iYaloyalo kei Tepora ni liutaka na mataivalu i Isireli, © Lifeway Collection/licensed mai na goodsalt.com

30 ni Me–5 ni Jiune

Na Dauveilewai 2–4; 6–8; 13–16

“A Vakatubura Cake na Turaga e Dua na Dauveisereki”

Mo nanuma tiko ni qasenivuli bibi duadua sa ikoya na Yalo Tabu. O na vukei ira vakacava na lewe ni kalasi mera vakavulici mai vua na Yalo Tabu ena nomu veivosakitaka na dina mai na ivola ni Dauveilewai?

Vola na Veika o Vakauqeti Kina

Sureta na Veiwasei

Vola ena papa ni volavola na yacadra eso na dau vakataulewa era kunei ena Na Dauveilewai 2–4; 6–8; 13–16 (me vakataki Tepora, Baraki, Kitioni, kei Samisoni). Solia vei ira na lewe ni kalasi e vica na miniti mera railesuva na iwase oqo ka vola ena dua na yaca ena papa ni volavola e dua na dina era a vulica mai na veika a sotava o koya oqo.

Vakavulica na iVunau

Na Dauveilewai 2:11–19; 3:5–12; 4:1–16

E dau solia na Turaga na veisereki ni da lakosese.

• Ni vakadikevi na nodra vakabesebese na Isireli me baleta na veisaqasaqa, rarawa, veivutuni, kei na veisereki e rawa ni vukei ira na lewe ni kalasi me ra kila na kaukauwa ni veisereki ni Kalou ena nodra dui bula. Sa rawa vei ira na lewe ni kalasi mera cakacaka vakailawalawa lalai mera raica na ivakarau e vakamacalataki tiko ena Na Dauveilewai 2:11–19; 3:5–12. Era a sereki vakacava na luvei Isireli mai na nodra ivakarau ni ivalavala ca kei na rarawa? Na cava eda vulica mai na ivola ni Dauveilewai ena ivakarau e rawa ni da dro tani kina mai na ivalavala ca kei na rarawa? Na cava eso na sala e dau sereki keda kina na Kalou? Sa rawa talega mo sureti ira na lewe ni kalasi me ra raica ka wasea na ivolanikalou e vakadinadinataka na Turaga me noda Dauveisereki ka Dauveivueti (me kena ivakaraitaki, 2 Samuela 22:1–3; Same 40:16–17; 1 Nifai 1:19–20; Mosaia 23:21–23; Vunau kei na Veiyalayalati 138:23).

• Na Dauveilewai 2:19 e volai kina ni ra sa gole tani na Isireli mai vua na Kalou ki na qaravi kalou matakau. Sa rawa vei ira na lewe ni kalasi mera vakalekalekataka na tikina oqo me vaka e dua na ivakasala vei ira. Ena sala cava so eda dau “cuva” kina ki “na kalou tani”? Ena vukei keda vakacava na Turaga me veisautaka na nodai “tovo ni lomaqa”?

• Me tekivutaka na veivosaki me baleta na nodrau sereki Isireli ko Tepora kei Baraki mai vei ira na kai Kenani, sa rawa mo kerea e dua na lewe ni kalasi me vakalekalekataka na italanoa (e rawa ni veivuke me kerei taumada o koya ni vo e vica na siga me rawa kina ni vakavakarau tiko). E rawa ni ra veivosakitaka na lewe ni kalasi na ivakarau ni bula nei Tepora e vakauqeti ira. A vakauqeti ira vakacava na luvei Isireli o Tepora mera muria na Turaga? E rawa beka mo ni wilika vata Na Dauveilewai 4:14 ka veivosakitaka na ibalebale ni vosa yalodina nei Tepora: “Sa sega li ni liutaki iko ko Jiova?” E dau liutaki keda vakacava na Turaga? (raica talega na Vunau kei na Veiyalayalati 84:87–88).

