isinb’il li pek chiru li muqleb’aal

Xjalam-uuch li muqleb’aal yamyo xsa’, xb’aan li xMaryna Kriuchenko

11–17 abril

Li Paswa

“Tixsach chi junajwa xwankil li kamk”

Naq yookat chixkawresinkil aawib’ choq’ re li k’utuk sa’ li domingo re li Paswa, k’oxla chan ru taatenq’aheb’ li komon chireek’ankil xloq’al lix mayej ut lix waklijik li Jesukristo.

Tz’iib’a li nakak’oxla

reetalil li wotzok

Xkanab’ankileb’ chi wotzok

Maare taapatz’ reheb’ li komon k’a’ru xe’xb’aanu chiru li Rahil Kutan re naq te’xkawresi xpaab’aal chirix li Jesukristo.

reetalil li k’utuk

Xk’utb’al li tzolʼlebʼ

Xb’aan naq li Kolonel kixsach xwankil li kamk, laa’o ajwi’ toowakliiq wi’chik chi yo’yo.

• Xb’aan naq anajwan wanko sa’ li Paswa, maare taawaj xk’utb’al resilal li xb’een Paswa—a’an lix waklijik li Jesukristo chi yo’yo (wan sa’ Jwan 20:1–17). Naru taab’oq jun li komon chixseraq’inkil a’ yaal jo’ naxnaw xyeeb’al. Taaruuq ajwi’ taak’ut li video “Ha resucitado” (ChurchofJesusChrist.org). Maare li komon te’raj ajwi’ b’ichank ut rilb’al li aatin sa’ loq’laj hu chirix li Kolonel (sa’ Eb’ li B’ich naxye chiroq li b’ich b’ar taataw li na’leb’ sa’ loq’laj hu). Toja’ naq li komon te’ruuq xyeeb’al b’ar wan raatinul li b’ich li jwal nawulak chiruheb’, ut k’a’ru neke’reek’a chirix li Kolonel.

• Re xtenq’ankileb’ li komon chixnawb’al naq li Najter Chaq’rab’ naxch’olob’ xyaalal li Jesukristo, naru taak’eheb’ chirilb’al li aatin sa’ loq’laj hu li eetalinb’il sa’ li tusb’il na’leb’ re li xamaan a’in sa’ Kim, Taaqehin—Choq’ reheb’ li komon ut li junkab’al, jo’ ajwi’ li aatin sa’ lix Hu laj Mormon li eetalinb’il ajwi’ aran. K’a’ru naxye sa’eb’ li raqal a’an chirix li Kolonel ut lix k’anjel? Chan ru naq xnawb’al li profeetil aatin a’an nokoxtenq’a?

Naru taatuqlaaq ut taasaho’q li qach’ool xb’aan lix tojb’al rix li maak xb’aan li Kolonel.

• Sa’ li tusb’il na’leb’ re li xamaan a’in sa’ Kim, Taaqehin—choq’ reheb’ li komon ut li junkab’al nareetali jar raqal sa’ loq’laj hu li neke’xch’olob’ li tuqtuukilal ut li sahil ch’oolejil xb’aan li Jesukristo. Wi ta li komon ak xe’rileb’ li raqal a’an sa’ rochoch, tenq’aheb’ re naq te’xye k’a’ru xe’xk’oxla chirix. Malaj ut naru teerileb’ li raqal a’an sa’ komonil, toja’ naq tex’aatinaq chirix li tuqtuukilal ut li sahil ch’oolejil naqak’ul xb’aan li Kolonel. Chan ru taqawotz li usilal a’in rik’ineb’ li ani ink’a’ ta neke’xtaw? Naru ajwi’ taapatz’ naq jun li komon taaril li raatin li Awa’b’ej Russell M. Nelson “Li sahil ch’oolejil ut kole’k sa’ musiq’ejil” (Jolomil ch’utub’aj-ib’ re octubre 2016) chiru li xamaan re naq tixkawresi rib’ chixch’olob’ankil k’a’ru naxye li aatin a’an chirix li sahil ch’oolejil chirix li Kolonel.

