Na Vanua ko Lako Kina, mai vei Sandy Freckleton Gagon

6–12 ni Jiune

Ruci; 1 Samuela 1–3

“Sa Reki na Yaloqu vua na Turaga”

Sa ka bibi me da tu vakarau me da veivakavulici, ia me laurai ni nomu ituvatuva e oka kina na nomu solia na madigi ki na kalasi me ra wasea na veika era sa vulica.

Vola na Veika o Vakauqeti Kina

Sureta na Veiwasei

Mera vakayaloqaqataki na lewe ni kalasi mera wasea na veika era sa vulica ena macawa oqo, sa rawa mo sureti ira mera vola ena papa ni volavola e dua na vosa se malanivosa mai na Ruci 1–4 se 1 Samuela 1–3 e vakauqeti ira ena nodra vuli yadua se vakamatavuvale. Wilika e vica e cake, ka kerei ira na lewe ni kalasi mera wasea na sala a vakauqeti ira kina na veivosa kei na malanivosa oqo.

Vakavulica na iVunau

Ruci; 1 Samuela 1–2

Na Karisito e rawa ni vukica na leqa me qaqa.

• E dina ni ra sotava yadua na nomu kalasi na veivakatovolei ka duidui mai vei rau o Ruci kei Ana, e rawa ni ra vulica na vei sala eso ka rau muria o rau na marama yalodina oqo me isau ni mosi ni yalo kei na vuturi. Me vukei ira ena ka oqo, sa rawa mo wasea na kalasi ki na ilawalawa lalai ka sureta na ilawalawa yadua mera wilika e dua na wase mai na Ruci 1–4 se 1 Samuela 1. Ena papa ni volavola, e rawa ni o vola na taro vakaoqo: Na veivakatovolei cava a sotava tiko o Ruci se o Ana? Erau vakaraitaka vakacava na nodra veivakabauti vua na Turaga ena gauna ni nodrau veivakatovolei? E rawa ni ra vakasaqara na ilawalawa na isau ni dua se vuqa na taro ka wasea na veika era kunea. Na cava eda vulica mai na itukutuku oqo me baleta na sala e rawa ni vukei keda kina na Turaga ena noda vakatovolei?

  

  Ena Vuku ni Gone Oqo Au a Masu Kina, mai vei Elspeth Young

• E sega ni o ira kece era masulaka me dua na gone era ciqoma, ka sega ni o ira kece sa mate na watina era vakamau tale. Ia na noda bolebole yadua, se cava ga na kedra ituvaki, e rawa ni ra madigi ni gole vua na iVakabula ka vaqaqacotaka na noda vakabauti Koya. Sa rawa mo kerei ira na lewe ni kalasi mera wilika na Ruci 2:11–12 kei na 1 Samuela 1:9–11 ka veivosakitaka na dredre a sotava o Ruci kei Ana kei na nodrau veimaliwai kei na Turaga. Sa rawa talega vei ira na lewe ni kalasi mera wasea na sala a vaqaqacotaki kina na nodra vakabauta baleta ni ra vuki vei Jisu Karisito ena gauna ni veivakatovolei.

  Me tokona na veivosaki oqo, sa rawa mo sureta e dua se vica na lewe ni kalasi mera vakavakarau mai mera wasea na nodra nanuma mai na dua vei ira oqo: na itukutuku nei Sister Reyna I. Aburto “Veidraki Kece, Jisu Tu Vei Au!” (Liaona, Nove. 2019, 57–60); na iwase ka kena ulutaga “Na Reki ena Noda Uabaleta ena Vukui Karisito” mai na itukutuku nei Elder D. Todd Christofferson “Nodra Reki na Yalododonu” (Liaona, Nove. 2019, 16–17); se na vosa nei Peresitedi Elaine S. Dalton ena “iKuri ni iVurevure.” Kerei ira na lewe ni kalasi mera wasea na veika era sa vulica me baleta na kena yaco me sala ni noda vakabauti Jisu Karisito na noda vakatovolei.

1 Samuela 2:18–36; 3

Sa dodonu meda vakarorogo ka talairawarawa ki na domo ni Turaga.

• Era tiko beka eso na lewe ni nomu kalasi ka ra vakataki Samuela, era sa rogoca na domo ni Turaga ia era sega ni kila ni sa Nona. Sa rawa mo sureta na lewe ni kalasi mera raicalesu na 1 Samuela 3, ka vakaraica na veika a cakava o Samuela ka rawa ni vukei keda ena noda sasaga meda rogoca ka talairawarawa ki na domo ni Turaga. Sa rawa talega mo kerea e rua na lewe ni kalasi me rau vakatotomuria tale na nodrau veitaratara o Samuela kei Ilai.

• Ena so na gauna eda kunei keda ena na ituvaki me vakataki Ilai—sa noda na madigi meda vukea e dua me kila na domo ni Turaga. Sa rawa vei ira na lewe ni kalasi mera wasea na sala era sa cakava kina oqo me baleti ira na itokani, lewe ni matavuvale, se ira na tani. Na ivolanikalou se veika cava sa yaco oti eda sa wasea me da vukei ira kina na tani me ra kila vakavinaka na sala e dau veitaratara kina kei keda na Turaga? (raica, me ivakaraitaki, Vunau kei na Veiyalayalati 6:22–23; 8:2–3; 9:7–9).

iKuri ni iVurevure

Eda sega ni tiko duadua ga.

E vakavulica o Peresitedi Elaine S. Dalton:

“Na ilakolako ni bula ena so na gauna e kauti keda ki na sala sega ni namaki. Era tu na veigoleyaki kei na tavuki ena gaunisala ka sega ni dua vei keda e rawa ni namaka. Ia ena vakatikitiki ni veika kece oqo ka tu talega kina na madigi—na madigi me da digitaka na isau ni taro kei na ituvatuva ni noda cakacaka. Na dredre ena bula oqo e rawa ni madigi me vukei keda meda toro voleka yani vua na iVakabula ka vakararavi vakalevu sara Vua. Ena noda ivalavala ni tiko voleka vua e veisiga yadua, eda tara cake na ivakarau kei na itovonibula Vakarisito . …

“Me vakataki Ruci kei Ana, eda na sotava taucoko na dredre. Eda na sega beka ni kila na inaki ni Turaga ena noda bula, ia sa noqu ivakadinadina ni da sa sega ni tiko duadua. Sa tiko vata kei keda o Koya, ka sa yalataka vei keda ko Koya, ‘Dou na sega ni raica rawa e matamudou vakayago, ena gauna oqo, na ituvatuva ni nomudou Kalou me yaco ena gauna mai muri, io kei na lagilagi ena muria mai ni sa oti e vuqa na veika rarawa’ [Vunau kei na Veiyalayalati 58:3]” (“Lesoni mai vei Ruci kei Ana,” Ensign, Epe. 2006, 35, 37).

Raica talega na Joni 14:18; Alama 38:5.

Vakatorocaketaki Noda Veivakavulici

E dodonu vinaka me da kaya “Au sega ni kila.” Me vaka ni sa dodonu mo cakava na nomu vinaka duadua mo sauma na nodra taro na nomu lewe ni kalasi, na Turaga e sega ni namaki iko mo kila na veika kece. Ni o sega ni kila mo sauma vakacava e dua na ka, vakadinata ni o sega ni kila ka tukuna na nomu ivakadinadina dina me baleta na veika o kila. (Raica na 1 Nifai 11:16–17; Veivakavulici ena iVakarau ni iVakabula, 24.)