li Jehova naxk’ut rib’ chiru laj Moises ut eb’ li xb’eenil aj Israel

Xjalam-uuch li Jehova naq naxk’ut rib’ chiru laj Moises ut 70 chi xb’eenil aj Israel, xb’aan laj Jerry Harston

25 abril–1 mayo

Exodo 24; 31–34

“Laa’in tin’ochb’eeninq aawe”

Kanab’ naq li aatin a’in kixye li Elder Jeffrey R. Holland tatxb’eresi sa’ xkawresinkil li tzolok: “Lix k’ihaleb’ li kristiaan moko neke’chal ta sa’ iglees re xtzolb’al jun ak’ na’leb’ chirix li evangelio. … Neke’chal b’an re reek’ankil li Musiq’ej. … Neke’raj naq ak’ob’resinb’ilaq xpaab’aaleb’ ut xyo’onihomeb’ ” (“Venido de Dios como maestro,” Liahona, julio 1998, 27).

Tz’iib’a li nakak’oxla

reetalil li wotzok

Xkanab’ankileb’ chi wotzok

Eb’ li komon naru te’xk’oxla naq jun ramiiw naxye reheb’, “Ink’a’ nawil ru li Najter Chaq’rab’; chanchan naq maak’a’ aj-e li raatinul sa’ lin yu’am.” Ye reheb’ naq re xsumenkil, te’xwotz jun chaab’il na’leb’ xe’xtaw naq xe’ril li Najter Chaq’rab’.

reetalil li k’utuk

Xk’utb’al li tzolʼlebʼ

Exodo 31:12–17

Naqoxloq’i li hilob’aal kutan jo’ reetalil li qapaab’ahom chiru li Qaawa’.

• Re xtikib’ankil, naru taapatz’ reheb’ li komon ma x’ajman jun sutaq naq te’xch’olob’ chiru xjunkab’al malaj ramiiw k’a’ut naq jalan li kutan domingo choq’ reheb’. Patz’ reheb’ naq te’xwotz k’a’ru xe’xye malaj k’a’ raj ru te’xye. Naru te’xtaw xna’leb’ sa’ Exodo 31:12–17 malaj sa’ “Xkomon chik li k’anjeleb’aal.” Chan ru naq li naqasik’ ru xb’aanunkil sa’ li hilob’aal kutan naxk’ut li qapaab’ahom chiru li Jesukristo?

• Us ta li tojb’a-maak li ch’olob’anb’il sa’ Exodo 31:14–15 ink’a’ nak’eeman anajwan, a’an naxk’ut naq jwal nim xwankil li hilob’aal kutan sa’ rilob’aal li Qaawa’. K’a’ut naq aajel ru li taqlahom a’in? Eb’ li raqal a’in naru texxtenq’a: Exodo 31:12–17; Isaias 58:13–14; Tzol’leb’ ut Sumwank 59:9–13.

  eb’ li kristiaan chirix li iglees

  Naq naqoxloq’i li hilob’aal kutan, naqak’ut li qarahom choq’ re li Qaawa’.

Exodo 32; 34:1–17

Li maakob’k, a’an li najtob’resink-ib’ chiru li Dios, a’b’an a’an naxyeechi’i jun b’e re truuq tooq’ajq rik’in.

• Re xtenq’ankileb’ li komon chixtz’ilb’al rix li seraq’ sa’ Exodo 32, patz’ reheb’ naq te’ril li ch’ol sa’ junesal malaj sa’ kok’ ch’uut. Chirix a’an, patz’ re wiib’ oxib’ li komon naq te’xk’oxla naq a’aneb’ laj Israelita li ke’titz’ naq laj Moises wan chi tzuul ut ke’xyiib’ jun pak’b’il dios oor. K’a’ru maare kireek’asiheb’ xch’ool chixloq’oninkil jun pak’b’il dios? Lix komoneb’ sa’ li tzoleb’aal naru te’xyal xq’unob’resinkileb’ xch’ool chi kanaak rik’in li Qaawa’ ut lix profeet. Eb’ li komon naru te’xye k’a’ru natenq’ank reheb’ chixpaab’ankileb’ lix sumwank. K’a’ru taqab’aanu re xtenq’ankileb’ li kristiaan li nach’a’ajko’ chiruheb’ xpaab’ankileb’ lix sumwank?

