laj Moises naxk’ojob’ laj Josue

Xjalam-uuch laj Moises naq naxk’ojob’ laj Josue, xb’aan laj Darrell Thomas

23–29 mayo

Josue 1–8; 23–24

“Yal aaq’e ut kawaq aach’ool”

Naq taawil Josue 1–8 ut 23–24, k’oxla li na’leb’ a’in: “Chak’oxla rix chi q’eq ut chi kutan” (Josue 1:8). K’e reetal li na’leb’ neke’chal sa’ laa k’a’uxl. Naru neke’xk’am aab’e chixk’utb’aleb’ li na’leb’ sa’ li tzolok.

Tz’iib’a li nakak’oxla

reetalil li wotzok

Xkanab’ankileb’ chi wotzok

Patz’ reheb’ li komon naq te’xwotz junaq na’leb’ xe’xtaw naq xe’tzolok chiru li xamaan a’in li xnimob’resi lix paab’aaleb’ chirix li Jesukristo. Maare xe’xk’oxla naq lix k’anjel laj Josue chanchan b’ayaq ajwi’ lix k’anjel li Jesukristo. K’a’ut naq neke’qab’antioxi li seraq’ sa’ lix hu laj Josue?

reetalil li k’utuk

Xk’utb’al li tzolʼlebʼ

Josue 1:1–9

“Yal aaq’e ut kawaq aach’ool.”

• Kiyeeman k’iila sut re laj Josue, “Yal aaq’e ut kawaq aach’ool” (chi’ilmanq Deuteronomio 31:7, 23; Josue 1:6–7, 9). Eb’ li komon maare te’raj aatinak chirix k’a’ru naraj xyeeb’al li Qaawa’ rik’in li ch’ol aatin a’an. Naru neke’xsik’ sa’ Josue 1:1–9 li na’leb’ kixk’e li Qaawa’ re laj Josue re xtenq’ankil chi wank chi kaw xch’ool. Naru ajwi’ neke’xwotz resileb’ kristiaan neke’xnaw ru li kaweb’ xch’ool. Chan ru naq laj Josue kixk’ut xkawil xch’ool sa’eb’ li seraq’ neke’tawman sa’ lix hu laj Josue? (che’ilmanq li ch’ol 3, 6, ut 8). Eb’ li komon naru neke’xwotz chan ru naq neke’xyal wank chi kaweb’ xch’ool choq’ re li Kristo.

Josue 1:8

Li raatin li Dios naru naxchaab’ilob’resi li qab’e.

• Re xwaklesinkileb’ xch’ool li komon chi tzolok xjuneseb’ ut jo’ junkab’al, naru nekeril Josue 1:8 sa’ komonil. K’a’ru naqatzol sa’ li raqal a’in chirix xtzolb’aleb’ li loq’laj hu? Eb’ li komon maare te’xwotz k’a’ru yookeb’ chixb’aanunkil re “xk’oxlankil rix” li loq’laj hu “chi q’eq ut chi kutan.” Chan ru naq li Qaawa’ “naxchaab’ilob’resi li qab’e” ut “nokoxk’e chi xik chi uub’ej” naq naqatzol li raatin?

  jun ixq naril li loq’laj hu

  Li raatin li Dios naru “naxk’e chi usaak li qab’e” (Josue 1:8).

Josue 3–4

Naru naqileb’ li k’a’ru “xchaq’al ru” re li Dios.

• Eb’ li komon maare te’raj rilb’al wi’chik li seraq’ chirixeb’ laj Israelita naq ke’xq’ax ru li nima’ Jordan. Naru nakak’eheb’ li komon sa’ ka’kab’il ut taapatz’ reheb’ naq te’xwotz li seraq’ chirib’ileb’ rib’, junjunq li ch’ol aatin te’xye (waklesi xch’ooleb’ chirilb’al sa’ Josue 3 wi neke’raj xjultikankil li seraq’). Chirix a’an, naru neke’aatinak chirix junaq na’leb’ xwulak chiruheb’. K’a’ru naqatzol sa’ li seraq’ a’in li naru nokoxtenq’a chirilb’aleb’ li k’a’ru “xchaq’al ru” re li Qaawa’ sa’ li qayu’am? (raqal 5). K’a’ru li k’a’aq re ru “xchaq’al ru” xb’aanuhom choq’ qe? K’a’ut naq aajel ru naq li junjunq chi tasal tenamit te’xk’ul xmusiq’ankileb’ li tixk’ut chiruheb’ naq “li Qaawa’ … nim xwankil”? (Josue 4:24).

