iYaloyalo ni vakatikori Josua tiko o Mosese, mai vei Darrell Thomas.

23–29 ni Me

Josua 1–8; 23–24

“Mo Kaukauwa ka Qaqa”

Ni o wilika na Josua 1–8 kei na 23–24, vakasamataka na ivakasala mo “vakanananu kina ena siga kei na bogi” (Josua 1:8). Vakatudaliga ki na veivakauqeti e basika mai. Ena rairai veimuataki oqo ki na vakavulici ni vakasama eso me baleta na nomu kalasi.

Vola na Veika o Vakauqeti Kina

Sureta na Veiwasei

Sureta na lewe ni kalasi me ra wasea e dua na tikina mai na nodra wiliwili ena macawa oqo e vakalevutaka na nodra vakabauti Jisu Karisito. Me ivakaraitaki, era sa na rairai vakasamataka vagumatua na sala eso e vakananumi Jisu Karisito kina vei ira na ilesilesi i Josua. Cava na vuna eda vakavinavinakataka kina na italanoa eso ena ivola i Josua?

Vakavulica na iVunau

Josua 1:1–9.

“Mo kaukauwa ka qaqa.”

• A tukuni vakavica vei Josua, “Mo kaukauwa ka qaqa” (raica Nai Vakarua 31:7, 23; Josua 1:6–7, 9). De na rairai yaga ki na lewe ni kalasi mera veivosakitaka na ka e vakaibalebaletaka na Turaga ena malanivosa oqo. E rawa ni ra vaqara ena Josua 1:1–9 na ivakasala a solia na Turaga vei Josua me vukei koya me kaukauwa ka yaloqaqa. Rawa talega ni ra wasea na ivakaraitaki ni tamata era kila tu ka tiko vei ira na ivakarau vakaoqo. A vakaraitaka vakacava o Josua na kaukauwa kei na yaloqaqa ena itukutuku era kune ena ivola i Josua? (me ivakaraitaki, raica na wase 3, 6, kei na 8). Sa rawa ni ra wasea na lewe ni kalasi na sala era sa tovolea tiko kina mera kaukauwa ka yaloqaqa ena vuku i Karisito.

Josua 1:8

Na vosa ni Kalou sa rawa ni vakalougatataka na noda sala.

• Me vakauqeti ira na lewe ni kalasi ena nodra vuli ivolanikalou vakai ira ka vakamatavuvale, sa rawa mo ni wilika na Josua 1:8 vakalasi. Na cava eda vulica mai na tikina oqo ena ivakarau ni kena vulici na ivolanikalou? De na rawa ki na lewe ni kalasi mera wasea na ka era sa cakava tiko mera “vakanananu” ena ivolanikalou “ena siga kei na bogi.” Sa cakava vakacava na Turaga me da “kalougata na nodai valavala” ka “tamata yaco” ni da vulica na Nona vosa?

  

  Na vosa ni Kalou sa rawa ni cakava meda “kalougata ena [noda] ivalavala” (Josua 1:8).

Josua 3–4

Sa rawa ni da vakila na “cakacaka‑mana” ni Kalou

• De na yaga vei ira na lewe ni kalasi e dua na railesu lekaleka ni kedra itukutuku na Isireli ena takosovi ni Uciwai na Joritani. Sa rawa mo wasea na kalasi vakaveisasa ka sureta na veisa yadua me tukuna na italanoa kivei ira yadua, ni sa yaco mera kaya e dua na yatuvosa ena dua na gauna (vakayaloqaqataki ira me raica na Josua 3 ke ra gadreva na veivuke ni kena nanumi na italanoa). Sa rawa ni ra qai veivosakitaka vakalasi na veika matailalai e vakaibalebale vei ira. Na cava eda vulica mai na italanoa oqo e rawa ni vukei keda me vakila na “cakacaka‑mana” ni Turaga ena noda bula? (tikina e 5). Na “cakacaka‑mana” cava so sa cakava o Koya vei keda? Cava na vuna e bibi kina me tiko na veika vakayalo ki na tabatamata yadua e vakavulici ira ni “sa kaukauwa na liga i Jiova”? (Josua 4:24).

• E dina ga ni da gadreva taucoko me tiko na noda dui kilaka tara-vakabauta, sa bibi talega me nanumi na ka e sa cakava na Turaga me baleti ira na tubuda. Mai na itukutuku ena Josua 4, na cava era cakava na Isireli me vukea na tabatamata mai muri mera nanuma na takosovi ni Uciwai na Joritani? (raica na Josua 4:1–7). Na cava eda sa cakava tiko me vakadeitaka ni ra na sega ni guilecava na veitabatamata mai muri na noda veika sotavi?

Josua 6–8

Na talairawarawa e kauta mai na kaukauwa ni Kalou ki na noqu bula.

• Naituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale e vakatura na vakatauvatani ni nodra ivalu na Isireli kei ira na kai Kenani ena Josua 6–8 vata kei na noda dui ivalu kei na veitemaki. Sa rawa mo tarogi ira na lewe ni kalasi na vakasama se nanuma cava so e tiko vei ira ni ra wilika na veiwase oqo ni vakasamataki tu na veivakatauvatani oqo. Se rawa ni o dusimaki ira ki na veitikina vakatabakidua e veiganiti tu ki na noda ivalu me levei kina na ivalavala ca, ka rawa ni ra veivosakitaka na ka era vakavulica na veitikina oya ena rawati ni kaukauwa ni Kalou ena noda bula. Eso na tikina oqo e rawa ni oka kina na Josua 6:1–5, 18, 20; 7:11–13.

Josua 23–24

“Mo ni digitaki koya edaidai kemuni na qarava.”

• De na rairai vukea na lewe ni kalasi mera tutaka vakai ira na Josua 23–24 ke ra raitayaloyalotaka tu ni ra sa kai Isireli ka rogoca tiko na veivakasalataki i Josua ena mua ni nona bula. Sa rawa ni o solia vei ira e vica na tikina me ra wilika lo ka qai kerea me ra wasea e dua na ka mai na veitikina oya e rawa ni vakauqeti ira me ra yalodina tikoga kivua na Turaga. Sa rawa talega ni ra wasea na sala era sa vakatulewataka kina vakataki ira o “koya [era] na qarava” (Josua 24:15). Cava na vuna era cakava kina na vakatulewa oqo?

• Sa rawa mo sureta na lewe ni kalasi me ra digitaka e dua na malanivosa mai na Josua 23–24 e vakauqeti ira me digitaka me ra qarava na Kalou ka qai cakava e dua na posita se iyaloyalo (meme) ena malanivosa oqo me vakaraitaki tu e vale se na sala ni vakauitukutuku raraba.

Vakatorocaketaki ni Noda Veivakavulici

Sa yaco na tubucake vakayalo e vale. Sa gadrevi me tiko ki na lewe ni nomu kalasi na nodra dui kilaka vakayalo ena taudaku ni kalasi me rawa ni ra kaukauwa tikoga kina vakayalo. Raica na sala eso ni kena vakayagataki na gauna lekaleka o tiko kina vata kei ira mo vakauqeti ira ni raica na veivakabulabulataki vakayalo ni ivolanikalou e vale—vakayadua ka vakamatavuvale. (Raica na Veivakavulici ena iVakarau ni iVakabula18.)