ru taq’a sa’ li yamyookil ch’och’

9–15 mayo

Numeros 11–14; 20–24

Meepo’resi eech’ool chiru li Qaawa’, chi moko chexxuwaq

Jun na’leb’ re xkanab’ankil qib’ chi ab’ink sa’ xhoonalil li tzolok a’an xpatz’b’aleb’ re li komon k’a’ru xwulak chiruheb’ naq xe’xtzol li loq’laj hu. A’an naxk’ut li nim xwankil chiruheb’ ut li kawresinb’ileb’ chixtzolb’al.

Tz’iib’a li nakak’oxla

reetalil li wotzok

Xkanab’ankileb’ chi wotzok

Wan naq, re xtenq’ankileb li komon re te’xwotz li xe’xtzol, tento xk’eeb’aleb’ xpatz’om, maare “K’a’ru xk’ut cheru li Santil Musiq’ej naq yookex chirilb’al li loq’laj hu chiru li xamaan a’in?” Chirix aʼan, kanabʼebʼ chi kʼoxlak ut chi sumenk.

reetalil li k’utuk

Xk’utb’al li tzolʼlebʼ

Numeros 12

Li xwech’b’al rix lix profeet li Qaawa’ naxrahob’tesi xch’ool li Qaawa’ .

• Numeros 12 naru naxtenq’aheb’ li komon chixtawb’al ru naq nimla maak xwech’b’al rix lix profeet li Qaawa’. Naru taapatz’ reheb’ li komon naq te’ril li ch’ol ut te’aatinaq chirix k’a’ru nareek’a li Qaawa’ chirixeb’ lix moos. Jo’ naxye sa’eb’ li raqal 1–2, k’a’ru naraj naxye xwech’b’al rix lix profeet li Qaawa’? K’a’ru li ch’a’ajkilal nak’ulman wi nab’aanuman? K’a’ru naru taqatzol chirix lix b’aanuhom laj Moises ut eb’ laj Israelita sa’eb’ li raqal 13 ut 15?

Numeros 12:3

“Laj Moises a’an jun li winq tuulan.”

• Maare wan kristiaan neke’sach xch’ool naq neke’ril naq junaq aj k’amol b’e nim xwankil jo’ laj Moises, li kixxaqab’ rib’ chiru laj Farahon ut kixb’aanu xninqal ru sachb’a-ch’oolej rik’in lix wankilal li Qaawa’, a’an ajwi’ jwal “tuulan xch’ool.” Naru nekeril Numeros 12:3 re xtikib’ankil rilb’al k’a’ru tz’aqal li tuulanil. Naru nakawil lix ch’olob’ankil sa’ “Tuulan, tuulanil” sa’ li K’utul Raqal reheb’ li Loq’laj Hu. Sa’ komonil, naru teesik’ k’a’ru naxk’ut xyaalal lix tuulanil laj Moises sa’ Numeros 12.

• K’a’ chik ru reetalil lix tuulanil laj Moises naru naqatzol? (chi’ilmanq, Exodo 18:13–25; Numeros 11:26–29; Hebreos 11:24–27; Moises 1:10–11). Naru ajwi’ teeril ut tex’aatinaq chirix li tuulanil kixk’ut li Kolonel (chi’ilmanq Mateo 11:29; 27:11–14; Lukas 22:41–42; Jwan 13:4–5). K’a’ru naxk’ut chiqu li reetalil xb’aanuhom laj Moises ut li Kolonel—malaj jalan chik kristiaan naqanaweb’ ru—chirix li tuulanil? K’a’ut naq li Dios naraj naq tuulanaq qach’ool?

Numeros 13–14

Rik’in li qapaab’aal chirix li Qaawa’, naru nawan qoyb’enihom sa’ li chalel.

• Naq neketz’il rix li seraq’ chirix li kab’laju chi aj Israelita li ke’taqlaak chixnawb’al li yeechi’inb’il ch’och’ ut ke’xk’e li reetalil li rilomeb’, patz’ reheb’ li komon chan ru naq li esil a’in naru tixtenq’aheb’ rik’in li ch’a’ajkilal neke’xnumsi. Re xtenq’ankileb’, naru taapatz’ reheb’ naq te’xyaab’asi li na’leb’ sa’ Numeros 13:23–33 li naru neke’xjuntaq’eeta rik’in li qayu’am. Li yeechi’inb’il ch’och’ naru naxk’utb’esi li k’a’ru naraj li Qaawa’ naq taqab’aanu, li chiil li uva naru naxk’utb’esi li qosob’tesinkil, li xninqal roq winq naru naxk’utb’esi li xninqal ru yale’k naqanumsi, ut wan xkomon chik. Tenq’aheb’ li komon chixwotzb’al li neke’xk’oxla naq li Qaawa’ naraj naq te’xtzol rik’in li seraq’ a’in.

