B’ar tatxik laa’at, xb’aan li xSandy Freckleton Gagon

6–12 junio

Rut; 1 Samuel 1–3

“K’a’jo’ naq nasaho’ lin ch’ool rik’in li Qaawa’ ”

Aajel ru naq kawresinb’ilat chi k’utuk, a’b’an k’e reetal naq taak’e ajwi’ xhoonaleb’ li komon chixwotzb’al li na’leb’ xe’xtzol.

Tz’iib’a li nakak’oxla

Xkanab’ankileb’ chi wotzok

Re xtenq’ankileb’ li komon chixwotzb’al li xe’xtzol chiru li xamaan a’in, naru taapatz’ reheb’ naq te’xtz’iib’a chiru pizarron jun aatin xwulak chiruheb’ sa’ Rut 1–4 malaj 1 Samuel 1–3 naq xe’tzolok sa’ junesal malaj sa’ junkab’al. Ilomaq ru junjunq reheb’, ut patz’ reheb’ li komon naq te’xye chan ru naq li aatin a’an xwaklesi xch’ooleb’.

Xk’utb’al li tzolʼlebʼ

Rut; 1 Samuel 1–2

Li Kristo naru tixjal li rahilal choq’ sahilal.

• Us ta jalan jalanq xch’a’ajkilaleb’ li komon sa’ laa tzoleb’aal rik’ineb’ li re xRut ut xAna, naru te’xtaw xna’leb’ rik’in lix b’aanuhomeb’ li ixq a’in sa’ xyi li sachk ut li rahilal. Re xtenq’ankileb’, naru taak’eheb’ li komon sa’ kok’ ch’uut, ut taapatz’ reheb’ naq te’ril jun ch’ol sa’ Rut 1–4 malaj 1 Samuel 1. Chiru li pizarron, nare taatz’iib’aheb’ li patz’om a’in: K’a’ruheb’ lix ch’a’ajkilal xRut ut xAna? Chan ru ke’xk’ut naq neke’xpaab’ li Qaawa’ sa’ xch’a’ajkilaleb’? Eb’ li ch’uut naru te’xsik’ xsumenkileb’ li patz’om a’an ut te’xwotz li na’leb’ neke’xtaw. K’a’ru naqatzol sa’eb’ li seraq’ a’in chirix li naru naxb’aanu li Qaawa’ re qatenq’ankil sa’ li qach’a’ajkilal?

  

  Xintz’aama naq tixk’e we li k’uula’al a’in, xb’aan li xElspeth Young

• Moko chixjunileb’ ta li neke’xtz’aama lix k’uula’al neke’xk’ul, ut moko chixjunileb’ ta li neke’kam xsum aatin neke’sumla wi’chik. A’b’anan, sa’eb’ li qach’a’ajkilal, maak’a’ naxye k’a’ruheb’, naru toojiloq rik’in li Qaawa’ ut taqakawob’resi li qapaab’aal chirix. Naru taapatz’ reheb’ li komon naq te’ril Rut 2:11–12 ut 1 Samuel 1:9–11, ut naq te’xye chan ru naq eb’ lix ch’a’ajkilal xRut ut xAna kixjal xwanjikeb’ rik’in li Qaawa’. Eb’ li komon naru ajwi’ te’xwotz chan ru naq lix paab’aaleb’ a’an xkawob’resiik naq xe’jilok rik’in li Jesukristo sa’ xch’a’ajkilaleb’.

  Re xtenq’ankileb’, naq maji’ textzoloq, naru taapatz’ re wiib’ oxib’ naq te’xkawresi rib’ chixwotzb’al li na’leb’ li wan sa’ jun reheb’ a’in: li raatin li Hermana Reyna I. Aburto, “Saʼ choql ut saʼ saqen, chatwanq wikʼin!” (Jolomil ch’utub’aj-ib’ re octubre 2019); li raqal “Li sahil ch’oolejil naq nokoq’axok u rik’in li Kristo” sa’ li raatin li Elder D. Todd Christofferson “Lix sahileb’ xch’ool laj santil paab’anel” (Jolomil ch’utub’aj-ib’ re octubre 2019); malaj li raatin li Awa’b’ej Elaine S. Dalton sa’ “Xkomon chik li k’anjeleb’aal.” Patz’ reheb’ li komon naq te’xwotz k’a’ru xe’xtzol chirix xkanab’ankil naq eb’ li qach’a’ajkilal te’xnimob’resi li qapaab’aal chirix li Jesukristo.