• Naq eb’ li kristiaan neke’ril ru li Najter Chaq’rab’, wan naq nasach xch’ooleb’ naq jwal kaw li tojb’a-maak kixk’e li Qaawa’ naq ke’maakob’k li tenamit. Exodo 34:1–9 naru tixtenq’aheb’ chixk’eeb’al reetal naq us ta li Dios ink’a’ naxk’ulub’a li maak, a’an ajwi’ aj uxtaan, ut naxkuy xmaakeb’ li ani neke’xjal xk’a’uxl. Eb’ li komon naru te’ril li raqal a’in ut te’xk’oxlaheb’ li patz’om a’in: K’a’ru naqatzol chirix li Qaawa’ sa’eb’ li raqal a’in? K’a’ut naq aajel ru xnawb’aleb’ li na’leb’ a’in chirix a’an? Naru taaye naq li Exodo 34:7, jo’ jaltesinb’il ru xb’aan laj Jose Smith, naxye naq li Dios ink’a’ “taarisi xmaakeb’ laj po’resinel ch’oolej.” K’a’ru naraj naxye a’in? Maare eb’ li komon naru te’xwotz chan ru rilomeb’ li ruxtaan li Dios. Chan ru naq tz’aqal aj uxtaan li Dios, a’ut tz’aqal tiik ajwi’ ru? (chi’ilmanq Alma 42:13–15).

• Kik’eeman li na’leb’ sa’ Exodo 34:6–17 re xtenq’ankileb’ laj Israelita chixjalb’aleb’ xk’a’uxl chirix xloq’oninkileb’ li pak’b’il dios (li yeeb’il resil sa’ Exodo 32). K’a’ru naqataw sa’eb’ li raqal a’in li maare kixtenq’aheb’ laj Israelita chixjalb’aleb’ xk’a’uxl? K’a’ru naqatzol chirix li Qaawa’ ut chirix li jalb’a-k’a’uxlej sa’ li na’leb’ a’in?

Exodo 33:11–17

Aajel ru naq wanq li Dios sa’ li qayu’am.

• Chan ru taatenq’aheb’ li komon chixyu’aminkil li kixye li Qaawa’ re laj Moises sa’ Exodo 33:11–17? Re xb’aanunkil, naru taatz’il rix li k’anjel kiraj li Dios naq toj tixb’aanu laj Moises (chi’ilmanq Exodo 33:1–3). K’a’ru naqataw sa’eb’ li raqal 11–17 li maare kixkawob’resi ut kixk’ojob’ xch’ool laj Moises? Eb’ li komon naru te’xk’oxla junaq na’leb’ li naraj li Dios naq te’xb’aanu—maare xb’aanunkileb’ li b’oqb’il k’anjel sa’ li Iglees, xtenq’ankileb’ lix junkab’al, malaj rilb’aleb’ li ras riitz’in. Toja’ naq te’rileb’ ru li raqal wi’chik. Chan ru naq li Dios tooxtenq’a?

reetalil xkomon chik li k’anjeleb’aal

Xkomon chik li k’anjeleb’aal

Li hilob’aal kutan, a’an jun eetalil.

Li Awa’b’ej Russell M. Nelson kixye: “Naq saajin chaq, xink’e reetaleb’ li komon li xe’xtz’iib’a chi tzoltzol li k’a’ru us xb’aanunkil ut li k’a’ru ink’a’ us xb’aanunkil sa’ li hilob’aal kutan. Toj moqon xintaw ru naq sa’eb’ li loq’laj hu, lin b’aanuhom ut lin ch’ool sa’ li hilob’aal kutan wan choq’ jun eetalil wik’in laa’in ut rik’in lin Choxahil Yuwa’ [chi’ilmanq Exodo 31:13; Esekiel 20:12, 20]. Rik’in xtawb’al ru a’in, ink’a’ chik na’ajman xtz’iib’ankil chi tzoltzol li us ut ink’a’ us xb’aanunkil. Naq nink’oxla mas us xb’aanunkil k’a’ruhaq sa’ li hilob’aal kutan, ninpatz’ wib’, “K’a’ru li eetalil li nawaj xk’eeb’al re li Dios?” Rik’in a’an, saqen chik ru li k’a’ru us tinb’aanu sa’ li hilob’aal kutan” (“Li hilob’aal a’an sahil kutan,” Jolomil ch’utub’aj-ib’ re abril 2015).

Xkawresinkil qib’ jo’ aj k’utunel

Tatkʼutuq rikʼin li Musiqʼej. “Li taqenaqil rajb’al chixjunil naxb’aanu jun aj k’utunel re li evangelio—rajlal patz’om, rajlal raqal sa’eb’ li loq’laj hu, rajlal k’anjel—a’an re xb’oqb’al li Musiq’ej re nimob’resink paab’aal ut re xb’oqb’aleb’ chixjunil chi chalk rik’in li Kristo” (Li kʼutuk joʼ li Kolonel, 10).