Tevita kei Koliaci, mai vei Steve Nethercott

13–19 ni Jiune

1 Samuela 8–10; 13; 15–18

“Ni Sa Lewa Na iValu Ko Jiova”

Ni ko vakavakarau mo veivakavulici, nanuma tiko ni o ira na lewe ni kalasi era sa rairai vulica e vuqa sara na ka ena nodra wili volanikalou tiko e vale. Na cava o rawa ni cakava mo tara cake kina na veika era sa sotava tiko?

Vola na Veika o Vakauqeti Kina

Sureta na Veiwasei

Me vakayaloqaqataki ira na lewe ni kalasi mera wasea na veika era sa vulica ena macawa oqo, solia vei ira na gauna mera vakasamataka kina na veivakauqeti e tiko vei ira me baleta na 1 Samuela 8–10; 13; 15–18. Qai kerei ira mera wasea e dua na tikina e vakauqeta e dua na vakasama.

Vakavulica na iVunau

1 Samuela 9:15–17; 10:1–12; 16:1–13

Na Kalou e kacivi ira na tamata ena parofisai me ra veiqaravi ena Nona matanitu.

• Na itukutuku ni Kalou ena nona digitaki Saula kei Tevita ena parofisai kei na ivakatakila e rawa ni vukei ira na lewe ni kalasi mera kila vakavinaka na sala era sa digitaki kina na tamata mera veiqaravi ena Lotu nikua. Sa rawa mo sureti ira na lewe ni kalasi mera wilika na 1 Samuela 9:15–17; 10:1–12; kei na 16:1–13, ka vaqara na veitikina e rawa ni vukei ira me ra kila na ibalebale ni “kacivi na tamata mai vua na Kalou” (Yavu ni Vakabauta 1:5). Na cava na kena duidui, vei ra na tamata era kacivi kei ira era tokoni ira, me ra kila ni sa digitaki ira na tamata na Kalou me ra veiqaravi ena Nona Lotu?

  

  Na iyaloyalo kei Samuela ni lumuti Saula tiko, © Lifeway Collection/licensed mai na goodsalt.com

1 Samuela 13:5–14; 15

“Sa vinaka na talairawarawa ka ca na isoro.”

• Me veivosakitaki na cava e bibi kina me da talairawarawa vua na Turaga, e rawa ni o sureta na kalasi me ra railesuva na 1 Samuela 13:5–14 ka vakaraica na ivakarau kei na itovo ka vakavuna na nona lutu o Saula. Na cava e rawa ni da vulica mai na nona cala o Saula?

• Ni da sega ni kila na vuna a vakaroti kina o Saula me vakamatei ira kece na Amelekaiti kei na nodra manumanu, e tiko na lesoni me da vuli mai na nona sauma na ivakaro o ya. Me vukei ira na lewe ni kalasi mera kila na lesoni oqo, e rawa ni o vola ena papa ni volavola Sa vinaka na talairawarawa mai na … ka sureti ira na lewe ni kalasi mera vakasamataka vagumatua na malanivosa oqo ni o ni railesuva vata na veika a yaco ena 1 Samuela 15. Na cava eso na ka vinaka eda dau digitaka cake mai na noda talairawarawa ki vua na Kalou ? Na cava e vinaka cake kina na talairawarawa vua na Kalou mai na veika vinaka tale eso?

1 Samuela 16:6-7

“Sa raica na yalo ko Jiova.”

• Ni wiliki oti na 1 Samuela 16:6–7, sa rawa mera wasea na lewe ni kalasi na nodra nanuma me baleta na ibalebale ni raica “na yalo” (tikina e 7). E rawa vakacava meda vulica meda dau rai ena sala e dau rai kina na Turaga? Sa rawa mera wasea na lewe ni kalasi na veika era sa sotava ka vakavulica vei ira na bibi ni kena raici na yalo ka sega ena irairai e tuba.

1 Samuela 17

E rawa ni vukei keda na Turaga me da vorata rawa na bolebole kecega.

• Ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale, era sa na rairai vakasamataka vagumatua na lewe ni kalasi na vosa ni tamata eso ena 1 Samuela 17. Nanuma mo kerei ira na kalasi me ra wasea na veika era sa vulica mai na itaviqaravi oqo. Vakabibi, na cava era a vulica me baleti Tevita?

• Eso na lewe ni nomu kalasi era sotava tiko beka na bolebole ka vaka me veivakayalolailaitaki me vaka a cakava o Koliaci vei Saula kei na nona mataivalu. O na vakayagataka vakacava na italanoa kei Tevita kei Koliaci me vukei ira na lewe ni kalasi me sotava na nodra bolebole ena vakabauta na Turaga? O na rawa ni vakaraitaka beka e dua na iyaloyalo kei Tevita kei Koliaci (me vaka na kena ena ituvatuva ena macawa oqo ena Lako Mai, Mo Muri Au—Baleta na Tamata Yadua kei na Matavuvale). Sa rawa mera qai vola ena papa na lewe ni kalasi eso na ka e rawa ni “Koliaci” ena noda siga oqo. Mera qai kunea na tikina eso ena 1 Samuela 17 ka vakaraitaka na vakabauta nei Tevita, ka rawa kina vua me vakadrukai Koliaci (raica talega na itukutuku ena “iKuri ni iVurevure”). E rawa ni ra wasea na lewe ni kalasi na veika era vakila ni vukei ira tiko kina na Turaga mera valuta na nodra ivalu.

iKuri ni iVurevure

Vakadrukai ni noda Koliaci.

E vakavulica o Peresitedi Gordon B. Hinckley:

“E tiko na Koliaci era wavoliti iko tu, tuwawa vakaitamera vaka inaki ca me vakarusai iko. Oqo era sega ni tagane ciwa-na-fute na kedra balavu, ia sai ira na tagane kei na isoqosoqo eso e vesuka na veika totoka ka ca ka rawa ni bolei ka vakamalumalumutaki ka vakarusai kemuni. …

“… Ia e sega ni gadrevi mo rere kevaka e tu vei iko e ligamu na irabo ni dina. … Sa tu vei iko na vatu ni ivalavala dodonu kei na vakarokoroko kei na yalodina mo vakayagataka vei ira na meca era vinakata me ra rawai iko. Me vaka ga na ka o kauwai kina, e rawa ni o ravuti ira ena ‘lomadonu ni matadra,’ ni vakayagataki e dua na vosa vakatautauvata. E rawa ni o qaqa vei ira kevaka walega mo bula vakaivakarau mo rawa ni levei ira kina. E rawa ni o tukuna vei ira taucoko me vaka a kaya o Tevita vei Koliaci, ‘Ko sa lako mai vei au ka vakaiseleiwau, ka vakamoto, ka vakaisasabai: ia sa lako yani vei kemuni ena yaca i Turaga ni lewevuqa, o koya na Kalou ni nodra mataivalu na Isireli, o ira ko a daubolea’ [1 Samuela 17:45]” (“Vakadrukai na Koliaci ena Noda Bula,” Ensign, Me 1983, 46, 51).

Vakatoroicaketaki Noda Veivakavulici

Na nomu kacivi e yaco ena veivakauqeti. Me vaka e dua na qasenivuli, o sa kacivi mai vua na Kalou mo vakalougatataki ira na Luvena. Ni o bula kilikili tiko ena Nona veivuke, ena solia vei iko o Koya na ivakatakila o vakasaqara. (Raica na Veivakavulici ena iVakarau ni iVakabula, 5.)