santil ochoch re São Paulo Brasil

2–8 mayo

Exodo 35–40; Levitico 1; 16; 19

“Santilal re li Qaawa’ ”

Naq yooqat chixtawb’al aana’leb’ sa’ xtzolb’aleb’ li loq’laj hu, tatruuq chi k’utuk ut chixwotzb’al xnawom aach’ool naq taawanq li tzolok sa’ domingo. K’a’ru taab’aanu re xtenq’ankileb’ li komon chixb’aanunkil ajwi’ chi jo’kan?

Tz’iib’a li nakak’oxla

reetalil li wotzok

Xkanab’ankileb’ chi wotzok

Sa’eb’ li ch’ol re li xamaan a’in wankeb’ li eeetalil li neke’k’utuk chirix li Jesukristo ut lix tojb’al rix li maak xb’aan a’an. Naru nakatikib’ k’utuk rik’in xb’oqb’aleb’ li komon chixtz’iib’ankil malaj chixyiib’ankil chiru li pizarron xjalam-uuch junaq na’leb’ chirix li Kolonel li xe’xtaw sa’ Exodo 35–40 malaj Levitico 1; 16; 19. Patz’ reheb’ naq te’xwotz k’a’ru xe’xtzol.

reetalil li k’utuk

Xk’utb’al li tzolʼlebʼ

Exodo 35–40

Li Qaawa’ naraj naq santaqo jo’ a’an.

• Naq eb’ li komon yookeb’ chixtzolb’al Exodo 35–40 chiru li xamaan a’in, maare xe’xk’oxla chan ru naq li loq’laj muheb’aal naxk’ameb’ xk’a’uxl chirix li Jesukristo. Wi xe’xb’aanu a’an, patz’ reheb’ naq te’xwotz k’a’ru xe’xk’oxla. Li tusleb’aal na’leb’ sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al naru tixtenq’aheb’. Naru ajwi’ nakat-aatinak chirix li na’leb’ neke’xk’ut li eetalil re li loq’laj muheb’aal li neke’k’utuk li wank chi sant wi’chik. Chan ru nokoxtenq’a li Jesukristo chi wank chi sant?

• Naab’aleb’ neke’k’oxlank re naq ch’a’aj li wank chi sant. Chan ru taatenq’aheb’ li komon chixtawb’al ru naq li wank chi sant a’an xcha’al lix k’uub’anb’il na’leb’ li qaChoxahil Yuwa’? Naru nekeril sa’ komonil li raatin li Awa’b’ej Henry B. Eyring sa’ “Xkomon chik li k’anjeleb’aal.” K’a’ru naraj naxye li wank chi sant? Chan ru naq eb’ li santil ochoch re li kutan a’in ut li k’anjel neke’qab’aanu aran nokohe’xtenq’a chi wank chi sant wi’chik? (chi’ilmanq ajwi’ Tzol’leb’ ut Sumwank 84:19–24; 109:6–26; 128:15–18). Chirix a’an maare taapatz’ reheb’ li komon naq te’xwotz chan ru naq neke’tenq’aak a’an ut eb’ li ras riitz’in xb’aaneb’ li k’a’aq re ru a’in chi wank chi sant wi’chik.

• Li loq’laj muheb’aal reheb’ laj Israelita sa’ li yamyookil ch’och’ chanchaneb’ ajwi’ li santil ochoch re li qakutankil. Naru nakapatz’ reheb’ li komon naq te’xtz’iib’a li k’a’aq re ru xe’xtzol chirix li loq’laj muheb’aal sa’ Exodo 35–40 li naxjultika reheb’ li k’a’ru nab’aanuman sa’ li santil ochoch. Wi neke’raj xtenq’, naru nakaye reheb’ b’ar wankeb’ li raqal sa’ Exodo 40 li neke’aatinak chirix li tz’apleb’ t’ikr, li artal, li loq’laj tiqib’aal, li ch’ajok, ut li yuluk. Chan ru naq li santil ochoch nokoxtenq’a chi chalk rik’in li Kristo? K’a’ru taqab’aanu re naq jayalanb’ilaqo rik’in a’an sa’ li santil ochoch?

Levitico 1:1–9; 16

Rik’in lix tojb’al rix li maak xb’aan li Jesukristo, naru nakuye’ qamaak.