1 Samuel 2:18–36; 3

Tento taqab’i ut taqapaab’ lix yaab’ xkux li Qaawa’.

• Maare wankeb’ li komon, jo’ laj Samuel, li xe’rab’i xyaab’ xkux li Qaawa’ a’b’an moko xe’xnaw ta naq re a’an. Naru taapatz’ reheb’ li komon naq te’ril 1 Samuel 3, ut te’xk’e reetal k’a’ru kixb’aanu laj Samuel li naru tooxtenq’a chirab’inkil ut chixpaab’ankil lix yaab’ xkux li Qaawa’. Naru ajwi’ taapatz’ re wiib’ li komon naq te’xk’utb’esi li xe’xye chirib’il rib’ laj Samuel ut laj Eli.

• Wan naq naqak’ul li kixk’ul laj Eli—naru taqatenq’a li qas qiitz’in chixk’eeb’al reetal lix yaab’ xkux li Qaawa’. Eb’ li komon naru te’xwotz chan ru ak xe’xb’aanu a’in choq’ reheb’ li ramiiw, li rech alal, malaj anihaq chik. Ma wankeb’ raqal sa’ li loq’laj hu malaj na’leb’ li xqawotz re xtenq’ankileb’ li qas qiitz’in chixtawb’al ru chan ru naq li Qaawa’ na’aatinak qik’in? (chi’ilmanq, Tzol’leb’ ut Sumwank 6:22–23; 8:2–3; 9:7–9).

Xkomon chik li k’anjeleb’aal

Maajo’q’e wanko qajunes.

Li Awa’b’ej Elaine S. Dalton kixye:

“Sa’ xb’ehil li qayu’am, wan naq noko’ok sa’ jun b’e maak’a’ sa’ qach’ool. Wankeb’ k’iila b’ach’al b’e li moko naru ta naqoyb’eni. A’b’an sa’ li junjunq b’ach’al b’e a’an naru taqasik’ ru k’a’ru taqab’aanu ut b’ar tooxik. Li ch’a’ajkilal naru tooxtenq’a chi jilok rik’in li Kolonel ut chixpaab’ankil chik. Naq nach’ wanko rik’in a’an wulaj wulaj, nokowulak jo’ li Kristo. …

“Jo’ xRut ut xAna, chiqajunilo wan qach’a’ajkilal. Maare ink’a’ junelik naqataw ru li rajom li Qaawa’ choq’ re li qayu’am, a’b’an ninnaw naq maajo’q’e wanko qajunes. Junelik wan a’an qik’in, ut a’an naxye qe, “Inkʼaʼ naru nekeril rikʼin ruchichʼochʼil xnaqʼ eeru, saʼ li kutan aʼin, lix kʼoxlahom lee Dios chirix li kʼaʼaq re ru aʼan li taachalq moqon, ut li loqʼalil li taawanq chirix xnumsinkil naabʼal li rahilal” [Tzol’leb’ ut Sumwank 58:3]” (“Lessons from Ruth and Hannah,” Ensign, abril 2006, 35, 37).

Chi’ilmanq ajwi’ Jwan 14:18; Alma 38:5.

Xkawresinkil qib’ jo’ aj k’utunel

Us ajwi’ xyeeb’al “ink’a’ ninnaw.” Us ta tento taayal aaq’e chixsumenkil xpatz’omeb’ li komon, li Qaawa’ naxnaw naq ink’a’ nakanaw chixjunil li k’a’aq re ru. Naq wan li k’a’ru ink’a’ nakanaw, ye a’an ut wotz xnawom aach’ool chirix li k’a’ru nakanaw. (Chi’ilmanq 1 Nefi 11:16–17; Li k’utuk jo’ li Kolonel, 24.)