Laj David sa’ xb’een li k’ojarib’aal, xb’aan laj Jerry Miles Harston

20–26 junio

2 Samuel 5–7; 11–12; 1 Reyes 3; 8; 11

“Laa k’ojarib’aal k’ojk’ooq sa’ xna’aj chi junelik”

Naq nakawil li loq’laj hu, tijon re xnawb’al b’arwan reheb’ li na’leb’ jwal nim xwankil choq’ reheb’ li komon sa’ laa tzoleb’aal, re naq taakawresi a’an.

Tz’iib’a li nakak’oxla

Xkanab’ankileb’ chi wotzok

Re xnawb’al k’a’ru xwulak chiruheb’ li komon naq xe’xtzol li loq’laj hu, naru taapatz’ reheb’ naq te’xtz’iib’a chiru kok’ hu li rajlil jun raqal li xtoch’ xch’ooleb’, toja’ naq te’xk’e sa’ jun li sek’. Chirix a’an, naru te’xxok wiib’ oxib’ li hu sa’ li sek’, ut te’ril ru ut te’aatinaq chirixeb’ li raqal.

Xk’utb’al li tzolʼlebʼ

2 Samuel 6:1–8

Tento taqab’aanu xk’anjel li Dios a’ yaal jo’ naraj a’an.

• Naru taapatz’ reheb’ li komon naq te’ril 2 Samuel 6:1–8 ut te’xk’e reetal li k’a’ru naxk’e qatijb’al sa’ li kutankil a’in. Li raatin laj Brigham Young sa’ “Xkomon chik li k’anjeleb’aal” naru texxtenq’a. Chan ru naq maare taqayal xb’aanunkil lix k’anjel li Dios chi jalan rik’in li ak xb’eresihom? K’a’ut naq ink’a’ us a’in? Eb’ li komon naru te’xwotz chan ru xe’xtzol xpaab’ankil lix b’eresihom li Qaawa’ re xb’aanunkil lix k’anjel.

2 Samuel 11

Junelik tento taqil qib’ chiru li maak.

• Xtawb’al qana’leb’ rik’in li ink’a’ us kixb’aanu laj David sa’ 2 Samuel 11 naru tooxtenq’a re naq ink’a’ taqab’aanu ajwi’. Naru teeril 2 Samuel 11:1–17 ut teek’e retal li kixsik’ ru xb’aanunkil laj David li kixk’e chi maakob’k. K’a’ raj ru kiru chixb’aanunkil ruuchil a’an? Naru taapatz’ reheb’ li komon naq te’xtz’iib’a jun ch’ol aatin li truuq tixtenq’a junaq chixtz’eqtaanankil li maak, a’ yaal li xe’xtzol sa’ 2 Samuel 11. Patz’ re wiib’ oxib’ li komon naq te’xwotz li na’leb’ xe’xtz’iib’a.

• Naru taawoksi 2 Samuel 11 re aatinak chirix li xiwxiw li nachal rik’in li pornografia ut xkomon chik li maak chirix li qajunxaqalil. Re xb’aanunkil a’an, naru teeril jun raqal re li raatin li Elder L. Whitney Clayton “Bienaventurados son todos los de corazón puro” (Liahona, Nov. 2007, 51–53). K’a’ru naxye li Elder Clayton chirix li xiwxiw li nachal rik’in li pornografia? Naru ajwi’ teeril li video “Volcar la mirada” (ChurchofJesusChrist.org). Chan ru naq li Kolonel naru tooxtenq’a chi numtaak sa’ xb’een li aaleek ut li na’leb’ a’in?

  Eb’ li komon naru te’xye chan ru naq neke’xkol rix xjunkab’aleb’ chiru li pornografia malaj neke’xtenq’aheb’ chixkanab’ankil. Naru natenq’an li raatin li Hermana Linda S. Reeves “Chanru xkolb’al qib’ chirix li tz’aj aj na’leb’: Jun junkab’al sa’ xsutam li Kristo” (Jolomil ch’utub’aj-ib’ re abril 2014; chi’ilmanq ajwi’ “Xkomon chik li k’anjeleb’aal”).