  eb’ li winq neke’xk’ut li ru che’ chiru laj Moises

  Lajeeb’ reheb’ aj Israelita ke’xuwak; Laj Josue ut laj Kaleb ke’wan xpaab’aal. © Lifeway Collection/licensed from goodsalt.com

Numeros 21:4–9

Wi noko’ilok wan wi’ li Jesukristo rik’in qapaab’aal, a’an naru tooxk’irtesi sa’ musiq’ej.

• Re xtenq’ankileb’ li komon chi aatinak chirix li seraq’ sa’ Numeros 21:4–9 ut chixnimankil xpaab’aaleb’ chirix li Kolonel, naru taatz’iib’aheb’ li patz’om a’in chiru li pizarron: K’a’ru nareetali li k’anti’ yiib’anb’il rik’in q’an ch’iich’?; K’a’ru nareetali xtiwomeb’ li k’anti’?; K’a’ut naq ke’wan kristiaan ink’a’ ke’ajok rilb’al li k’anti’?; Chan ru nokoruhan “chirilb’al” sa’ li kutankil a’in? Eb’ li komon naru te’xwotz lix sumenkil neke’xtaw naq yooqeb’ chirilb’al Numeros 21:4–9; 1 Nefi 17:40–41; Alma 33:18–22; ut Helaman 8:13–15. B’ar wan junqaq reheb’ li kok’ k’a’aq re ru li nokoxb’oq wi’ li Kolonel chixb’aanunkil re took’irtesiiq xb’aan? K’a’ut naq wan naq ch’a’aj xb’aanunkil li kok’ k’a’aq re ru a’in? (chi’ilmanq “Xkomon chik li k’anjeleb’aal” re xtawb’al xkomon chik li na’leb’ chirix a’in). Maare li komon naru te’xwotz chan ru naq xb’aanunkil li k’a’aq re ru a’in naxk’am chaq xwankil li Kolonel sa’ xyu’ameb’.

reetalil xkomon chik li k’anjeleb’aal

Xkomon chik li k’anjeleb’aal

“Li k’a’ru ka’ch’in ut moko nimob’resinb’il ta.”

Li Elder L. Whitney Clayton ki’aatinak chirix jun obiisp li naxk’eheb’ xna’leb’ li komon li neke’xnumsi naab’al li ch’a’ajkilal sa’ xyu’ameb’:

“Lix na’leb’ choq’ reheb’ li komon re li teep, a’an xb’aanunkil wi’chik li k’a’ru ink’a’ ch’a’aj re li paab’aal jo’ xtzolb’al lix Hu laj Mormon rajlal kutan, … xtojb’al li lajetqil, ut k’anjelak sa’ li Iglees chi k’eek’o qach’ool. A’ut, li sumenkil neke’xk’e chi kok’ aj xsa’, a’an jun jun re li kab’ rix ch’oolej: “… K’a’ru rilom li xb’aanunkil a’ yaal b’ar wan re li k’a’aq re ru a’in rik’in li ch’a’ajkilal li yookin chixnumsinkil?”

“… Li ani neke’b’aanunk re li “k’a’ru ka’ch’in ut moko nimob’resinb’il ta” [Alma 37:6]—ab’ink chiru li k’a’ru chanchan naq b’ab’ay—osob’tesinb’ileb’ rik’in paab’aal ut kawilal li naxq’ax ru li b’aanuhom re paab’ank ut, chi yaal, naq chanchan ta wi’ naq maak’a’ rilomeb’ chirib’il rib’ ” (“B’aanuhomaq li k’a’ru tixye eere,” Jolomil ch’utub’aj-ib’ re abril 2017).

Xkawresinkil qib’ jo’ aj k’utunel

Wotz li jwal aajel ru. Moko naru ta taawotz li junjunq chi seraq’ chi moko raqal. Taaqe li Santil Musiq’ej, ut k’e reetal li neke’raj ru li komon naq yookat chixkawresinkil li tzolok. Chijultiko’q aawe naq li junkab’al, maawa’ li tzoleb’aal, tento raj naq taawanq choq’ xch’oolil li tzolok chirix li evangelio.