• Us ta chiqajunil naqaj ru xk’ulb’al qamusiq’ejil re xwaklesinkil li qapaab’aal, aajel ajwi’ ru xjultikankil k’a’ru xb’aanuhom li Qaawa’ choq’ reheb’ li qaxe’ qatoon. Jo’ naxye sa’ Josue 4, k’a’ru ke’xb’aanu laj Israelita re xtenq’ankileb’ li ralal xk’ajol chixjultikankil lix q’axb’al ru li nima’ Jordan? (chi’ilmanq Josue 4:1–7). K’a’ru yooko chixb’aanunkil re naq chixjunil li naqanumsi ink’a’ taasachq sa’ xch’ooleb’ li qalal qak’ajol?

Josue 6–8

Li paab’ank naxk’am chaq lix wankil li Dios sa’ lin yu’am.

• Li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al naxk’ut naq maare us raj xjuntaq’eetankil lix yalb’aleb’ xq’e laj Israelita rik’ineb’ laj Kanahanita sa’ Josue 6–8 rik’in lix yalb’al qaq’e laa’o rik’in li aaleek. Naru taapatz’ reheb’ li komon k’a’ru xe’xk’oxla naq xe’ril ruheb’ li ch’ol a’in rik’in li juntaq’eetank sa’ xk’a’uxleb’. Malaj taak’e junjunq li raqal reheb’ li maare aajel ru re xtzolb’al chan ru elk chiru li maak, ut te’aatinaq chirix li neke’xk’ut li raqal a’an chirix xk’ulb’al lix wankil li Dios sa’ li qayu’am. Junjunq reheb’ li raqal a’an maare a’anaqeb’ Josue 6:1–5, 18, 20; 7:11–13.

Josue 23–24

“Sik’omaq ru anajwan ani chi aj-u teeraj k’anjelak.”

• Maare li komon te’ruuq chixyu’aminkil li na’leb’ sa’ Josue 23–24 wi te’xk’oxla naq a’aneb’ laj Israelita li ke’rab’i laj Josue naq kixk’e li na’leb’ a’in sa’ xraqik lix yu’am. Naru nakak’e junjunq li raqal reheb’ re te’ril ru chi ch’anch’o ut chirix a’an taapatz’ reheb’ naq te’xwotz k’a’ru namusiq’ank reheb’ sa’eb’ li raqal a’an chi wank chi tiik chiru li Qaawa’. Naru ajwi’ neke’xwotz chan ru naq neke’xsik’ ru xjuneseb’ rib’ “ani chi aj-u te’raj k’anjelak” (Josue 24:15). K’a’ut naq xe’xsik’ ru a’an?

• Naru nakab’oqeb’ li komon chixsik’b’al ru junaq ch’ol aatin sa’ Josue 23–24 li taamusiq’anq reheb’ chixsik’b’al ru k’anjelak chiru li Dios ut chirix a’an te’xyiib’ xjalam-uuch li te’xk’ut sa’ rochocheb’ malaj sa’eb’ li redes sociales.

Xkawresinkil qib’ jo’ aj k’utunel

Li musiq’ejil k’iik na’uxman sa’ kab’l. Eb’ li komon tento te’xk’ul li musiq’aak naq ink’a’ wankeb’ sa’ li tzoleb’aal re naq kawaqeb’ sa’ musiq’ej. K’e reetal chan ru taawoksi chi chaab’il li hoonal rik’ineb’ re naq taawaklesi xch’ooleb’ chixtawb’aleb’ xmusiq’ejil tzakemq sa’eb’ li loq’laj hu sa’ kab’l, xjuneseb’, ut rik’ineb’ ajwi’ lix junkab’al. (Chi’ilmanq Li k’utuk jo’ li Kolonel, 18.)