Li santil ochoch, a’an rochoch li Qaawa’.

1 Reyes 8:22–61

Li santil ochoch naxk’e li osob’tesink.

• Yeeb’il sa’ 1 Reyes 8 k’a’ruheb’ li osob’tesink kixsik’ laj Salomon choq’ re lix tenamit naq kichoyman xkab’lankil li santil ochoch. Naru taajek’iheb’ li raqal 22–61 chiruheb’ li komon, ut taapatz’ reheb’ naq te’xwotz k’a’ru neke’xtaw li naxwaklesi xch’ooleb’ chi loq’onink sa’ li santil ochoch. Eb’ li komon naru te’xye chan ru naq li loq’onink sa’ li rochoch li Qaawa’ narosob’tesi xyu’ameb’.

1 Reyes 8:61; 11:1–11

“Lix ch’ool moko kiwan ta junes choq’ re li Qaawa’.”

• K’a’ru naraj naxye naq “wan li qach’ool … junes choq’ re li Qaawa’ ”? (1 Reyes 8:61). Ma jalan a’an rik’in xb’aanunkil chixjunil chi tz’aqal re ru? Chan ru? Naq eb’ li komon yookeb’ chixk’oxlankileb’ li patz’om a’in, naru te’ril 1 Reyes 11:1–11 ut te’xk’e reetal k’a’ru naxye li Qaawa’ chirix lix ch’ool laj Salomon. Chan ru naq ink’a’ taqab’aanu li kixb’aanu a’an?

Xkomon chik li k’anjeleb’aal

Xtiikob’resinkil li kaax.

Li Awa’b’ej Brigham Young kixye: “Chakanab’ xjunes li Awa’b’ejihom, li Qaawa’ naxtiikob’resi li kaax; ut wi na’eek’an, ut chanchan naq t’ane’k re, wi ink’a’ tiik naxik ut chanchan naq t’ane’k re, maaye’ laa wuq’ re xtiikob’resinkil; miqakut qib’ sa’ li k’a’ru moko qe ta laa’o; chakanab’ b’an, a’an xk’anjel li Qaawa’ ” (Discourses of Brigham Young, sel. John A. Widtsoe [1954], 66).

Xkolb’al rix li junkab’al chiru li pornografia.

Li Hermana Linda S. Reeves kixye: “Chan ru taqakoleb’rix li qakok’al ut li qasaaj? Wankatqeb’ k’anjeleb’aal re xtz’ilb’al rix esil sa’eb’ qach’iich’, a’b’an li jwal chaab’il tz’ilok-ix sa’ li ruchich’och’, li jun ajwi’ ut toj sa’ xraqik nak’anjelak, a’an lix tz’ilb’al qix sa’ junqal li nachal rik’in lix nawom qach’ool chirix lix rahom li qaChoxahil Yuwa’ ut lix mayej li Kolonel re xtojb’al rix li qamaak” (“Chanru xkolb’al qib’ chirix li tz’aj aj na’leb’: Jun junkab’al sa’ xsutam li Kristo,” Jolomil ch’utub’aj-ib’ re abril 2014; chi’ilmanq ajwi’ Joy D. Jones, “Cómo tratar el tema de la pornografía: proteger, responder y sanar,” Liahona, octubre 2019, 37–41).

Xkawresinkil qib’ jo’ aj k’utunel

Kʼe reetal naq taakʼut li yaalil tzolʼlebʼ. “Junelik taapatzʼ aawibʼ, “Chan ru naq li kʼaʼru yookin chixkʼutbʼal tixtenqʼahebʼ li komon saʼ lin tzolebʼaal chixnimobʼresinkil lix paabʼaal chirix li Kristo, chixjalbʼalebʼ xkʼaʼuxl, chixbʼaanunkil ut chixpaabʼankil li sumwank rikʼin li Dios, ut chixkʼulbʼal li Santil Musiqʼej?” ” (Li k’utuk jo’ li Kolonel, 20).