nimla tzuul

Jun li tzuul sa’ Egipto. Chalen chalen nayeeman naq a’an li Tzuul Sinai.

18–24 abril

Exodo 18–20

“Taqab’aanu jo’ nimal li xye li Qaawa’ ”

Naq yookat chirilb’al Exodo 18–20, tz’iib’a li k’a’ru na’ok sa’ laa na’leb’ choq’ re xtenq’ankileb’ li komon sa’ li tzolok. Us ta yal ka’ch’in li na’leb’ nakak’oxla, naru tixtenq’aheb’ li komon chixtawb’al li k’a’ru chaab’il.

Tz’iib’a li nakak’oxla

reetalil li wotzok

Xkanab’ankileb’ chi wotzok

Re xtenq’ankileb’ li komon chixyeeb’al li na’leb’ xe’xtaw naq yookeb’ chi tzolok, naru taatz’iib’a li ajl 18, 19, ut 20 sa’ li pizarron re reetalinkil li raqal xe’ril sa’ Exodo chiru li xamaan. Patz’ reheb’ li komon naq te’xtz’iib’a chixk’atq li ajl a’an jarub’eb’ li raqal te’raj xch’olob’ankil sa’ komonil. Naq jun li komon yoo chixch’olob’ankil li raqal, patz’ reheb’ li komon ma xe’xtaw ajwi’ li na’leb’ a’an naq xe’tzolok chiru li xamaan.

reetalil li k’utuk

Xk’utb’al li tzolʼlebʼ

Exodo 18:13–26

Naru “taqatenq’a xk’amb’al” lix k’anjel li Qaawa’.

• Re xtenq’ankileb’ li komon chi aatinak chirix li na’leb’ li kixye laj Jetro re laj Moises (chi’ilmanq Exodo 18:13–26) naru taapatz’ reheb’ k’a’ru te’xye re li ani nareek’a naq “q’axal kaw” lix k’anjel sa’ li Iglees malaj sa’ junkab’al, ut naq anchal “taalub’q” chi junajwa (Exodo 18:18). Chan ru naq li na’leb’ sa’ Exodo 18:13–26 tixtenq’a li komon a’an? K’a’ chik ru taqaye re?

• Maare naq tex’aatinaq chirix Exodo 18:13–26 tex’ok ajwi’ chi aatinak chirix li k’anjelak jo’ aj ilol komon, ut teeye chan ru naq li k’anjel a’an naxtenq’aheb’ li jolominel sa’ li Iglees chixk’amb’al li iiq sa’ xk’anjel li Qaawa’ (Exodo 18:22). Chan raj ru xna’leb’eb’ li ani te’k’anjelaq jo’ aj jolominel sa’ li tenamit? (chi’ilmanq Exodo 18:21). K’a’ut naq aajel ru li na’leb’ a’an naq nokok’anjelak chiqib’il qib’ jo’ aj ilol komon? Chan ru naq li qak’anjel jo’ aj ilol komon naxtenq’aheb’ li jolominel sa’ li Iglees chixk’amb’al li riiq? Naq yookex chi aatinak, naru ajwi’ taak’ut jun reheb’ li video sa’ ministering.ChurchofJesusChrist.org.

  xk’eeb’al li uq’ej sa’ komonil

  Li k’anjel jo’ aj ilol komon nokoxtenq’a chi tz’aqonk sa’ xk’anjel li Qaawa’.

Exodo 20:2–11

Taqak’e li Kristo jo’ li jwal aajel ru sa’ qayu’am.

• B’ar wan jun li k’anjel li naraj naq taqab’aanu li k’a’ru jwal aajel ru sa’ xtiklajik? (Maare a’an xb’aanunkil li matematicas malaj xk’uub’ankil li wa). Ye reheb’ li komon wiib’ oxib’ li k’anjel taak’oxla laa’at, toja’ naq taakanab’eb’ chixk’oxlankil xkomon chik. Chan ru naq wan ajwi’ chi jo’kan sa’ li k’a’ru taqlanb’il sa Exodo 20:2–11? K’a’ru naxye lix taqlahom li Dios chirix xk’eeb’al li Dios jo’ li jwal aajel ru sa’ qayu’am? K’a’ru naqak’e sa’ qayu’am ruuchil li Dios? (Wankeb’ reetalil a’in sa’ “Xkomon chik li k’anjeleb’aal.”) Rilb’al Exodo 20:2–11 junpaataq naru tixtenq’aheb’ li komon re naq te’raj xk’eeb’al li Dios jo’ li jwal aajel ru sa’ xyu’am.

