Vakatikori o Tevita na Tui, mai vei Jerry Miles Harston

20–26 ni Jiune

2 Samuela 5–7; 11–12; 1 Tui 3; 8; 11

“Na Nomuni Matanitu ena Vakataudeitaki me Tawamudu ”

Ni o vulica na ivolanikalou, vakasaqara ena masumasu mo kila na ivakavuvuli cava ena vakaibalebale vakalevu duadua vei ira na lewe ni nomu kalasi me rawa ni o vakanamata ki na nodra gagadre.

Vola na Veika o Vakauqeti Kina

Sureta na Veiwasei

Mo kila na veika era kunea na lewe ni kalasi e vakaibalebale ena nodra vulica na ivolanikalou, sa rawa mo kerei ira mera vola na idusidusi me baleta e dua na tikina ka a vakauqeti ira ena tikitiki ni pepa ka qai biuta na pepa ena dua na koniteina. Sa rawa vei ira na lewe ni kalasi mera tomika e dua na pepa mai na koniteina, ka mera wilika ka veitalanoataka na kalasi na malanivosa oya.

Vakavulica na iVunau

2 Samuela 6:1–8

E dodonu meda kitaka na cakacaka ni Kalou ena Nona sala.

• Sa rawa mo kerei ira na lewe ni kalasi mera wilika na 2 Samuela 6:1–8 ka vakasamataka na ivakaro cava e rawa ni tukuna vei keda nikua na italanoa oqo. Na itukutuku mai vei Brigham Young ena “iKuri ni iVurevure” ena rawa ni veivuke. Na cava eso na sala eda tovolea kina me da cakava na cakacaka ni Kalou ena dua tale na sala mai na kena a dusimaka o Koya? Na cava e dau rerevaki kina na ka oqo? Sa rawa vei ira na lewe ni kalasi mera wasea na gauna era a vulica kina mera vakararavi ki na veidusimaki sa solia na Turaga me baleta na kena rawati na Nona cakacaka.

2 Samuela 11

E dodonu meda dau taqomaki keda mai na ivalavala ca.

• Na noda vulica na digidigi veivakaleqai nei Tevita ka volai ena 2 Samuela 11 e rawa ni vukei keda me da levea na cala vata vakaoya. De rawa beka me ra wilika vata na kalasi na 2 Samuela 11:1–17 ka raica na digidigi a cakava o Tevita ka vakavuna nona ivalavala ca. Na cava beka a rawa ni cakava vakaduatani o Tevita? E rawa talega ni o kerei ira na lewe ni kalasi me ra vola e dua na iyatuvosa ena vukea me vakauqeta e dua me levea na ivalavala ca, ka yavutaki ena veika era sa vulica mai na 2 Samuela 11. Kerea e vica na lewe ni kalasi me ra wasea na nodra nanuma.

• Sa rawa mo vakayagataka na 2 Samuela 11 mo veivosakitaka kina na rerevaki ni iyaloyalo vakasisila kei na ivalavala ca tale eso ni veiyacovi. Me caka oqo, sa rawa ki na kalasi me railesuva vata na veitikina eso ni itukutuku nei Elder L. Whitney Clayton “Sa Kalougata Ko Ira Kecega Sa Yalosavasava” (Liaona, Nove. 2007, 51–53). Na ivakasala cava e solia o Elder Clayton me baleta na rerevaki ni iyaloyalo vakasisila? Sa rawa talega mo sarava na vidio “To Look Upon” (ChurchofJesusChrist.org). Ena vukei keda vakacava na iVakabula meda vorata rawa na veitemaki se itovo oqo?

  Sa rawa vei ira na lewe ni kalasi mera wasea na vakasama era kunea ni veivuke ena nodra sasaga me taqomaka na nodra matavuvale mai na iyaloyalo vakasisila se ulabaleta na kena revurevu ni iyaloyalo vakasisila. Na itukutuku nei Sisita Linda S. Reeves “Tataqomaki mai na iYaloyalo Vakasisila—Matavuvale Vakaliuci Karisito” e rawa ni veivuke (Liaona, Me 2014, 15–17; raica talega na “iKuri ni iVurevure”).

Na valetabu na vale ni Turaga

1 Tui 8: 22–61

E kauta mai na veivakalougatataki na valetabu.

• 1 Tui 8 e vakamacalataka na veivakalougatataki a segata o Solomoni ki vei ira na nona tamata ni sa mai vakacavari na valetabu. Sa rawa mo wasea na vei tikina e 22–61 vei ira na lewe ni kalasi ka kerei ira mera wasea e dua na ka era kunea ka vakauqeti ira ena nodra sokalou ena valetabu. Sa rawa ki na kalasi me wasea na sala sa vakalougatataka kina na nodra bula na nodra sokalou tiko ena vale ni Turaga.

1 Tui 8:61; 11:1–11

“A sa sega ni dodonu na yalona vei Jiova.”

• Na cava na kena ibalebale meda “laiva [na] yaloda … me taucoko vua na Turaga”? (1 Tui 8:61). E duidui beka mai na noda ivalavala e taucoko? E duidui vakacava? Ni ra vakasamataka vakatitobu na kalasi na taro oqo, e rawa ni ra wilika na 1 Tui 11:1–11 ka raica na veika e tukuna na Turaga me baleta na yaloi Solomoni. Eda na levea vakacava na cala a cakava o koya?

iKuri ni iVurevure

Vakadeitaka na waqa.

A vakavulica o Peresitedi Brigham Young: “Laiva ga na Matanitu, na Turaga e vakatudeitaka na waqa; Ia kevaka e drigiti, ka rairai gadrevi me vakatudeitaki, kevaka e dua na gauna e vakatajiki vakalailai, kei na irairai kece ni na vakatobuicu, qarauna na nomu dodoka yani na ligamu mo vakatudeitaka; me da kakua ni siova na veika e sega ni okati keda; laiva me tiko vakaikoya ga, e sa cakacaka ni Turaga” (iVunau i Brigham Young, sel. John A. Widtsoe [1954], 66).

Taqomaki ni matavuvale mai na iyaloyalo vakasisila.

A vakavulica o Sisita Linda S. Reeves: “Eda na taqomaki ira vakacava na luveda lalai kei ira na itabagone? Na itatarovi sa iyaya yaga ni cakacaka, ia na itatarovi cecere duadua e vuravura, o koya duadua ga ena qai cakava, sai koya ga na nona itatarovi e liu e lako mai na dua na ivakadinadina titobu ka veivauci ni nona loloma na Tamada Vakalomalagi kei na solibula veisorovaki ni noda iVakabula me baleti keda yadua” (“Tataqomaki mai na iYaloyalo Vakasisila—Matavuvale Vakaliuci Karisito,” Liaona, Me 2014, 16; raica talega na Joy D. Jones, “iWali ni iYaloyalo Vakasisila: Veitaqomaka, Veivosaki, ka Veivakabulai,” Ensign, Okot. 2019, 22–27).

Vakatorocaketaki Noda Veivakavulici

Vakadeitaka ni ko sa vakavulica tiko na vunau dina. “Mo dau tarogi iko tikoga ‘Na sala cava era na vukei kina na noqu lewe ni kalasi mai na veika au sa vakavulici ira tiko kina me ra tara cake na nodra vakabauti Karisito, mera veivutuni, mera cakava ka maroroya na veiyalayalati kei na Kalou, ka ciqoma na Yalo Tabu?’” (Veivakavulici ena iVakarau ni iVakabula, 20).