laj Moises xaqxo sa’ li tzuul

Xjalam-uuch laj Moises sa’ li Tzuul Nebo, © Providence Collection/licensed from goodsalt.com

16–22 mayo

Deuteronomio 6–8; 15; 18; 29–30; 34

Chak’e reetal maare anchal taasachq sa’ laa ch’ool li Qaawa’

Laj Moises kireek’a naq tento tixtzoleb’ li ralal xk’ajol laj Israel a’ yaal k’a’ru li neke’raj ru (chi’ilmanq Deuteronomio 6:1). Naq taatzol li hu Deuteronomio, sik’ aamusiq’ankil re naq taanaw k’a’ru li na’leb’ taak’ut, a’ yaal k’a’ru li neke’raj ru li komon.

Tz’iib’a li nakak’oxla

reetalil li wotzok

Xkanab’ankileb’ chi wotzok

Xb’aan naq sa’ li hu Deuteronomio wankeb’ lix ch’otojik li aatin kixye laj Moises reheb’ li ralal xk’ajol laj Israel, naru nakapatz’ reheb’ li komon naq te’xwotz junaq na’leb’ xe’xtaw sa’ li hu Deuteronomio li taawulaq raj chiruheb’ xwotzb’al reheb’ lix kok’al malaj eb’ li rimam sa’ xraqik chixjunil. Naq yooqeb’ chixwotzb’al a’an, patz’ reheb’ naq te’xch’olob’ k’a’ut naq xe’xsik’ ruheb’ li aatin a’an.

reetalil li k’utuk

Xk’utb’al li tzolʼlebʼ

Deuteronomio 6:4–7, 20–25; 8:2–5, 11–17; 29:18–20; 30:6–10, 15–20

Li Qaawa’ naraj naq taqara chi anchal qach’ool.

• Sa’ chixjunil Deuteronomio wankeb’ li raqal li naru nokohe’xtiikisi chixk’oxlankil chan ru wan li qaam sa’ musiq’ej. Re xtenq’ankileb’ li komon chixwotzb’al li neke’xk’oxla chirixeb’ li raqal a’in, naru nakayiib’ junaq aamej chiru li pizarron. Chirix a’an jek’iheb’ li raqal a’in reheb’ li komon: Deuteronomio 6:4–7, 20–25; 8:2–5, 11–17; 29:18–20; 30:6–10, 15–20. Patz’ reheb’ li komon naq te’xtz’iib’a rajlil li raqal sa’ li aamej wi na’aatinak chirix junaq na’leb’ li tento raj taawanq sa’ li qaam malaj te’xtz’iib’a rajlil li raqal chirix li aamej wi na’aatinak chirix junaq na’leb’ li ink’a’ us choq’ qe. K’a’ru naraj naxye xk’eeb’al x’anchalil li qach’ool re li qaChoxahil Yuwa’?

• Chan ru taqach’olob’ chiru li qajunkab’al malaj eb’ li qas qiitz’in k’a’ut naq naqapaab’ lix taqlahom li Dios? Chirix naq te’xtz’il rix li patz’om a’in, eb’ li komon naru neke’ril Deuteronomio 6:4–7, 20–25 malaj li aatin wan sa’ “Xkomon chik li k’anjeleb’aal” ut te’xwotz xk’a’uxleb’. Chan ru naq eb’ li na’leb’ a’in neke’xjal li qana’leb’ chirixeb’ li taqlahom ut eb’ li sumwank?

Deuteronomio 6:4–9, 20–25

“Chi yalb’il aaq’e, k’uteb’ [li raatin li Qaawa’] chiruheb’ laa walal aak’ajol.”

• Wan naq chaab’il rab’inkil chan ru naq eb’ li kristiaan yookeb’ chixtzolb’al li evangelio sa’ rochocheb’. Xtz’ilb’al rix chan ru naq eb’ li komon yookeb’ chixb’aanunkil li naxye sa’ Deuteronomio 6:4–9, 20–25 naru natenq’an re naq eb’ li komon te’tzoloq chirib’ileb’ rib’. K’a’ru naqab’aanu re xk’utb’al ut “xwotzb’al” (raqal 7) li raatin li Dios jo’ neke’xye li raqal a’in? Ma wan seraq’ naru naqawotz b’ar wi’ li Qaawa’ xooxb’eresi sa’ lix yalb’al qaq’e?

Deuteronomio 15:1–15

Re xtenq’ankileb’ li wankeb’ rajom ru, aajel ru li uq’ej aj k’anjel ut li aamej wankeb’ rajom.

