Xjalam-uuch li xDebora sa’ xjolomileb’ li teep aj pleet aj Israel, © Lifeway Collection/licensed from goodsalt.com

30 mayo–5 junio

Jueces 2–4; 6–8; 13–16

“Li Qaawa’ kixwaklesi jun aj kolol reheb’ ”

Chiwanq sa’ aach’ool naq li Santil Musiq’ej, a’an laj k’utunel nim xwankil. Chan ru taatenq’aheb’ li komon chi tzole’k xb’aan li Santil Musiq’ej naq yookex chi aatinak chirixeb’ li na’leb’ sa’ li hu Jueces.

Tz’iib’a li nakak’oxla

Xkanab’ankileb’ chi wotzok

Tz’iib’a xk’ab’a’eb’ laj raqol aatin li wankeb’ sa’ Jueces 2–4; 6–8; 13–16 chiru li pizarron (maare xDebora, aj Barak, aj Gideon, ut aj Sanson). K’e xhoonaleb’ li komon chixsik’b’al sa’eb’ li ch’ol a’in jun na’leb’ xe’xtzol chirix jun reheb’ li kristiaan a’in, ut te’xtziib’a rub’el xk’ab’a’.

Xk’utb’al li tzolʼlebʼ

Jueces 2:11–19; 3:5–12; 4:1–16

Naq nokojalb’ehiik, li Qaawa’ naxyeechi’i qakolb’al.

• Xtz’ilb’al rix li po’resink ch’oolej, li rahilal, li jalba-k’a’uxlej, ut li kole’k ke’xk’iilasuti laj Israel naru tixtenq’aheb’ li komon chixk’eeb’al reetal lix wankilal li Dios chixkolb’aleb’ sa’ xyu’ameb’. Sa’ kok’ ch’uut, eb’ li komon naru te’xtz’il rix li na’leb’ a’in sa’ Jueces 2:11–19; 3:5–12. Chan ru naq eb’ li ralal xk’ajol laj Israel ke’kole’ rix chiru li maak ut li rahilal? K’a’ru naqatzol sa’ li hu Jueces chirix xkolb’al qib’ chiru li maak ut li rahilal? Chan ru nokoxkol li Dios? Naru ajwi’ taapatz’ reheb’ li komon naq te’xsik’ ut te’xwotzeb’ li raqal li neke’xch’olob’ naq li Qaawa’, a’an aj Kolol qe ut aj Tojol qix (chi’ilmanq 2 Samuel 22:1–3; Salmos 40:16–17; 1 Nefi 1:19–20; Mosiah 23:21–23; Tzol’leb’ ut Sumwank 138:23).

• Tz’iib’anb’il sa’ Jueces 2:19 naq eb’ laj Israelita ke’xkanab’ li Dios k’iila sut re xloq’oninkileb’ li pak’b’il dios. Eb’ li komon naru te’xye li raqal a’in chi kosb’il ru jo’ jun tijom choq’ reheb’. Chan ru naq wan naq “naqawiq’ib’ qib’ ” chiru “jalanil dios”? Chan ru naq li Qaawa’ naru tooxtenq’a chixjalb’al li “qamaa’usilal”?

• Re aatinak chirix lix kolb’al laj Israel chiruheb’ laj Kanahanita xb’aan xDebora ut laj Barak, naru taapatz’ re jun komon naq tixye chi kosb’il ru li seraq’ a’an (maare taapatz’ re chiru li xamaan re naq truuq tixkawresi rib’ chixwotzb’al). Eb’ li komon naru te’aatinaq chirix junaq xchaab’ilal li xDebora li xwulak chiruheb’. Chan ru naq xDebora kixwaklesi xch’ooleb’ li ralal xk’ajol laj Israel chixtaaqenkil li Qaawa’? Naru teeril Jueces 4:14 ut tex’aatinaq chirix li naraj naxye li raatin xDebora: “Li Qaawa’ a’an aj k’amol b’e chawu.” Chan ru naq aj k’amol b’e chiqu li Qaawa’? (chi’ilmanq ajwi’ Tzol’leb’ ut Sumwank 84:87–88).

