Li Kaqi Palaw

4–10 abril

Exodo 14–17

“Xaqab’omaq eerib’ ut ilomaq lix kolb’a-ib’ li Qaawa’ ”

Tz’il rix chan ru naq lix yu’ameb’ laj Israel neke’reetali lix yu’ameb’ li komon sa’ laa tzoleb’aal. B’ar wankeb’ li esilal sa’ xyu’ameb’ laj Israel li tixtenq’aheb’ li komon?

Tz’iib’a li nakak’oxla

Xkanab’ankileb’ chi wotzok

Sa’ Exodo 14–17 wankeb’ naab’al li xnimal ru seraq’. Jun li komon naru tixtz’iib’a xjalam-uuch jun li seraq’ naq yookex chixtz’ilb’al rix k’a’ru li seraq’ a’an. Patz’ reheb’ k’a’ru na’leb’ xe’xtaw sa’ li seraq’ a’an.

Xk’utb’al li tzolʼlebʼ

Exodo 14

Li qaChoxahil Yuwa’ nokoxkol naq yooko chixtaaqenkil li Santil Musiq’ej.

• Naq eb’ laj Israel ke’wulak chire li Kaqi Palaw, anchal oso’jenaq chik lix b’e—a’b’an wan xna’leb’ li Dios li maji’ neke’ril. Naq li komon neke’xtzol chi ak’il li esilal chirixeb’ laj Israel ut li Kaqi Palaw, naru te’ok chixk’oxlankil chi ak’il chan ru naq li Dios ak xrisiheb’ chaq sa’ ch’a’ajkilal junxil. Maare taawaj xk’eeb’aleb’ li komon chirilb’al Exodo 14 junpaataq re naq te’xye k’a’ru nawulak chiruheb’ sa’ li esilal a’an. Tenq’aheb’ ajwi’ chixseraq’inkil chan ru ak xe’isiik chaq sa’ ch’a’ajkilal junxil, ut chixyeeb’al b’ar wan li aatin sa’ li raqal a’in li naxwaklesiheb’ xpaab’aal chirix lix wankilal li Dios chiqakolb’al.

• Maare taawulaq ajwi’ cheru li aatin sa’ Tzol’leb’ ut Sumwank 8:2–3. K’a’ru nak’utman sa’ li raqal a’in chirix laj Moises? K’a’ru nokoxtenq’a chixnawb’al chirix li esilal sa’ Exodo 14? Jo’ naxye aran, chan ru taqasik’ li qatenq’ankil sa’ ch’a’ajkilal? K’oxla chan ru naq li na’leb’ sa’ “Xkomon chik li k’anjeleb’aal” naru texxtenq’a chixtz’ilb’al rix li na’leb’ a’in.

Li mana taqlanb’il chaq xb’aan li Dios naxk’e xkawilaleb’ laj Israel sa’ xtib’el; aajel ajwi’ ru xkawilal li qamusiq’. Jalam-uuch xb’aan laj Leopold Bruckner

Exodo 15:23–27; 16:1–15; 17:1–7

Li Qaawa’ tixk’e li k’a’ru na’ajman choq’ qe naq yooko chi b’eek sa’ li yu’am a’in.

• Sa’ Exodo 15–17 wan naab’al li esilal li naru tixtenq’aheb’ li komon chixpaab’ankil naq wan xwankilal li Qaawa’ chixk’eeb’al li k’a’ru na’ajman choq’ re li qatib’el ut li qamusiq’. Maare li junq komon naru taaril jun reheb’ li raqal a’in, re naq tixsik’ li musiq’ejil na’leb’: Exodo 15:23–27; 16:1–15; 17:1–7. Kanab’ naab’aleb’ li komon chixyeeb’al k’a’ru xe’xtaw. Chan ta ru naq li esilal a’in tixtenq’a li ani wan sa’ aajel ru, maare sa’ tib’elej malaj sa’ musiq’ej?

• Li komon naru ajwi’ te’xsik’ resilal li wech’ok sa’ li raqal a’an. K’a’ru taaye re jun laa was aawiitz’in re xch’olob’ankil k’a’ru naraj naxye li wech’ok? K’a’ut naq xuwajel li wech’ok? Maare teetz’il rix sa’ komonil chan ru naq ink’a’ tex’ok sa’ xwech’inkil rix li Qaawa’ naq wankex sa’ ch’a’ajkilal.