• Maare taaweek’a naq taa’ajmanq li aatinak chirix xtenq’ankileb’ li qas qiitz’in chixtawb’al xsahil xch’ool chirix li Kristo. Naru taak’eheb’ li komon chixk’oxlankil li ani neke’xnaw ru—maare sa’ xk’anjel jo’ aj ilol komon—li wan ta sa’ aajel ru choq’ re xtenq’ankil, xmetz’ew, malaj yal rab’inkil resil li Jesukristo ut lix tojb’al rix li maak. Tenq’aheb’ li komon re naq te’xsik’ xna’leb’ sa’ loq’laj hu (wan resil sa’ “Xkomon chik li k’anjeleb’aal”) naq yookeb’ chixtz’ilb’al rix chan ru te’xtenq’a li ras riitz’in. B’oqeb’ wiib’ oxib’ li komon re naq te’xye k’a’ru neke’xk’oxla chirix li tenq’ank jo’ kixb’aanu chaq li Jesus.

li Kristo chiru li krus

Cha ru li kutan sa’ Golgota, xb’aan laj J. Kirk Richards

Xb’aan lix tojb’al rix li maak, wan xwankil li Jesukristo re naq tooxtenq’a chixq’axb’al ru li maak, li kamk, li ch’a’ajkilal, ut li majelal.

• Re xtenq’ankileb’ li komon chixk’oxlankil li usilal li naqak’ul sa’ xk’ab’a’ lix tojb’al rix li maak xb’aan li Jesukristo, naru te’xtz’iib’a sa’ pizarron li aatin Maak, Kamk, Ch’a’ajkilal, ut Majelal. Li junq komon naru tixyaab’asi jun reheb’ li raqal eetalinb’il sa’ “Xkomon chik li k’anjeleb’aal” re naq te’xk’oxla chan ru naq li Kolonel nokoxtenq’a chixq’axb’al ru li na’leb’ sa’ li pizarron. Rub’el li junq na’leb’ sa’ li pizarron, li komon naru te’xtz’iib’a reetalil li aatin xe’ril sa’ loq’laj hu, toja’ naq te’xch’olob’ xnawom xch’ool chirix li Kolonel ut lix tojb’al rix li maak.

• Li seraq’ ut li jaljookil ru aatin naru tooxtenq’a chixtawb’al ru lix tojb’al rix li maak xb’aan li Jesukristo. Naru taab’oq jun li komon chixyeeb’al jun reheb’ lix seraq’ li Elder Walter F. González sa’ li raatin “Lix toch’om li Kolonel” (Jolomil ch’utub’aj-ib’ re octubre 2019) malaj li raatin li Hermana Neill F. Marriott “Li kanaak rik’in li Dios ut xtuqub’ankil li jukulal” (Jolomil ch’utub’aj-ib’ re octubre 2017). K’a’ru naxye li seraq’ ut li jaljookil ru aatin a’in chirix lix tojb’al rix li maak xb’aan li Jesukristo? Ch’utub’eb’ li komon sa’ ka’kab’il re naq te’xyoob’ lix seraq’ malaj lix jaljookil ru aatin.

• Sa’eb’ li raqal a’in, jo’ nimal kixtoj li Jesukristo choq’ re li qakolb’al: Isaias 53:3–5; Mosiah 3:7; Tzol’leb’ ut Sumwank 19:16–19? Jo’ nimal kixtoj li qaChoxahil Yuwa’? (chi’ilmanq Jwan 3:16).

reetalil xkomon chik li k’anjeleb’aal

Xkomon chik li k’anjeleb’aal

Lix tojb’al rix li maak xb’aan li Jesukristo.

• Isaias 61:1–3

• Esekiel 36:26–28

• Mateo 11:28–30

• Lukas 1:46–55

• Romanos 8:35–39

• Alma 7:10–13

• Alma 11:42–45

• Moroni 10:32–33

• Tzolʼlebʼ ut Sumwank 19:15–19

• Moises 5:9–12

Xkawresinkil qib’ jo’ aj k’utunel

K’e xb’antioxinkileb’ li neke’tzolok aawik’in. “Milaatz’o’ aawu sa’ li k’utuk toj reetal naq ink’a’ nakab’antioxi raatineb’ li neke’tzolok aawik’in. Aajel ru naq te’xnaw naq nakawoxloq’i lix na’leb’ ut lix nawom” (Li k’utuk jo’ li Kolonel, 33).