• Toj maji’ nawulak li kutan b’ar wi’ “maajunaq neb’a’ sa’ eeyanq” (Deuteronomio 15:4), jo’kan naq li na’leb’ re xtenq’ankileb’ li neb’a’ wan sa’ Deuteronomio 15 toj aajel ru, us ta li na’leb’ chirix li k’asok ut li moosil ak xjala. Naru nakapatz’ reheb’ li komon naq te’ril wi’chik li raqal 1–15 ut te’xtaweb’ li na’leb’ chirix xtenq’ankileb’ li neb’a’ ut li wankeb’ rajom ru li te’raj xtz’ilb’al rix. Eb’ li patz’om jo’ a’in naru neke’tenq’an sa’ li aatinak: K’a’ru naraj naxye “taaye’ laa wuq’ ” reheb’ li wankeb’ rajom ru? (eb’ li raqal 8, 11). K’a’ru xk’anjel li qaam sa’ xtenq’ankileb’ li qas qiitz’in? (che’ilmanq li raqal 7, 9–10). K’a’ru naqatzol chirix lix k’utum li Qaawa’ chirix xtenq’ankileb’ li wankeb’ rajom ru? (chi’ilmanq raqal 15).

Deuteronomio 29:9; 30:15–20

Li Qaawa’ nokoxb’oq chixsik’b’al ru “li yu’am ut li usilal, malaj li kamk ut li maa’usilal.”

• Us raj xjuntaq’eetankil li raatin laj Moises li wan sa’ Deuteronomio rik’in junjunqeb’ lix k’utum laj Lehi re lix junkab’al sa’ 2 Nefi 1–4. Eb’ li komon maare te’ruuq chixtawb’al xjuntaq’eetileb’ ut xjalanileb’ sa’eb’ li raqal a’in: Deuteronomio 29:9 ut 2 Nefi 4:4; Deuteronomio 30:15–20 ut 2 Nefi 2:26–29. Chan ru naq laj Lehi kixkutanob’resi ru li kixk’ut laj Moises? K’a’ut naq li aatin yu’am ut kamk chaab’ileb’ re xch’olob’ankil naq naqasik’ ru “xpaab’ankil” malaj “risinkil qib’ ” chiruheb’ lix taqlahom li Dios? (Deuteronomio 30:16–17). Eb’ li komon naru neke’xwotz li neke’xtaw sa’eb’ li raqal a’in li naxtoch’ xch’ooleb’ “chixsik’b’al ru li yu’am” (Deuteronomio 30:19).

reetalil xkomon chik li k’anjeleb’aal

Xkomon chik li k’anjeleb’aal

Neke’qapaab’ li qasumwank xb’aan naq naqara li Dios.

Li Awa’b’ej Linda K. Burton kixk’ut:

“Sa’ chixjunileb’ li na’leb’ li tento taqak’e wi’ qach’ool chixpaab’ankileb’ li qasumwank, a’in li jwal nim xwankil chiruheb’ chixjunil chik—li rahok. …

“Wi naqara chi tz’aqal li osob’tesink neke’qak’ul rik’in li k’anjel naqab’aanu, maak’a’ naru naramok re naq taqab’aanu li k’a’ru naxpatz’ qe li Qaawa’ chi sa ut chi wan rajom li qach’ool” [Joseph Fielding Smith, “Importance of the Sacrament Meeting,” Relief Society Magazine, octubre 1943, 592]. Jo’ naxye li Awa’b’ej Joseph Fielding Smith, naq neke’qapaab’ li sumwank naqak’ut li qarahom choq’ re lix tojb’al rix li maak li maak’a’ roso’jik ut li ink’a’ natawman ru li kixb’aanu laj Kolol qe ut laj Tojol qix, ut lix rahom li qaChoxahil Yuwa’ li tz’aqal re ru” (“El poder, gozo y amor que provienen de guardar convenios,” Liahona, noviembre 2013, 114).

Xkawresinkil qib’ jo’ aj k’utunel

Abʼin. “Li abʼink naxk’utb’esi li rahok. … Patzʼ re li qaChoxahil Yuwaʼ naq tatxtenqʼa chixtawbʼal ru li kʼaʼru nekeʼxye li komon saʼ li tzolebʼaal. Naq nakak’e reetaleb’ chi us, us ta ink’a’ neke’aatinak, naru taanaw k’a’ru na’ajman choq’ reheb’ ” (Li kʼutuk joʼ li Kolonel, 34).