• Maare jalan b’ayaq li mayejank xul choq’ qe sa’eb’ li kutankil a’in, a’b’an naab’al li na’leb’ naru naqatzol rik’in a’an chirix lix tojb’al rix li maak xb’aan li Jesukristo. Re xtikib’ankil aatinak, naru nakak’ut xjalam-uuch li Kolonel sa’ Getsemani ut chiru li Krus (chi’ilmanq Hu reheb’ li Jalam-uuch re li Evangelio, 56, 57). Eb’ li komon naru neke’xwotz li neke’reek’a chirix lix tojb’al rix li maak xb’aan li Jesukristo. Chirix a’an, patz’ reheb’ li komon naq te’ril wi’chik Levitico 1:1–9 malaj Levitico 16, li neke’aatinak chirix xmayejankileb’ li xul, ut te’xtaweb’ li aatin li te’reek’a naq neke’aatinak ajwi’ chirix lix mayej li Kolonel. Chan ru naq eb’ li najter mayej a’in nokohe’xtenq’a chixtawb’al ru chi us lix tojb’al rix li maak xb’aan li Jesukristo? Eb’ li komon naru neke’xb’icha jun li b’ich chirix li Kolonel ut te’xwotz li neke’reek’a chirix a’an.

  najter kristiaan neke’xk’am chaq li mayej re xyiib’ankil li loq’laj muheb’aal

  Eb’ li ralal xk’ajol laj Israel ke’mayejak choq’ re li loq’laj muheb’aal “chi alanb’il sa’ xch’ooleb’ ” (Exodo 35:5). Jalam-uuch xb’aan laj Corbert Gauthier, © Lifeway Collection/licensed from goodsalt.com

• Maare us raj choq’ reheb’ li komon xjuntaq’eetankileb’ li mayej kixpatz’ li Qaawa’ reheb’ li kristiaan sa’ li Najter Chaq’rab’ rik’ineb’ li naxpatz’ qe anajwan. Naru neke’xtz’iib’a chan ru naq nokomayejak chiru li Qaawa’ ut sa’ lix k’anjel, jo’ li k’anjelak sa’ junaq b’oqb’il k’anjel, xtojb’al li mayej re kuyuk sa’, k’anjelak sa’ resilal li junkab’al, malaj rilb’al qib’ chiqib’il qib’. Chirix a’an naru neke’ril sa’ komonil Levitico 1:1–9 ut taab’oqeb’ li komon chixsik’b’al kok’ na’leb’ chirixeb’ li mayej neke’ch’olob’aman sa’eb’ li raqal a’an li maare juntaq’eet b’ayaq rik’ineb’ li mayej naxpatz’ qe li Qaawa’ sa’eb’ li kutankil a’in (chi’ilmanq 3 Nefi 9:19–20; Tzol’leb’ ut Sumwank 64:34). K’a’ru naqatzol sa’ Moises 5:7 chirix naq taqak’e reetal naq yooko chi mayejak sa’ lix k’anjel li Qaawa’?

reetalil xkomon chik li k’anjeleb’aal

Xkomon chik li k’anjeleb’aal

Li Dios naru nokoxsantob’resi.

Li Awa’b’ej Henry B. Eyring kixye:

“Xnimal li sahil ch’oolejil nachal rik’in xnimal li santilal sa’ junesal. … Eb’ li loq’laj hu neke’xk’ut chiqu naq sa’ xyanq junjunq chik na’leb’, naru toosantob’resiiq malaj naru taanimanq li qasantilal naq naqak’anjela li qapaab’aal chirix li Kristo, naq naqak’ut li rajom qach’ool chi ab’ink, naq naqajal qak’a’uxl, naq nokomayejak choq’ re a’an, naq naqak’uleb’ santil k’ojob’anb’il k’anjel, ut naq naqapaab’eb’ li qasumwank rik’in a’an. …

“Li b’ich “K’e insantilal” [Eb’ li B’ich, 74] naxye chan ru naru tootijoq re xk’ulb’al qatenq’ chixk’ulb’al xkomon li qasantilal. Laj tz’iib’ahom re naxye naq li santilal naqasik’ a’an jun maatan k’eeb’il xb’aan jun li Dios aj rahonel, k’eeb’il chiru xnumik li kutan, chirix chixjunil li naru naqab’aanu” (“Li santilal ut li k’uub’anb’il na’leb’ re sahil ch’oolejil,” Jolomil ch’utub’aj-ib’ re octubre 2019).

Xkawresinkil qib’ jo’ aj k’utunel

Oksi li b’ich namusiq’an. Li raatinuleb’ li b’ich naru neke’xk’e xtz’aqob’ li tzol’leb’ wankeb’ sa’eb’ li loq’laj hu. Qayehaq, xb’ichankil junaq li b’ich jo’ “K’e insantilal” malaj “Sachso ninkana” (Eb’ li B’ich, 74, 118) naru naxk’e xtz’aqob’ junjunq li na’leb’ neke’k’utman sa’ Levitico 16 ut 19.