• Li komon naru ajwi’ te’xch’olob’ chan ru naq li mana sa’ Exodo 16 nareetali lix ch’olaninkil li qamusiq’. Chan ru naq li mana chanchan ajwi’ lix ch’olaninkil li qamusiq’? K’a’ru yoo chixk’utb’esinkil li Qaawa’ chiruheb’ laj Israel naq kixtaqla li mana chi jo’kan? (chi’ilmanq Jwan 6:31–35, 48–58). Naru ajwiʼ teeril jun rehebʼ li video li yeebʼilebʼ resil saʼ “Xkomon chik li kʼanjelebʼaal.”

Exodo 17:8–16

Naqak’ul li us naq naqaxaqab’ xwankileb’ laj jolominel.

• Naq laj Aaron ut laj Hur ke’xtaqsi li ruq’ laj Moises, kireetali naq na’ajman xxaqab’ankileb’ xwankil li ani b’oqb’il jo’ aj k’amol qab’e. Maare oxib’eb’ li komon te’xb’aanu rib’ jo’ chanchan laj Moises, laj Aaron, ut laj Hur ut jun chik li komon tixyaab’asi li esilal a’an. Chan ru naq laj Aaron ut laj Hur neke’reetali li qak’anjel choq’ re xtenq’ankileb’ laj jolominel? Chan ru naqaxaqab’eb’ xwankil li jolominel?

Xkomon chik li k’anjeleb’aal

Naru taak’ul aab’eresinkil xb’aan li Dios.

Li Hermana Michelle Craig xye:

“Jo’ xtzolom li Kolonel, naru taak’ul xmusiq’ankil aana’leb’, li tixk’am ajwi’ rib’ rik’in li na’leb’ ak taqlanb’il, choq’ re laa yu’am laa’at. Wan li k’anjel ka’ajwi’ choq’ aawe laa’at, ut taab’eresiiq aana’leb’ re naq taab’aanu.

Laj Nefi, li ras laj Jared, ut laj Moises ke’xq’ax li nimla ha’—a’b’an moko junaqik ta ke’xb’aanu. Laj Nefi “kixpech’ li che’ … li ink’a’ nawb’il ru” [1 Nefi 18:1]. Li ras laj Jared kixyiib’ li jukub’ “tz’aptz’o ru chanchan jun sek’ ” [chi’ilmanq’ Eter 6:5–8]. Ut laj Moises “kib’eek chiru chaqi b’e sa’ xyi li palaw” [Exodo 14:29].

“Chixjunileb’ ke’xk’ul xb’eresinkil xna’leb’, ak re re li junjunq, ut ke’ab’ink chiru. Li Qaawa’ naxk’oxla li ani na’ab’ink, ut laj Nefi kixye naq “tixk’uub’ jun li b’e choq’ reheb’ … re naq te’xb’aanu li k’a’ru naxtaqlaheb’ wi’ ” [1 Nefi 3:7]. K’ehomaq reetal naq laj Nefi naxye, “jun li b’e”—ut ink’a’ naxye “li b’e.”

Ma wan naq naqasach jun li qataqlankil xb’aan li Qaawa’ xb’aan naq naxk’ut “jun li b’e” li ink’a’ xqoyb’eni chaq?” (“Musiq’ejil seeb’al,” Jolomil ch’utub’aj-ib’ re octubre 2019).

Eb’ li video

Sa’eb’ li video “El pan de cada día: Modelo,” “El pan de cada día: Experiencia,” ut “El pan de cada día: Cambio” (ChurchofJesusChrist.org), li Elder D. Todd Christofferson naxye li na’leb’ chirix li mana.

Xkawresinkil qib’ jo’ aj k’utunel

Tenq’aheb’ li komon chixch’olob’ankil xnawom xch’ool. Nim xwankil xnawomeb’ xch’ool li komon sa’ laa tzoleb’aal. Re xb’oqb’aleb’ chixwotzb’al xnawom xch’ool, naru taaye li patz’om chanchan a’in: “K’a’ru usilal xak’ul sa’ laa yu’am xb’aan naq xataaqe li profeet?” (Chi’ilmanq ajwi’ Li k’utuk jo’ li Kolonel, 11.)