Na Dauveilewai 6–8

E rawa ni cakacaka mana na Turaga ni da vakararavi ena nona sala.

• Na vulici ni kaci nei Kitioni e rawa ni vakauqeti ira na lewe ni kalasi ena nodra dui veiqaravi. Sa rawa mo kerei ira mera wilika ka veivosakitaka Na Dauveilewai 6:11–16. Na cava eda vulica rawa mai na veika oqo? Me vukei ira mera vuli mai Na Dauveilewai 7, sa rawa mo sureta e dua se vuqa na lewe ni kalasi mera vakatotomuria na sotia nei Kitioni ka tukuna na italanoa mai na nodra rai na sotia. Eso tale na lewe ni kalasi e rawa ni vakataroga na veika e lako curuma na sotia. E tautauvata vakacava na italanoa oqo kei na veika e yaco tiko ena noda bula? Na cava eda vulica me baleta na Turaga mai na talanoa oqo?

Na Dauveilewai 13–16

Na kaukauwa e lako mai na yalodina ki na noda veiyalayalati kei na Kalou.

• O na vukei ira vakacava na lewe ni kalasi mera kila na dina veivakauqeti kei na ivakaro bibi mai na italanoa kei Samisoni? E dua na sala e rawa ni o sureta kina na veimama ni kalasi me ra railesuva Na Dauveilewai 14–16 ka vakaraica na veitikina e vakaraitaka ni a tiko na Turaga vata kei Samisoni. E rawa ni ra raica na ikarua ni veimama na tikina e vakaraitaka ni a sega ni dina taucoko vua na Turaga o Samisoni. Kerei ira na lewe ni kalasi me ra wasea na veika era sa kunea. Na cava e vakavulica vei keda na bula nei Samisoni me baleta na noda maroroya na veiyalayalati eda cakava vua na Kalou? Na itukutuku nei Sister Ann M. Dibb ena “iKuri ni iVurevure” ena rawa ni veivuke.

  

  Sa Biuta Sobu o Samisoni na Duru, mai vei James Tissot kei ira tale eso

iKuri ni iVurevure

E dua na lesoni mai na bula nei Samisoni.

E vakavulica o Sister Ann M. Dibb: “A sucu o Samisoni me dua na tamata qaqa. A yalataki vei tinana, ‘Ia ena vakatekivu me vakabulai ira na Isireli mai na ligadra na kai Filisitia’ [Na Dauveilewai 13:5]. Ia ni sa tubu cake o Samisoni, a raica vakalevu na veitemaki kei vuravura ka segai na veiliutaki ni Kalou. A digitaka o koya na veika eso baleta ‘[ni] sa vinakati koya sara’ [Na Dauveilewai 14:3] ka sega ni baleta ni ra dodonu na digidigi oya. E vakavuqa, na kena vakayagataka na ivolanikalou na malanivosa ‘a sa lako sobu’ [Na Dauveilewai 14:7] ni tukuni tiko na ilakolako i Samisoni, nona ivalavala, kei na digidigi. Ni a sega ni tucake ka rarama mai me vakayacora na veika qaqa sa tu vua, a rawai Samisoni ko vuravura, takali mai vua na isolisoli kaukauwa ni Kalou, ka mate dole vakaloloma” (“Dou Tucake ka Rarama Mai,” Liaona, Me 2012, 118).

Vakatorocaketaki ni Noda Veivakavulici

Me tiko na nodra gauna ni veiwasei na vuli tiko. “Ni ra wasea na vuli tiko na veika era sa vulica, e sega walega ni ra vakila na Yalotabu ka vaqaqacotaka na nodra dui ivakadinadina, ia era vakayaloqaqataki ira talega na vo ni lewe ni kalasi me ra raica vakataki ira na dina. … Maroroya na gauna me ra veiwasei kina na gonevuli ena lesoni yadua.” (Veivakavulici ena iVakarau ni iVakabula, 30.)