meu Savasava Tu” se “Loloma i Jisu” (Volanisere, nos. 73, 110) e rawa ni vaqaqacotaka eso na itukutuku e vakavulici ena Vunau ni Soro 16 kei na 19.