Exodo 20:2–17

Aj uxtaan li Dios.

• Chan ru taatenq’aheb’ li komon chixnawb’al naq aajel ru li lajeeb’ chi taqlahom sa’ qakutankil anajwan? Naru taach’utub’eb’ sa’ ka’kab’il re naq te’ril Exodo 20:2–17, toja’ naq te’xtz’il rix chan ru naq xpaab’ankil li taqlahom naxtenq’aheb’, lix junkab’al, ut li ras riitz’in. Naru ajwi’ taak’ut li video “La obediencia a los diez mandamientos” (ChurchofJesusChrist.org). K’a’ru naxyeechi’i li Dios reheb’ li neke’xpaab’ lix taqlahom? (chi’ilmanq Mosiah 2:41). Chan ru naq lix taqlahom li Dios naxk’ut lix xrahom choq’ qe?

additional resources icon

Xkomon chik li k’anjeleb’aal

Miwan jalan chik li dios.

Li Awa’b’ej Spencer W. Kimball kixch’olob’ naq xpaab’ankil li pak’b’il dios sa’ najter q’e kutan nareetali ajwi’ li k’a’ru nab’aanuman anajwan. Aʼan kixye:

“Li loq’onink pak’b’il dios, a’an jun li maak jwal nim. …

“Sa’ li kutankil anajwan, naru te’pak’manq li b’alaq’il dios jo’ chaab’il aq’ej, jo’ nimla ochoch, jo’ negocio, jo’ makina, jo’ automovil, jo’ chaab’il jukub’, ut naab’al chik li k’a’aq re ru li nokoxjalb’ehi re naq ink’a’ toowulaq jo’ wan li Dios. …

“Naru ajwi’ xpak’b’al li b’alaq’il dios sa’ li k’a’ru ink’a’ naru xche’b’al. Li titulo sa’ tzoleb’aal malaj sa’ trab’aaj naru taapak’manq jo’ b’alaq’il dios. …

“Wankeb’ li neke’xloq’ li rochoch ut lix b’eleb’aal ch’iich’ xb’een wa—toja’ naq anchal “maak’a’ xtumin” choq’ re li lajteqil. Ani yookeb’ chixloq’oninkil? Tz’aqal yaal naq maawa’ lix Dios li choxa ut li ch’och’. …

“Naab’aleb’ neke’xloq’oni li yohob’k, li karib’k, li vacacion, li wa’ak ut li b’eek sa’ xraqik li xamaan. Wankeb’ li neke’xloq’oni li deporte, a’an li bolotz’ uq’, li b’olotz’ oq’, xpleetinkil li wakax, malaj li golf.

“Ut wankeb’ ajwi’ xpak’b’il dios li winq sa’ li awa’b’ejil ut sa’ li b’ihomal. Eb’ li pakb’il dios re li awa’b’ejil, re li b’ihomal, ut re li wankilal, a’aneb’ kawil aj taqlanel sa’ qab’een, ut wankeb’ jo’ chanchan ajwi’ li wakax oor sa’ xyanqeb’ li ralal xk’ajol laj Israel.” (Enseñanzas de los Presidents de la Iglesia: Spencer W. Kimball [2006], 162–163).

Xkawresinkil qib’ jo’ aj k’utunel

Ch’olob’ yal wiib’ oxib’ li na’leb’. “Naab’al wan chixyeeb’al sa’ li junjunq tzolok, a’b’an moko na’ajman ta ru naq taak’utmanq chixjunil sa’ jun tzolok re xtoch’b’al xch’ool junaq—chi kok’ aj xsa’ tz’aqal jun malaj wiib’ na’leb’ ” (Li k’utuk jo’ li Kolonel, 7).