Jueces 6–8

Li Qaawa’ naru tixb’aanu li sachb’a-ch’oolej naq naqapaab’ lix na’leb’.

• Li tzolok chirix lix b’oqb’al laj Gideon chi k’anjelak naru tixtenq’aheb’ li komon sa’ xk’anjeleb’. Naru taaye reheb’ naq te’ril ut te’aatinaq chirix Jueces 6:11–16. K’a’ru naqatzol sa’eb’ li raqal a’in? Re xtenq’ankileb’ chixtzolb’al Jueces 7, naru taaye reheb’ wiib’ oxib’ li komon naq a’aneb’ laj pleet sa’ xteep laj Gideon, ut naq te’xye li seraq’ a’ yaal li rilob’aaleb’ laj pleet. Eb’ lix komoneb’ naru te’patz’oq chirix li ke’xk’ul laj pleet. K’a’ru naqil sa’ li seraq’ a’in li chanchan li qayu’am? K’a’ru naqil sa’ li seraq’ a’in li chanchan li nak’ulman sa’ qayu’am?

Jueces 13–16

Nachal qametz’ew rik’in xpaab’ankileb’ li qasumwank rik’in li Dios.

• Chan ru taatenq’aheb’ li komon chixtawb’al li chaab’il na’leb’ jo’ ajwi’ li tijom sa’ li seraq’ chirix laj Sanson? Naru taaye re xyijacheb’ naq te’ril Jueces 14–16 re xsik’b’aleb’ li raqal li neke’xk’ut naq kiwan li Qaawa’ rik’in laj Sanson. Li jun xyijacheb’ chik naru te’xsik’eb’ li raqal li neke’xk’ut naq moko anchal ta xch’ool laj Sanson rik’in li Qaawa’. Patz’ reheb’ li komon naq te’xwotz li k’a’ru xe’xtaw. K’a’ru naxk’ut lix yu’am laj Sanson chiqu chirix xpaab’ankileb’ li qasumwank rik’in li Dios? Li raatin li Hermana Ann M. Dibb sa’ “Xkomon chik li na’leb’ ” naru texxtenq’a.

  

  Laj Sanson naxt’aneb’ li oqech, xb’aan laj James Tissot ut xkomoneb’ chik

Xkomon chik li k’anjeleb’aal

Jun na’leb’ naqatzol rik’in xyu’am laj Sanson.

Li Hermana Ann M. Dibb kixye: “K’a’jo’ naq usilanb’il laj Sanson naq kiyo’la. Kiyehe’ re xna’, “A’an taatikib’anq xkolb’aleb’ laj Israel sa’ ruq’eb’ laj Filistea” [Jueces 13:5]. A’b’an, naq kik’i laj Sanson, ki’ok chixsik’b’al ru li aaleek re li ruchich’och’ chiru lix na’leb’ li Dios. A’an kixsik’ ru li k’a’ru “kiwulak chiru” [Jueces 14:3] ruuchil li k’a’ru tiik ru. Chi k’iilasutinb’il, li loq’laj hu naxye naq “xko’o” [Jueces 14:7], ut a’an naxch’olob’eb’ lix b’eenik ut lix b’aanuhom laj Sanson. Ruuchil xwaklesinkil rib’ ut lemtz’unk sa’ xtz’aqob’resinkil ru li reechanihom, li ruchich’och’ kinumtaak sa’ xb’een laj Sanson, kisach xmetz’ew k’eeb’il re xb’aan li Dios, ut kikam naq toj saaj” (“Levantaos y brillad,” Liahona, mayo 2012, 118).

Xkawresinkil qib’ jo’ aj k’utunel

Kanab’ xhoonalil re te’wotzoq li ani yookeb’ chi tzolok. “Naq eb’ li komon neke’xwotz li k’a’ru neke’xtzol, moko ka’aj ta wi’ neke’reek’a li Musiq’ej ut neke’xkawob’resi lix nawomeb’ xch’ool, neke’xwaklesi aj b’an wi’ xch’ooleb’ lix komoneb’ chixtawb’al li yaal xjuneseb’ rib’. … K’e xhoonaleb’ li komon chi wotzok sa’ li tzolok.” (Li k’utuk jo’ li Kolonel, 30.)